Eitem ar yr agenda
CAIS GOLLYNGIAD CYNGOR TREF BODELWYDDAN
Ystyried adroddiad gan y Swyddog Monitro (copi wedi’i amgáu),
ynglŷn â chais am ollyngiad a wneir gan Gyngor Tref Bodelwyddan.
Cofnodion:
Cyflwynodd y
Cadeirydd y Cynghorydd Richard Mainon, aelod o’r cyngor sir a Chynghorydd Tref
Bodelwyddan a gofynnodd iddo roi’r cefndir i’r cais am ollyngiad gan aelodau
Cyngor Tref Bodelwyddan.
Esboniodd y
Cynghorydd Mainon fod canolfan gymunedol y pentref wedi ei rhedeg am 42 blynedd
gan Gymdeithas Cymuned Bodelwyddan (BCA), ond bod y Gymdeithas bellach wedi ei
dirwyn i ben a’r ganolfan gymuned mewn perygl o gael ei chau.
Yng nghyfarfod
cyntaf Cyngor y Dref ar 24 Mai yn dilyn Etholiadau’r Awdurdod Lleol, lle’r
roedd llawer o bobl yn bresennol, cytunwyd i gynnal cyfarfod ar wahân i
benderfynu beth i’w wneud ac i ystyried sefydlu cymdeithas newydd.
Ar 30 Mai,
ffurfiwyd cymdeithas newydd o’r enw “Cyfeillion Bodelwyddan”. Gan mai 3 aelod
yn unig sydd ar Gyngor Tref Bodelwyddan ac un Cynghorydd Sir yn gweithredu dan
adran 91 Deddf Llywodraeth Leol roedd yn rhaid i’r holl gynghorwyr fod ar
bwyllgor y gymdeithas newydd. Oherwydd hyn roeddynt yn gwneud y cais am
ollyngiad.
Esboniodd y
Swyddog Monitro (SM), er mwyn cydymffurfio â chod ymddygiad yr Aelodau,
byddai’n rhaid i’r aelodau lenwi ffurflen datgan cysylltiad wrth ymdrin â
materion ar y rhaglen yn ymwneud â Chyfeillion Bodelwyddan. Byddai’r rhain yn
bennaf yn faterion o gysylltiad personol na fyddai’n effeithio ar eu hawl i
bleidleisio. Fodd bynnag, byddai’r grŵp newydd yn chwilio am gymorth ariannol gan y Cyngor Tref. Felly byddai’r
cysylltiad yn rhagfarnol ac ni fyddai gan y cynghorwyr bleidlais os na fyddai’r
gollyngiad yn cael ei ganiatáu.
Dywedodd y SM
wrth y Pwyllgor y gallai’r Pwyllgor Safonau ganiatáu eithriad neu ollyngiad yn
rhinwedd Deddf Llywodraeth Leol 2000. Cyfeiriodd sylw’r aelodau at y rheoliad
yn atodiad 2 a’r rheoliadau a oedd fwyaf perthnasol yn yr achos hwn – Rheoliad
2(a), (d) a (h).
Er y gall y
Pwyllgor Safonau ddewis un sail ar gyfer caniatáu gollyngiad, nid oes
rheidrwydd arnynt i’w ganiatáu. Er bod llythyr Clerc Cyngor Tref Bodelwyddan yn
gwneud cais am ollyngiad am gyfnod o 12 mis gallai’r Pwyllgor ddewis ei
ganiatáu am unrhyw gyfnod, os oedd yn dymuno ei ganiatáu o gwbl. Ymhellach,
gallai’r Pwyllgor osod cyfyngiad ariannol a byddai’n rhaid gofyn am
gymeradwyaeth bellach ar gyfer hyn.
Gofynnodd y
Cadeirydd am eglurder ynghylch a oedd y gollyngiad yn cael ei roi i gynghorwyr
a enwyd neu i’r corff, h.y. Cyfeillion Bodelwyddan.
