Eitem ar yr agenda

Ystyried adroddiad gan y Cynghorydd Hugh Evans, Arweinydd ac Aelod Arweiniol yr Economi a Llywodraethu Corfforaethol (copi ynghlwm) yn cyflwyno fersiwn derfynol dogfen weledigaeth Canol Tref Y Rhyl a’r dull arfaethedig i gyflawni’r gwaith llywodraethu a darparu adnoddau.

PENDERFYNWYD bod y Cabinet yn –

(a)       cefnogi’r uchelgeisiau hirdymor a’r 8 syniad allweddol sydd wedi’u nodi yn nogfen y Weledigaeth (Atodiad 2), a

(b)       cadarnhau ei fod wedi darllen, deall ac wedi ystyried yr Asesiad o Effaith ar Les (Atodiad 1) fel rhan o'i ystyriaethau a’i fod yn ymrwymo i’r Cyngor ganolbwyntio ar gyflawni’r effeithiau cadarnhaol, hirdymor ar les sydd wedi’u cynnwys ynddo.

Cyflwynodd yr Arweinydd yr adroddiad a fersiwn derfynol o ddogfen Weledigaeth Canol Tref y Rhyl a'r dull arfaethedig ar gyfer llywodraethu a rhoi adnoddau i'w gyflawni.

Roedd y Cyngor wedi gweithio ar y cyd dros y deunaw mis diwethaf gan ymgysylltu gydag ystod o bobl a phartneriaid i ddatblygu gweledigaeth ar y cyd ar gyfer Canol Tref y Rhyl, a oedd yn canolbwyntio ar: ddarparu cytbwysedd bywiog o ran defnydd, gwell mynediad at ganol y dref a llif cerddwyr o amgylch canol y dref, ac atmosffer canol y dref dymunol.  Mae wyth syniad allweddol wedi’u cynhyrchu ac roedd gwaith ar y gweill i’w datblygu mewn rhaglen gwaith i'r dyfodol o flaenoriaethau a phrosiectau dros gyfnod pymtheg mlynedd y Weledigaeth.   Byddai hyn yn ffurfio sail y cynllun gweithredu drafft ar gyfer y rhaglen er mwyn i Fwrdd Rhaglen y Rhyl ei symud ymlaen.

Cyfeiriodd yr Arweinydd at y buddsoddiad a’r gwelliannau sylweddol yn y Rhyl dros y blynyddoedd diwethaf a bod angen cynllunio i ddatblygu canol y dref gyda Gweledigaeth a oedd yn adlewyrchu dyheadau lleol drwy broses ymgysylltu helaeth, ac a oedd yn ategu at gynlluniau presennol a buddsoddiad gyda dull cydlynol.   Darparodd y Rheolwr Rhaglen a Thîm Datblygu Busnes ac Economaidd rywfaint o gefndir creu'r ddogfen Weledigaeth a phroses ymgysylltu gynhwysfawr, gan dynnu sylw at y prif themâu sy'n dod i'r amlwg a'r prosiectau allweddol i ddatblygu'r syniadau allweddol, a darparu trosolwg o brosiectau presennol a'r rhai sydd eisoes ar y gweill er mwyn cymryd mantais o'r cyfleoedd cyllid adfywio presennol a gyda'r nod o ddenu buddsoddiad y sector preifat.

Cyfeiriodd yr Arweinydd hefyd at waith Bwrdd Datblygu Cymunedol y Rhyl yn ategu at yr uwch gynllun a mynd i'r afael â materion cymdeithasol ac eglurodd y Prif Weithredwr rôl y Bwrdd, yn cynnwys uwch arweinwyr o'r sectorau statudol, i ystyried sut i wneud y budd mwyaf ar y cyd o fuddsoddiad ac adfywio wedi'i gynllunio'n ehangach yn y Rhyl i gydlynu a gwneud y mwyaf o gyfleoedd o ran cyflogaeth, iechyd, addysg, diogelwch cymunedol a thai.   Roedd y Cyngor wedi penderfynu buddsoddi mewn Swyddog Datblygu Cymunedol yn y Rhyl i weithio gyda’r gweithwyr o’r asiantaethau statudol, y sector gwirfoddol a’r grwpiau cymunedol i gynorthwyo i gyfeirio a gwneud y mwyaf o gyfleoedd cyllid ac adnoddau, i adrodd i’r Bwrdd ac i Grŵp Cyfeirio’r Rhyl i sicrhau ymgysylltiad gwleidyddol, a byddai adroddiadau'n cael eu cyflwyno i'r Cabinet.   Roedd y Bwrdd wedi gosod targedau llym yn seiliedig ar y dangosyddion amddifadedd gyda’r bwriad o nodi effaith y buddsoddiad ar breswylwyr.

