Eitem ar yr agenda

Ystyried adroddiad gan y Cynghorydd Brian Jones, Aelod Arweiniol Priffyrdd, Cynllunio a Theithio Cynaliadwy (copi ynghlwm) yn cyflwyno argymhellion y Grwp Cynllunio Strategol mewn perthynas â Strategaeth a Ffefrir Ddrafft y CDLl Newydd.

 

PENDERFYNWYD bod y Cabinet yn argymell argymhellion y Grŵp Cynllunio Strategol i’r Cyngor ynglŷn â’r Strategaeth Ddewisol CDLl Newydd Drafft fel a ganlyn -

 

(a)       Lefelau Arfaethedig o Dwf Drafft:

68ha o dir cyflogaeth i gynnal rhagofyniad tir o 47.6ha.

Tir ar gyfer 3,775 o gartrefi newydd i gwrdd â'r gofyniad tai o 3,275.

 

(b)       Dull Gofodol Arfaethedig Drafft:

Yn seiliedig ar Opsiwn 3 - canolbwyntio ar ddatblygu yn Safle Strategol Bodelwyddan ac aneddiadau â gwasanaeth; y tair haen uchaf yn yr hierarchaeth aneddiadau (prif ganolfannau, canolfannau lleol a phentrefi) gyda thwf mwy cyfyngedig yn yr aneddiadau heb wasanaethau eraill (mewnlenwi a safleoedd bach o fewn ffiniau datblygu), yn canolbwyntio’n bennaf ar gwrdd ag anghenion lleol

 

(c)        i argymell y Strategaeth a Ddewisir Drafft (Atodiad 2 o'r adroddiad) yn ei gyfanrwydd i'r Cyngor, a

 

(d)       cadarnhau eu bod wedi darllen, deall ac wedi ystyried yr Asesiadau o Effaith ar Les (Atodiad 3 yr adroddiad) fel rhan o'i ystyriaethau.

 

Cyflwynodd y Cynghorydd Brian Jones yr adroddiad yn rhoi manylion y Gwaith a wnaed hyd yma ar Gynllun Datblygu Lleol (CDLl) Newydd Sir Ddinbych ac argymhellion y Grŵp Cynllunio Strategol mewn perthynas â’r Strategaeth a Ffafrir Drafft ar gyfer yr CDLl. Byddai’r CDLl Newydd yn darparu polisïau cynllunio cyfoes a dyraniadau safle ar gyfer datblygiadau i fynd i’r afael â materion ac anghenion yn y sir ar gyfer y cyfnod 2018 - 2033. Yn gryno, gosododd y Strategaeth a Ffafrir Ddrafft -

 

Lefelau Twf Arfaethedig Drafft –

 

·         68ha o dir cyflogaeth i ddarparu ar gyfer gofyniad tir a ragwelir- o 47.6ha

·         Tir ar gyfer 3,775 o gartrefi newydd i fodloni gofyniad tai o 3,275 o gartrefi

 

Dull Gofodol Arfaethedig Drafft –

 

·         Canolbwyntio datblygiad ar Safle Strategol Bodelwyddan a’r aneddiadau a wasanaethir: y tair haen uchaf yn yr hierarchaeth aneddiadau (prif ganolfannau, canolfannau lleol a phentrefi) gyda thwf mwy cyfyngedig mewn aneddiadau eraill heb eu gwasanaethu (safleoedd mewnlenwi a safleoedd bach mewn ffiniau datblygu), sy’n canolbwyntio’n bennaf ar fodloni anghenion lleol.

 

Darparodd yr adroddiad rywfaint o gefndir mewn perthynas â sefydlu ac aelodaeth o’r Grŵp Cynllunio Strategol ynghyd â datblygu’r Strategaeth a Ffafrir Ddrafft o ran datblygu opsiynau twf a gofodol a gosod y cyd-destun ar gyfer dynodi faint o dir datblygu oedd yn ofynnol ar gyfer tai a chyflogaeth ac ymhle y dylid lleoli’r datblygiad hwnnw. Cytunodd mwyafrif y Grŵp Cynllunio Strategol i argymell lefelau twf a ffafrir, y dull gofodol arfaethedig a’r ddogfen Strategaeth a Ffafrir Ddrafft gyflawn i’r Cabinet a’r Cyngor. Cefnogodd  y Cadeirydd a chynrychiolydd Grwpiau Ardal Aelodau Elwy y ffigur twf mewn tai ond nid y ffigur tir cyflogaeth felly trwy oblygiad, ni wnaeth hefyd gefnogi’r dull gofodol.

