Eitem ar yr agenda

Ystyried adroddiad gan y Rheolwr Tîm Cynllunio Strategol (copi yn amgaeedig) i geisio cymeradwyaeth y Cyngor ar gyfer Cynllun Lles BGC Conwy a Sir Ddinbych 2018-23.

 

 

Cyflwynodd yr Arweinydd, y Cynghorydd Hugh Evans, Gynllun Lles Bwrdd Gwasanaethau Cyhoeddus Conwy a Sir Ddinbych 2018-2023 (a oedd wedi ei gylchredeg yn flaenorol).

 

Sefydliad statudol o dan Deddf Llesiant Cenedlaethau'r Dyfodol (Cymru) 2015 yw’r Bwrdd Gwasanaethau Cyhoeddus.

 

Roedd drafft cyntaf y cynllun wedi ei gyhoeddi ar gyfer ymgynghoriad rhwng 30 Hydref 2017 a 22 Ionawr 2018. Roedd y drafft cyntaf yn cynnwys chwe blaenoriaeth ond yng nghyfarfod Bwrdd Gwasanaethau Cyhoeddus Conwy a Sir Ddinbych ar 29 Ionawr 2018, cafodd y chwe blaenoriaeth eu hail-drefnu yn dri:

(i)              Pobl – Lles meddyliol da i bob oed (gan gynnwys y 1000 diwrnod cyntaf ac effaith hyn ar ddyfodol person)

(ii)             Cymuned - Ymrymuso’r Gymuned (gan gynnwys gwydnwch pobl ifanc a phobl hŷn), a

(iii)            Lle – Gwydnwch amgylcheddol.

Mae’r themâu hyn yn cyd-fynd â’r blaenoriaethau a amlinellir yng Nghynllun Corfforaethol Sir Ddinbych.

 

Roedd y Swyddog Cynllunio Strategol a Pherfformiad wedi mynychu cyfarfod y Pwyllgor Archwilio Partneriaethau ar 14 Rhagfyr i gyflwyno’r cynllun drafft a thrafod safbwynt y Pwyllgor ar gwestiynau’r ymgynghoriad.

 

Ar y pwynt hwn, darllenodd y Cynghorydd Jeanette Chamberlain-Jones ddatganiad yn ei rôl fel Cadeirydd y Pwyllgor Archwilio Partneriaethau oedd fel a ganlyn:

 

Gan mai’r Pwyllgor Archwilio Partneriaethau yw pwyllgor archwilio dynodedig y Cyngor ar gyfer materion Bwrdd Gwasanaethau Cyhoeddus, roedd yn un o'r rhai a ymgynghorwyd ag o’n statudol ar y Cynllun Lles drafft.  Ymgynghorwyd â'r Pwyllgor ar flaenoriaethau a chynnwys Cynllun Lles y Bwrdd Gwasanaethau Cyhoeddus yn ei gyfarfod ar 14 Rhagfyr 2017. Mae’r pwyntiau a godwyd gan y Pwyllgor wedi eu nodi mewn atodiad i’r adroddiad a gyflwynir i chi heddiw, ac mae pob un ohonoch wedi cael cyfle i’w ddarllen.     Byddwch yn gweld o'r pwyntiau a godir gan y Pwyllgor yn y cyfarfod fod:

 

·       Aelodau yn cydnabod fod y Cynllun ei hun yn ddogfen strategol lefel uchel sy’n nodi amcanion a dyheadau’r Bwrdd Gwasanaethau Cyhoeddus am y pum mlynedd nesaf.  Byddai ei ddarparu, felly, yn ddibynnol ar gynlluniau darparu traws-sefydliadol a chydweithio effeithiol gan bob partner;

·       Cododd aelodau nifer o bwyntiau yn ymwneud â hyrwyddo gwydnwch ymysg pob grŵp oedran i wella iechyd a lles (corfforol a meddyliol), lleihau gordewdra ac arwahanrwydd cymdeithasol ac ati. Mae felly’n ddymunol fod y Bwrdd Gwasanaethau Cyhoeddus, yn sgil yr ymarferiad ymgynghori, wedi penderfynu canolbwyntio ar y tri phrif flaenoriaeth sef:

 

i.                 Pobl – Lles meddyliol da i bawb o bob oed (gan gynnwys y 1000 diwrnod cyntaf ac effaith hyn ar ddyfodol person)

ii.                Cymuned - Grymuso’r Gymuned (gan gynnwys gwydnwch pobl ifanc a phobl hŷn)

iii.              Lle – Gwydnwch amgylcheddol

gan fod pob un yn gyd-ddibynnol ar ei gilydd, ac yn cyd-fynd â’i gilydd.  Maent hefyd yn cefnogi ideoleg atal a gweithio mewn partneriaeth effeithiol Deddf Llesiant Cenedlaethau'r Dyfodol (Cymru) 2015 a Deddf Gwasanaethau Cymdeithasol a Llesiant (Cymru) 2014 at y diben o fagu gwydnwch a gwella lles.

