Eitem ar yr agenda
ADRODDIAD BLYNYDDOL AR DDIOGELU OEDOLION YN SIR DDINBYCH 1 EBRILL 2017 - 31 MAWRTH 2018
- Meeting of Pwyllgor Craffu Partneriaethau, Dydd Iau, 20 Medi 2018 10.00 am (Item 5.)
- View the declarations of interest for item 5.
Ystyried adroddiad gan Rheolwr Tîm Diogelu Oedolion Diamddiffyn (copi
ynghlwm) i roi trosolwg o effaith trefniadau ac arferion Diogelu Lleol ac
adolygu’r cynnydd yn y maes gwaith allweddol hwn dros y deuddeg mis diwethaf.
10:05 a.m. – 10:50 a.m.
Cofnodion:
Yn absenoldeb yr
Aelod Arweiniol Lles ac Annibyniaeth, cyflwynodd y Pennaeth Gwasanaethau Cymorth Cymunedol Adroddiad Blynyddol y Rheolwr Tîm: Diogelu ar
Ddiogelu Oedolion yn Sir Ddinbych am y cyfnod 1 Ebrill 2017 hyd at 31 Mawrth 2018, yr oedd copïau
ohono wedi’i gyhoeddi a’i ddosbarthu
cyn cyfarfod y Pwyllgor.
Yn ystod ei gyflwyniad hysbysodd y Pennaeth Gwasanaeth yr aelodau fod
yr adroddiad, ei fformat wedi'i
ddiwygio yn unol ag awgrymiadau blaenorol a wnaed gan y Pwyllgor, yn amlinellu'r gofynion deddfwriaethol yn ymwneud â diogelu,
y gwelliannau a gyflawnwyd yn ystod y flwyddyn
mewn perthynas â chysondeb ac ansawdd y gwaith diogelu a'r prosesau sydd
ar waith i fynd i'r afael
ag unrhyw bryderon diogelu a ddygwyd i sylw'r Cyngor, ynghyd â manylion nifer yr atgyfeiriadau
a dderbyniwyd yn y sir yn ystod 2017-18. Fel yn y blynyddoedd blaenorol, ac yn unol â'r duedd
genedlaethol, roedd nifer yr atgyfeiriadau
amddiffyn oedolion wedi cynyddu yn
ystod 2017-18. Serch hynny, roedd y cynnydd o 8% yn 2017-18 o'i gymharu â 2016-17 yn sylweddol is na'r cynnydd o 48% a gofnodwyd yn 2016-17 o'i gymharu â 2015-16. Manylodd y Pennaeth Gwasanaeth
ar y 'penawdau diogelu ar gyfer
2017-18' a restrwyd yn yr adroddiad yn
cynghori aelodau, mewn ymateb i bryderon
a godwyd gan Arolygiaeth Gofal Cymru (CIW) ar ansawdd cofnodion cyfarfodydd strategaeth a'u potensial i ddarparu llwybr archwilio digonol, bod gwelliannau sylweddol wedi’u gwneud mewn
perthynas â'r agwedd hon o'r gwaith, gyda chofnodion
nawr yn cynnwys
tystiolaeth o ganlyniadau ffurfiol a chynlluniau gweithredu gyda'r amserlenni cytunedig ar gyfer eu
cwblhau.
Sicrhaodd y Pennaeth Gwasanaeth
y Pwyllgor nad oedd perfformiad y Cyngor yn erbyn
yr unig ddangosydd
perfformiad cenedlaethol
(DP) yn ymwneud â diogelu oedolion - y nifer o ymholiadau a gwblhawyd o fewn 7 diwrnod gwaith - a oedd yn 67% oedd
y perfformiad 'gorau' na 'gwaethaf' yng
Nghymru. Pwysleisiodd fod y dangosydd hwn yn cwmpasu
pob agwedd ar ddelio â'r
ymholiad, gan gynnwys casgliad yr holl dasgau
gweinyddol a oedd yn dibynnu
i raddau ar sefydliadau partner yn cwblhau eu gwaith
papur a'u cyflwyno i'r Cyngor
ar amser. Roedd yn bwysig
deall hynny, er nad oedd perfformiad y Cyngor mewn perthynas
â'r DP yn ymddangos yn dda,
blaenoriaeth y Cyngor oedd sicrhau diogelwch
yr unigolyn diamddiffyn. Pe bai tystiolaeth
i awgrymu bod unigolyn mewn perygl o unrhyw
fath o niwed, byddai camau'n cael eu cymryd
ar y diwrnod y daeth y dystiolaeth i'r amlwg. Cyn
ymateb i gwestiynau'r aelodau, eglurodd y Pennaeth Gwasanaeth y gofynion o ran y Trefniadau Diogelu rhag Colli
Rhyddid (DoLS) a goblygiadau posib y diwygiad a gynigiwyd ym Mesur newydd
Galluedd Meddyliol y DU (Diwygiad) (MCA Bill) ar DoLS, a fydd yn
eu gweld yn cael eu
disodli gan gynllun o’r enw
Trefniadau Diogelu Rhyddid. Roedd perfformiad Sir Ddinbych mewn perthynas â gweithgarwch DoLS yn ystod 2017-18 yn unol ag
awdurdodau lleol eraill yng Nghymru.
