Eitem ar yr agenda
CYNLLUN CORFFORAETHOL AR GYFER HEN SAFLEOEDD YSGOL
Ystyried
adroddiad cyfrinachol gan y Rheolwr Rhaglen - Newid Busnes (Cyfleusterau, Tai
ac Asedau) (copi ynghlwm) sydd yn gofyn am farn y Pwyllgor ar sut mae’r Cyngor
yn bwriadu rheoli neu gael gwared ar hen safleoedd ysgol.
11.20am – 12pm
Cofnodion:
Cyflwynodd yr
Aelod Arweiniol Cyllid, Perfformiad ac Asedau Strategol adroddiad cyfrinachol
(a gylchredwyd yn flaenorol), y Rheolwr Cyfleusterau, Asedau a’r Rhaglen Tai
(Newid Busnes), a amlinellodd sut roedd y Cyngor yn cynnig rheoli a gwaredu
safleoedd ysgol diangen yn y dyfodol. Roedd y Pwyllgor wedi gofyn am y wybodaeth yn
dilyn trafodaeth, mewn cyfarfod cynharach, am weithrediad yr argymhellion a
oedd wedi codi o adolygiad addysg gynradd yn ardal Rhuthun.
Yn ystod ei
gyflwyniad, rhoddodd yr Aelod Arweiniol wybod i'r Pwyllgor mai nod y Cyngor
wrth ddelio â safleoedd ysgol diangen oedd gwireddu'r buddion mwyaf posibl
ohonynt i'r Awdurdod a'r gymuned, wrth sicrhau ar yr un pryd nad oeddent yn dod
yn safleoedd dolur llygad, a oedd yn peri rhwymedigaethau cynnal a chadw
gormodol, ac felly’n straen fawr ar adnoddau ariannol gwerthfawr.
Tynnodd sylw hefyd at
y cymhlethdodau o amgylch perchnogaeth rhai o’r adeiladau a safleoedd ysgol, yn
cynnwys cymalau a chyfamodau cyfyngol, ymddiriedolaethau a materion
perchnogaeth tir ac ati. Yn amgaeedig gyda’r adroddiad oedd cynllun ar gyfer
safleoedd ysgol diangen, a oedd gyda gwybodaeth am bob safle diangen cyfredol,
neu safleoedd y rhagwelwyd y byddent yn dod yn ddiangen o fewn y ddwy flynedd
nesaf, manylion ynghylch eu perchnogaeth a chynigion cyfredol y Cyngor ar gyfer
y safleoedd hynny. Hefyd yn amgaeedig oedd dogfen yn amlinellu’r dull a gymerwyd gan y Cyngor,
unwaith roedd hen ysgol wedi’i dynodi’n safle nad oedd ei hangen.
Rhoddodd yr Aelod
Arweiniol wybod i Aelodau, o ganlyniad i brofiadau’r gorffennol, bod y Cyngor
bellach wedi pennu terfyn amser i gofrestru diddordeb defnydd cymunedol, ac i
gymeradwyo cynllun busnes ar sail dystiolaeth ar gyfer defnyddio’r safle yn y
dyfodol. Y rheswm dros hyn oedd, tra bod yr adeilad yn wag ac ym mherchnogaeth y
Cyngor, roedd yr Awdurdod yn atebol am yr adeilad a chynnal a chadw'r safle, yn
cynnwys costau ar gyfer gwneud y safle'n ddiogel. Gan gyfeirio at safleoedd diangen a restrwyd
yn yr adroddiad a oedd naill ai ym mherchnogaeth yr Ymddiriedolaeth neu fod eu
perchnogaeth yn dal yn destun ymchwiliad, dywedodd yr Aelod Arweiniol y
byddai’r safle(oedd) yn cael eu gwerthu a’r derbynebau’n cael eu cadw mewn
ymddiriedolaeth, hyd nes y datryswyd y materion ymddiriedolwr, unwaith roedd
digon o amser wedi mynd heibio ac os oedd modd olrhain yr ymddiriedolwyr neu eu
buddiolwyr.
