Eitem ar yr agenda

I dderbyn cyflwyniad gan gynrychiolwyr Bwrdd Iechyd Prifysgol Betsi

Cadwaladr ar y cynnydd a wnaed hyd yma gyda datblygiad y cyfleuster

newydd a'r amserlen ddisgwyliedig ar gyfer ei ddarparu.

10.10 a.m. – 10.50 a.m.

Dywedodd Cyfarwyddwr Clinigol Therapiau Gwasanaethau Clinigol BIPBC bod y Bwrdd Iechyd yn gweithio ar ail gam proses achos busnes 3 cham Llywodraeth Cymru ar gyfer datblygu safle’r cyn Ysbyty Brenhinol Alexandra yn y Rhyl yn ysbyty cymuned ar gyfer Gogledd Sir Ddinbych.  Drwy gyflwyniad PowerPoint dangosodd yr adeilad newydd arfaethedig gan bwysleisio y byddai’r ysbyty cymuned newydd yn llawer mwy nag ysbyty yn unig:

•              byddai'r model gwasanaeth arfaethedig i’w ddatblygu ar y safle yn cynnwys tîm amlddisgyblaethol amlasiantaeth a fyddai’n dylunio eu gwasanaethau o amgylch anghenion y defnyddiwr gwasanaeth, gan gefnogi’r ethos ail-alluogi i rymuso defnyddwyr gwasanaeth i fyw yn annibynnol drwy gydweithio gyda phartneriaid gofal cymdeithasol a thrydydd sector i wella ataliad a lles.

•              byddai’n cefnogi mwy o waith integredig rhwng gofal iechyd sylfaenol a chymunedol gan ganolbwyntio ar bobl hŷn gyda golwg ar leddfu’r pwysau ar Ysbyty Glan Clwyd, darparu gwasanaeth iechyd meddwl a chorfforol integredig i bobl hŷn, darparu gwasanaethau gofal iechyd dydd brys yr un diwrnod ac ystod o wasanaethau dydd a chlaf allanol yn agosach at gartref y claf; a

_•                       byddai’r datblygiad mewn ffurf Campws Gofal Iechyd a fyddai’n gwneud defnydd o adeilad yr hen ysbyty Brenhinol Alexandra, adeilad rhestredig Graddfa II ar y cyd ag adeilad yr ysbyty newydd arfaethedig.       Byddai hefyd yn cynnig safle gwaith integredig ar gyfer Gwasanaethau Un Pwynt Mynediad, Gwasanaethau Iechyd Meddwl Plant a Phobl Ifanc (CAMHS) a swyddfeydd ar gyfer timau cefnogaeth integredig. 

Hysbyswyd y Pwyllgor bod:

•           y Bwrdd Iechyd wedi cymeradwyo a chyflwyno’r Achos Busnes Amlinellol ar gyfer Prosiect Ysbyty Cymuned Gogledd Sir Ddinbych i Lywodraeth Cymru yn Ionawr 2017.  Wedi’i gynnwys yn yr Achos Busnes Amlinellol oedd yr achos ar gyfer buddsoddi cyfalaf yn yr adeilad newydd a darparu gwasanaethau newydd ar y safle, ynghyd â sail resymegol ar gyfer buddsoddiad ychwanegol yn yr adeilad rhestredig Gradd II.

•           o ganlyniad i gyflwyno’r Achos Busnes Amlinellol i Lywodraeth Cymru, roedd cynrychiolwyr Bwrdd wedi cyfarfod swyddogion Llywodraeth Cymru ym mis Gorffennaf a Medi 2017 i drafod y cynigion.  Roedd y Tîm Prosiect wedi ailgyfarfod i ymateb i heriau a nodwyd fel rhan o’r broses cymeradwyo’r Achos Busnes Amlinellol ac roedd Adolygiad Trothwy o’r achos busnes a’r broses wedi’i gomisiynu.    Roedd canfyddiadau’r Adolygiad Trothwy wedi profi’n hynod ddefnyddiol gyda golwg ar symud y prosiect ymlaen;

•           Roedd Llywodraeth Cymru eisiau sicrwydd mewn perthynas â sut fyddai’r Achos Busnes Amlinellol yn cefnogi darpariaeth y cynllun strategol Byw yn Iach Aros yn Iach gan y Bwrdd Iechyd, strategaeth gweithlu wedi’i ailddiffinio a mwy o eglurder ar fanteision gwireddu’r cynllun.  Roedd yr olaf yn ymwneud â’r defnydd o adeilad rhestredig presennol, drwy ddefnyddio hwn fel swyddfa yn bennaf, roedd y Bwrdd Iechyd yn hyderus y gallai sicrhau dyfodol yr adeilad a darparu gwasanaethau iechyd ychwanegol o fewn yr adeilad newydd.  Nid oedd materion yn ymwneud â’r gweithlu yn unigryw i’r prosiect hwn