 

Ystyriodd y Cabinet  yr adroddiad a’r argymhellion a roddwyd gerbron gan y Grwpiau Cynllunio Strategol a chanolbwyntiodd y ddadl ar y meysydd canlynol - 

 

·         Cydnabyddodd y swyddogion yr angen i ddarparu ar gyfer safle trosglwyddo Sipsiwn a Theithwyr trwy broses yr CDLl a oedd yn cynnwys nifer o gamau a byddent yn cael eu cynnwys yng ngham yr CDLl i’w archwilio gan y cyhoedd ynghyd â phob dyraniad safle arall.

·         Cyfeiriodd y Cynghorydd Tony Thomas at faterion a godwyd gan rai Grwpiau Ardal Aelodau a theimlai y byddai’n ddarbodus gohirio ystyriaeth o’r eitem i alluogi ar gyfer mynd i’r afael â’r materion hynny a hefyd i adlewyrchu’n well anghenion busnesau bach a oedd yn hollbwysig i economi Sir Ddinbych. Ar wahoddiad y Cadeirydd, y Cynghorydd Emrys Wynne, crynhodd cynrychiolydd Grŵp Ardal Aelodau Rhuthun ar y Grŵp Cynllunio Strategol bryderon Grŵp Ardal Aelodau Rhuthun mewn perthynas â’r gostyngiad potensial yn swm y tir cyflogaeth sydd ar gael yn Rhuthun a’r effaith andwyol dilynol ar yr ardal a ymhelaethwyd ymhellach arni gan y Cynghorydd Huw Hilditch-Roberts. Eglurodd y swyddogion fod ffigurau tir cyflogaeth yn y Strategaeth a Ffafrir Ddrafft wedi rhoi syniad bras o’r lefelau twf arfaethedig  a fu’n seiliedig  ar adroddiad y BE Group a oedd wedi ystyried y safleoedd mewn rhywfaint o fanylder ac esboniwyd y rhesymeg y tu cefn i’r argymhellion o ran safleoedd Rhuthun yng Nglasdir a Lôn Parcwr. Rhoddwyd sicrwydd nad oedd unrhyw ddyraniadau safle’n cael eu cynnig ar hyn o bryd ac os oedd y Strategaeth a Ffafrir Ddrafft yn cael ei chymeradwyo am ymgynghoriad, byddai cyfle am adborth ac i roi gwybod bod gwaith yn mynd rhagddo a cheisiadau gan Grwpiau Ardal Aelodau i ailymweld â’r dyraniad safleoedd cyflogaeth yn cael eu darparu ar eu cyfer. Yn ddiweddar, rhoddodd Grŵp Ardal Aelodau Prestatyn safle cyflogaeth botensial gerbron i’w gynnwys yn yr CDLl a chalonogwyd y Cynghorydd Julian Thompson-Hill nad oedd gwaharddiad i ddod â safleoedd ychwanegol ymlaen yn ddiweddarach i’w hystyried fel rhan o’r broses dyrannu safleoedd ac felly cefnogodd argymhellion y Grŵp Cynllunio Strategol.

