Eitem ar yr agenda
EFFAITH CAU YSGOL RHEWL
Ystyried
adroddiad gan y Prif Reolwr – Cefnogi Addysg (Copi ynghlwm) sy’n amlinellu’r
gefnogaeth a ddarparwyd i Ysgol Rhewl yn ystod y broses cau ac adborth gan
fudd-ddeiliaid ar y gefnogaeth a dderbyniwyd.
10.45am – 11.15am
Cofnodion:
Cyflwynodd yr Aelod Arweiniol Addysg, Plant a Phobl Ifanc adroddiad y Prif
Reolwr, Moderneiddio
Addysg, (a ddosbarthwyd eisoes) yn amlinellu'r gefnogaeth a roddwyd i Ysgol
Rhewl yn ystod y broses o gau'r ysgol. Ynghlwm wrth yr adroddiad roedd atodiadau’n crynhoi
ymatebion rhieni i’r holiaduron a roddwyd iddynt, sylwadau a gafwyd gan yr
ysgolion a fydd yn cymryd disgyblion Ysgol Rhewl yn ogystal â sylwadau’r Pennaeth
dros dro ar adeg cau’r ysgol.
Dywedodd
yr Aelod Arweiniol mai dim ond dau riant oedd wedi ateb yr holiadur ac o’r
saith ysgol a dderbyniodd ddisgyblion ysgol Rhewl, pump oedd wedi ymateb. Roedd rhai o’r sylwadau a gafwyd hefyd yn
gwrth-ddweud ei gilydd.
Disgwyliwyd i ddechrau y byddai mwyafrif y disgyblion yn trosglwyddo i’r
ysgolion newydd yn Rhuthun ond ni ddigwyddodd hynny. Roedd nifer o’r plant wedi
trosglwyddo i ysgolion mewn rhannau eraill o’r sir, rhai oherwydd eu bod yn
byw'n agosach at yr ysgolion hynny ac eraill oherwydd dewis y rhieni. Cydnabu'r Aelod Arweiniol nad yw byth yn brofiad braf cau
ysgol ond roedd yn falch o allu dweud fod y disgyblion wedi setlo’n dda yn eu
hysgolion newydd. Dywedodd y Prif
Reolwr Moderneiddio Addysg wrth yr Aelodau bod swyddogion o Wasanaeth Addysg y
Cyngor wedi gweithio’n agos â Phennaeth Dros dro Ysgol Rhewl drwy gydol y
broses o gau’r ysgol a throsglwyddo’r disgyblion. Dywedodd hefyd bod y Pennaeth Dros dro wedi gweithio’n
ddiwyd gyda disgyblion a rhieni dan amgylchiadau anodd dros ben. Yn ogystal â rhoi
cefnogaeth i rieni (mewn cyfarfodydd un i un a chyfarfodydd grŵp),
disgyblion a'r corff llywodraethu roedd y Cyngor hefyd wedi darparu cefnogaeth,
naill ai'n uniongyrchol neu'n anuniongyrchol, drwy Gyrfa Cymru, i staff yr
ysgol - ffaith a nodwyd yn sylwadau'r Pennaeth Dros dro. Gofynnodd y Pennaeth
Addysg a Gwasanaethau Plant am i’r ffaith gael ei nodi, er bod y Cyngor yn
ymgymryd â phroses siomedig ac amhleserus iddyn nhw’n
bersonol, bod cymuned Ysgol Rhewl wedi ymddwyn yn broffesiynol, yn gwrtais ac
yn barchus tuag at swyddogion y Gwasanaeth Addysg.
Gan ymateb i gwestiynau’r aelodau, fe wnaeth yr Aelod Arweiniol a’r
swyddogion:
- gydnabod bod
cymunedau’n gwerthfawrogi eu hadeiladau ysgol gan ddweud bod y Cyngor yn
cynnig yr opsiwn i’r gymuned leol brynu adeiladau ysgol diddefnydd. Mewn man lle nad
oes cyfleusterau cymunedol yn bodoli gallai fod yn gyfle da i'r gymuned
brynu’r amwynder. Fodd
bynnag mae Pafiliwn Chwaraeon gyda'r holl offer angenrheidiol eisoes yn
bodoli yn Rhewl felly nid oedd gan y gymuned unrhyw ddiddordeb mewn prynu
adeiladau’r hen ysgol a oedd eisoes mewn cyflwr eithaf gwael.
