Eitem ar yr agenda
EFFEITHIOLRWYDD ASESIADAU EFFAITH AR LES (WIA)
Ystyried
adroddiad gan y Swyddog Cynllunio a Pherfformiad (copi ynghlwm) sy'n adolygu
effeithiolrwydd dull y Cyngor i asesu effaith ei benderfyniadau a gofyn am farn
y Pwyllgor ynghylch sut gall Aelodau gefnogi herio a chraffu'r asesiadau
effaith hyn yn effeithiol.
11.40am – 12.15pm
Cofnodion:
Cyflwynodd yr
Aelod Arweiniol Cyllid, Perfformiad ac Asedau Strategol adroddiad y Swyddog
Cynllunio a Pherfformiad (dosbarthwyd yn flaenorol) oedd yn rhoi diweddariad
i’r Pwyllgor ar weithredu ac effeithiolrwydd dull y Cyngor ar asesu effaith ei
benderfyniadau, gan ddefnyddio ei Asesiad o Effaith ar Les ar y wefan. Yn ystod ei gyflwyniad hysbysodd yr Aelod
Arweiniol y Pwyllgor bod Asesiadau o’r Effaith ar Gydraddoldeb wedi bod mewn
bodolaeth ers peth amser, fodd bynnag nid oeddent bob amser wedi bod yn
effeithiol neu’n ddarostyngedig i her neu archwilio digonol. Gyda chyflwyniad y Ddeddf Lles
Cenedlaethau’r Dyfodol (Cymru) 2015, roedd Sir Ddinbych wedi gwneud
penderfyniad rhagweithiol i ddatblygu Asesiad o Effaith ar Les i gynnwys pob
agwedd o ofynion y Ddeddf tra'n parhau i ddiwallu gofynion deddfwriaethol
eraill, er enghraifft yr angen i gynnal Asesiad o'r Effaith ar
Gydraddoldeb. Wrth fabwysiadu’r dull
hwn, roedd y Cyngor wedi datblygu pecyn gwefan ar gyfer arwain adran i hwyluso
cynnal Asesiad o’r Effaith ar Les, dull a ystyriwyd yn arfer da gan Swyddfa
Archwilio Cymru. Drwy gynnal yr
Asesiad o’r Effaith ar Les yn defnyddio’r pecyn hwn, roedd gwybodaeth wedi’i
chyflwyno i’r cynghorwyr mewn ffurf hawdd i’w deall fyddai’n helpu’r broses
gwneud penderfyniad, tra byddai’n ofynnol i’r holl swyddogion ystyried yr
effeithiau ar holl amcanion lles a'r egwyddor datblygu cynaliadwy. Roedd hyn yn sicrhau bod dull cyson yn cael
ei ddefnyddio i gynnal yr Asesiad o’r Effaith ar Les bob tro. Tynnodd yr Aelod Arweiniol sylw’r Pwyllgor
at y gwahaniaethau a sylwyd drwy ymgymryd â’r dull hwn, gan gynnwys
penderfyniadau gwell a her mwy effeithiol yr Asesiadau o Effaith ar Les. Er hynny, roedd yna le i wella ymhellach,
ac o ganlyniad y rheswm dros adolygu eu heffeithiolrwydd.
Dywedodd yr Aelod
Arweiniol a’r Swyddog Cynllunio a Pherfformiad bod yr Asesiadau o’r Effaith ar
Les a archwiliwyd fel rhan o’r adolygiad wedi bod o ansawdd amrywiol, rhai yn
dioddef rhagfarn gan yr awdur ac eraill yn amlwg ddim yn dechrau’n ddigon buan
yn y camau cynllunio ar gyfer y cynigion i’w hystyried. Roedd
gwaith ar y gweill ar hyn o bryd gyda swyddogion i bwysleisio’r angen i
ddechrau’r Asesiad o’r Effaith ar Les yn fuan tra’n ffurfio cynnig neu brosiect
ac i barhau i’w ddiweddaru yn ystod ei oes.
Roedd hyn yn arbennig o bwysig mewn perthynas â phrosiectau mawr yr oedd
y Cyngor yn bwriadu ymgymryd â nhw.
Roedd y broses Grŵp Cyfaill Beirniadol ar gyfer herio Asesiadau o’r
Effaith ar Les wedi profi’n arbennig o ddefnyddiol ac roedd yna gynlluniau i
adfer y broses hon yn ffurfiol wrth symud ymlaen. Roedd cefnogaeth aelodau etholedig ar gyfer
y broses yn allweddol ar gyfer llwyddo yn ogystal â’u rôl i herio’r Asesiadau
o’r Effaith ar Les a gyflwynwyd iddynt.
Wrth ymateb i
gwestiynau aelodau gwnaeth yr Aelod Arweiniol a’r Swyddog Perfformiad:
•
gadarnhau
nad oedd pob Asesiad o’r Effaith ar Les yn cael eu gwirio o ran ansawdd.
Roedd y Gwasanaeth Moderneiddio a Gwella Busnes yn dibynnu ar swyddogion i
gysylltu â nhw am gymorth a chyngor os oeddent yn cael anhawster cwblhau
Asesiadau o’r Effaith ar Les. Fodd
bynnag, mewn rhai gwasanaethau e.e. y swyddogion yn delio gyda’r Cynllun
Datblygu Lleol (CDLl) roedd yna lefel uchel o arbenigedd cwblhau Asesiadau o’r
Effaith ar Les ac roedd swyddogion o bob gwasanaeth arall yn cael eu hannog i
weithio gyda’i gilydd lle bo’n bosibl i lunio Asesiadau o’r Effaith ar Les o
ansawdd uchel.
•
cadarnhawyd
bod hawlfraint pecyn gwefan Asesiad o’r Effaith ar Les yn eiddo i Gyngor Sir
Ddinbych.
Roedd nifer o awdurdodau lleol eraill wedi dangos diddordeb ynddo ac roedd
Cyngor Bwrdeistref Sirol Conwy yn ystyried defnyddio pecyn Sir Ddinbych, fodd
bynnag, nid oedd Sir Ddinbych yn rhagweld y byddai’n cynhyrchu incwm sylweddol
i’r awdurdod;
•
dywedwyd
bod yna ddogfen Cwestiynau Cyffredin ar fewnrwyd y Cyngor i gynorthwyo
cynghorwyr a swyddogion i herio Asesiadau o’r Effaith ar Les; a
•
cytunwyd
i roi ystyriaeth i’r ffordd orau i roi cefnogaeth bersonol i gynghorwyr herio
Asesiadau o’r Effaith ar Les yn effeithiol wrth symud ymlaen e.e. drwy ddarparu
sesiwn ar gyfer Briffio’r Cyngor, hyfforddi grŵp llai a digwyddiadau
datblygu ac ati.
Ar ddiwedd
trafodaeth y Pwyllgor:
PENDERFYNWYD: - yn ddarostyngedig i’r sylw
uchod a darparu cefnogaeth i holl aelodau etholedig o ran sgiliau datblygu i
herio ac archwilio Asesiadau o’r Effaith ar Les yn effeithiol, i dderbyn
canfyddiadau’r adolygiad o’r broses Asesiad o’r Effaith ar Les.
Dogfennau ategol:
- Effectiveness of WIA Report 130619, Eitem 8. PDF 228 KB
- Effectiveness of WIA Report 130619 - App 1, Eitem 8. PDF 90 KB
- Effectiveness of WIA Report 130619 - App 2, Eitem 8. PDF 664 KB