·         Heriodd y Cynghorydd Huw Hilditch-Roberts y ffigur twf cyflogaeth arfaethedig a sail y cyfrifiadau a wnaed gan BE Group, yn enwedig mewn perthynas â’r defnydd o gyfraddau cwblhau’r gorffennol na fyddent yn cymharu’n ffafriol yn Rhuthun, ac ystyriodd y dylai dyraniadau fod yn seiliedig ar angen, gan ailadrodd ei bryderon mewn perthynas â cholled potensial tir cyflogaeth sydd ar gael yn Rhuthun heb gynnig unrhyw newid mewn ardaloedd eraill. Cynghorwyd y swyddogion ynghylch yr angen i ymgymryd ag adolygiad o dir cyflogaeth a dynodi gofynion a chlustnodi safleoedd yn yr CDLl oedd yn rhan o’r cam nesaf, o ganlyniad, adolygodd y BE Group argaeledd presennol ac argymhellodd dir i’w gario ymlaen. Ailadroddwyd nad oedd manylion ac argymhellion dyrannu’r safle’n rhan o’r cam presennol yn y broses ond byddai’n cael ei ystyried yn fanwl yn y cam nesaf - nid oedd yr un o’r safleoedd yn cael eu hystyried na’u diystyru ar y cam hwn. Dynododd y Strategaeth a Ffafrif yr anghenion yn Sir Ddinbych a byddai trafodaeth fanylach ar ardaloedd unigol yn digwydd yn nes ymlaen.

·         canolbwyntiodd rhywfaint o’r drafodaeth ar rymuster y broses a ddefnyddiwyd i ymgysylltu aelodau a oedd yn cynnwys sefydlu’r Grŵp Cynllunio Strategol a gadeiriwyd gan y Cynghorydd Brian Jones (Aelod Arweiniol) ac a oedd yn cynnwys Cadeirydd y Pwyllgor Cynllunio ac un cynrychiolydd o bob Grŵp Ardal Aelodau i adrodd a rhoi adborth ar y cyfraniadau gyda’i gilydd gyda dau sesiwn friffio o bob aelod. Gofynnodd y Cynghorydd Mark Young am gadarnhad o ran argymhellion CCA a nodwyd bod y Grŵp wedi pleidleisio o blaid yr argymhellion – 5 o blaid a 2 yn erbyn – nid oedd y Cadeirydd a chynrychiolydd Grŵp Ardal Aelodau Elwy yn cefnogi’r ffigurau tir cyflogaeth. Adroddodd y Cynghorydd Brian Jones ar gyfarfodydd y Grŵp Cynllunio Strategol ac ystyriwyd cyfoeth y dystiolaeth ynghyd â’i farn bersonol mewn perthynas â thwf economaidd a phwysigrwydd busnesau bach. Teimlai’r Cynghorydd Hilditch-Roberts ei bod hi’n bwysig i’r Aelod Arweiniol ac aelodau eraill fod yn gysurus â’r argymhellion a holodd ynghylch yr amserlen ar gyfer cyflawni ac a oedd cwmpas i fynd i’r afael ymhellach â materion eithriadol cyn cyflwyno’r ddogfen i’r Cyngor. Nododd yr Arweinydd, ar wahân i Grŵp Ardal Aelodau Elwy, fod pob cynrychiolydd Grŵp Ardal Aelodau arall ar y Grŵp Cynllunio Strategol wedi pleidleisio o blaid yr argymhellion a byddai cyfle pellach i ddelio â’r materion a godwyd mewn perthynas â dyraniadau safle yn nes ymlaen ac adolygu’r ffigurau tir cyflogaeth ar ôl y cyfnod ymgynghori. Cyfeiriodd y swyddogion hefyd at y Cytundeb Cyflawni sy’n gosod yr amserlen dynn ar gyfer llunio’r CDLl Newydd a gymeradwywyd gan y Cyngor ac yn dilyn hynny, gan Lywodraeth Cymru.

