Eitem ar yr agenda
YMATEB CYNGOR SIR DDINBYCH I’R CORONAFEIRWS
Ystyried
adroddiad gan y Cynghorydd Hugh Evans, Arweinydd ac Aelod Arweiniol yr Economi
a Llywodraethu Corfforaethol (copi wedi’i amgáu) yn diweddaru’r Cabinet am
reoli effeithiau pandemig y Coronafeirws yn Sir Ddinbych a gogledd Cymru, a
cheisio cymeradwyaeth ar y broses i reoli’r adferiad.
Penderfyniad:
Pleidleisiwyd: 8 o
blaid, 0 yn erbyn, 0 yn ymatal
PENDERFYNWYD bod
y Cabinet yn nodi cynnwys yr adroddiad, cefnogi’r camau a gymerwyd a chytuno ar
y camau nesaf fel y nodwyd o fewn yr adroddiad.
Cofnodion:
Cyflwynodd
y Cynghorydd Hugh Evans adroddiad yn diweddaru’r Cabinet ynglŷn ag effaith
pandemig y Coronafeirws ar Sir Ddinbych a gogledd Cymru, ac roedd yn ceisio
cytundeb ar y broses i reoli’r adferiad sydd wedi’i nodi yn yr adroddiad.
Tynnodd
yr Arweinydd sylw at y dull unedig ac arloesol a gymerwyd wrth ymateb i’r
Coronafeirws. Rhoddodd deyrnged i bawb sydd
wedi bod yn cydweithio tra’n wynebu heriau anodd er mwyn cyflawni’r canlyniadau
gorau, addasu trefniadau democrataidd a llywodraethu, a sicrhau penderfyniadau cyflym ac ymatebion
amserol i gyhoeddiadau gweinidogol. Gan
edrych ymlaen tuag at adferiad, cynigiwyd nifer o themâu eang ynghyd â mesurau
i sicrhau ymgysylltiad aelodau wrth ffurfio a chyflwyno’r cynllun adferiad ac
ailsefydlu prosesau democrataidd mwy arferol megis craffu.
Rhoddodd y Prif Weithredwr deyrnged hefyd i staff ac aelodau am eu
gwaith a’u cefnogaeth ddiweddar. Fe aeth drwy’r adroddiad
gyda’r aelodau fel a ganlyn -
·
amlinellodd drefniadau
cynllunio rhag argyfwng a rôl y Tîm Rheoli Argyfwng Strategol wrth fynd i’r
afael â materion strategol a gweithredol a datblygu gwasanaethau a dulliau
newydd o gyflwyno gwasanaethau
·
fe soniodd am yr ymateb
rhanbarthol sy’n cael ei oruchwylio gan y Grŵp Cydgysylltu Strategol
·
dywedodd fod natur y pandemig yn
golygu fod y cyfnod ymateb yn debygol o barhau am gryn amser ochr yn ochr â’r
cyfnod adferiad
·
fe eglurodd y byddai’r cyfnod
adferiad yn golygu ailddechrau gwasanaethau’n ddiogel a chydweithio’n
rhanbarthol wrth gynllunio adferiad effaith Covid-19 yn y dyfodol
·
cynigiodd y byddai
llywodraethu mewnol ynglŷn ag adferiad yn canolbwyntio ar nifer o brif
themâu a byddai gan bob un swyddog arweiniol ac aelod arweiniol dynodedig
·
cadarnhaodd y byddai’r broses
adferiad yn rhanbarthol yn cael ei harwain gan Grŵp Cydlynu Adferiad aml
asiantaeth a fyddai’n ymdrin â themâu rhanbarthol allweddol, a
·
rhoddodd fanylion am effaith
ariannol Covid-19 oedd eisoes yn sylweddol, a chadarnhaodd y byddai newyddion
diweddaraf yn cael ei roi i aelodau’n rheolaidd.
Cyfeiriodd
y Cynghorydd Richard Mainon at ei adroddiad i Arweinwyr Grwpiau (Atodiad 3 yr
adroddiad) oedd yn manylu ar drefniadau dros dro i gynnwys aelodau ehangach y
Cyngor yn yr ymateb adferiad, gyda phwyslais ar gynhwysiant, gan ystyried yr
angen am her effeithiol a phenderfyniadau cyflym ac effeithlon. Roedd yr ymateb i’r cynigion wedi bod yn galonogol
ac wedi’u derbyn yn gadarnhaol gan aelodau ac Arweinwyr Grwpiau wrth iddynt
weithio gyda’u gilydd ac yn hyblyg i fynd i’r afael ag amgylchiadau gwahanol
a’r angen am benderfyniadau ar frys.
Codwyd
y pwyntiau canlynol yn ystod y drafodaeth a ddilynodd -
·
Fe dynnodd y Cynghorydd Bobby
Feeley sylw at waith gwerthfawr Denbighshire Leisure Limited (DLL) yn ystod y cyfnod
clo, yn cynnwys adleoli staff i helpu meysydd gwasanaeth eraill, a rhoddodd
deyrnged i’w gwaith caled yn ystod yr amser anodd yma i’r gwasanaeth. Roedd y Cabinet yn cydnabod ac yn gwerthfawrogi y
rôl roedd DLL wedi’i chwarae.
