Eitem ar yr agenda
CYLLIDEBAU CYFUN (IECHYD A GOFAL CYMDEITHASOL) - ADRODDIAD CYNNYDD
- Meeting of Pwyllgor Craffu Partneriaethau, Dydd Iau, 2 Tachwedd 2017 10.00 am (Item 6.)
- View the declarations of interest for item 6.
Ystyried
adroddiad gan y Rheolwr Prosiect, y Tîm Cydweithredu Rhanbarthol (copi ynghlwm)
i ddarparu’r wybodaeth ddiweddaraf ar waith sy’n datblygu i sefydlu Cyllidebau
Cyfun ar draws Gogledd Cymru.
11.05 a.m. – 11.45 a.m.
Cofnodion:
Datganodd y Cynghorydd Gareth Lloyd Davies gysylltiad personol gan ei fod
yn gweithio i Fwrdd Iechyd Prifysgol Betsi Cadwaladr (BIPBC).
Cyflwynodd y Cyfarwyddwr Corfforaethol: Cymunedau / Cyfarwyddwr Statudol
Gwasanaethau Cymdeithasol yr adroddiad a'r atodiadau (a ddosbarthwyd yn
flaenorol) a oedd yn amlinellu'r cynnydd a wnaed hyd yn hyn mewn perthynas â
sefydlu cyllidebau cyfun ar gyfer gwasanaethau iechyd a gofal cymdeithasol
penodol ledled rhanbarth Gogledd Cymru. Yn ystod ei chyflwyniad,
atgoffodd y Cyfarwyddwr yr aelodau bod sefydlu cyllidebau cyfun ar gyfer
gwasanaethau penodol yn ofyniad o dan Ran 9 Deddf Gwasanaethau Cymdeithasol a
Lles (Cymru) 2014.
Hysbyswyd yr aelodau, er mwyn datblygu trefniadau
cyllideb cyfun, bod Bwrdd Partneriaeth Rhanbarthol Gogledd Cymru (NWRPB) wedi
sefydlu Gweithgor Cyllidebau Rhanbarthol, sy'n cynnwys arbenigwyr technegol
arbenigol o'r Gwasanaeth Iechyd ac awdurdodau lleol. Roedd y Grŵp hwn, dan gadeiryddiaeth Cyfarwyddwr Gwasanaethau
Cymdeithasol Sir Ddinbych, wedi bod yn gyfrifol am archwilio manteision posibl
sefydlu cyllidebau cyfun, y trefniadau gweithredu a rheoli ar gyfer cyllidebau
cyfun, gan nodi unrhyw risgiau a gweithredoedd lliniaru sy'n gysylltiedig â hwy
a sefydlu trefniadau llywodraethu ac ati. Roedd cynrychiolaeth dda ar gyfer Sir
Ddinbych ar y Grŵp gan fod Cyfarwyddwr y Gwasanaethau Cymdeithasol yn ei
gadeirio ac roedd ei swyddog Adran 151, y Rheolwr Gwasanaethau Cyfreithiol, un
o'i Gyfreithwyr ac Arbenigwr Adnoddau Dynol yn aelodau ac yn gynghorwyr
technegol i'r Grŵp.
Dywedwyd wrth y Pwyllgor fod y NWRPB a
Chyfarwyddwyr Gwasanaethau Cymdeithasol ledled Cymru yn gadarn o'r farn y dylid
ystyried cyllidebau cyfun fel offeryn i gefnogi'r daith tuag at integreiddio
nid ffurf o integreiddio yn eu rhinwedd eu hunain. Er bod cynnydd wedi'i wneud wrth ddatblygu cytundeb integreiddio
rhanbarthol, roedd gwaith ar y gweill o hyd i gwmpasu a datblygu cyllidebau
cyfun ar gyfer meysydd gwasanaeth penodol. Roedd nifer o gynlluniau peilot
yn cael eu cynnal ar hyn o bryd, neu wedi dod i'r casgliad yn ddiweddar, i
asesu ymarferoldeb y defnydd o gyllidebau cyfun ar gyfer darparu gwasanaethau
yn y meysydd hyn. Er bod angen llawer mwy o waith mewn nifer o'r meysydd hyn cyn cyflwyno
adnoddau cyfun, daeth yn amlwg na fyddai Gogledd Cymru, yn debyg i bob
rhanbarth arall yng Nghymru, mewn sefyllfa i sefydlu cyllideb gyfun ar gyfer
darpariaeth cartref gofal o fis Ebrill 2018, ac felly ni fyddai'n cydymffurfio
â gofynion y Ddeddf. Hysbyswyd Gweinidog Llywodraeth Cymru dros Wasanaethau Cymdeithasol ac
Iechyd y Cyhoedd o'r sefyllfa ac, o ganlyniad, roedd gan bob Bwrdd Partneriaeth
Ranbarthol 12 mis ychwanegol i gydymffurfio â'r gofyniad hwn. Roedd hi hefyd wedi ei gwneud yn glir iawn y byddai'n ystyried ymyrryd os
na chydymffurfiwyd â'r gofyniad hwn erbyn Ebrill 2019. Cynghorwyd yr aelodau
fod Gogledd Cymru o flaen y partneriaethau rhanbarthol eraill mewn perthynas â
symud ymlaen â'r gofyniad hwn, ond roedd llawer iawn o waith manwl ei angen
ynghyd â materion cymhleth i weithio trwyddynt cyn llofnodi cytundeb mewn
perthynas â'r gyllideb gyfun benodol hon.