Atebodd y SM y
byddai’r cynghorwyr yn cael eu rhestru. Petai cynghorydd newydd yn cael ei
gyfethol yna ni fyddai’n elwa ar y gollyngiad a byddai’n rhaid iddo wneud cais
am ollyngiad personol. Wrth i’r gymdeithas gymunedol ddatblygu a denu mwy o
wirfoddolwyr, tybir y bydd y cynghorwyr yn ymbellhau oddi wrthi. Sicrhaodd y SM
fod y math hwn o gais yn gyffredin yng Nghymru a’i fod yn cael ei ystyried er
budd cyhoeddus.
Ymhelaethodd y
Cynghorydd Mainon ar gyflwr y cyfleusterau cymunedol ac amcangyfrifwyd y byddai
angen £42,000 i wella cyflwr yr adeilad. Byddai’r gwaith atgyweirio yn cynnwys:
dau foeler newydd; adnewyddu’r neuadd; uwchraddio’r gegin; rhwystr llawr gwlyb
a chyfleusterau newid ar gyfer chwaraewyr pêl-droed. Rhagwelwyd na fyddai’r
costau yn fwy na £60,000. Roedd gan y Cyngor Tref adnoddau digonol i dalu am y
swm hwn. Ar ôl i’r neuadd gael ei gwella, disgwylir y bydd yn haws denu
aelodau’r gymuned i’w defnyddio. Gallai’r gwaith ddechrau’n syth petai’r cais
am ollyngiad yn cael ei gymeradwyo.
Trafododd y
Pwyllgor fanteision ymestyn cyfyngiadau amser y gollyngiad o 12 mis i 18 mis.
Er bod hyn yn cynnig rhywfaint o hyblygrwydd petai unrhyw waith ar y prosiect
yn cymryd mwy o amser, roedd y Pwyllgor hefyd o’r farn bod cyfyngiadau amser o
gymorth i ganolbwyntio meddyliau pobl ac y gallai’r Gymdeithas gyflwyno cais
arall yn y dyfodol petai angen.
Pan ofynnwyd a
fyddai’r Cyfeillion yn gwneud cais am arian loteri i gefnogi’r prosiect yn y
dyfodol, dywedodd y Cynghorydd Mainon y byddai hyn yn digwydd a’i fod yn meddwl
y byddai’n bosibl cael 50% ychwanegol ar ffurf grantiau. Fodd bynnag, y
flaenoriaeth yw sefydlu’r Gymdeithas yn gyfreithiol ac adnewyddu’r adeilad
erbyn y gaeaf.
Wrth grynhoi,
dywedodd y Cadeirydd wrth aelodau’r Pwyllgor fod ganddynt bŵer cyfreithiol dan adran 81(4) Rheoliadau
Pwyllgorau Safonau (Caniatáu Gollyngiadau) (Cymru) 2001/2279 yn yr achosion a
ganlyn –
(a) os oes gan ddim llai na hanner aelodau’r
awdurdod perthnasol neu hanner aelodau un o bwyllgorau’r awdurdod (yn ôl fel y
digwydd) y mae’r busnes i gael ei ystyried ganddo gysylltiad sy’n berthnasol
i’r busnes hwnnw.
PENDERFYNWYD, yn amodol ar yr uchod, ar y camau a
ganlyn:
(a) Bod y Pwyllgor Safonau
yn caniatáu’r cais am ollyngiad â chyfyngiadau cronnus o £60,000 am gyfnod o 12
mis a
(b) Byddai’r
SM yn ysgrifennu at Glerc Cyngor Tref Bodelwyddan ac yn dosbarthu’r llythyr
ymhlith aelodau’r Pwyllgor (GW i
weithredu).
Dogfennau ategol:
- Bodelwyddan dispensation, Eitem 5. PDF 197 KB
- Dispensation app1, Eitem 5. PDF 55 KB
- Extract from Dispensation Regs17-6-16 9_39 (AM), Eitem 5. PDF 129 KB