Eitem ar yr agenda
POLISÏAU'R CYNGOR A'R ASIANTAETH CEFNFFYRDD AR GYFER CYNNAL A CHADW YMYLON FFYRDD A PHERTHI A GWASGARU PLALADDWYR
I dderbyn adroddiad gan Pennaeth Priffyrdd, Cyfleusterau a Gwasanaethau Amgylcheddol ar bolisïau Cyngor Sir Dinbych ac Asiantaeth Cefnffyrdd Gogledd a Chanolbarth Cymru (NMWTRA) mewn perthynas â chynnal a chadw ymylon ffyrdd / perthi a gwasgaru plaladdwyr (copi ynghlwm).
10:05am – 11:00am
Cofnodion:
Cyflwynodd yr
Aelod Arweiniol Priffyrdd, Effaith Amgylcheddol, Gwastraff a Theithio
Cynaliadwy yr adroddiad (a ddosbarthwyd yn flaenorol) ochr yn ochr â'r Aelod
Arweiniol Tai a Chymunedau, a'r Pennaeth Priffyrdd, Cyfleusterau a Gwasanaethau
Amgylcheddol. Hefyd roedd David Evans, Dirprwy Bennaeth Gwasanaeth a Mark
Watson-Jones, Cydlynydd Amgylcheddol o Asiantaeth Cefnffyrdd Gogledd a
Chanolbarth Cymru.
Cyflwynwyd yr
adroddiad i aelodau ar gais y Pwyllgor ar ôl iddo ystyried Cynllun Cyflawni
Dyletswydd Bioamrywiaeth drafft y Cyngor yn ystod haf 2019. Yn ogystal,
gofynnwyd am wybodaeth am ddefnydd y Cyngor o blaladdwyr. Roedd yr aelodau’n ceisio sicrwydd bod
polisïau cynnal a chadw ymylon/gwrychoedd priffyrdd Sir Ddinbych yn cael eu
gweithredu’n gyson ledled y sir. Wrth i
dair cefnffordd, a oedd yn gyfrifoldeb Asiantaeth Cefnffyrdd Gogledd a
Chanolbarth Cymru groesi’r sir, roedd cynrychiolwyr Asiantaeth Cefnffyrdd
Gogledd a Chanolbarth Cymru hefyd wedi'u gwahodd i'r cyfarfod i drafod gyda’r
Pwyllgor ei bolisïau mewn perthynas â chynnal a chadw ymylon/gwrychoedd a’r
defnydd o blaladdwyr.
Yn ystod y
drafodaeth, dywedwyd wrth y Pwyllgor:
·
er y
bu cryn sylw a si yn y cyfryngau ynghylch diogelwch Glyffosad a'r defnydd
ohono, nid oes unrhyw chwynladdwr systemig effeithiol amgen wedi ei ddarganfod
na'i ddatblygu. Roedd
nifer o awdurdodau yn archwilio dulliau amgen ac roedd gwyddonwyr yn ymchwilio
i gynhyrchion amgen posibl, ond hyd yma Glyffosad oedd y cynnyrch mwyaf
effeithiol o'i fath ar y farchnad. Pe bai’r Cyngor ac Asiantaeth Cefnffyrdd Gogledd a Chanolbarth Cymru yn
defnyddio dulliau neu gynnyrch amgen, bydden nhw naill ai’n lafurddwys neu’n
ddrud i’w prynu.
·
Caiff
Glyffosad ei drwyddedu a’i ddefnyddio gan holl lywodraethau’r DU. Ar hyn o bryd, dyna’r unig ateb ymarferol
ar gyfer delio gyda chwyn ar draws rhwydwaith y priffyrdd. Roedd y math o chwynladdwr systematig a
ddefnyddid gan y Cyngor ac Asiantaeth Cefnffyrdd Gogledd a Chanolbarth Cymru o
safon diwydiannol a barnwyd ei fod yn gwbl ddiogel pe bai'n cael ei gymhwyso
gan weithwyr hyfforddedig a chontractwyr a oedd yn cydymffurfio ag arferion
gwaith diogel y cawsant hyfforddiant arnynt. Cafodd y plaladdwr ei chwistrellu
ddwywaith y flwyddyn ar ffyrdd y sir.
·
Cafodd
dulliau eraill, megis triniaeth ewyn poeth, eu defnyddio mewn meysydd penodol
o’r sir, h.y. Safleoedd o Ddiddordeb Gwyddonol Arbennig. Fodd bynnag, roedd y defnydd ohono yn
gyfyngedig ac felly ni fyddai’n ymarferol i’w ddefnyddio ar draws rhwydwaith y
briffordd;
·
Weithiau
byddai trigolion yn dychryn wrth weld gweithwyr yn rhoi plaladdwyr mewn mannau
cyhoeddus, yn gwisgo dillad amddiffynnol a masgiau wyneb pan oedd aelodau o'r cyhoedd
yn bresennol. Fodd bynnag, honnwyd bod y plaladdwyr yn ddiogel i'r cyhoedd.