Wrth ymateb i gwestiynau'r Aelodau, dyma ddywedodd yr Aelod Arweiniol, y
Cyfarwyddwr Corfforaethol a'r swyddogion:
· gofynnwyd i'r aelodau godi unrhyw achosion unigol
yn uniongyrchol â hwy, yr oedd ganddynt bryderon yn eu cylch o ran eu cael eu
derbyn i ofal preswyl / gofal nyrsio hyd nes y byddai triniaeth feddygol yn y
dyfodol heb gael asesiad gofal / gofal nyrsio priodol;
· cynghorwyd nad oedd y gyfraith mewn perthynas â
chyllidebau cyfun ar gyfer darparu gofal ar hyn o bryd yn caniatáu i'r gyllideb
gyfun gael ei dirprwyo i unigolion er mwyn iddynt gomisiynu eu pecyn gofal eu
hunain, byddai angen i'r holl Wasanaethau Cymdeithasol / Gwasanaeth Iechyd
gomisiynu pob pecyn.
Roedd byrddau partneriaeth yn
lobïo'r Llywodraeth i newid y gyfraith mewn perthynas â hyn;
· cadarnhawyd nad oedd y Gwasanaethau Iechyd Meddwl Oedolion na'r
Gwasanaethau Iechyd Meddwl Plant a Phobl Ifanc (CAMHS) wedi'u cynnwys o fewn
cwmpas gofynion cyllideb gyfun Deddf SSWB (Cymru) 2014. Serch hynny, roedd Tîm
Iechyd Meddwl Iechyd a Gwasanaethau Cymdeithasol integredig eisoes ar waith yn
Sir Ddinbych o dan ddarpariaethau Adran 33 Deddf y Gwasanaeth Iechyd Gwladol
(Cymru) 2006 a oedd yn caniatáu i'r Gwasanaeth Iechyd ac awdurdodau lleol, lle
y bo'n briodol, ymrwymo i gytundeb partneriaeth ar gyfer darparu gwasanaethau
integredig. Un
elfen o gytundebau o'r fath oedd y gallu i gronni arian i ddarparu gwasanaeth
integredig. Cyflwynwyd
adroddiad ar gyllidebau cyfun yn unol â'r ddarpariaeth ddeddfwriaethol hon i'r
aelodau yng nghyfarfod y Pwyllgor a gynhaliwyd ar 14 Medi 2017;
· cynghorwyd mai amcan darpariaethau Deddf SSWB
(Cymru) 2014 oedd dod â gwasanaethau iechyd a gofal cymdeithasol yn agosach at
ei gilydd i wella lles dinasyddion;
· hysbysodd y Pwyllgor bod elfen o nerfusrwydd ar ran
yr holl awdurdodau lleol yng Ngogledd Cymru a'r Bwrdd Iechyd mewn perthynas â
datblygu cyllidebau cyfun, yn enwedig o ystyried y sefyllfa ariannol y mae'r
Bwrdd Iechyd yn ei wynebu ar hyn o bryd a'r cyfyngiadau ariannol ar gyllidebau
awdurdodau lleol;
· cadarnhawyd fod awdurdodau lleol ledled Cymru wedi
cyflwyno sylwadau i Weinidog Llywodraeth Cymru mewn perthynas ag ymarferoldebau
sefydlu cyllidebau cyfun ar gyfer darpariaeth cartrefi gofal erbyn 2018
oherwydd y swm mawr o arian a fyddai angen ei dalu i'r gyllideb gyfun hon. Roedd rhai eisoes yn amau a oedd y
dyddiad Ebrill 2019 yn gyraeddadwy, yn enwedig o gofio faint o waith sydd ei
angen i sefydlu'r gyllideb, gan roi'r gweithdrefnau angenrheidiol yn eu lle,
a’r trefniadau diogelu a llywodraethu cadarn ar waith;
· pwysleisiwyd nad oedd yr NWRPB yn gorff gwneud
penderfyniadau, byddai angen cyflwyno unrhyw gynigion a luniwyd gan y Bwrdd i bob
awdurdod lleol a chyrff penderfynu y Bwrdd Iechyd i'w cymeradwyo i’w
gweithredu;
· cynghorwyd eu bod yn hyderus bod casgliadau'r Ael a gyflawnwyd mewn
perthynas â datblygu cyllidebau cyfun wedi bod yn adlewyrchiad cywir o'r
cynigion cynaliadwyedd hirdymor, ac felly'r rheswm dros gymryd digon o amser a
gofal wrth archwilio'r agweddau cyfreithiol a thechnegol cysylltiedig gyda
sefydlu cronfeydd cyfun;
· cytunwyd fod y cysyniad o gyllidebau cyfun yn ganmoladwy,
fel ag yr oedd nod y Ddeddf – sef integreiddio darparu gwasanaethau gofal a
lles er budd defnyddwyr gwasanaeth a gwella canlyniadau ar eu cyfer. Y sialens fwyaf fyddai troi'r weledigaeth yn
realiti, yn enwedig adeiladu sylfaen gadarn er mwyn galluogi cyllidebau i gael
eu cyfuno a'u rheoli'n effeithiol;
· cynghorwyd fod Deddf SSWB (Cymru) 2014 yn nodi ei
bod yn ofynnol i bob awdurdod lleol o fewn ardal ôl troed Bwrdd Iechyd Lleol
gydweithio i wella gwasanaethau gofal cymdeithasol a lles trigolion yn yr ardal
honno h.y. i'r chwe awdurdod lleol yng Ngogledd Cymru o fewn ardal Bwrdd Iechyd
Prifysgol Betsi Cadwaladr (BIPBC). Nid oedd hyn yn gwahardd awdurdodau lleol rhag ymrwymo i gytundebau â
Byrddau Iechyd eraill pe baent am wneud hynny. Roedd
deddfwriaeth gynharach a oedd yn dal mewn grym yn caniatáu i awdurdodau lleol
ymrwymo i gytundebau partneriaeth i gronni arian i ddarparu gwasanaethau
integredig.