•           Roedd gwaith ar y gweill i ail-ddrafftio’r atodiad i’r Achos Busnes Amlinellol a oedd yn manylu’r cynigion ystadau, byddai hyn yn cynnwys datganiad clir ar swyddogaeth yr adeilad rhestredig Gradd II yn dilyn buddsoddiad arfaethedig o tua £200k.  Byddai yna fwy o fanylion yn yr Achos Busnes Amlinellol, cyn ei ailgyflwyno i Lywodraeth Cymru, ar y ffynonellau refeniw ar gyfer darparu gwasanaethau newydd ar y safle;

•           Fel rhan o’r gwaith paratoi ar gyfer ailddatblygu’r safle, roedd yr Adran Cleifion Allanol wedi adleoli i’r hen adeilad Glan Traeth ym mis Rhagfyr 2017, dylai'r gwaith o ddymchwel yr estyniad 1960au gael ei gwblhau erbyn diwedd Ebrill 2018.  Yn dilyn y gwaith hwn, byddai'r ardal a ddefnyddir gan yr hen Adran Cleifion Allanol yn cael ei ail-wynebu i ddarparu 44 gofod parcio ychwanegol, byddai mwy o waith ail-wynebu yn cael ei wneud ar y prif faes parcio a llwybrau yn cael eu diffinio’n glir gyda golau gwell yn cael ei osod i ddiogelu cleifion a staff; ac

•           Unwaith y byddai’r tîm prosiect yn fodlon bod yr holl heriau a godwyd gan Lywodraeth Cymru wedi derbyn sylw digonol, byddai’r Achos Busnes Amlinellol yn cael ei gyflwyno i’r Bwrdd Iechyd i’w gymeradwyo ar gyfer ei ailgyflwyno i Lywodraeth Cymru.  Nid oedd amserlen benodol wedi’i gosod ar gyfer hyn eto gan fod y Tîm Prosiect eisiau sicrhau bod yr holl ymholiadau wedi derbyn sylw. 

Mewn ymateb i gwestiynau aelodau’r Pwyllgor, roedd Cyfarwyddwr Ardal:  Ardal Ganolog: y Bwrdd Iechyd yn

•           cadarnhau eu bod yn teimlo’r un rhwystredigaeth â’r aelodau mewn perthynas â’r amser maith yr oedd y prosiect yn gymryd i ddwyn ffrwyth.  Roedd y broses Achos Busnes yn broses gan Lywodraeth Cymru.  Roedd yn faith oherwydd ei fod yn broses tri cham.    Fodd bynnag, roedd trafodaethau sylweddol wedi eu cynnal rhwng Prif Weithredwr y Bwrdd Iechyd a Llywodraeth Cymru.  Yn ogystal, roedd yna gefnogaeth wleidyddol sylweddol i’r prosiect.

•           Roedd y Bwrdd Iechyd wedi profi oedi tebyg o’r blaen wrth ddatblygu prosiect Ysbyty Alltwen, oedd nawr yn agored ac yn weithredol;

•           Roedd y Bwrdd Iechyd yn gwbl ymrwymedig i ddarparu’r prosiect er gwaethaf y ffaith ei fod yn parhau o dan fesurau arbennig ac yn wynebu pwysau ariannol difrifol;

•           roedd Llywodraeth Cymru wedi rhoi sicrwydd y byddai’n darparu £40miliwn tuag at gost cyfalaf y prosiect, gyda’r Bwrdd Iechyd i ddarparu £2.3miliwn o arian refeniw tuag at y prosiect (er bod £2.3miliwn yn ymddangos yn swm sylweddol roedd BIPBC yn sefydliad £1.4bn felly nid oedd yr arian refeniw oedd yn ofynnol iddo ddarparu yn ormodol);

•           cadarnhawyd bod y Bwrdd Iechyd yn gadarn o’r farn y dylai’r cynllun gynnwys Canolfan Iechyd a Lles o ystyried proffil amddifadedd y Rhyl; a

•           Dywedwyd oherwydd cyflwr gwael yr adeilad rhestredig Gradd II a phryderon diogelwch tân, ar sail diogelwch cleifion ni ellir rhoi gwelyau cleifion mewnol yn yr adeilad;

Mewn ymateb i gwestiynau'r Pwyllgor, dywedodd swyddogion BIPBC:

•           roedd yr achos busnes presennol yn ddogfen gyhoeddus, fodd bynnag roedd yr achos busnes hwn yn cael ei adolygu ar hyn o bryd.    Unwaith y byddai’r achos busnes a adolygwyd wedi'i gyflwyno i'r Bwrdd Iechyd ei gymeradwyo, byddai hefyd yn ddogfen gyhoeddus;

•           Roedd yr Adolygiad Trothwy wedi’i gomisiynu gan Lywodraeth Cymru trwy sefydliad annibynnol i ddarparu adolygiad cyfaill beirniadol o’r achos busnes gyda golwg ar ei gryfhau.    Roeddent yn gwneud ymholiadau pa un a oedd yr adroddiad terfynol ar gael i’r cyhoedd ai peidio;

