Eitem ar yr agenda

I ystyried adroddiad gan y Cynghorydd Mark Young, Aelod Arweiniol ar gyfer Cynllunio, Gwarchod y Cyhoedd a Chymunedau Mwy Diogel (copi’n amgaeedig) yn ceisio cymeradwyaeth y Cabinet o’r diwygiadau i ddirprwyo awdurdod i Bennaeth Cynllunio, Gwarchod y Cyhoedd a Gwasanaethau Cefn Gwlad i fynd i mewn i gytundeb.

Pleidlais: 7 o blaid, 0 yn erbyn, 0 ymataliad

PENDERFYNWYD bod y Cabinet yn dirprwyo awdurdod i’r Pennaeth Cynllunio, Diogelu’r Cyhoedd a Gwasanaethau Cefn Gwlad yn dilyn ymgynghoriad â’r Aelod Arweiniol dros Gynllunio, Diogelu’r Cyhoedd a Gwasanaethau Cefn Gwlad, y Swyddog a151 a’r Swyddog Monitro i gytuno a llofnodi’r Cytundeb Rhyng-Awdurdod i sicrhau bod y Cyngor yn cefnogi’r strategaeth gydlynol genedlaethol a rhanbarthol i gyfyngu ar ledaeniad Covid-19.

Cyflwynodd y Cynghorydd Mark Young adroddiad yn ceisio cymeradwyaeth y Cabinet i ddirprwyo awdurdod i Bennaeth Cynllunio, Gwarchod y Cyhoedd a Gwasanaeth Cefn Gwlad i ymrwymo i Gytundeb Rhyng-Awdurdod gydag awdurdodau lleol eraill Gogledd Cymru i reoli’r broses o recriwtio a rheoli staff ychwanegol i weithredu elfen olrhain cysylltiadau o brosiect Profi, Olrhain a Diogelu.

Ym mis Mai 2020 cyhoeddodd Llywodraeth Cymru strategaeth genedlaethol oedd yn cynnwys gofyniad i dracio ac olrhain lledaeniad Covid-19 yng Nghymru. Fel rhan o’r strategaeth honno, fe sefydlodd awdurdodau lleol Gogledd Cymru dimau olrhain cysylltiadau gyda staff oedd wedi’u hadleoli.  Wrth i fwy o wasanaethau’r Cynghorau ailddechrau byddai'r staff yna angen dychwelyd i'w dyletswydd arferol a byddai staffio'r timau olrhain cysylltiadau yn fater hanfodol. Roedd Llywodraeth Cymru wedi cymeradwyo £11.2m o gyllid ar gyfer y prosiect yng ngogledd Cymru ar gyfer gweddill y flwyddyn ariannol.  Cynigiwyd bod Cyngor Sir y Fflint yn cydlynu’r gwaith o recriwtio a rheoli staff ar gyfer y prosiect ar ran holl awdurdodau lleol gogledd Cymru, ac y byddai’r trefniadau llywodraethu’n cael eu nodi mewn Cytundeb Rhyng-Awdurdod.  Roedd rhagor o fanylion yn cynnwys manteision y dull a gweithrediad y prosiect wedi cael eu darparu yn yr adroddiad.

Tynnodd y Cabinet sylw at bwysigrwydd y prosiect Profi, Olrhain a Diogelu er mwyn atal lledaeniad Covid-19 ar y cyd â rhaglen brofi effeithiol, a mynegwyd rhywfaint o rwystredigaeth dros yr amser aros i gael prawf a'r canlyniad. O ran adnabod ardaloedd risg uchel a strategaeth yn y dyfodol, fe soniodd y Prif Weithredwr am ganlyniad y dadansoddiad ar ôl y don gyntaf o Covid-19 gyda’r mwyafrif o’r rhai a gafodd eu heffeithio yn gysylltiedig â’r sectorau iechyd a gofal cymdeithasol.  Roedd nifer o feysydd risg uchel a grwpiau diamddiffyn wedi cael eu hadnabod ac roedd llawer o waith yn mynd rhagddo ar draws Bwrdd Iechyd Prifysgol Betsi Cadwaladr a Grŵp Adfer Iechyd a Gofal Cymdeithasol er mwyn ymateb i’r ffactorau hynny, dadansoddi data ymhellach a rheoli’r risgiau wrth fynd ymlaen. Roedd ffliw tymhorol yn bryder hefyd o ystyried y pwysau ychwanegol ar systemau iechyd a gofal cymdeithasol ac fe fyddai yna ymgyrch weithredol i gynnig a hyrwyddo brechiad y ffliw gyda’r nod o leihau’r pwysau hwnnw ar draws y system.

Roedd yr Arweinydd yn croesawu dyraniad cyllid Llywodraeth Cymru ar gyfer y prosiect ar draws y rhanbarth gan obeithio y byddai'n ddigonol. Roedd yn awyddus i dynnu sylw at bwysigrwydd cyfathrebu a hyrwyddo prosiect Profi, Olrhain a Diogelu ac i sicrhau fod y rhai oedd yn cael eu holrhain yn gwrando ar y cyngor ac yn ymateb yn gyflym ac yn gadarnhaol. Roedd y Pennaeth Cynllunio, Gwarchod y Cyhoedd a Gwasanaethu Cefn Gwlad yn cytuno y byddai cynllun cyfathrebu effeithiol yn hanfodol ac fe soniodd am gyhoeddi astudiaethau achos ar unigolion sy'n gweithio fel swyddogion olrhain cysylltiadau er mwyn hyrwyddo'r mater a thynnu sylw at ei bwysigrwydd; fe fyddai yna gynllun cyfathrebu rhanbarthol.  Fe soniodd hefyd am elfen ‘Diogelu’ y prosiect gan ddweud fod ei wasanaeth yn gweithio’n agos gyda busnesau o ran gwaith atal sydd yn parhau i fod yn ffocws allweddol ar draws gwasanaethau awdurdodau lleol eraill.  Fe soniodd y Cynghorydd Mark Young am lwyddiant prosiect Profi, Olrhain a Diogelu yn Sir Ddinbych hyd yn hyn, ond dywedodd bod rhagor o waith yn mynd rhagddo er mwyn canfod pa gefnogaeth fyddai ar gael i fusnesau oedd wedi’u heffeithio’n wael yn rhan o’r broses honno.

PENDERFYNWYD bod y Cabinet y dirprwyo awdurdod i’r Pennaeth Cynllunio, Diogelu’r Cyhoedd a Gwasanaethau Cefn Gwlad yn dilyn ymgynghoriad â’r Aelod Arweiniol dros Gynllunio, Diogelu’r Cyhoedd a Gwasanaethau Cefn Gwlad, y Swyddog a151 a’r Swyddog Monitro i gytuno a llofnodi’r Cytundeb Rhyng-Awdurdod i sicrhau bod y Cyngor yn cefnogi’r strategaeth gydlynol genedlaethol a rhanbarthol i gyfyngu ar ledaeniad Covid-19.