·
Diolchodd y Cynghorydd Mark
Young i’r staff o adran Cynllunio a Gwarchod y Cyhoedd am eu holl waith caled,
ymroddiad a phroffesiynoldeb wrth gynnal Rhaglen Profi, Olrhain a Diogelu a’u
dyletswyddau eraill. Roedd y cyngor a
chymorth gwerthfawr a ddarparwyd eisoes wedi cael ei gydnabod yn rhanbarthol yn
eu hymateb i'r clwstwr o achosion ar Ynys Môn ac yn Wrecsam. O ystyried pwysigrwydd amlwg y Rhaglen Profi,
Olrhain a Diogelu, gofynnodd am ymrwymiad i helpu sicrhau cyllid digonol er
mwyn i'r adran barhau â'r gwaith. Roedd
yr Arweinydd yn cydnabod rôl holl bwysig y Rhaglen Profi, Olrhain a Diogelu a
mynegodd ei werthfawrogiad am waith y swyddogion oedd yn ogystal â’u
dyletswyddau arferol. O
ystyried ansicrwydd yn y dyfodol o ran yr adnoddau angenrheidiol a’r effaith
posibl ar wasanaethau eraill mae'n debygol y bydd heriau wrth gyflwyno'r
flaenoriaeth ranbarthol honno. Dywedodd
y Prif Weithredwr fod y grŵp rhanbarthol wedi ail werthuso’r lefel o
gyllid oedd ei angen ar gyfer y Rhaglen POD i ddarparu staff ychwanegol dros
gontract o ddeunaw mis a ddylai alluogi staff presennol i ddychwelyd i’w swyddi
arferol dros amser. Yn sgil ansicrwydd yn y
dyfodol byddai’r sefyllfa’n cael ei monitro’n agos. Mynegodd y Cynghorydd Bobby
Feeley ei siom nad oedd Iechyd Cyhoeddus Cymru wedi dechrau’r Rhaglen POD yn
gynt.
·
Rhoddodd y Cynghorydd Huw
Hilditch-Roberts deyrnged i’r holl staff oedd wedi mynd y tu hwnt i’w
dyletswyddau arferol i gefnogi preswylwyr, yn enwedig rheini ar y rheng flaen. Fel Aelod Arweiniol Addysg diolchodd i staff am
eu hymdrechion i’w gwneud hi’n bosibl i ailagor ysgolion dros y tair wythnos
nesaf a'r manteision a fyddai’n dod yn sgil hynny. Wrth
ystyried yr ymateb adferiad a chyfranogiad aelodau, mynegodd bryder nad oedd
nifer o brosiectau diweddar a grëwyd yn sgil Covid-19, wedi bod yn destun i'r
un broses ddemocrataidd a’r lefel o graffu. Cyfeiriodd at y cyllid a
gafwyd trwy’r Gronfa Ymateb i Covid Cludiant Cynaliadwy Lleol fel enghraifft.
Roedd yr Arweinydd yn derbyn ei bwynt ac eglurodd y bu’n rhaid i’r Cyngor
ymateb yn gyflym iawn i ddatganiadau gweinidogol er mwyn sicrhau cyllid ar gyfer prosiectau
Covid penodol o ganlyniad i’r amgylchiadau presennol. O
ystyried yr amgylchiadau hynny a’r angen am benderfyniadau cyflym, nid oedd
digon o amser i fynd drwy'r prosesau arferol wrth graffu ar effeithiolrwydd,
derbyniwyd hefyd y gallai’r dull yma achosi problemau mewn rhai achosion, ond
mewn amgylchiadau eraill gallai fod yn effeithiol iawn megis cyllid grant
busnes. Gan ymateb yn benodol i’r
cyllid Cludiant Cynaliadwy Lleol a sicrhawyd roedd y Cynghorydd Brian Jones
wedi cefnogi'r prosiect gan ddweud sut y mynegwyd rhai o gynigion y prosiect
gydag aelodau lleol, yn bennaf trwy'r Grwpiau Ardal yr Aelodau, ynghyd ag
ymgysylltu â’r gymuned fusnes ehangach. Cadarnhaodd aelodau eraill natur a chanlyniad yr
ymgynghoriadau ar y cynigion yn eu hardaloedd lleol
·
Cyfeiriodd
y Cynghorydd Graham Timms at yr agenda argyfwng hinsawdd ac ecolegol ac roedd
yn gobeithio y byddai yna rywfaint o ddarpariaeth ar gyfer hynny yn y cynllun
adferiad. Roedd yr Arweinydd a’r Prif Weithredwr yn cydnabod bod addasu i
ffyrdd gwahanol o weithio o ganlyniad i’r pandemig wedi darparu cyfleoedd i
ddatblygu'r agenda hwnnw, gydag effaith gadarnhaol ar leihau carbon, a fyddai'n
cael ei sefydlu mewn ymarfer yn y dyfodol
Byddai monitro allyriadau carbon a gweithio i gyrraedd y targedau hynny
yn cael ei gynnal trwy’r broses adferiad.
·
gan
ymateb i gais y Cynghorydd Martyn Holland am ddata ar fannau problemus o
Coronafeirws yng ngogledd Cymru, cadarnhaodd y Prif Weithredwr eu bod wedi
derbyn rhywfaint o newyddion gan Fwrdd Iechyd Prifysgol Betsi Cadwaladr y bore
hwnnw, byddai’n ei drafod gyda'r Aelod Arweiniol cyn dosbarthu nodyn briffio
i’r holl aelodau wedyn.
PENDERFYNWYD bod
y Cabinet yn nodi cynnwys yr adroddiad, yn cefnogi’r camau gweithredu sydd wedi
eu cymryd ac yn cytuno ar y camau nesaf a nodir yn yr adroddiad.
Dogfennau ategol:
- DCC CORONAVIRUS REPORT, Eitem 5. PDF 241 KB
- DCC CORONAVIRUS REPORT - APP 1, Eitem 5. PDF 97 KB
- DCC CORONAVIRUS REPORT - APP 2, Eitem 5. PDF 91 KB
- DCC CORONAVIRUS REPORT - APP 3, Eitem 5. PDF 139 KB