Ymhelaethodd hefyd ar amcanion allweddol
y Cyngor mewn perthynas â diogelu oedolion ar gyfer
y flwyddyn adrodd gyfredol.
Wrth ymateb i gwestiynau'r
Pwyllgor, dywedodd y Pennaeth Gwasanaeth a'r Rheolwr Tîm:
Diogelu y canlynol:
·
cadarnhawyd bod cyflwyno Deddf
Gwasanaethau Cymdeithasol a
Lles (Cymru) 2014 a'i phrosesau cysylltiedig
mewn perthynas â diogelu wedi cyfrannu
at y cynnydd yn nifer yr atgyfeiriadau
diogelu yn ystod y blynyddoedd diwethaf. Derbyniwyd yn eang hefyd
fod gwybodaeth gyhoeddus a chanfyddiad o'r hyn a oedd
yn ymyrru ar fywyd person diamddiffyn a'u hawliau wedi arwain
at gynnydd mewn atgyfeiriadau hefyd;
·
cynghorwyd y gallai 'ansawdd' atgyfeiriad diogelu oedolion i'r Cyngor hefyd
effeithio ar allu'r Awdurdod i gwrdd â'r dyddiad cau ar gyfer 7 diwrnod gwaith
ar gyfer cwblhau ymchwiliad, oherwydd os darperir gwybodaeth annigonol, mae
angen gwneud ymholiadau ychwanegol cyn i'r ymchwiliad ddechrau. Byddai unrhyw
awgrym y bu gweithred droseddol wedi ei gwneud yn golygu bod yn rhaid i'r
Heddlu gwblhau ei ymchwiliad cyn y gallai'r Cyngor orffen ei ymchwiliad. O
ganlyniad, ni fyddai'r targed 7 diwrnod yn cael ei fodloni, yn enwedig mewn
achosion cymhleth a'r rheiny a oedd yn cynnwys sefydliadau partner. Serch
hynny, byddai camau diogelu wedi cael eu cychwyn i symud y person diamddiffyn
allan o niwed pe bai unrhyw dystiolaeth gychwynnol yn awgrymu eu bod yn destun
unrhyw fath o gamdriniaeth, er enghraifft, corfforol, meddyliol, emosiynol,
ariannol ac ati;
·
hysbyswyd yr aelodau fod
y Cyngor wedi ymrwymo i wella perfformiad yn erbyn DP Llywodraeth Cymru (LlC) ac roedd yn awyddus
i gwblhau 85% o ymholiadau a dderbyniwyd
o fewn y targed 7 diwrnod gwaith, o'i gymharu â'r
67% presennol, a lle nad oedd hynny'n
bosibl byddai’r mecanwaith cofnodi cadarn a sefydlwyd yn casglu’r rhesymau
dros beidio â chydymffurfio â'r DP. Roedd pob awdurdod
yn cydnabod na fyddai modd
cydymffurfio fyth â 100% o fewn y targed
7 diwrnod gwaith oherwydd cymhlethdodau a natur y gwaith dan sylw. Serch
hynny, roedd Bwrdd Diogelu Gogledd
Cymru, gyda’i aelodaeth yn cynnwys
cynrychiolwyr o'r holl asiantaethau sy'n delio â materion
diogelu, yn ymrwymedig i wella perfformiad a hwyluso perthnasoedd gwaith gwell a chyflymach rhwng asiantaethau. Gyda’r amcan o wireddu'r uchelgais hon, roedd wedi cyhoeddi
canllawiau i asiantaethau ar sut y gallent
weithio gyda'i gilydd i wella perfformiad a sicrhau canlyniadau gwell i unigolion diamddiffyn sydd mewn perygl;
·
cadarnhawyd, er bod un o'r
astudiaethau achos a gynhwyswyd yn yr
adroddiad yn canolbwyntio ar honiad o gam-drin ariannol mewn perthynas
ag 'Atwrneiaeth Arhosol', nad oedd y math yma o gam-drin yn fwy cyffredin
yn y blynyddoedd diwethaf nag y bu rhai blynyddoedd yn ôl;
·
sicrhawyd yr aelodau nad oedd y ffaith
bod 'gweithwyr cyflogedig' yn cyfrif am 69% o'r unigolion a gafodd honiadau o gam-drin oedolion diamddiffyn
wedi’u gwneud yn eu herbyn
yn frawychus, gan fod ‘gweithwyr
cyflogedig' yn gweithio mewn gwasanaeth
a reolir yn fanwl ac sydd â gweithdrefnau llym i'w dilyn os
gwnaed honiad. Roedd y gweithwyr hyn ar adegau
yn cefnogi eu cleientiaid mewn sefyllfaoedd agos felly roeddent mewn perygl o gael honiadau yn eu herbyn.