Croesawodd y Cabinet y ddogfen fel modd o ddarparu canolbwynt clir ar gyfer canol y dref a’i adfywiad a rhoi hyder a chreu dyfodol hir dymor gwell ar gyfer y Rhyl.   Croesawyd y broses ymgysylltu gynhwysfawr a’r ymdrechion cydweithredol i gynhyrchu’r Weledigaeth hefyd.   Roedd y prif bwyntiau trafod yn cynnwys -

·          o ran blaenoriaethu a chynllunio prosiectau, hysbyswyd yr aelodau bod y ddogfen Weledigaeth yn nodi rhaglen hir dymor a byddai prosiectau’n cael eu blaenoriaethu gan ddefnyddio’r fethodoleg gorfforaethol yn seiliedig ar fuddion a chanlyniadau mesuradwy; darparwyd sicrwydd o ran hyblygrwydd o fewn y cynllun i ymateb i’r cyfleoedd fel yr oeddent yn dod i'r amlwg pe bai cyllid ar gael, yn yr un modd pe bai diddordeb gan y sector preifat byddai'n bosibl symud prosiect i fuddsoddiad sector preifat diogel a gwneud y mwyaf o'r buddion.

·         Nododd y Prif Weithredwr adfywiad ffisegol y Rhyl a oedd yn amlwg wrth ymweld â’r dref a’r cynlluniau adfywio hirdymor, a thynnu sylw at yr her o sicrhau y byddai buddsoddi mewn isadeiledd yn cael effaith gadarnhaol ar breswylwyr lleol a safonau byw.   

Roedd wedi ymweld â holl ardaloedd ward y sir ac wedi ymgysylltu â busnesau a phreswylwyr lleol wrth ymweld â'r Rhyl gan dynnu sylw at bwysigrwydd gwrando ar y cymunedau yr ydym yn eu gwasanaethu.

·         Croesawodd y Cynghorydd Richard Mainon swydd Swyddog Datblygu Cymunedol er mwyn gwneud y mwyaf o’r buddion a'r canlyniadau ac roedd yn awyddus bod y Cabinet yn derbyn adborth ynglŷn â hynny – cadarnhawyd y rhoddir ystyriaeth i gynnwys ymgysylltiad gydag aelodau ar yr elfennau adfywio a datblygu cymunedol a'r bwriad oedd darparu adroddiadau diweddaru i'r Cabinet a'r aelodau lleol.   

Nid oedd unrhyw aelodau etholedig ar y Bwrdd Datblygu Cymunedol oherwydd roedd yn cynnwys grŵp o uwch swyddogion i drafod materion gweithredol ac ymarferol.

Gofynnodd yr Arweinydd am gwestiynau gan rai nad ydynt yn Aelodau Cabinet-

·         Diolchodd y Cynghorydd Joan Butterfield i’r Cyngor ar ran preswylwyr y Rhyl am eu hymroddiad i adfywio’r Rhyl ac am y cyfraniadau lleol yn y ddogfen Weledigaeth.   

O ran ymgysylltu â’r gymuned yn y dyfodol, rhoddwyd sicrwydd y byddai’r Cyngor yn parhau i ymgysylltu â’r gymuned leol yn hir dymor wrth i’r uwch gynllun barhau.

·         Roedd y Cynghorydd Meirick Davies yn awyddus am fuddsoddiad yn Nhrefnant a chydnabu’r aelodau bod angen gwario mewn ardaloedd ward eraill a thrafod potensial ffynonellau cyllid ar gyfer gwahanol brosiectau mewn gwahanol ardaloedd – nodwyd bod rhai prosiectau adfywio yn y Rhyl yn gymwys ar gyfer cyllid grant ond ar gyfer ardaloedd gwledig roedd potensial ar gyfer cyllid fferm wynt ar gyfer prosiectau lleol.   

O ran cwestiwn am adeiladau hanesyddol yn y Rhyl, darparwyd sicrwydd ynglŷn ag ymrwymiad y Cyngor o ran hynny drwy gymryd camau i wella a chadw adeiladau hanesyddol yn y dref.

·         Cyfeiriodd y Cynghorydd Gwyneth Kensler at swm y buddsoddiad yn y Rhyl dros sawl blwyddyn a holi a wnaed asesiad o’r canlyniadau.   

Cytunwyd y gellir dysgu gwersi o’r gorffennol ond na fu buddsoddiad yn y gorffennol yn gynaliadwy a byddai’r cynllun yn edrych tuag at y dyfodol ac yn hwyluso gwelliannau mewn safonau byw, nid buddsoddiad cyfalaf yn unig.   O ran goblygiadau refeniw darparwyd sicrwydd bod hyn yn ystyriaeth gan y Grŵp Buddsoddi Strategol yng ngham achos busnes y prosiectau unigol.

·         Lleisiodd y Cynghorydd Barry Mellor ei gefnogaeth ar gyfer y ddogfen Weledigaeth a thynnu sylw at fuddion y gwaith adfywio sydd eisoes wedi’i gyflawni, yn enwedig o ran y ddwy ysgol newydd, ac fe gadarnhawyd iddo bod y Weledigaeth yn darparu'r hyder gofynnol yn nyfodol y dref.

PENDERFYNWYD bod y Cabinet –

(a)       yn cefnogi dyheadau hirdymor a'r 8 syniad allweddol a nodwyd yn y ddogfen Weledigaeth (Atodiad 2 yr adroddiad), ac

(b)       yn cadarnhau eu bod wedi darllen, deall ac wedi ystyried yr Asesiad o Effaith ar Les (Atodiad 1 yr adroddiad) fel rhan o'u hystyriaethau, ac yn ymrwymo bod y Cyngor yn canolbwyntio ar gyflawni’r effeithiau lles hirdymor cadarnhaol sydd wedi’u nodi ynddo.