Eitem ar yr agenda
SIR DDINBYCH FEL LLEOLIAD TWRISTIAETH A DIGWYDDIADAU
- Meeting of Pwyllgor Craffu Cymunedau, Dydd Iau, 7 Medi 2017 10.00 am (Item 5.)
- View the declarations of interest for item 5.
Ystyried
adroddiad (copi ynghlwm) ar waith y Tîm Twristiaeth i hyrwyddo Sir Ddinbych fel
lleoliad twristiaeth a digwyddiadau a gwneud argymhellion ar sut y dylid
datblygu twristiaeth yn y sir ymhellach.
Cofnodion:
Cyflwynodd yr
Arweinydd, y Cynghorydd Hugh Evans adroddiad (wedi’i ddosbarthu yn barod) yn
manylu ar waith y Tîm Twristiaeth i hyrwyddo a gwerthu Sir Ddinbych fel
lleoliad twristiaeth a digwyddiadau gan ganolbwyntio’n benodol ar weithio mewn
partneriaeth â’r Ardal o Harddwch Naturiol Eithriadol i ddatblygu a mireinio'r
broses o wneud cais i gynnal digwyddiadau a’r arloesedd a’r gwaith datblygu a
wnaed.
Dywedodd yr Arweinydd wrth y Pwyllgor ei fod ef a’r staff eisiau clywed
safbwyntiau archwilio ar y gwaith a wnaed i atynnu twristiaid i Sir Ddinbych ac
effeithiolrwydd y bartneriaeth o ran twristiaeth i gynyddu’r gwerth sy’n cael
ei wario gan dwristiaid yn y sir.
Roeddent
hefyd yn awyddus i dderbyn arsylwadau
archwilio os yw Strategaeth Twristiaeth y Sir yn gynaliadwy ac yn un a fyddai'n
cyfrannu'n effeithiol at uchelgais hirdymor y Cyngor o ddatblygu’r economi. Mae Sir Ddinbych yn
ffodus fod ganddi ystod eang o atyniadau twristiaeth. Mae ganddi hefyd
‘gefnffyrdd’ sy’n croesi ar hyd y sir gyda miloedd o dwristiaid yn teithio i
wahanol gyrchfannau gwyliau yng Ngogledd
Cymru, Gogledd Ddwyrain Lloegr a Chanolbarth Lloegr. Felly mae hi’n bwysig i
economi Sir Ddinbych ein bod yn atynnu'r twristiaid sy'n teithio ar y
cefnffyrdd i ymweld â threfi, atyniadau, llety, llefydd bwyta ayb yn Sir
Ddinbych fel eu bod yn gwario eu harian yn yr ardal.
Rhoddodd yr Arweinydd Tîm (Twristiaeth, Marchnata a Digwyddiadau)
amlinelliad i’r Pwyllgor o’r manteision i'r Cyngor a'r sir o weithio mewn
partneriaeth â chynghorau Sir y Fflint a Wrecsam mewn perthynas â gwaith
twristiaeth a digwyddiadau, yn enwedig gan mai nifer fechan o swyddogion sydd
gan Sir Ddinbych yn gweithio yn y maes hynny. Bu swyddogion o’r dair sir yn ogystal â chynrychiolwyr o
Ardal o Harddwch Naturiol Eithriadol yn cyfarfod fel Partneriaeth Twristiaeth
Gogledd Ddwyrain Cymru yn fisol i gynllunio a datblygu’r gwaith. Yn y misoedd diwethaf
maent wedi:
·
bod yn llwyddiannus i
sicrhau £40k o gyllid gan Lywodraeth Cymru i dalu am waith hyrwyddo ar gyfer y
thema Blwyddyn y Môr 2018.
Trwy
gymryd i ystyriaeth mai dim ond rhan o ardal Gogledd Ddwyrain Cymru sydd wrth
yr arfordir roedd y bartneriaeth wedi canolbwyntio ar y cynnig ‘ffyrdd i’r môr’
gan bwysleisio'r cynnig i dwristiaid yn yr ardal o ffordd i’r môr yn ogystal
â’r cynnig traeth a’r môr ei hun;
·
bod yn gweithio’n agos â busnesau twristiaeth
ar y Cynllun Llysgennad Twristiaeth.
