Eitem ar yr agenda

Ystyried adroddiad gan Bennaeth Cynllunio a Gwarchod y Cyhoedd (copi wedi'i amgáu) sy’n rhoi diweddariad i’r aelodau am y Bartneriaeth Teledu Cylch Caeëdig a cheisio cefnogaeth i’w chadw.

9.40 a.m. – 10.10 a.m.

Cyflwynodd y Cynghorydd Julian Thompson-Hill, Aelod Arweiniol Perfformiad Cyllid ac Asedau Strategol yr adroddiad ac atodiad cyfrinachol (a ddosbarthwyd yn flaenorol) a brifiodd y Pwyllgor ynghylch y cefndir i benderfyniad y Cyngor i dynnu’n ôl o ddarparu ei wasanaeth TCC a throsglwyddo darpariaeth y gwasanaeth i Bartneriaeth TCC Sir Ddinbych.

Cadarnhaodd y Cynghorydd Thompson-Hill -

·         er bod y Cydlynydd TCC llawn amser yn cael ei gyflogi gan y Cyngor, roedd y swydd yn cael ei hariannu gan y Bartneriaeth

·         er gwaetha’r ffaith nad oedd y delweddau’n cael eu monitro 24 awr y dydd, ni fu cynnydd amlwg mewn achosion o drosedd ac anrhefn.

·         tra bo’r Bwrdd Partneriaeth TCC, a oedd yn goruchwylio gwaith y Bartneriaeth wrth ddarparu’r gwasanaeth TCC, yn fodlon gyda'r gwasanaeth a ddarparwyd, cydnabu nad oedd y trefniadau ar gyfer darparu’r gwasanaeth cyfredol yn gynaliadwy yn y tymor hir oherwydd oed y gweinydd TGCh a’r gofynion cynnal a chadw camera.

·         roedd y Bwrdd wedi archwilio nifer o fodelau darparu posibl ar gyfer y gwasanaeth.  Ar ôl ystyried sawl opsiwn gwahanol, cytunwyd dechrau gweithio gyda Chyngor Gorllewin Sir Gaer a Chaer er mwyn iddyn nhw ymgymryd â’r gwaith o reoli’r gwasanaeth o ddydd i ddydd yn y dyfodol.

Gan ymateb i gwestiynau’r aelodau, bu i'r Aelod Arweiniol, Pennaeth Cynllunio a Gwarchod y Cyhoedd a'r Rheolwr Gwarchod y Cyhoedd -

·         amlinellu cost y gwasanaeth TCC pan oedd y Cyngor yn ei weithredu a’r penderfyniad a gymerwyd fel rhan o’r ymarfer cyllideb Rhyddid a Hyblygrwydd i dynnu yn ôl o’i ddarparu gan nad oedd yn wasanaeth statudol.

·          Fodd bynnag, roedd y Cyngor yn cydnabod pwysigrwydd y gwasanaeth ac felly cytunwyd gweithio gyda’r holl bartneriaid a oedd yn fodlon cydweithio i ddarparu gwasanaeth TCC. Cynghorwyd er nad oedd Cyngor Sir Ddinbych bellach yn cyfrannu’n gorfforaethol tuag at gost y Gwasanaeth TCC, nid oedd gwasanaethau penodol o fewn y Cyngor yn cyfrannu swm ariannol e.e. Gwasanaethau Parcio, Cynllunio a Gwarchod y Cyhoedd.

·         cadarnhaodd bod y Bartneriaeth TCC yn darparu gwasanaeth camera TCC gofod cyhoeddus sefydlog i drefi Prestatyn, Rhuddlan a’r Rhyl.  Roedd gan drefi sirol eraill eu trefniadau preifat eu hunain ar gyfer gwasanaethau TCC

·         cynghorwyd fod gan yr Heddlu TCC symudol a oedd yn cael eu defnyddio mewn mannau lle mae trosedd ac anrhefn yn fynych.  Roedd gan y Cyngor hefyd gamera symudol a allai gofnodi delweddau, ond nid oedd yn bwydo’r llun i’r ystafell reoli

·         eglurwyd y fformwla arfaethedig ar gyfer pob un o’r tair tref (yn yr atodiad cyfrinachol) ar gyfer darparu Gwasanaeth TCC oddi wrth y Bartneriaeth a oedd yn cynnwys isafswm sicr o gamerâu ar gyfer pob un o'r trefi.  Roedd yr adroddiad hefyd yn cynnwys y cytundeb cynnal a chadw arfaethedig ar gyfer y camerâu a oedd eisoes yn eu lle a’r camau a fyddai’n cael eu cymryd pan fyddai unrhyw gamera’n diffygio neu’n dod i ben ei fywyd trwsiadwy.