·         Ailadroddodd y Cynghorydd Richard Mainon bwysigrwydd sicrhau’r canlyniad cywir ar y cam hwn a holodd sut roedd adborth o’r ymgynghoriad cynharach wedi dylanwadu ar y cynllun twf a dyrannu tir cyflogaeth o gofio bod y llyw cychwynnol wedi bod ar gyfer Opsiwn 2. Heriodd y newid dilynol mewn cyfeiriad a’r effaith ar Safle Strategol Allweddol Bodelwyddan, yn enwedig o gofio cyflwyno adroddiad BE Group ar gam cymharol hwyr yn y broses a oedd wedi cael effaith sylweddol ar y ffigurau twf a gyflwynwyd. Esboniodd y swyddogion y gwaith cychwynnol a gyflwynwyd gan ystadegydd o Gyngor Bwrdeistref Sirol Conwy ar sail sefyllfaoedd twf a dewisiadau oedd yn gysylltiedig â thwf swyddi a chyfrifiadau gofyniad tir dilynol i ddarparu lefel anghenion sylfaenol ar gyfer dewisiadau twf aelwydydd. Roedd y BE Group wedi ymgymryd â darn o waith gwahanol mewn perthynas ag adolygiad tir cyflogaeth a oedd yn cynnwys ymgynghori  ag asiantau a busnesau ac adroddodd ddymuniad cryf am ofynion twf pellach. Manylwyd ar y sail dystiolaeth ar gyfer y cyfrifiadau lefel twf arfaethedig yn ymwneud â thir cyflogaeth yn adroddiad BE Group a oedd ar gael i bob aelod.

 

Gwahoddodd yr Arweinydd gyflwyniadau/cwestiynau gan bobl nad oeddent yn aelodau Cabinet –

 

·         Adroddodd y Cynghorydd Rhys Thomas, Cynrychiolydd Grŵp Ardal Aelodau Dinbych ar y Grŵp Cynllunio Strategol fod y Grŵp wedi cydweithio’n galed i fod o fantais i Sir Ddinbych i gyd a gellid mynd i’r afael â materion ardal ward unigol ar gam diweddarach yn y broses. Ychwanegodd y byddai agweddau ar y CDLl gyda chysylltiadau â Bargen Twf y Gogledd y dylid eu trafod yn ystod y broses ymgynghori. Roedd yr Arweinydd yn parchu gwaith y Grŵp Cynllunio Strategol ac o ran y fargen twf ranbarthol, cadarnhaodd y potensial am fuddsoddiad enfawr

·         Cyfeiriodd y Cynghorydd Arwel Roberts, Cynrychiolydd Grŵp Ardal Aelodau Elwy ar y Grŵp Cynllunio Strategol at ei ymwneud hwyr yn y Grŵp mewn cyfarfod Grŵp Ardal Aelodau Elwy diweddar a ganolbwyntiodd ar y gofyniad tai ym Modelwyddan a phryderon mewn perthynas â’r 26ha potensial o dir at ddefnydd diwydiannol ac a ystyriwyd safleoedd eraill yn ardal Grŵp Ardal Aelodau Elwy. Esboniodd y swyddogion fod gan Fodelwyddan ganiatâd amlinellol ar hyn o bryd hyd at fis Mawrth 2021 at ddefnyddiau amrywiol gan gynnwys 26ha o dir cyflogaeth a argymhellwyd i’w gario ymlaen i’r CDLl nesaf; cafwyd caniatâd am 1715 o gartrefi ym Modelwyddan oedd heb ddirwyn i ben eto. Wrth fodloni anghenion tai, ystyriwyd caniatâd cynllunio amlinellol a allai ddod gerbron ac yn hynny o beth, ystyriwyd bod caniatáu 400 o unedau yn asesiad rhesymol o ran yr hyn y gellid ei gyflwyno erbyn 2033.

·         Cadarnhaodd y Cynghorydd Graham Timms, Cynrychiolydd Grŵp Ardal Aelodau Dyffryn Dyfrdwy ar y Grŵp Cynllunio Strategol fod y Grŵp Cynllunio Strategol wedi ystyried swm helaeth a chymhleth o wybodaeth a chytunodd gyda’r Cynghorydd Brian Jones mewn perthynas â phwysigrwydd busnesau bach a’r angen am fuddsoddiad yn y maes hwnnw ar draws Sir Ddinbych, gan gynnwys Dyffryn Dyfrdwy. Cadarnhaodd y Cyfarwyddwr Corfforaethol Economi a Thir y Cyhoedd fod potensial am gyllid i’r dyfodol yn codi o Fargen Twf y Gogledd i ariannu safleoedd cyflogaeth yn ardal Dyffryn Dyfrdwy ac ailadroddodd sicrwydd y byddai cyfle i ddwyn ymlaen safleoedd fel rhan o gam i’r dyfodol yn y broses o alluogi i’r buddsoddiad hwnnw ddigwydd