Canolbwyntiwyd
ar yr hyn y gall gwahanol fathau o fusnesau twristiaeth ei wneud i hyrwyddo
busnesau eraill fyddai’n debygol o elwa o dwristiaid. Mae cyllid Rhaglen Datblygu Gwledig (RDP) wedi ei sicrhau yn ddiweddar gan
Cadwyn Clwyd i wella’r cynllun hwn ymhellach trwy ddatblygu model yn seiliedig
ar y we i atynnu mwy o gyfranogwyr ac i sicrhau bod y Cynllun yn gynaliadwy yn
y dyfodol;
·
bod yn rhan o waith y
grŵp tasg a gorffen ar feysydd parcio yn edrych ar sut y gellir gwneud
gwell defnydd o feysydd parcio cyhoeddus y sir er mwyn hyrwyddo a chyfeirio
twristiaid at atyniadau a busnesau twristiaeth yr ardal.
Mae’r
gwaith yn parhau gyda hynny.
Gyda’r bwriad o gefnogi trefnwyr digwyddiadau mae Tîm Twristiaeth Sir
Ddinbych wedi datblygu ‘proses hysbysu digwyddiadau’ newydd a llai trafferthus. Gwaith wedi’i wneud i
wella’r broses. O ganlyniad, dim ond dwy
dudalen ar y ffurflen hysbysu fydd angen eu llenwi gan eu bod yn cynnwys yr
holl agweddau ynghlwm â chynnal digwyddiad gan gynnwys gofynion trwyddedu, cau
ffyrdd ac ati. Bydd y broses
hysbysiad sengl yn cael ei dreialu o fis Ionawr 2018 ymlaen. Mae bellach yn
amlwg bod nifer gynyddol o dwristiaid yn defnyddio safleoedd cyfryngau
cymdeithasol i gael gwybodaeth i dwristiaid ac felly roedd yn hanfodol bod y
Cyngor yn diweddaru ei gyfryngau cymdeithasol yn rheolaidd a hynny mewn modd
arloesol. Er bod cynnydd
yn y defnydd o gyfryngau cymdeithasol i gael gafael ar wybodaeth twristiaeth
nid yw hynny’n cael effaith negyddol ar werth canolfannau gwybodaeth i
dwristiaid gyda dau i’w cael yn Sir Ddinbych yn ogystal a Phwyntiau Gwybodaeth
i Dwristiaid, gyda thri yn y sir.
Cafodd y Pwyllgor amlinelliad gan swyddogion o Wasanaethau Cefn Gwlad a’r
AHNE o sut y cydweithiwyd yn agos gyda’r Tîm Twristiaeth i gyflawni’r
Strategaeth a thwristiaeth cynaliadwy yn yr ardal. Cyfeiriwyd at nifer o fentrau sy’n cael eu
treialu ar hyn o bryd mewn partneriaeth â busnesau lleol fel ‘Bwyta, Aros,
Gwneud’ a’r ‘Clwb Bwyd Blasus’.
Mae
cynlluniau yn cael eu gwneud ar hyn o bryd i geisio cysylltu'r gweithgareddau
yn ymwneud â throi'r goleuadau Nadolig ymlaen mewn nifer o drefi yng Ngogledd
Ddwyrain Cymru gyda gwaith hyrwyddo a digwyddiadau Clwb Bwyd Blasus.
Gan ymateb i gwestiynau’r aelodau, dywedodd yr Aelod Arweiniol a’r
swyddogion:
·
bod aelodau etholedig mewn
sefyllfa dda i dynnu sylw at yr holl ddigwyddiadau a mentrau twristiaeth yn
digwydd ledled y sir.
Trwy
ddefnyddio cyfryngau cymdeithasol gallent o bosib gynyddu lefelau mynediad mewn
digwyddiadau neu nifer y pobl sy’n ymweld â threfi a phentrefi ac ati. Byddai swyddogion yn fwy na pharod i helpu aelodau gyda diffyg hyder neu
brofiad i ddefnyddio cyfryngau cymdeithasol ac i fod yn gyfarwydd â’r buddion
yn ogystal â pheryglon cyfryngau cymdeithasol;
·
yn y cyfarfod AHNE nesaf
bydd trafodaethau yn parhau ar sut y gall yr AHNE weithio gyda phentrefi a
busnesau lleol i wella eu presenoldeb ac i wneud pobl sy'n ymweld â'r ardal yn
fwy ymwybodol ohonynt er mwyn cynyddu eu hincwm o dwristiaeth;
·
y Cynllun Llysgennad
Twristiaeth ar-lein newydd i fusnesau yn cael ei lansio yn swyddogol gyda
busnesau lleol.