- nodi fod y
swyddogion wedi gwneud eu gorau i ymgysylltu â rhieni, disgyblion a’r
gymuned ysgol a’u cefnogi drwy’r broses, ond y
byddai bob amser wersi i'w dysgu ar gyfer y dyfodol.
- nodi ei bod yn
bwysig bod cefnogaeth ac yn y blaen ar gael pan oedd rhieni a rhanddeiliaid yn barod i ymgysylltu. Oherwydd sensitifrwydd
cynigion i gau ysgolion nid yw pawb a effeithir bob amser yn barod i
ymgysylltu neu geisio cefnogaeth ar yr un pryd.
Bydd adeiladu hyblygrwydd i mewn i’r broses felly yn hollbwysig.
- cadarnhau fod rhai
disgyblion/rhieni wedi newid eu
meddwl am ba ysgol i drosglwyddo eu plentyn/plant iddi ar ôl
dyddiau blasu mewn gwahanol ysgolion.
- cynghori bod
cefnogaeth hefyd wedi’i rhoi gan y Gwasanaeth Addysg i'r ysgolion hynny a
oedd yn derbyn disgyblion o Ysgol Rhewl.
- cadarnhau bod
penderfyniad i beidio symud y disgyblion oedd wedi dewis symud i Ysgol
Stryd Rhos i’r ysgol newydd pan fyddai’n agor ond yn hytrach aros tan y
flwyddyn academaidd newydd wedi’i wneud ar ôl trafod ac ymgynghori gyda'r
Pennaeth Dros dro. Teimlwyd y
byddai hyn yn gweithio’n well gan y byddai’n osgoi’r angen i ddisgyblion
Blwyddyn 6 symud am ddim ond un tymor cyn gorfod symud eto i’r ysgol
uwchradd yn nhymor yr hydref.
- nodi nad oes
arwydd bod newid ysgol wedi cael effaith niweidiol ar gyrhaeddiad
disgyblion. Roedd dwy
o’r ysgolion a dderbynion ddisgyblion o Ysgol Rhewl wedi cael eu harolygu
gan Estyn yn ddiweddar ac wedi cael adroddiadau da dros ben. Mae disgwyl y bydd
adroddiad ar effaith yr adolygiad o ddarpariaeth addysg gynradd yn ardal
Rhuthun gyfan yn mynd gerbron y Pwyllgor yn ei gyfarfod ym mis Hydref
2019. Bydd yr
adroddiad yn cynnwys asesiad o unrhyw effaith ar gyrhaeddiad disgyblion.
- cadarnhad bod y
Pennaeth Dros dro wedi mynd yn ôl i swydd yn ei hysgol flaenorol, roedd
rhai staff wedi cymryd pecynnau diswyddo ac eraill wedi dod o hyd i waith
arall. Cytunodd y
Prif Reolwr, Moderneiddio
Addysg y byddai’n dosbarthu gwybodaeth fanylach am hyn ac ar y gwaith sy’n
cael ei wneud gan Wasanaethau
Ieuenctid y Cyngor, a
- rhoddodd sicrwydd
i’r Pwyllgor fod y Rhewl yn bentref â chysylltiadau cymunedol cryf gyda nifer o weithgareddau cymunedol sefydledig
yn cael eu cynnal yno'n rheolaidd.
Ar ddiwedd y drafodaeth
Penderfynwyd: - Yn amodol ar y sylwadau
uchod, cydnabod yr adborth a gafwyd a’r gwersi a ddysgwyd a bod y Gwasanaeth
Addysg yn eu defnyddio wrth gynllunio ar gyfer y dyfodol.
Ar y pwynt hwn (11.45 am) cafwyd egwyl o 10 munud.
Ailddechreuodd y cyfarfod am 11.55 a.m.
Dogfennau ategol:
- Ysgol Rhewl Feedback Report 090519, Eitem 6. PDF 273 KB
- Ysgol Rhewl Feedback Report 090519 - App 1, Eitem 6. PDF 263 KB
- Ysgol Rhewl Feedback Report 090519 - App 2, Eitem 6. PDF 214 KB
- Ysgol Rhewl Feedback Report 090519 - App 3, Eitem 6. PDF 197 KB