Cafodd pob honiad ei ymchwilio'n
drylwyr. Pe nodwyd patrymau o honiadau neu bryderon
byddai Staff Comisiynu'r Cyngor yn rhoi
statws pryderon cynyddol i’r darparwyr
ac yn eu monitro'n agos. Hyd nes bod unrhyw
ddiffygion wedi'u cywiro ni fyddai'r
Cyngor yn rhoi preswylwyr newydd yn y sefydliadau
hynny nac yn comisiynu unrhyw
wasanaethau pellach gan y darparwr hwnnw;
·
cadarnhawyd pe bai honiad
o gam-drin yn erbyn gofalwr neu
aelod o staff y darparwr gofal iechyd wedi
cael ei brofi,
byddai’r gwiriadau Gwasanaeth Datgelu a Gwahardd (DBS) yn eu gwahardd rhag
cael eu cyflogi
yn y sector gofal a gwasanaethau iechyd yn y dyfodol. Disgwylir
i system gofrestru genedlaethol
ar gyfer pob gweithiwr gofal
gael ei
lansio cyn bo hir. O dan
y system hon, byddai unrhyw
weithiwr gofal a oedd wedi cael
honiadau o gam-drin wedi’u profi yn
eu herbyn yn colli eu
cofrestriad ac felly ni fyddent yn gallu
cael eu cyflogi
yn y sector yn ystod eu gwaharddiad
cofrestru;
·
cynghorwyd er na fyddai digon o arian ar gael
er mwyn galluogi'r
Gwasanaeth i gyflawni'r cyfan yr oedd
am ei gyflawni, roedd mwy o adnoddau
staff rŵan yn ystod y blynyddoedd diwethaf, cyflogwyd mwy o staff monitro ar gontractau ac roedd timau'n gweithio
gyda'i gilydd yn well mewn ymgais
i ddiogelu preswylwyr diamddiffyn; a
·
chadarnhawyd fod holl gartrefi preswyl neu nyrsio preifat
ac awdurdod lleol yn cael eu
harolygu'n rheolaidd ac yn drylwyr gan
Arolygiaeth Gofal Cymru (CIW) a fyddai fel rhan o'r
broses arolygu yn nodi unrhyw ddiffygion
neu afreoleidd-dra, gan gynnwys y rheiny
sy'n gysylltiedig â'u prosesau recriwtio.
Ar
ddiwedd y drafodaeth:
Penderfynodd y Pwyllgor:
(i)
yn amodol ar yr arsylwadau uchod
i gydnabod natur bwysig ymagwedd gorfforaethol tuag at ddiogelu oedolion sydd mewn perygl,
a chyfrifoldeb y Cyngor i ystyried hyn fel
maes blaenoriaeth allweddol a'i osod
ochr yn ochr
â'r ymrwymiad a'r arwyddocâd a roddir gan Sir Ddinbych i ddiogelu plant sydd mewn perygl;
(ii)
bod adroddiadau
blynyddol yn y dyfodol hefyd yn
cynnwys astudiaethau achos lle na
chafwyd canlyniadau boddhaol yn ychwanegol
at y rhai y gwireddwyd canlyniadau boddhaol ar eu cyfer;
(iii)
maes o law,
bod Adroddiad Gwybodaeth, yn cael ei
baratoi a'i ddosbarthu i aelodau'r Pwyllgor ar gynnwys
y Mesur Galluedd Meddyliol (Diwygiad) a'i oblygiadau i'r Cyngor a phreswylwyr.
Dogfennau ategol:
- Safeguarding Report 200918, Eitem 5. PDF 222 KB
- Safeguarding Report 200918 - Apps.1docx, Eitem 5. PDF 213 KB
- Safegaurding Report Appendix 2, Eitem 5. PDF 185 KB