Bydd
busnesau lleol yn cael eu hannog i ymuno a rhannu gwybodaeth, arfer da ac ati,
ac i fentora eu gilydd os oes angen;
·
ymgyrch yn cael ei redeg i
annog busnesau lleol i fod yn rhan o’r Fforwm Twristiaeth.
Os
na allent fynychu cyfarfodydd Fforwm, bydd gofyn iddynt rannu gwybodaeth am
ddigwyddiadau a mentrau gyda phobl busnes lleol eraill;
·
gwaith yn mynd rhagddo ar
hyn o bryd i edrych ar ddichonolrwydd cael Pwyntiau Gwybodaeth i Dwristiaid yn
llyfrgelloedd y sir yn ogystal â
Llysgenhadon Twristiaeth i ymweld â llyfrgelloedd yn rheolaidd.
Gan
fod mynediad i Wi-Fi am ddim ym mhob llyfrgell yn y sir mae’n debygol bod
twristiaid yn cael eu denu i ymweld â nhw i gael mynediad i wybodaeth
electronig;
·
mewn perthynas â
thwristiaeth bysiau domestig mae’r cynnydd wedi bod yn llawer mwy araf na’r
disgwyl ar draws y sir.
Fodd
bynnag, mae Rhuthun trwy ymrwymiad y Cyngor Tref yn gwneud cynnydd i ennill
achrediad Statws Cyfeillgar i Fysiau;
·
mae gwarchodfeydd natur y
sir yn cael eu gweld fel cyfleuster cymunedol yn hytrach nag atyniad i
dwristiaid.
Er
nad yw twristiaid yn cael eu hatal rhag ymweld â’r gwarchodfeydd natur nid yw’r
cyfleusterau hyn yn cael eu hysbysebu i dwristiaid;
·
roeddent yn cytuno gyda’r
aelodau bod angen gwneud mwy i farchnata Sir Ddinbych ac ardal Prestatyn fel
‘dechrau/diwedd’ Taith Genedlaethol Clawdd Offa gyda’r bwriad i ddenu cerddwyr
i dreulio ychydig ddyddiau yn yr ardal yn crwydro’r lle gan ymweld ag atyniadau
eraill a defnyddio’r busnesau lleol;
·
gwaith rhagarweiniol yn
cael ei wneud ac er bod y gwaith yn y cyfnod cynnar ar hyn o bryd mae bwriad i
fusnesau yn ardal Prestatyn i fanteisio ar dwristiaid sy’n ymweld ag ardal
Gronant i edrych ar y haid o fôr-wenoliaid bach;
·
mae’r Cyngor a’r
Bartneriaeth wedi, trwy wybodaeth a dderbyniwyd o atebion i’r cwestiynau
ychwanegol a gomisiynwyd gan arolwg ymwelwyr blynyddol Croeso Cymru, wedi
llunio proffil ymwelwyr gymharol fanwl ar gyfer yr ardal.
Mae’r
rhan fwyaf o ymwelwyr yn ymddangos i fod yn ferched hŷn gyda incwm dros
ben sydd ar gael i’w wario. Ar sail y wybodaeth hon
mae gwaith wedi mynd rhagddo i geisio marchnata’r ardal i groestoriad o grwpiau
oedran;
·
mae wedi bod yn hynod o
anodd i ragweld tueddiadau’r dyfodol ar gyfer twristiaeth.
Yn
y DU mae’r tywydd yn gyfrannwr sylweddol i lwyddiant y diwydiant twristiaeth
mewn unrhyw flwyddyn.
Ffactor arall sy’n cael effaith ar dwristiaeth yw’r
gyfradd gyfnewid ariannol. Fodd bynnag, ar hyn o bryd
mae brandiau twristiaeth Cymru a Gogledd Cymru yn cael eu cydnabod i fod yn
gynnyrch hynod gadarn.
Mae cynnig twristiaeth Gogledd Cymru a Gogledd Ddwyrain
Cymru wedi elwa’n fawr o fod yn agos i frandiau twristiaeth eraill fel Lerpwl,
Manceinion a Chanolbarth Lloegr ac felly yn atynnu ymwelwyr sydd eisiau pecyn
gwyliau gwledig a dinesig;
·
tra bod y brand gwyliau
‘gwyliau gartref’ wedi bod yn boblogaidd yn y blynyddoedd diwethaf mae
arwyddion yn dangos bod gwyliau o'r fath o bosib wedi cyrraedd ei uchafbwynt yn
barod o ran poblogrwydd;
·
bod penderfyniad blaenorol
y Cyngor i ddatblygu'r economi fel un o’r blaenoriaethau corfforaethol yn
seiliedig ar ddata oedd yn cydnabod anghyfartaledd mewn enillion yn Sir
Ddinbych o'i gymharu â siroedd
eraill.