·         Holodd y Cynghorydd Martyn Holland am y potensial i Lywodraeth Cymru ymyrryd o gofio’u rhan nhw yn y broses CDLl diwethaf. Cadarnhaodd y swyddogion  bod ganddynt hyder yn y ffigurau a ddarparwyd a fu’n seiliedig ar y wybodaeth orau oedd ar gael. Roedd pwyslais presennol Llywodraeth Cymru yn seiliedig ar gyflawniadwyedd a byddai adborth Llywodraeth Cymru’n cael ei ofyn amdano fel rhan o’r broses ymgynghori.

 

Ystyriodd y Cabinet argymhellion y Grŵp Cynllunio Strategol fel y manylir arnynt yn yr adroddiad a ph’un ai i’w hargymell i’r Cyngor. Cytunwyd pleidleisio o blaid pob argymhelliad ar wahân o ran eglurder ac yn dilyn hynny –

 

PENDERFYNWYD bod y Cabinet yn argymell argymhellion y Grŵp Cynllunio Strategol i’r Cyngor mewn perthynas â’r Strategaeth a Ffafrir yr CDLl Newydd Drafft fel a ganlyn –

 

(a)       Lefelau Twf Arfaethedig Drafft:

 

68ha o dir cyflogaeth  i ddarparu ar gyfer gofyniad tir amcanol o 47.6ha

Tir ar gyfer 3,775 o gartrefi newydd i ddiwallu gofyniad tai o 3,275 o gartrefi

 

(b)       Dull Gofodol Arfaethedig Drafft:

 

Ar sail Opsiwn 3 – canolbwyntio datblygiad yn Safle Strategol Bodelwyddan ac aneddiadau a wasanaethir: y tair haen uchaf yn yr hierarchaeth aneddiadau (prif ganolfannau, canolfannau lleol a phentrefi) gyda thwf mwy cyfyngedig mewn aneddiadau eraill nad oeddent yn cael eu gwasanaethu (safleoedd mewnlenwi a bach mewn ffiniau datblygu), sy’n canolbwyntio’n bennaf ar fodloni anghenion lleol

 

(c)        argymell y Strategaeth a Ffafrir Ddrafft (Atodiad 2 i’r adroddiad) yn ei chyfanrwydd i’r Cyngor, a

 

(d)       chadarnhau ei fod wedi darllen, deall ac ystyried yr Asesiadau o Effaith ar Les (Atodiad 3 yr Adroddiad) fel rhan o’i ystyriaeth.

 

Cofnodwyd y pleidleisiau ar gyfer pob un o’r argymhellion uchod fel a ganlyn –

 

(a)       Y Cynghorwyr Hugh Evans, Bobby Feeley, Brian Jones, Julian Thompson-Hill a Mark Young – O BLAID

            Y Cynghorydd Richard Mainon – YN ERBYN

            Y Cynghorwyr Huw Hilditch-Roberts a Tony Thomas – DIM PLEIDLAIS

 

(b)       Y Cynghorwyr Hugh Evans, Bobby Feeley, Huw Hilditch-Roberts, Julian Thompson-Hill a Mark Young – O BLAID

            Y Cynghorydd Richard Mainon – YN ERBYN

            Y Cynghorwyr Brian Jones a Tony Thomas – DIM PLEIDLAIS

 

(c)        Y Cynghorwyr Hugh Evans, Bobby Feeley, Huw Hilditch-Roberts, Brian Jones, Tony Thomas, Julian Thompson-Hill a Mark Young – O BLAID

            Y Cynghorydd Richard Mainon – YN ERBYN

 

(d)       PAWB O BLAID.

 

Gohiriwyd y cyfarfod yn y fan hon (11.30 a.m.) am egwyl lluniaeth.