Eitem ar yr agenda
STRATEGAETH ARWYDDION TWRISTIAETH AR GYFER SIR DDINBYCH
Ystyried adroddiad
(copi ynghlwm) gan y Rheolwr Traffig, Parcio a Diogelwch ar y Ffyrdd sy’n
ceisio sylwadau’r Pwyllgor ar ddatblygu Strategaeth Arwyddion Twristiaeth ar
gyfer Sir Ddinbych, ac yn rhoi’r wybodaeth ddiweddaraf i aelodau ar y
cynlluniau arwyddion twristiaeth presennol.
11.30am – 12pm
Cofnodion:
Roedd yr Arweinydd, Cynghorydd Hugh Evans, Rheolwr
Parcio a Diogelwch ar y Ffyrdd, Mike Jones a’r Arweinydd Tîm – Twristiaeth,
Marchnata a Digwyddiadau a Peter McDermott yn bresennol ar gyfer yr eitem hon.
Cyflwynodd yr Arweinydd, Cynghorydd Hugh Evans yr
adroddiad (a ddosbarthwyd eisoes) i ddarparu gwybodaeth ynglŷn â
datblygu’r Strategaeth Arwyddion Twristiaeth, gan gynnwys adroddiad cynnydd ar
gynlluniau parhaus arwyddion twristiaeth.
Clywodd aelodau bod yr adroddiad yn amlygu’r angen
i fynd i’r afael ag Arwyddion Twristiaeth yn Sir Ddinbych. Mae twristiaeth yn
bwysig iawn i Sir Ddinbych ac mae swyddogion wedi buddsoddi llawer iawn o amser
a gwaith ynddo. Amlygwyd bod yr adroddiad wedi dyddio gan fod y gyllid a oedd
yn weddill ar gyfer arwyddion Dyffryn Clwyd i’w gosod ar yr A55 wedi cael eu
cytuno gan y Grŵp Buddsoddi Strategol. Croesawodd yr Arweinydd sefydlu
gweithgor i ddatblygu Strategaeth Arwyddion Twristiaeth dilynol gyda’r bwriad o
gyfeirio twristiaid at bob rhan o’r sir. Codwyd pryderon ynglŷn â chyllid
ar gyfer y strategaeth, a fyddai disgwyliadau uchel yn gyraeddadwy gan y sector
preifat ac a fyddai’r strategaeth yn gydnaws â Ffordd Cymru?
Rhoddodd y Rheolwr Traffig, Parcio a Diogelwch ar y
Ffyrdd esboniad i’r pwyllgor o gylch gorchwyl y Gweithgor. Roedd aelodau o bob
un o’r grwpiau ardal wedi cael eu gwahodd i fynychu’r grŵp. Bwriad y
grŵp oedd goruchwylio datblygiad y Strategaeth Arwyddion Twristiaeth.
Byddai pump amcan arfaethedig y strategaeth, a amlinellir yn yr adroddiad, yn
cael eu monitro gan y Gweithgor.
Rhoddwyd trosolwg o Ffordd Cymru i Aelodau gan yr
Arweinydd Tîm – Twristiaeth, Marchnata a Digwyddiadau. Cadarnhawyd bod Sir
Ddinbych yn gynwysedig yn Ffordd Gogledd Cymru ynghyd â phob Awdurdod arall yn
y Gogledd. Rhoddwyd pwyslais ar bwysigrwydd gweithio mewn partneriaeth gydag
awdurdodau eraill. Roedd Cymru a’i hatyniadau yn cael eu hyrwyddo trwy
wybodaeth Ffordd Cymru er mwyn annog twristiaid i ymweld â Chymru.
Cafwyd trafodaethau ynglŷn â’r arwyddion o’r
A55 tuag at y Rhyl. Cadarnhaodd y Rheolwr Traffig, Parcio a Diogelwch ar y
Ffyrdd bod swyddogion wedi bod yn archwilio nifer o opsiynau. Esboniwyd bod
nifer o gwynion wedi’u derbyn gan drigolion Dyserth ynglŷn â thraffig.
