Eitem ar yr agenda
GWASANAETHAU TAI
I ystyried canfyddiadau Adolygiad Swyddfa Archwilio Cymru o Safbwynt y Defnyddiwr Gwasanaeth (copi ynghlwm) a gynhaliwyd fis Awst 2018.
Cofnodion:
Cyflwynodd Aelod Arweiniol Tai, Adfywio a’r Amgylchedd adroddiad ar y cyd
gan Swyddog Arweiniol Tai Cymunedol a Swyddog Arweiniol Eiddo Corfforaethol a'r
Stoc Dai (a gylchredwyd eisoes). Roedd yr adroddiad yn cyflwyno ymateb y Cyngor
i ganfyddiadau Adolygiad Safbwynt Defnyddwyr Gwasanaeth Swyddfa Archwilio Cymru
a gyhoeddwyd mis Awst 2018, o safbwynt Safon Ansawdd Tai Cymru, a gwaith yr
Awdurdod gyda thenantiaid.
Yn ystod ei gyflwyniad, diolchodd yr Aelod Arweiniol i'r Pwyllgor am y
cyfle i ymateb i’r ddau gynnig am welliant gan Swyddfa Archwilio Cymru yn dilyn
ei adolygiad. Tynnodd yr Aelod Arweiniol sylw aelodau at ganlyniadau Arolwg
Tenantiaid a Thrigolion 2019 (Atodiad 3 yr adroddiad) lle nodwyd cyfradd
fodlonrwydd o 90% yn ymateb i’r cwestiwn am safon cyffredinol eu cartref, sy'n
hynod foddhaol.
Atgoffodd Swyddog Arweiniol Tai Cymunedol y
Pwyllgor bod Cyngor Sir Ddinbych wedi cyflawni Safon Ansawdd Tai Cymru (WHQS),
ond roedd gwaith cynnal a gwella stoc dai’r Cyngor yn parhau ar raddfa lai na’r
hyn oedd ei angen i gyflawni'r WHQS. Gan gyfeirio at Adolygiad Defnyddwyr Gwasanaeth Swyddfa
Archwilio Cymru, dywedodd Swyddog Arweiniol Tai Cymunedol fod y Swyddfa
Archwilio wedi cynnal cyfweliadau stepen drws gyda 122 o denantiaid allan o
gyfanswm o 3,385 o denantiaid tai’r Awdurdod. Roedd yr arolwg wedi dod i’r casgliad y dylai’r Cyngor:
·
ddarparu help i’r rheiny
oedd yn profi lleithder neu gartrefi nad oeddynt wedi eu gwresogi’n ddigonol,
yn effeithiol o ran ynni, neu wedi eu hinswleiddio’n dda, ac
·
adolygu effaith hir dymor
diwedd y gwasanaeth warden preswyl o’i gynlluniau tai gwarchod
O safbwynt lleithder ac effeithlonrwydd ynni'r cartrefi, dywedodd y Swyddog
Arweiniol ei bod yn bwysig deall bod 23% o'r tenantiaid a arolygwyd gan Swyddfa
Archwilio Cymru wedi dweud eu bod yn dioddef o broblemau “lleithder a
chyddwysiad”, fodd bynnag nid oedd Swyddfa Archwilio Cymru wedi gwneud unrhyw
ymchwiliadau pellach i broblemau tenantiaid na ffynonellau’r problemau hynny .
Roedd arolwg tebyg wedi ei gynnal yn ardaloedd Awdurdodau Lleol eraill
Gogledd Cymru, roedd y maint sampl yn Ynys Môn yn debyg i un Sir Ddinbych ac
roedd 37% yno wedi nodi eu bod yn profi problemau tebyg. Dywedodd y Pennaeth
Gwasanaeth bod posibilrwydd fod problemau cyddwysiad yn cael eu hachosi gan nad
oedd cartref yn cael ei gynhesu yn ddigonol, drwy ddefnydd aneffeithiol neu
anrheolaidd o'r system wresogi, ac / neu fod y preswylydd ddim yn defnyddio
mesurau awyru digonol.