Wrth ymateb i
gwestiynau aelodau, gwnaeth yr Aelod Arweiniol a swyddogion -
·
roi
gwybod y byddai achosion busnes a gyflwynwyd yn y dyfodol fel cynigion ar gyfer
adeiladau ysgol newydd sy’n cael eu cyflwyno i'r Grŵp Buddsoddi Strategol
a'r Cabinet, yn gorfod cynnwys manylion ynghylch beth roedd y Gwasanaeth Addysg
yn cynnig ei wneud gydag unrhyw asedau neu safleoedd diangen, yn codi o’r
cynnig
·
cadarnhau
bod Siarter y Cyngor Sir gyda chynghorau tref a chymuned yn gofyn bod y Cyngor
yn ceisio datganiadau o ddiddordeb gan gynghorau tref a chymuned, mewn unrhyw
ased sydd ym mherchnogaeth y sir, nad oedd eu hangen Gallai’r Cyngor Sir gynnig trosglwyddo ased dros ben i gyngor tref neu
gymuned, a oedd â chynllun busnes cadarn a chytûn ar gyfer ei ddefnydd yn y
dyfodol. Byddai swyddogion o’r Gwasanaeth a Moderneiddio Busnes (BIMS) ar gael i
gynghorau tref a chymuned neu grwpiau cymunedol a gyfansoddwyd, i’w helpu i
archwilio opsiynau posibl a llunio'r cynllun busnes gofynnol.
Ni fyddai unrhyw ased
yn cael ei drosglwyddo oni bai bod cyllid digonol wedi’i ddiogelu gan y corff a
gyfansoddwyd, i weithredu’r cyfleuster ar gyfer y dyfodol hyd y gellir ei
ragweld. Ond os oedd cyfleuster cymunedol eisoes yn gweithredu o fewn y gymuned
honno, roedd y Cyngor yn annhebygol o gytuno i drosglwyddo ased i’r gymuned
honno ar gyfer pwrpas tebyg
·
rhoi
gwybod, unwaith y byddai ased yn cael ei drosglwyddo i gyngor neu gorff arall a
gyfansoddwyd, ni fyddai’r Cyngor yn atebol am unrhyw gostau a oedd yn
gysylltiedig gyda’r ased yn y dyfodol. Os na fyddai’r sefydliad a oedd wedi caffael yr
adeilad/safle gan y Cyngor heb unrhyw ddefnydd ar ei gyfer yn y dyfodol, byddai
pob rhwymedigaeth yn aros gyda nhw. Ond roedd gan y Cyngor y pwerau i weithredu
cyfamodau adfachu gydag unrhyw asedau a drosglwyddodd i sefydliadau eraill,
felly pe bai’r sefydliadau hynny’n cael gwared ar yr ased o fewn y cyfnod amser
a nodwyd yng nghytundeb y trosglwyddiad, byddai'r Cyngor yn gymwys i adfachu
canran benodol o'r derbyniad cyfalaf
·
cadarnhawyd,
os byddai’r Cyngor yn adeiladu ysgol ffydd newydd ar dir sydd ym mherchnogaeth
yr esgobaeth, byddai perchnogaeth y safle’n dychwelyd i’r Esgobaeth, os
ystyriwyd nad oedd angen yr ysgol honno ar unrhyw adeg yn y dyfodol.