Cytunodd swyddogion y byddai arwyddion ar gyfer y Rhyl o Gyffordd 31 yn cynyddu
traffig sy’n pasio trwy Dyserth gan arwain at gynnydd mewn cwynion. Esboniwyd
bod swyddogion wedi edrych ar ddatrysiadau eraill. Bydd yr arwyddion newydd
arfaethedig yn caniatáu i’r cyhoedd gyrraedd cyrchfan ac yna mynd ymlaen i
atyniad twristiaid.
Nid oedd arwyddion ar gyfer pwyntiau gwefru mewn
meysydd parcio wedi cael eu cynnwys yn nyluniad yr arwyddion twristiaid newydd,
cadarnhaodd y Rheolwr Traffig, Parcio a Diogelwch ar y Ffyrdd y gallai hynny
fod yn bwnc trafod yn y dyfodol. Roedd gorsafoedd gwefru ar gyfer ‘Smart Cars’
yn cael eu cefnogi gan dechnoleg ‘Smart’ a oedd yn cynnwys mapiau gorsafoedd
gwefru, teimlwyd bod hynny’n ddigonol ar gyfer y galw presennol.
Cadarnhawyd mai dim ond newydd gymeradwyo'r cyllid
oedd y Cyngor. Clywodd aelodau nad oedd yr hysbysiad o gymeradwyaeth wedi cael
ei drafod gyda Chynghorau Tref, Dinas a Chymuned hyd yma. Byddai’r Cyngor yn
cyfathrebu gyda Llywodraeth Cymru ynglŷn ag amserlenni gwaith er mwyn cael
amserlen mewn lle erbyn haf 2020.
Datganodd y Cadeirydd bod y gefnffordd yn mynd trwy
nifer o wardiau lleol, awgrymwyd y dylai Asiantaeth Cefnffyrdd Gogledd a
Chanolbarth Cymru fod yn rhan o’r Gweithgor ynghyd â’r aelodau. Pwysleisiwyd pa mor bwysig yw bod y gweithgor
yn archwilio pryderon aelodau gan gynnwys cyllid a chyllidebau.
Cefnogodd yr Arweinydd y gallai’r gweithgor edrych
ar yr awgrym o ddefnyddio symbolau ar arwyddion twristiaid o’r Gefnffordd.
Gellid anfon llythyr at Lywodraeth Cymru yn gofyn i’r polisi gael ei adolygu er
mwyn hyrwyddo trefi sy’n bellach i ffwrdd o’r gefnffordd.
Roedd aelodau yn falch o weld lluniau o Sir
Ddinbych yn cael eu cynnwys yn nogfen Ffordd Gogledd Cymru. Cadarnhawyd y
byddai mwy o wybodaeth ac atyniadau twristiaid Sir Ddinbych yn cael eu hyrwyddo
ar-lein ac mewn dogfennau pellach.
Ar
ddiwedd trafodaeth y Pwyllgor:
Penderfynwyd:
(i)
yn amodol ar yr
arsylliadau uchod, cefnogi parhad y gwaith i ddatblygu'r Strategaeth Arwyddion
Twristiaeth, gan gynnwys estyn gwahoddiad i gynrychiolwyr o Asiantaeth
Cefnffyrdd Gogledd a Chanolbarth Cymru i gyfrannu at ddatblygu’r Strategaeth
pan fyddai’r Gweithgor yn ystyried hynny’n briodol; a
(ii)
derbyn drafft terfynol
o’r Strategaeth Dwristiaeth ar ddiwedd 2020 / dechrau 2021 i’w harchwilio cyn
ei chymeradwyo
Dogfennau ategol:
- Tourism Signage Strategy Report 120320, Eitem 6. PDF 243 KB
- Tourism Signage Strategy Report 120320 Appendix A - WG policy, Eitem 6. PDF 1 MB
- Tourism Signage Strategy Report - Appendix B - Existing DCC Tourism Signage Policy, Eitem 6. PDF 56 KB
- Tourism Signage Strategy Report - Appendix C - Proposed A55 Signage, Eitem 6. PDF 655 KB
- Tourism Signage Strategy Report - Appendix D- Proposed A55 Rhyl Signage, Eitem 6. PDF 861 KB
- Tourism Signage Strategy Report - Appendix E - Proposed Prestatyn Signage, Eitem 6. PDF 950 KB