Eitem ar yr agenda

Derbyn a chymeradwyo’r adroddiad blynyddol drafft i’w ystyried yn y cydbwyllgor craffu BGC agoriadol ym mis Mai 2019. Bydd yr eitem hon hefyd yn cynnwys diweddariad ar y blaenoriaethau, adolygiad o aelodaeth BGC a thrafodaeth o flaenoriaethau’r dyfodol.

Fran Lewis a Hannah Edwards (Cyngor Bwrdeistref Sirol Conwy)

2.40 p.m. – 3.10 p.m.

Cyflwynodd Fran Lewis, Rheolwr Perfformiad a Gwelliant Corfforaethol (CBSC) yr adroddiad blynyddol drafft (a ddosbarthwyd yn flaenorol).

Lluniwyd yr adroddiad i roi trosolwg bras o’r hyn sydd wedi’i gyflawni ers cyhoeddi cynllun lles y Bwrdd Gwasanaethau Cyhoeddus ym mis Ebrill 2018. Roedd rhaid sicrhau bod y Bwrdd Gwasanaethau Cyhoeddus yn atebol i’r cyhoedd ac yn gallu adlewyrchu ar y meysydd yr oedd yn gwneud gwahaniaeth ynddynt yn unol â’r pum ffordd o weithio, ynghyd ag amlinellu'r cyfeiriad ar gyfer y dyfodol.

Eglurwyd y byddai’r adroddiad blynyddol drafft yn cael ei gyflwyno i’r Cydbwyllgor Craffu ym mis Mai cyn cael ei ail gyflwyno ger bron y Bwrdd Gwasanaethau Cyhoeddus ym mis Mehefin er mwyn cael ei gymeradwyo’n derfynol.  

Cafwyd trafodaeth bellach a chodwyd y pwyntiau canlynol:

·         Ystyriwyd aelodaeth y Bwrdd fel rhan o’r gwaith wrth symud ymlaen. Awgrymwyd y dylid gwahodd cynrychiolwyr o Barc Cenedlaethol Eryri i ymuno â’r Bwrdd, yn ogystal â chynrychiolwyr o’r Adran Tai ac Adfywio. Nodwyd, pe bai cynrychiolydd o'r Parc Cenedlaethol yn cael ei wahodd, byddai’n rhaid cynnwys cynrychiolydd o AHNE. Hysbyswyd y Bwrdd bod Cynghorau Tref a Chymuned hefyd wedi gofyn i gael cynrychiolydd ar y Bwrdd. Mynegwyd pryder y gallai aelodaeth gynyddu’n ormodol ac felly ni fyddai gan y Bwrdd fodel darparu effeithiol.  Cytunodd yr aelodau i adolygu aelodaeth yn ffurfiol yn ystod y cyfarfod nesaf.

·         Newid y rolau arweiniol ar gyfer y meysydd blaenoriaeth – roedd rhai aelodau o’r farn y byddai’n amser delfrydol i aelodau’r Bwrdd, sy’n arbenigwyr o fewn eu meysydd, gyflawni’r blaenoriaethau priodol.  Cytunwyd y bydd Cyfoeth Naturiol Cymru yn arwain ar flaenoriaeth yr amgylchedd a bydd Iechyd Cyhoeddus Cymru / Bwrdd Iechyd Prifysgol Betsi Cadwaladr yn arwain ar y flaenoriaeth lles meddyliol.  Bydd Cyngor Sir Ddinbych yn parhau i arwain y flaenoriaeth ymrymuso'r gymuned gyda chefnogaeth Cyngor Gwasanaethau Gwirfoddol Sir Ddinbych a Chyngor Gwasanaethau Gwirfoddol Conwy.

·         Nodwyd nad oedd y ffaith ein bod yn Fwrdd agored ar gyfer y cyhoedd wedi’i chyfleu yn ddigon amlwg yn yr adroddiad.

·         Awgrymwyd y dylid cynnwys y cyfeiriad ar gyfer y 12 mis nesaf o fewn yr adroddiad.

·         Gofynnodd Helen Wilkinson (Cyngor Gwasanaethau Gwirfoddol Sir Ddinbych) i gael golygu’r elfen ddementia yn y flaenoriaeth ymrymuso'r gymuned.

• Mewn perthynas â’r elfen ddigartrefedd yn y flaenoriaeth ymrymuso'r gymuned, gofynnodd y Bwrdd i gael mwy o wybodaeth am y sefyllfa yng Nghonwy a Sir Ddinbych yn ystod cyfarfod yn y dyfodol.

·         Tynnu’r cyfeiriad at flaenoriaethau Comisiynydd Cenedlaethau’r Dyfodol.

·         Er mwyn sicrhau bod yr adroddiad yn amlinellu’r gwahaniaeth yr oedd y Bwrdd yn ei wneud, awgrymwyd y dylid cynnwys diagram i ddangos i ble yr oedd y llwybr yn arwain ac yr hyn yr oeddem eisiau ei gyflawni (os yn bosib yn y cylch hwn o adroddiadau).

Ar y pwynt hwn, dywedodd Sian Williams (Cyfoeth Naturiol Cymru) wrth yr aelodau eu bod yn dilyn dull rhanbarthol o ran Newid Hinsawdd. Bydd y dull hwn yn ddefnyddiol i ddysgu oddi wrth ein gilydd ac i sicrhau nad yw gwaith yn cael ei ddyblygu. Trwy’r dull hwn bydd hefyd cyfle i gymharu â Byrddau Gwasanaethau Cyhoeddus eraill.  Cadarnhaodd y byddai’n cyflwyno’r cynlluniau, y syniadau a’r wybodaeth ar y gwaith sy’n cael ei wneud ar newid hinsawdd ar hyn o bryd gan Fwrdd Gwasanaethau Cyhoeddus Gwynedd a Môn, mewn cyfarfod yn y dyfodol.

Cadarnhaodd y Cadeirydd y byddai’r newidiadau a geisiwyd yn cael eu gwneud i’r adroddiad blynyddol drafft a byddai’r fersiwn ddiwygiedig yn cael ei dosbarthu i Aelodau’r Bwrdd er mwyn iddynt roi eu sylwadau.  Oherwydd terfynau amser, byddai dyddiad cau yn cael ei osod ar gyfer unrhyw ddiwygiad gan y Bwrdd, cyn cyflwyno’r adroddiad i’r Pwyllgorau Craffu.

PENDERFYNWYD

 (i)        diwygio Adroddiad Blynyddol Drafft 2018/2019 Bwrdd Gwasanaethau Cyhoeddus Conwy a Sir Ddinbych cyn ei ddosbarthu i Aelodau’r Bwrdd a’i gyflwyno i’r Pwyllgor Craffu.

 (ii)       adolygu aelodaeth yn ffurfiol yn ystod y cyfarfod  nesaf.

 (iii)      y bydd Cyfoeth Naturiol Cymru yn arwain ar flaenoriaeth yr amgylchedd a bydd Iechyd Cyhoeddus Cymru / Bwrdd Iechyd Prifysgol Betsi Cadwaladr yn arwain ar y flaenoriaeth lles meddyliol.

 (iv)      y bydd yr wybodaeth ddiweddaraf am ddigartrefedd yn cael ei darparu mewn cyfarfod yn y dyfodol.