Serch hynny, rhagwelir y byddai
sefydlu partneriaethau o'r fath yn brin;
· cydnabuwyd bod ardal ôl troed y Bwrdd Iechyd wedi
ymestyn i sir Powys, gyda chleifion o ogledd Powys yn cael eu cyfeirio at
ysbytai yn ardal BIPBC.
Cadarnhawyd nad oedd Bwrdd Iechyd
Addysgu Powys (BIAP) a'i awdurdodau lleol cysylltiedig ddim pellach na NWRPB
gyda datblygu cyllidebau cyfun;
· cadarnhawyd, er bod y NWRPB yn Fwrdd dan arweiniad
gweithredol, ei ffocws oedd cleifion a dinasyddion y rhanbarth. Am y rheswm hwn, gofynnwyd am gyngor technegol,
ariannol a chyfreithiol gan arbenigwyr yn y maes. Roedd
yn treialu nifer o brosiectau peilot mewn perthynas â chyllidebau cyfun gyda'r
bwriad o nodi problemau ac arferion da gyda'r nod yn y pen draw o sefydlu
trefniadau cyllidebau cyfun effeithlon ac effeithiol; a
· cadarnhawyd fod arbenigwyr AD yn ymwneud â gwaith y grŵp cyllidebau cyfun
er mwyn nodi materion sy'n ymwneud ag Adnoddau Dynol, megis telerau ac amodau'r
staff ac ati, os gwnaed cynnig i gynnwys staffio a chostau staffio mewn unrhyw
drefniadau cyllideb gyfun. Pwysleisiwyd
nad oedd yn rhaid i drefniadau cyllidebau cyfun gynnwys trefniadau cyflogaeth
staff, roedd arferion gwaith integredig yn ddigonol.
Ar ddiwedd y drafodaeth:
PENDERFYNWYD yn amodol ar y sylwadau uchod:
(i)
cadarnhau
ei fod wedi darllen, deall ac ystyried yr Asesiad o Effaith ar Les fel rhan o’i
ystyriaethau:
(ii)
nodi na fyddai Gogledd Cymru fel rhanbarth yn
cyfuno cyllidebau Cartrefi Gofal erbyn Ebrill 2018, tra'n cydnabod y gwaith
sylweddol sydd ar y gweill ar draws y rhanbarth i ddatblygu gwaith o ran
integreiddio a chyllidebau cyfun;
(iii)
cydnabod y gofynion adnoddau sydd eu hangen i
gwblhau'r gwaith sy'n gysylltiedig ag integreiddio a chyllidebau cyfun o fewn
yr amserlenni a nodir yn y Ddeddf, gan gynnwys y costau posibl a'r ffynonellau
ariannu i'w darparu; a
(iv)
gofyn i adroddiad gael ei gyflwyno i'r Pwyllgor i'w
ystyried yn ei gyfarfod ym mis Mai 2018, ar y cynnydd a wnaed wrth ddatblygu a
chyflwyno cyllidebau iechyd a gofal cymdeithasol cyfun a chydymffurfio ag Adran
9 o Ddeddf Gwasanaethau Cymdeithasol a Lles (Cymru) 2014.
Dogfennau ategol:
- Pooled Budgets Report WELSH, Eitem 6. PDF 307 KB
- 13. Llythyr i'r Gweinidog 15 09 2017 - Ymateb i'r camau gweithredu i sefydlu cronfeydd cyfun, Eitem 6. PDF 172 KB
- Well-being Impact Assessment 19 10 2017 v2, Eitem 6. PDF 84 KB