Er mwyn darparu cymorth a chyngor i denantiaid roedd y Cyngor wedi
cynhyrchu taflen wybodaeth (Atodiad 2 i’r adroddiad) ar sut i osgoi cyddwysiad
yn y cartref . Roedd hefyd,
mewn partneriaeth gyda Chyngor ar Bopeth Sir Ddinbych, wedi trefnu ymgynghorydd
penodedig i gefnogi tenantiaid cyngor o ran problemau tlodi tanwydd, lleithder
a chyddwysedd.
Os oedd lleithder yn broblem, gellid gwneud gwaith strwythurol i fynd i’r
afael â’r broblem. Gan fod Sir Ddinbych wedi cyflawni Safon Ansawdd
Tai Cymru byddai digon o wres ym mhob un o’r tai a adnewyddwyd o dan y rhaglen,
ac ni fyddai problemau lleithder ynddynt. Dywedodd y Pennaeth
Gwasanaeth ei bod yn arbennig o braf nodi bod yr arolwg Tenantiaid a Thrigolion
wedi graddio Gwasanaeth Tai Sir Ddinbych fel y prif awdurdod lleol yng Nghymru
ar gyfer ‘ansawdd cyffredinol y cartref' ac ar gyfer y ffordd mae'r Gwasanaeth
yn mynd i'r afael â gwaith atgyweirio a chynnal a chadw.
Wrth ymateb i gwestiynau aelodau o safbwynt y
cynnig gwelliant yn ymwneud â lleithder a gwresogi, fe wnaeth yr Aelod
Arweiniol a swyddogion:
·
gadarnhau bod gwaith
cynnal a chadw Safon Ansawdd Tai Cymru wedi ei ariannu yn bennaf drwy gyllid
Llywodraeth Cymru (LlC) a drwy incwm rhenti a dderbyniodd y Cyngor gan ei
denantiaid.
Fodd bynnag, wrth symud ymlaen, amcan Sir Ddinbych oedd
sicrhau bod safon ei waith ailwampio o safon uwch na Safon Ansawdd Tai Cymru.
·
amlygu bod yr arolwg
Tenantiaid a Thrigolion wedi nodi'r angen i sicrhau ei bod yn bwysig i
denantiaid, yn ogystal â chael tai braf i fyw ynddynt, deimlo fod eu cymdogaeth
yn lle braf i fyw. Ar ôl cyflawni Safon
Ansawdd Tai Cymru, roedd peth o'r gwaith oedd yn cael ei wneud o ran y stoc dai
yn canolbwyntio ar waith amgylcheddol ac allanol, hynny yw, gwrychoedd, ffensio
ac ati. Er ei bod weithiau’n anodd
sicrhau ffensys a ffiniau unffurf ar ystadau, yn arbennig pan oedd llawer o’r
tai wedi eu gwerth a bellach o dan berchnogaeth breifat gan nad oedd pob
perchennog preifat eisiau newid eu ffensio;
·
sicrhau bod y Cyngor bob
amser yn gosod y systemau diweddaraf pan fyddent yn uwchraddio systemau
gwresogi yn y cartrefi.
Ni fyddai cypyrddau cynhesu yn cael eu gwaredu os oeddynt
eisoes yn bodoli, yn hytrach byddai gwresogydd cefndir newydd yn cael ei osod
yn lle’r hen danc dŵr poeth ar gyfer awyru dillad ac ati. Fodd bynnag,
doedd dim lle yn rhai o dai llai y Cyngor ar gyfer cwpwrdd cynhesu. Byddai’r tai oedd yn perfformio waethaf o ran ynni yn cael eu clustnodi er
mwyn derbyn systemau gwresogi newydd yn gyntaf gan mai’r tenantiaid yno
fyddai'n elwa fwyaf o dderbyn uwchraddiad;
·
derbyn pe byddai
tenantiaid yn gwrthod uwchraddio eu systemau gwresogi, a allai olygu y byddai’r
Cyngor yn methu cyflawni'r targed roedd wedi ei osod i'w hun yn y Cynllun
Corfforaethol, y gellid cael darpariaeth i gategoreiddio hyn fel 'methiant
derbyniol' gan y byddai'r awdurdod wedi gwneud pob ymdrech i gyflawni'r targed.
