Eitem ar yr agenda
CAFFAEL GOFAL A CHEFNOGAETH MEWN CYNLLUN TAI GOFAL YCHWANEGOL I BOBL HŶN AC ANABLEDD CYMHLETH
I ystyried
adroddiad gan y Cynghorydd Bobby Feeley, Aelod Arweiniol Lles ac Annibyniaeth
(copi ynghlwm) yn gofyn i’r Cabinet gymeradwyo cynnal proses gaffael ar gyfer
tendro gofal a chefnogaeth i’r Cynllun Tai Gofal Ychwanegol, Awel y Dyffryn,
Dinbych.
Penderfyniad:
PENDERFYNWYD fod
y Cabinet yn cymeradwyo’r broses gaffael ar gyfer gofal a chefnogaeth fel y
manylwyd yn yr adroddiad gyda chanlyniad ar gyfer pob tendr yn dod gerbron y
Cabinet i gael cymeradwyaeth derfynol.
Cofnodion:
Cyflwynodd y Cynghorydd Bobby Feeley yr adroddiad yn
gofyn am gymeradwyaeth y Cabinet i ymgymryd â'r broses gaffael ar gyfer tendro
gofal a chefnogaeth i'r Cynllun Tai Gofal Ychwanegol, Awel y Dyffryn, Dinbych.
Roedd Cynllun Tai Gofal Ychwanegol
Awel y Dyffryn wedi'i ddatblygu gan y Cyngor mewn partneriaeth â Grŵp Tai
Cynefin a rhagwelwyd y byddai'r cynllun yn barod ar gyfer 1 Medi 2020.
Cynigiwyd cynnal dau ymarfer tendro ar gyfer caffael gwasanaethau gofal a
chefnogaeth ar gyfer 66 o unedau pobl hŷn ac 8 uned anabledd cymhleth sydd
wedi'u lleoli ar y safle i ddarparu darpariaeth gofal 24 awr y dydd, 365
diwrnod o'r flwyddyn yn unol â Chontract Gofal Cartref Rhanbarthol Sir Ddinbych
a gofynion llywodraethu eraill. Byddai dau dendr ar wahân yn cael eu rhedeg
trwy'r fframweithiau priodol ar gyfer y ddwy elfen o gefnogaeth yn y cynllun
gyda chanlyniad pob tendr yn cael ei ddwyn yn ôl i'r Cabinet i'w gymeradwyo'n
derfynol. Roedd cyfeiriad at amcangyfrif o'r costau tendro a manylion pellach y
contract wedi'u cynnwys yn yr adroddiad.
Cefnogodd y Cabinet y cynllun i ddarparu darpariaeth
iechyd a gofal cymdeithasol yn yr ardal ac ystyriwyd manylion y broses gaffael
arfaethedig.
Ymatebodd swyddogion i gwestiynau
a sylwadau gan aelodau fel a ganlyn –
·
o ystyried y gwaith ychwanegol sy'n gysylltiedig â meddygon lleol,
gofynnodd y Cynghorydd Mark Young am sicrwydd ynghylch ymgynghori priodol a
chadarnhawyd bod Bwrdd Iechyd Prifysgol Betsi Cadwaladr yn mynychu Grŵp
Cyflenwi Gwasanaethau'r prosiect a bod meddygfeydd hefyd yn rhan o'r broses honno.
·
rhagwelwyd y byddai'r darparwr gofal Pobl Hŷn yn cael ei benodi erbyn
Mai / Mehefin a bod y darparwr Anabledd Cymhleth yn cael ei benodi erbyn
Gorffennaf / Awst
·
roedd marchnad ddarpariaeth gymysg yn Nhinbych a byddai'r cynllun yn ceisio
gwasanaethu Dinbych a'r ardaloedd cyfagos yn gyntaf gyda gwaith pellach yn
parhau o ran y cynnig iechyd a gofal cymdeithasol cyffredinol yn yr ardal.
·
rhoddwyd
sicrwydd bod y gallu i ddarparu gwasanaethau gofal cymdeithasol trwy gyfrwng y
Gymraeg yn fater blaenoriaeth ac yn rhan o'r gofynion contract a fyddai'n cael
eu gwerthuso trwy'r broses dendro. Fodd bynnag, roedd heriau o ran recriwtio ac
roedd gwaith yn mynd rhagddo gyda'r uned datblygu gweithlu gofal cymdeithasol i
gefnogi darpariaeth gwasanaeth Cymraeg.
·
mewn perthynas â chyfleoedd staff, cadarnhaodd y Cynghorydd Huw
Hilditch-Roberts fod holl staff y cyngor yn cael cyfle i ddysgu Cymraeg ac i
wella a datblygu eu sgiliau iaith Gymraeg a darparwyd cyllid at y diben hwnnw.
Nid oedd problemau gyda recriwtio wedi'u cyfyngu i Sir Ddinbych gydag
awdurdodau cyfagos hefyd yn cael anawsterau yn hynny o beth
·
o ran
digonolrwydd lefelau staffio gyda'r nos, byddai Grŵp Cynefin yn darparu
gwasanaeth o fath ‘concierge’ gyda pherson ar y safle i ddarparu cymorth rheoli
tai 24/7 yn ychwanegol at y tîm gofal ar y safle. Cynlluniwyd a darparwyd gofal
yn unol â'r angen a nodwyd ar y pryd ac o ganlyniad byddai nifer y staff sydd
eu hangen yn amrywio i ddarparu ar gyfer yr anghenion newidiol hynny.
PENDERFYNWYD bod y Cabinet yn cymeradwyo
ymgymryd â'r broses gaffael ar gyfer gofal a chefnogaeth fel y manylir yn yr
adroddiad gyda chanlyniad pob tendr yn cael ei ddwyn yn ôl i'r Cabinet i'w
gymeradwyo'n derfynol.
Ar y pwynt hwn (11.15 a.m.) gohiriwyd y cyfarfod am
egwyl.
Dogfennau ategol:
- PROCUREMENT EXTRA CARE HOUSING SCHEMEv1, Eitem 9. PDF 215 KB
- PROCUREMENT EXTRA CARE HOUSING SCHEME - APP WBIA, Eitem 9. PDF 97 KB