·         pwysleisiwyd o dan y cytundeb newydd y byddai sicrwydd ar yr isafswm o gamerâu ym mhob tref ar unrhyw un adeg, er y byddai’r nifer o gamerâu sy’n effro ym Mhrestatyn a’r Rhyl yn sylweddol uwch na'r isafswm sicr.  Byddai swm a gyfrannwyd gan bob cyngor tref yn sicrhau'r isafswm o gamerâu gweithredol

·         bod Heddlu Gogledd Cymru yn cyfrannu £16k at y gwasanaethau TCC sir gyfan ar draws y rhanbarth

·         cadarnhawyd bod y Bwrdd Partneriaeth TCC wedi ystyried pump gweithredwr posibl ar gyfer darparu gwasanaeth, gan gynnwys awdurdodau eraill yng Ngogledd Cymru.  Fodd bynnag, ar ôl gwerthuso’r bidiau ac ymweld â holl ystafelloedd rheoli’r gweithredwyr er mwyn asesu’r math o wasanaeth y gellid ei ddarparu, daeth i’r amlwg bod y gwasanaeth y gallai CWCC ei gynnig yn y tymor hir yn llawer gwell.  Roeddent eisoes yn gweithio’n agos gyda Heddlu Gogledd Cymru a gallent ddarparu’r Bartneriaeth gyda gwasanaeth monitro adweithiol, 24 awr, 7 diwrnod o’r wythnos, a oedd yn fwy na’r hyn yr oedd y Bartneriaeth yn ddarparu ei hun ar hyn o bryd.

·         dywedwyd byddai’r contract cynnal a chadw cyfredol gyda chwmni i wasanaethu a thrwsio camerâu yn parhau.  Pan a phryd y credwyd y byddai camera wedi dod i ddiwedd ei oes trwsiadwy, byddai penderfyniad yn cael ei wneud, yn seiliedig ar asesiad risg, i amnewid y camera ai peidio gydag un o ardal risg isel.

·         cadarnhawyd bod Heddlu Gogledd Cymru a gwasanaethau Cynghorau unigol i gyd wedi ymrwymo i gyfrannu'r swm gofynnol tuag at y gwasanaeth am hyd y cyfnod contract.  Gofynnwyd i’r tri chyngor tref hefyd wneud yr un ymrwymiad, gan y byddai hyn yn diogelu dyfodol y gwasanaeth am gyfnod y contract gyda CWCC.    Unwaith byddai’r holl bartïon wedi cytuno, byddai Cytundeb Lefel Gwasanaeth yn cael ei lunio a fyddai’n ymrwymo’r holl bartneriaid i gyfrannu’n ariannol i’r Gwasanaeth am gyfnod penodol.

·         cynghorwyd nad oedd y posibilrwydd o brydlesu camerâu TCC gofod cyhoeddus yn opsiwn.  Gwnaed ymholiadau mewn perthynas â hyn ond roedd cwmnïau gweithgynhyrchu camerâu wedi cynghori nad prydlesu fyddai'r opsiwn gorau

·         cadarnhawyd, unwaith byddai’r gwasanaeth gyda CWCC wedi cael ei sefydlu, byddai ymholiadau’n cael eu gwneud gyda chynghorau dinas, tref a chymuned eraill yn y sir ynghylch a fyddai diddordeb ganddynt mewn ymuno a chyfrannu tuag at waith y Bartneriaeth.  Gellid hefyd edrych ar ddichonoldeb caniatáu busnesau unigol i gyfrannu tuag at y system.

Yn ei rinwedd fel Cynghorydd Tref Rhuddlan ac aelod o Fwrdd Partneriaeth TCC, cadarnhaodd y Cynghorydd Arwel Roberts ei fod wedi bod yn rhan o’r broses werthuso ar gyfer y gwasanaeth newydd arfaethedig.  Roedd yn llwyr gefnogol o’r ymagwedd tymor hir ar gyfer darparu’r Gwasanaeth ac roedd yn teimlo byddai’r opsiwn CWCC yn diogelu’r gwasanaeth ar gyfer y dyfodol.

Er bod y Bwrdd Partneriaeth TCC wedi cytuno mewn egwyddor i fynd i gytundeb â CWCC, nid oedd dyddiad dechrau i’r contract wedi cael ei gytuno eto.  Rhagwelwyd byddai’r gwasanaeth newydd yn dechrau cyn diwedd y flwyddyn galendr gyfredol.  Felly -

PENDERFYNODD Y PWYLLGOR yn amodol ar y sylwadau uchod -

 (a)      i gefnogi rôl y Cyngor o fewn y Bartneriaeth;

 (b)      parhau i gefnogi i gadw’r Bartneriaeth, a

 (c)       Bod adroddiad pellach yn cael ei gyflwyno i’r Pwyllgor mewn deuddeg mis yn manylu ar y cynnydd a wnaed gyda sefydlu'r trefniadau newydd rhwng Partneriaeth TCC Sir Ddinbych a Cyngor Gorllewin Sir Gaer a Chaer (CWCC), ei effeithlonrwydd o ran darparu Gwasanaeth TCC ar gyfer ardal gogledd Sir Ddinbych ac amlinellu unrhyw opsiynau posibl sydd ar gael ar gyfer ymestyn y gwasanaeth i rannau eraill o’r sir.