·
disgwylir y byddai’r tai
cyngor newydd arfaethedig sydd i’w hadeiladu yn y dyfodol agos mor effeithlon o
ran ynni na fyddai angen gosod system wresogi annibynnol;
·
cadarnhau bod ffaniau
echdynnu yn cael eu gosod fel arfer pan fyddai eiddo yn cael eu hailwampio;
·
cynghori bod y rhan fwyaf
o dai y mae’r Cyngor yn eiddo arnynt wedi derbyn bwyler gwres canolog newydd o
fewn yr 8 mlynedd diwethaf;
·
sicrhau bod Swyddogion Tai
yn ymdrin â materion gorfodi, fel gwrychoedd wedi gordyfu, a gerddi blêr ac ati
bob dydd fel rhan o’u dyletswyddau dyddiol; a
·
cynghori y byddai rôl y
Swyddogion Tai yn newid o Ebrill 2019, mewn ymgais i wrando yn well ar
denantiaid a gweithredu ar eu pryderon. O'r dyddiad hwn ymlaen byddai
tenantiaid yn cysylltu ag un swyddog ar gyfer pob ymholiad tai a thenantiaid. Byddai Swyddogion Tai yn ymweld â chanolfannau cymunedol yn rheolaidd er
mwyn cwrdd tenantiaid, ac os na fyddai canolfannau cymunedol ar gael byddent yn
ymweld â’r ystadau mewn fan i gwrdd trigolion ac ateb ymholiadau. Maes o law byddai Cynghorwyr yn cael gwybod pwy yw’r Swyddog(ion) Tai ar
gyfer eu hardal
Llongyfarchodd aelodau’r Pwyllgor y Gwasanaeth Tai am y daflen gyngor ar osgoi
cyddwysedd, roeddynt yn teimlo y byddai’r daflen yn ddefnyddiol i bob aelwyd yn
y sir. Yn ddiweddar
roedd nifer o aelodau wedi ymweld â’r tai Cyngor oedd wedi eu hailwampio yn eu
wardiau a nodwyd eu bod yn edmygu safon y gwaith ailwampio a wnaed.
O safbwynt ail gynnig Swyddfa Archwilio Cymru ar gyfer gwelliant, sef
adolygu effaith hirdymor dwyn y gwasanaeth warden i drigolion yn ei gynlluniau
llety gwarchod i ben, pwysleisiodd Swyddog Arweiniol Tai Cymunedol bod y Cyngor
yn llwyr ddeall bod y wardeiniaid yn
cael eu gwerthfawrogi gan y tenantiaid a'u bod yn hoff iawn o'r wardeiniaid,
fodd bynnag yn y blynyddoedd diweddar roedd eu presenoldeb wedi bod yn fwy o
dawelwch meddwl nag unrhyw beth arall.
Gyda’r newid ffocws o ran darpariaeth gofal cymdeithasol i fod ar
ail-alluogi a hyrwyddo annibyniaeth, roedd y potensial gan bresenoldeb
wardeiniaid mewn llety i wneud i rhai drigolion fod yn fwy ynysig ac yn llai
tebygol o geisio rhyngweithiad cymdeithasol. O dan y Rhaglen Byw’n Annibynnol (SIL) gallai darpariaeth
gymdeithasol wedi’i dargedu gael ei rannu ar draws y sir, ymysg trigolion yn
byw mewn llety Cyngor, llety rhent preifat neu yn eu heiddo eu hunain, a
gallent oll gael mynediad cyfartal i’r gwasanaethau roeddynt eu hangen. O dan y Rhaglen Byw’n
annibynnol mae rhai trigolion o’r cyn adeiladau tai gwarchod yn trefnu eu
digwyddiadau cymdeithasol eu hunain yn y canolfannau cymunedol ger yr eiddo,
roedd hyn yn lleihau'r risg o arwahanrwydd cymdeithasol.
Eglurodd y Rheolwr Gwasanaeth: Ardaloedd (Gwasanaethau Cymorth Cymunedol) y broses
trawsnewid a ddilynwyd ar gyfer y tenantiaid tai gwarchod hynny oedd wedi nodi
‘anghenion’, a amlinellir yn Atodiad 4 yr adroddiad. Dywedodd o'r 66 o
drigolion oedd wedi derbyn cymorth drwy'r gwasanaeth SIL, dim ond dau oedd wedi
cwyno, roedd un angen cymorth ychwanegol ac fe ddarparwyd y cymorth hwnnw maes
o law.