·       sefydliadau gwasanaethau cyhoeddus sy’n aelodau o’r Bwrdd Gwasanaethau Cyhoeddus sydd â’r pŵer i weithredu’r blaenoriaethau a restrir yn y Cynllun Lles, h.y. drwy eu cynlluniau strategol, yma yn Sir Ddinbych, ein Cynllun Corfforaethol.  Roedd yn ddymunol felly i weld fod y themâu yn y Cynllun Lles terfynol yn cyd-fynd â'n Cynllun Corfforaethol. I lwyddo i ddarparu ein Cynllun Lles byddai angen i bob sefydliad partner weithio’n effeithiol gyda’i gilydd, byddai hefyd angen iddynt gael sianelau cyfathrebu clir gyda’i gilydd a gyda thrigolion.

·        er mwyn cyflawni ei gyfrifoldebau mewn perthynas â darparu’r Cynllun, bydd Archwilio yn monitro cynnydd y Bwrdd Gwasanaethau Cyhoeddus wrth gyflawni’r blaenoriaethau a’r Cynllun. 

 

Gan fod gan Sir Ddinbych Fwrdd Gwasanaethau Cyhoeddus ar y cyd â Chonwy, mae gwaith yn cael ei wneud ar hyn o bryd i archwilio’r dull mwyaf effeithiol i ni gyflawni ein blaenoriaethau o archwilio’r Bwrdd Gwasanaethau Cyhoeddus.  Yn fuan, bydd y Grŵp Cadeiryddion ac Is-gadeiryddion Archwilio yn ystyried nifer o ddewisiadau posibl ar gyfer archwilio’r Bwrdd yn y dyfodol, gan gynnwys y posibilrwydd o gyflwyno trefniadau archwilio ar y cyd gyda Chonwy.  Yn y cyfamser, bydd y Pwyllgor Archwilio Partneriaethau yn parhau i weithredu fel pwyllgor archwilio dynodedig y Cyngor ar y Bwrdd Gwasanaethau Cyhoeddus.

 

Cyn cyhoeddi'r Cynllun roedd rhaid iddo gael ei gymeradwyo gan Fyrddau pob sefydliad oedd yn rhan o’r Bwrdd Gwasanaethau Cyhoeddus. Yn achos yr Awdurdodau Lleol, roedd rhaid cael cymeradwyaeth y Cyngor Llawn.

 

Yn ystod y drafodaeth codwyd y pwyntiau canlynol:

·       Nid oedd y cynllun busnes ar gyfer Ysbyty Brenhinol Alexandra yn y Rhyl wedi ei gylchredeg eto. Cadarnhaodd yr Aelod Arweiniol dros Les ac Annibyniaeth, y Cynghorydd Bobby Feeley, yn dilyn cyfarfod gyda Chadeirydd Bwrdd Iechyd Prifysgol Betsi Cadwaladr, Pete Higson, y byddai'r Cynllun Busnes yn cael ei ail gyflwyno ym Mawrth 2018 a chadarnhaodd fod yna ymrwymiad 100% gan Fwrdd Iechyd Prifysgol Betsi Cadwaladr i ddatblygiad Ysbyty Brenhinol Alexandra.

·       Cadarnhawyd y byddai cydweithio gyda phartneriaid sector cyhoeddus, gwasanaethau cymunedol a gwirfoddol yn golygu y byddai’r Cynllun yn mynd yn ei flaen i wella ansawdd bywyd trigolion.

 

Yn dilyn trafodaeth:

 

PENDERFYNWYD bod:

(i)              Y Pwyllgor yn cadarnhau ei fod wedi darllen, deall ac ystyried yr Asesiad o’r Effaith ar Les (Atodiad A) fel rhan o’i ystyriaethau.

(ii)             Y Cyngor yn cefnogi’r blaenoriaethau ar gyfer Cynllun Lles Bwrdd Gwasanaethau Cyhoeddus Conwy a Sir Ddinbych 2018-2023.