Y
flaenoriaeth ar gyfer y gwaith datblygu economaidd a gymerwyd hyd yma yw
cyfuniad o ddarparu gwell cefnogaeth i fusnesau newydd a phresennol, ac atynnu
sectorau o werth uwch i’r sir. Parc
Busnes Llanelwy oedd prif ffocws y rhan olaf o’r gwaith. Y rheswm dros hynny yw bod enillion o dwristiaeth
yn tueddu i fod yn is nag o fathau eraill o gyflogaeth, gydag enillion o
dwristiaeth mewn ardaloedd arfordirol hefyd yn tueddu i fod yn is nag ardaloedd
heb fod ar yr arfordir – mae’r broblem yma wedi cael ei amlygu mewn erthygl
papur newydd yn ddiweddar;
·
ysgolion yn cael eu
defnyddio yn aml i dynnu sylw ac i hyrwyddo digwyddiadau sy’n cael eu cynnal yn
y sir, hefyd marchnata ar y radio;
·
swyddogion a chyfranogwyr
y Clwb Bwyd Blasus yn cyfathrebu ar hyn o bryd gyda busnesau yn Lerpwl i weld
os byddai rhedeg fersiwn o'r cynllun Independant
Liverpool Scheme yn ardal Gogledd Ddwyrain Cymru yn gweithio;
·
defnyddio ‘tacsi wedi’i
addurno’ i hyrwyddo wedi cael ei wneud yn Llundain yn ystod yr haf i dynnu sylw
at yr hyn sydd ar gael yng Ngogledd Cymru. Wedi bod yn ffordd effeithiol o godi
proffil a heb unrhyw gostau ynghlwm â’r ymgyrch;
·
roeddent yn hynod o
ymwybodol o'r diffyg llety dros nos yn y sir.
O
ganlyniad, mae’r Tîm Economaidd a Datblygu Busnes yn gweithio’n galed i gefnogi
a datblygu mathau amrywiol o lety gwyliau ar hyd y sir hy gwestai bwtîg,
glampio, gwestai fforddiadwy ag enw da ac ati. Er
hynny, er bod ymgynghori wedi bod â’r AHNE ynglŷn â cheisiadau cynllunio
nid oedd sylwadau wedi’u cael gan y Tîm Economaidd a Datblygu Busnes ar sut y
byddai ceisiadau arfaethedig yn debygol o gael effaith ar ddatblygu economaidd
yn yr ardal.
Cyfeiriodd yr aelodau at gais presennol am westy mawr
gyda chyfleusterau ‘caban’ yn y sir a fyddai yn eu barn nhw yn elwa o
arsylwadau gan y Tîm Economaidd a Datblygu Busnes ar ei effaith economaidd ac i
gael ei gynnwys yn adroddiad i Bwyllgor Cynllunio y Cyngor;
·
mae cael caniatâd
Llywodraeth Cymru i godi arwyddion ger y cefnffyrdd, gan gynnwys arwyddion
twristiaeth, yn broses gymhleth a chostus iawn.
Caniatâd
wedi’i roi yn ddiweddar i godi arwyddion yn cyfeirio twristiaid i Ddyffryn
Clwyd, mae’r Cyngor bellach yn y broses o ddylunio'r cynllun a chael gafael ar
gyllid i dalu am yr arwyddion;
·
roedd gan y Cyngor
brotocol amlwg mewn perthynas â gosod arwyddion dros dro/heb eu hawdurdodi ar
y Briffordd ar gyfer dibenion hysbysebu busnesau a digwyddiadau cymunedol. Mae’r protocol wedi cael ei archwilio gan y pwyllgor Archwilio yn ystod
tymor y cyn gyngor.