Roedd y gwasanaeth SIL yn dal i gefnogi tua 15 o denantiaid, ond roedd y
mwyafrif o denantiaid mewn cyn lety gwarchod bellach yn niwtral o ran deiliadaeth. Yn y dyfodol agos
byddai’r Gwasanaeth SIL yn cael ei alinio gyda’r Gwasanaeth Ail-alluogi.
Byddai’r rôl newydd ar gyfer y Swyddogion Tai o Ebrill 2019 yn cynnwys
penodi un hanner diwrnod yr wythnos yn gweithio yn un o'r cyn adeiladau tai
gwarchod yn eu hardal er mwyn cefnogi, helpu a chynghori’r tenantiaid. Byddai'r holl
denantiaid mewn cyn gynlluniau tai gwarchod yn cael ymweliad gan Swyddog Tai o
leiaf unwaith y flwyddyn.
Yn
ogystal, roedd gwaith yn mynd rhagddo i archwilio’r posibilrwydd o gyflwyno
gwasanaeth ‘gofalwr symudol’ er mwyn gwneud gwaith cynnal a chadw ysgafn yn y
canolfannau cymunedol ar safleoedd yng nghyn adeiladau’r llety gwarchod. Byddai’r ddarpariaeth cynnal a chadw, y byddai tâl
gwasanaeth yn cael ei godi amdano fel rhan o’r rhent, yn bresenoldeb ar y safle
ar sail cylchdro er mwyn cysylltu gyda thrigolion a'u cynorthwyo gyda mân
dasgau cynnal a chadw. Pe byddai hynny
yn bosib byddai angen ymgynghori gyda thenantiaid ar y cynnig cyn ei gyflwyno.
Gan ymateb i gwestiynau gan yr Aelodau, dywedodd y
swyddogion:
·
mai un o’r heriau mwyaf i
swyddogion o’r Gwasanaeth Tai a’r Gwasanaethau Cymorth Cymunedol oedd perswadio
pobl i fynychu digwyddiadau cymdeithasol ac ati a gweld hynny fel ffordd o
wella eu lles ac ansawdd eu bywyd;
·
bod perthynas weithio’r
Cyngor gydag Age Connect yn hynod lwyddiannus, roedd yn cynnal y gwasanaeth
Hwylusydd Cymunedol, gwasanaeth oedd yn cael ei ariannu gan y Gronfa Gofal
Integredig. Roedd yn braf bod arian y
Gronfa Gofal Integredig ar gyfer y Gwasanaeth wedi ei gadarnhau yn ddiweddar ar
gyfer 2019/20
Ar ddiwedd trafodaeth drylwyr:
Penderfynwyd: yn amodol ar y sylwadau
uchod -
(i)
derbyn y wybodaeth
a gyflwynwyd a chefnogi ymdrechion y Gwasanaeth Tai a’r Gwasanaethau Cymorth
Cymunedol i fynd i’r afael â’r ddau gynnig o ran gwelliant sy’n ymwneud â
thenantiaid y Cyngor yn codi o Adolygiad Safbwynt Defnyddwyr Gwasanaeth Swyddfa
Archwilio Cymru - Safon Ansawdd Tai Cymru; a
(ii)
bod Adroddiad Gwybodaeth yn cael ei ddarparu i’r Pwyllgor yn haf 2020 wedi
‘Adolygu effeithiolrwydd y model gweithio newydd ar gyfer Swyddogion Tai'.
Dogfennau ategol:
- Housing Services WAO Review Report 210319, Eitem 5. PDF 211 KB
- Housing Services WAO Review Report 210319 - App 1, Eitem 5. PDF 593 KB
- Housing Services WAO Review Report 210319 - App 2, Eitem 5. PDF 603 KB
- Housing Services WAO Review Report 210319 - App 3, Eitem 5. PDF 171 KB
- Housing Services WAO Review Report 210319 - App 4, Eitem 5. PDF 237 KB
- Housing Services WAO Review Report 210319 - App 5, Eitem 5. PDF 276 KB