Eitem ar yr agenda
CWYNION PERFFORMIAD EICH LLAIS (CH2)
Archwilio gwybodaeth (copi ynghlwm) am berfformiad gwasanaethau wrth
gydymffurfio â gweithdrefn gwyno’r Cyngor.
10:30 a.m
Cofnodion:
Cyflwynodd y Swyddog Cwynion Statudol a Chorfforaethol yr adroddiad a’r
atodiadau (a gylchredwyd ymlaen llaw) yn absenoldeb Aelod Arweiniol Datblygu
Seilwaith Cymunedol, a adawodd y cyfarfod yn fuan er mwyn mynychu cyfarfod
gydag Arweinydd y Tŷ a’r Prif Chwip yn Llywodraeth Cymru – y Gweinidog
sy’n gyfrifol am seilwaith digidol, i drafod band eang gwael mewn rhai rhannau
o Sir Ddinbych.
Roedd yr adroddiad a’r atodiadau yn darparu trosolwg a dadansoddiad o’r
cwynion, canmoliaethau a’r awgrymiadau a dderbyniwyd gan y Cyngor dan bolisi
adborth cwsmeriaid ‘Eich Llais’ yn ystod chwarter 2 blwyddyn adrodd 2017/18. Yn
ystod y cyflwyniad tynnodd y Rheolwr Gwella Gwasanaethau sylw’r Pwyllgor at y
ffaith bod rhai cynghorwyr, yn anfwriadol, wedi bod yn defnyddio mecanwaith
adborth cwsmeriaid ‘Eich Llais’ i adrodd am ymholiadau/ceisiadau am
wasanaeth. O ganlyniad roedd Pennaeth Cwsmeriaid, Cyfathrebu a Marchnata
wedi ail-gyhoeddi canllawiau i gynghorwyr ynglŷn â sut i gyflwyno
ymholiadau/ceisiadau am wasanaeth, gan bwysleisio pwysigrwydd dilyn y drefn
gytunedig er mwyn sicrhau trywydd archwilio cyflawn mewn perthynas â phob
cais/ymholiad a dderbynnir. Os dilynir y drefn gywir yna bydd modd i aelodau
etholedig ddilyn cynnydd eu cais/ymholiad drwy system EMMA – y system sydd wedi
ei datblygu a’i chyflwyno er budd a hwylustod i aelodau etholedig. Cadarnhaodd
y Rheolwr Gwella Gwasanaethau bod trafodaethau yn parhau o ran cyflwyno System
Rheoli Cysylltiadau Chwsmeriaid. Mae’r Grŵp Prosiect yn datblygu cynllun
gweithredu ac mae Tîm Cyfathrebu Corfforaethol y Cyngor yn rhan o’r grŵp
hwnnw. Rhagwelir y bydd mwy o wybodaeth ar gael yn y flwyddyn newydd ar broses
gyflwyno arfaethedig y system newydd.
Dywedodd y Swyddog Cwynion Statudol a Chorfforaethol bod y Cyngor, yn ystod
ail chwarter 2017-18, wedi cyrraedd y ‘trothwy rhagoriaeth’ o ran delio â
chwynion Cam 1 a Cham 2, gan fod pob cwyn wedi ei thrafod o fewn y terfynau
amser er gwaethaf derbyn mwy o gwynion na’r chwarter blaenorol. Mae hefyd
yn braf clywed bod mwy o ganmoliaethau ac awgrymiadau ar gyfer gwella wedi eu
derbyn gan y cyhoedd yn chwarter 2. Mae’r adroddiad yn cynnwys enghreifftiau o
ddefnyddio cwynion yn gadarnhaol i wella gwasanaethau. Er y byddai cynnal
perfformiad y flwyddyn ar 100% bron yn amhosibl ar gyfer cwynion Cam 1 a Cham
2, roedd y swyddogion yn hyderus y gallai’r Cyngor gyflawni 98% yn Chwarter 3,
a chyfradd cyrhaeddiad blynyddol cyfartalog o 98% yn 2017-18.
Mae Atodiad 1 i’r adroddiad yn cynnwys manylion nifer o gwynion Cam 1 a
Cham 2 a dderbyniwyd yn erbyn gwasanaethau unigol ynghyd â pherfformiad y
Cyngor wrth ddelio â nhw yn chwarter 2, yn ogystal â dadansoddiad o’i
berfformiad wrth ddelio â chwynion ar y ddau gam yn ystod cyfnod pedair
blynedd.
Mae Atodiad 2 i’r adroddiad yn cynnwys ffurf arfaethedig ar gyfer
cyflwyno’r adroddiad ystadegol i’r Pwyllgor yn y dyfodol. Er bod rhai materion
angen eu datrys o ran y ffurf newydd, mae’r mater o ran llunio graffiau ac ati
yn ddwyieithog a’r wybodaeth a mewnfudir i gorff yr adroddiad wedi ei ddatrys.
Mae Atodiad 3 i’r adroddiad yn cynnwys canlyniadau’r dadansoddiad annibynnol
a gynhaliwyd o foddhad preswylwyr a chwsmeriaid ar eu rhyngweithiad gyda’r
Cyngor a derbyn y gwasanaethau gofynnol. Mae’r wybodaeth a gesglir ar gyfer y
rhan hon o’r ymarfer yn werthfawr iawn i wasanaethau ac yn eu galluogi i wella
gwasanaethau a chryfhau eu dulliau cyfathrebu gyda phreswylwyr. Mae Gwasanaeth
Cwsmeriaid, Cyfathrebu a Marchnata ar hyn o bryd yn gweithio gyda’r Gwasanaeth
TGCh i ddatblygu mecanwaith adrodd penodol i’r gwasanaeth a fyddai'n galluogi'r
gwasanaeth i wella'r cyfathrebu gyda phreswylwyr a defnyddwyr gwasanaeth
ymhellach.