Ond, os caiff ei
hadeiladu ar dir ym mherchnogaeth y cyngor, byddai perchnogaeth y safle’n
dychwelyd i’r Cyngor
·
rhoi
gwybod, os byddai pob ymdrech yn cael ei wneud i olrhain buddiolwyr
Ymddiriedolaeth, a oedd wedi rhoi tir yn rhodd at ddibenion darparu
gweithgareddau addysgol, ac nad oedd unrhyw benderfyniad ar y gweill, y byddai
Adran Gyfreithiol y Cyngor yn dechrau trafodaethau gyda’r Comisiwn Elusennau gyda’r
bwriad o geisio caniatâd i waredu’r safle. Unwaith y caiff
ei werthu, a bod yr holl gostau cynnal a chadw a rheoli wnaed gan y Cyngor yn
cael eu hadennill, byddai'r arian yn cael ei ddal mewn 'cyfrif dal' hyd nes y
byddai buddiolwyr yn cael eu holrhain
·
cadarnhau
bod y Cyngor bob amser yn ceisio gwireddu gwerth am arian wrth waredu asedau
dros ben. Ond roedd ystyriaeth hefyd yn cael ei rhoi i fuddion y gymuned
·
cadarnhawyd,
os oedd yn briodol, y gallai’r Awdurdod ymgeisio am ganiatâd cynllunio ar safle
cyn ei waredu, ond byddai angen trafod y costau a’r buddion o ddefnyddio’r dull
hwn gyda’r Adran Gynllunio a’r gwasanaethau eraill, yn dibynnu ar y math o
ganiatâd cynllunio a geisiwyd, h.y. os oedd y math o ganiatâd a geisiwyd â’r
potensial i gefnogi darpariaeth o flaenoriaethau corfforaethol y Cyngor
·
rhoi
gwybod bod y Cyngor wedi ceisio sefydlu a ‘mapio’ pob cyfleuster cymunedol sydd
ar gael ar draws y sir dros y blynyddoedd diweddar. Ond roedd hyn wedi profi’n anodd iawn, gan
fod nifer fawr ohonynt yn cael eu gweithredu gan sefydliadau gwirfoddol, h.y.
eglwysi, capeli, sefydliadau cymunedol
·
egluro’r
broses ar gyfer dynodi ‘mannau gwyrdd’ o fewn y prosesau Cynllunio a’r Cynllun
Datblygu Lleol (CDLl). Os oedd y dref neu gymuned eisiau i’r Cyngor drosglwyddo ased dros ben
iddynt ar gyfer y diben o gael ei ddynodi fel man gwyrdd, byddent yn gyntaf yn
gorfod archwilio'r angen am fan gwyrdd fel rhan o'r broses CDLl, a
·
rhoi
gwybod ei bod nawr yn ofynnol i’r Cyngor ystyried buddion cymunedol, y gwerth
ariannol gorau a chynaliadwyedd tymor hir pob penderfyniad yng nghyd-destun
darpariaethau Deddf Llesiant Cenedlaethau'r Dyfodol (Cymru) 2015.
Cyn dod â’r
drafodaeth i ben, gofynnodd y Pwyllgor i gael gwybodaeth am sut roedd sawl
ysgol Eglwys yn y sir wedi’u lleoli ar dir ym mherchnogaeth y Cyngor ac i’r
gwrthwyneb, a phe bai unrhyw ysgol o blith y rhain yn dod yn wag/yn ddiangen,
pwy fyddai’n gyfrifol am eu cynnal a’u cadw, a’u gwaredu.
PENDERFYNWYD yn amodol ar y sylwadau uchod, i dderbyn y wybodaeth
a roddwyd a chefnogi'r dull a gymerwyd gan y Cyngor, gyda'r bwriad o wireddu'r
buddion mwyaf posibl, a chael y gwerth gorau gan safleoedd ysgol diangen.
Daeth y cyfarfod
i ben am 12.20pm.
Dogfennau ategol:
- Restricted enclosure Gweler y rhesymau pam fod dogfen 8./1 yn gyfyngedig
- Restricted enclosure Gweler y rhesymau pam fod dogfen 8./2 yn gyfyngedig
- Restricted enclosure Gweler y rhesymau pam fod dogfen 8./3 yn gyfyngedig