Mae’r protocol yn nodi y dylai trefnwyr digwyddiadau
cymunedol gysylltu â’r Cydlynydd Strydwedd Ardal priodol o flaen llaw i
gytuno ar leoliadau addas ar gyfer arwyddion o’r fath. |
PENDERFYNWYD dan
ddarpariaethau Adran 100A Deddf Llywodraeth Leol 1972, gwahardd y Wasg a’r
Cyhoedd o’r cyfarfod ar gyfer yr eitemau canlynol ar y sail y byddai gwybodaeth
eithriedig yn debygol o gael ei datgelu fel y’i diffinnir ym Mharagraffau 14 ac
15 Rhan 4 Atodlen 12A Ddeddf Llywodraeth Leol 1972.
O dan Rhan II busnes ac mewn ymateb i gwestiwn gan aelod etholedig cafodd y
Pwyllgor ddiweddariad gan Bennaeth Gwasanaethau Priffyrdd a’r Amgylchedd ar y
sefyllfa diweddaraf mewn perthynas â Chastell Bodelwyddan ac Ymddiriedolaeth
Castell Bodelwyddan. Cynghorodd mai
cyfrifoldeb Ymddiriedolaeth y Castell a pherchennog y gwesty yn bennaf yw
hyrwyddo cyfleusterau i dwristiaid ar y safle, ac nid cyfrifoldeb y Cyngor.
Rhan I
Cyn cau’r drafodaeth fe bwysleisiodd yr aelodau ar bwysigrwydd:
·
hyrwyddo beth sydd ar gael
mewn trefi a phentrefi lleol i bobl sy’n ymweld â’r AHNE a llwybr Clawdd Offa,
yn arbennig atyniadau sy'n cael eu rhedeg gan y Cyngor, hy, Carchar Rhuthun,
Nantclwyd y Dre a Phlas Newydd, Llangollen. Dylid ymdrechu
hefyd i gefnogi busnesau wedi eu lleoli ar gyrion AHNE i hyrwyddo eu cynnig i
ymwelwyr â’r AHNE;
·
yr angen i dynnu sylw'r
holl bartneriaid, yn fusnesau lleol neu gyrff cyhoeddus fel CADW at frand
diwylliant a iaith Gymraeg cadarn i dwristiaid yn yr ardal;
·
archwilio dichonolrwydd o
gael arwyddion o enwau trefi a phentrefi sy’n cynnwys emblemau i nodi pa
amwynderau ac atyniadau sydd ar gael yno, a
·
chyfathrebu/ymgynghori rheolaidd
rhwng yr Adran Gynllunio a’r Tîm Economaidd a Datblygu Busnes mewn perthynas
â’r effaith economaidd posib yn sgîl datblygiadau arfaethedig (yn gadarnhaol a
negyddol) a'r sylwadau hynny i gael eu cyflwyno i'r Pwyllgor Cynllunio.
Diolchodd yr Arweinydd i'r Pwyllgor am eu cyfraniad a'u harchwiliad manwl
o'r pwnc.
Penderfynodd y Pwyllgor:
PENDERFYNWYD, yn amodol ar y sylwadau uchod,
(i)
i gydnabod y pwysigrwydd o sicrhau fod cynllun a strategaeth twristiaeth
y Cyngor yn cyd-fynd â’r strategaeth datblygu economaidd cyffredinol er mwyn sicrhau bod y buddion economaidd
gorau yn cael eu gwireddu yn yr hirdymor ar gyfer yr ardal, busnesau a
phreswylwyr; ac
(ii)
bod adroddiad cynnydd pellach yn cael ei gyflwyno
i’r pwyllgor mewn deuddeg mis gan fanylu ar effeithiolrwydd y gwahanol fentrau
twristiaeth wrth gyflawni'r Strategaeth Twristiaeth a’u cyfraniad at gyflawni
uchelgais y Cyngor mewn perthynas a datblygu economaidd.
Dogfennau ategol:
- Tourism Report W 070917, Eitem 5. PDF 257 KB
- Apendix 1 Tourism Overview 2016-17, Eitem 5. PDF 598 KB
- Apendix 1b STEAM Denbighshire 2016 overview, Eitem 5. PDF 184 KB
- Tourism Report 070917 - App 2, Eitem 5. PDF 221 KB
- Tourism Report 070917 - App 3, Eitem 5. PDF 27 KB
- App4, Eitem 5. PDF 124 KB
- Tourism Report 070917 - App 5 TIP Rhug, Eitem 5. PDF 1 MB
- Tourism Report 070917 - App 6, Eitem 5. PDF 661 KB
- Tourism Report 070917 - App 7, Eitem 5. PDF 654 KB