Wrth ymateb i gwestiynau’r Aelodau, dywedodd y Swyddog Cwynion Statudol a
Chorfforaethol a’r Pennaeth Gwella Gwasanaethau y canlynol:
·
Nid yw cwynion yn erbyn
ysgolion a chwynion yn ymwneud ag addysg yn dod o dan gwmpas Gweithdrefn Gwyno
Gorfforaethol ‘Eich Llais’. Mae’r rhain yn cael eu trin ar wahân, fel rheol gan
yr ysgolion eu hunain neu Swyddog Cwynion y Gwasanaeth Addysg
·
Mae cwynion y gwasanaethau
cymdeithasol wedi eu trin yn unol â’r canllawiau statudol h.y. eu cydnabod o
fewn dau ddiwrnod gwaith a’u datrys o fewn 10 diwrnod gwaith. Er bod proses
annibynnol, bydd unrhyw bryder sy’n dod i’r amlwg fel rhan o’r broses gwynion
gorfforaethol, a all olygu trosedd yn erbyn oedolion diamddiffyn, yn cael ei
atgyfeirio at y Tîm Diogelu Oedolion Diamddiffyn er mwyn iddynt gynnal
ymchwiliad brys
·
Yn eu barn hwy, mae’n
bosibl bod y gwelliant mewn perfformiad mewn perthynas â delio â chwynion yn
ganlyniad i Aelodau a swyddogion yn ymrwymo i’r weithdrefn ac yn gweld ei
gwerth ar gyfer gwella darpariaeth gwasanaeth
·
Mae’r targed 10 diwrnod ar
gyfer delio â chwynion yn debyg iawn i’r terfyn amser 10 diwrnod statudol ar
gyfer cwynion gwasanaethau cymdeithasol, sef yr amser hiraf y dylai gymryd i
ddelio ag unrhyw gŵyn. Ar y cyfan, mae cwynion yn derbyn sylw ac yn cael
eu datrys o fewn 10 diwrnod gwaith
Ar
hyn o bryd mae saith allan o’r naw ymgynghorydd yn y Ganolfan Gwasanaeth
Cwsmeriaid yn siarad Cymraeg. Mae hyn yn galluogi cwsmeriaid/preswylwyr sy'n
dymuno cyfathrebu â’r Cyngor yn Gymraeg i wneud hynny ar y pwynt cyswllt
cyntaf. Wedi dweud hynny, mae’n bosibl nad fel yna y bydd hi
gyda'r gwasanaethau a fydd yn gyfrifol am ddatrys ymholiadau ac ati.
Cododd yr Aelodau bryderon ynghylch rhwystredigaethau Cynghorwyr a'r
cyhoedd wrth adael negeseuon ar beiriannau ateb a neb yn eu ffonio'n ôl i roi
gwybod iddynt am y cynnydd neu i gydnabod derbyn yr ymholiad. Cytunodd y
swyddogion i dynnu sylw pob gwasanaeth at hyn.
Cytunodd y Swyddog Cwynion Statudol a Chorfforaethol i holi pam bod
perfformiad y Cyngor wedi lleihau i 60% mewn perthynas â chwynion Cam 2 a
chafwyd sylw o fewn y terfynau amser yn ystod Chwarter 3 2016-17.
Ar ddiwedd y drafodaeth dywedodd y Cadeirydd bod Aelod Arweiniol Datblygu
Seilwaith Cymunedol wedi gofyn i’w ddiolchiadau i’r Swyddog Cwynion Statudol a
Chorfforaethol am ei waith wrth wella perfformiad mewn perthynas a delio â
chwynion corfforaethol dan weithdrefn ‘Eich Llais’ gael eu nodi a’u cofnodi.
PENDERFYNWYD: - yn amodol ar y
sylwadau uchod -
(i) derbyn yr adroddiad ar berfformiad y Cyngor wrth ddelio a
chwynion, canmoliaethau ac awgrymiadau a gafwyd dan weithdrefn gwyno
gorfforaethol ‘Eich Llais’ yn ystod Chwarter 2, 2017-18;
(ii) derbyn data ar ganlyniadau Ymdrech a Bodlonrwydd
Cwsmeriaid Cyngor Sir Ddinbych ar gyfer chwarter 2 2017-18 a sut y defnyddiwyd
yr wybodaeth honno i wella gwasanaethau i gwsmeriaid y Cyngor a phreswylwyr.
Dogfennau ategol:
- Your Voice Report Q2 2017-18 071217, Eitem 6. PDF 206 KB
- Your Voice Report Q2 2017-18 - App 1 071217, Eitem 6. PDF 518 KB
- Your Voice Report Q2 2017-18 - App 2 071217, Eitem 6. PDF 586 KB
- Your Voice Report Q2 2017-18 - App 3 071217F, Eitem 6. PDF 282 KB
- Your Voice Report Q2 2017-18 - App 3 Annex 071217, Eitem 6. PDF 206 KB