Y rhesymau pam roedd gweithwyr yn
gwisgo'r dillad amddiffynnol oedd i gydymffurfio â rheolau iechyd a diogelwch
yn ymwneud â chysylltiad hirfaith i gemegau, gan eu bod yn delio â nhw o ddydd
i ddydd. Nid oedd
cysylltiad byrdymor, fel yr oedd y cyhoedd yn ei brofi, yn peri risg i iechyd
·
Roedd
Cyngor Sir Ddinbych ac Asiantaeth Cefnffyrdd Gogledd a Chanolbarth Cymru yn
rhan o Rwydwaith Bioamrywiaeth Gogledd Ddwyrain Cymru. Roedd hyn yn sicrhau bod
pob asiantaeth a oedd yn gweithredu yn yr ardal yn defnyddio arferion
bioamrywiaeth ac iechyd a diogelwch tebyg wrth dorri ymylon glaswellt a
chwistrellu plaladdwyr. Yn ogystal, gosodwyd pob contract cynnal a chadw priffyrdd yn dilyn proses
dendro ffurfiol. Lluniodd
yr awdurdodau priffyrdd fanylebau'r contract a oedd yn nodi materion fel amlder
toriadau, chwistrellu cemegol a'r mathau o gemegau i'w defnyddio, pob un
ohonynt yn seiliedig ar ddeddfwriaeth a rheoliadau cyfredol. Byddai’r holl gontractau yn cael eu
monitro er mwyn sicrhau cydymffurfiaeth gyda manyleb y contract. Ni fyddai contractau bob amser yn cael eu
gosod ar sail pris yn unig, roedd ansawdd y gwaith hefyd yn ffactor.
Roedd yn bwysig felly i aelodau
etholedig hysbysu'r asiantaethau am waith o ansawdd da yn ogystal â gwaith o
ansawdd gwael;
·
Roedd
y Cyngor ac Asiantaeth Cefnffyrdd Gogledd a Chanolbarth Cymru yn cyfathrebu
gyda gweithredwyr a chontractwyr penodedig mewn perthynas â lleoliad
gwarchodfeydd natur ar ochr y ffordd a sut i'w hamddiffyn yn ystod ymarferion
torri ymylon a chwistrellu chwyn;
·
Roedd
mwyafrif y gwrychoedd ledled y sir yn rhai perchnogaeth breifat, felly roedd y
tirfeddianwyr yn gyfrifol am eu cynnal a’u cadw
Pwysleisiodd
aelodau gwledig yr angen i drefnu toriadau ymylon yn effeithiol ar ffyrdd
gwledig i gyd-fynd â'r amrywiannau yn y tymor tyfu o flwyddyn i flwyddyn, a
hefyd i sicrhau bod yr ymylon yn cael eu torri cyn i rywfaint o'r llystyfiant
galedu, h.y. gorthyfail. Roedden nhw o’r farn felly bod angen elfen o hyblygrwydd ar gyfer polisïau
torri ymylon. Ar y sail
hwn, penderfynodd y Pwyllgor ar y canlynol:
Penderfynwyd: - ar ôl archwilio polisïau cyfredol y ddau
sefydliad, ac yn amodol ar yr arsylwadau uchod -
(i)
derbyn yr adroddiad ac argymell y dylid cadw at amseriad toriadau ymylon
glaswellt ar draws y sir, gyda lefel o hyblygrwydd yn rhan ohono er mwyn
darparu ar gyfer yr amrywiannau mewn tymhorau tyfu o flwyddyn i flwyddyn; a
(ii)
cyflwyno Polisi Cynnal a Chadw Ymylon Glaswellt priffyrdd y Cyngor i’r
Pwyllgor yn y cyfarfod ym mis Mai 2020 ar gyfer ei adolygu
Dogfennau ategol:
- Highways and Trunk Roads Verge Maintenance Report 130220 (1), Eitem 5. PDF 335 KB
- Highways and Trunk Roads Verge Maintenance Report 130220 - App I, Eitem 5. PDF 109 KB
- Highways and Trunk Roads Verge Maintenance Report 130220 - App II, Eitem 5. PDF 337 KB
- Highways and Trunk Roads Verge Maintenance Report 130220 - App III, Eitem 5. PDF 946 KB
- Highways and Trunk Roads Verge Maintenance Report 130220 - App IV, Eitem 5. PDF 2 MB
- Highways and Trunk Roads Verge Maintenance Report 130220 - App V English, Eitem 5. PDF 251 KB