•           roeddent yn deall pwysigrwydd yr adeilad rhestredig Gradd II i’r trigolion lleol yn llwyr, a dyna'r rhesymau yr oeddent yn ceisio ei gynnwys yn y prosiect ar gyfer yr Ysbyty Cymuned Gogledd Sir Ddinbych newydd.     Oherwydd y cyfyngiadau oedd yn gysylltiedig â’i statws rhestredig, ni fyddai’n addas ar gyfer darparu gofal cleifion mewnol y 21ain Ganrif.  O ganlyniad, roedd y Bwrdd yn cynnig ei ddefnyddio, yn dilyn rhaglen faith o ailwampio fel swyddfeydd ar gyfer y cyfleuster newydd gyda rhai gwasanaethau clinigol yn cael eu darparu ar y llawr gwaelod.  Byddai’r Gwasanaeth Un Pwynt Mynediad a thimau eraill a leolir yn y gymuned yn cael eu lleoli ar loriau eraill; a

•           gyda’r datblygiadau mewn gwyddoniaeth a gofal meddygol yn y blynyddoedd diwethaf, ynghyd â'r ystod arfaethedig o wasanaethau cymunedol yn rhan o'r prosiect ac argaeledd tai addas, bod cyfleuster cleifion mewnol 28 gwely yn ddigonol ar gyfer anghenion y GIG yn ardal Gogledd Sir Ddinbych yn y dyfodol. 

Ar ddiwedd y drafodaeth dywedodd cynrychiolwyr y Bwrdd Iechyd eu bod yn hyderus fod ganddynt nawr achos busnes cadarn i’w gyflwyno i Lywodraeth Cymru.    Ailgadarnhawyd eu bod nhw a’r Bwrdd Iechyd wedi ymrwymo'n llwyr i ddarparu'r prosiect. 

Yn briffio’r Pwyllgor ar y sefyllfa ddiweddaraf o safbwynt rhoi’r gorau i ddarparu gwelyau dros dro yn Inffyrmari Dinbych, rhoddodd swyddogion y Bwrdd Iechyd drosolwg o’r datblygiadau presennol ac arfaethedig i Wasanaethau Cymunedol y Bwrdd Iechyd yn y de a chanol Sir Ddinbych.  Hysbyswyd yr Aelodau o safbwynt:

Corwen:  roedd gwaith ar fin dechrau i ailddatblygu’r Ganolfan Iechyd.  Roedd y gwaith hwn, i’w gwblhau erbyn yr hydref, yn rhan o fuddsoddiad £1.5miliwn yn y Ganolfan. Byddai’n cynnwys darparu dwy ystafell ymgynghori newydd i feddygon teulu’r dref, dwy ddeintyddfa newydd ac ystafell driniaeth amlbwrpas.    Tra ymgymerir â'r gwaith byddai gwasanaethau'n cael eu darparu mewn llety dros dro, gyda gwasanaethau deintyddol yn cael eu darparu yn eu lleoliad presennol.  Byddai cyfleusterau maes parcio yn cael eu dyrannu i gleifion sy’n mynychu’r feddygfa yn agos at yr adeilad dros dro, byddai hyn yn cynnwys awr o barcio am ddim. 

Rhuthun:  Roedd Llywodraeth Cymru wedi cyhoeddi’n ddiweddar bod £1.7 miliwn wedi’i glustnodi ar gyfer gwasanaethau iechyd yn yr ardal yn amodol ar ddatblygu achos busnes.  Nod y buddsoddiad hwn oedd gallu adleoli gwasanaethau a ddarperir ar hyn o bryd yn y Clinig i Ysbyty Cymuned Rhuthun.  Byddai’n hwyluso estyniad i gael ei adeiladu yn yr ysbyty a gwaith ailwampio yn yr ysbyty ei hun.    Byddai’n datblygu’r ystod o wasanaethau sydd ar gael yn yr ysbyty ymhellach i alluogi cydweithio rhwng gofal sylfaenol, gofal cymunedol a gofal eilaidd, yn ogystal â darparu cyfleoedd ar gyfer integreiddio gwasanaethau’n well gyda phartneriaid trydydd sector a statudol.     Rhagwelir y byddai Achos Cyfiawnhau Busnes sengl drafft yn cael ei gwblhau erbyn diwedd 2018.  Os byddai'r prosiect yn cael ei gymeradwyo byddai'n hwyluso adleoli gwasanaethau meddyg teulu, Gwasanaeth Deintyddol Cymunedol, Ymwelwyr Iechyd, Nyrsys Ysgol, Gwasanaethau Iechyd Meddwl Cymunedol a’r Gwasanaeth Ambiwlans.  Wrth edrych ymlaen roedd y Bwrdd Iechyd yn ystyried cyfleoedd ehangach o fewn ardal de Sir Ddinbych i wella gofal yn agosach at gartrefi pobl drwy gydweithio.  Roedd trafodaethau cychwynnol wedi eu cynnal rhwng y Bwrdd a’r awdurdod lleol i archwilio cyfleoedd posibl ar gyfer gwaith integredig a allai ffurfio cam o’r datblygiad yn Rhuthun ar gyfer y dyfodol.