Eitem ar yr agenda

Ystyried cais i godi 63 annedd a mynediad newydd i gerbydau a gwaith cysylltiedig ar dir i’r gorllewin o Ffordd Wrecsam, Llanfair Dyffryn Clwyd, Rhuthun (copi’n amgaeedig).

Cyflwynwyd cais i godi 63 annedd a mynediad newydd i gerbydau a gwaith cysylltiedig ar dir i’r gorllewin o Ffordd Wrecsam, Llanfair Dyffryn Clwyd, Rhuthun.

Siaradwr Cyhoeddus –

Mynegodd Alan Edwards (yn erbyn) bryderon ynghylch elfennau o’r cais, gan gynnwys y llwybr troed a chroesi’r A525. Roedd yn pryderu ynghylch lleoliad y tanc storio LPG a'r effaith ar y coed a blannwyd fel cofeb ryfel.

Tynnodd Matt Gilbert (o blaid) sylw at y ffaith bod y safle yn safle a neilltuwyd. Mae ar y safle angen mynediad a byddai’r coed yn cael eu hail-blannu o flaen yr eiddo. Mae’r cynllun wedi’i ddiwygio ac yn darparu mynediad i gerddwyr. Mae’r mynediad ar hyd yr A525 wedi’i ddarparu yn unol â chyngor y swyddogion priffyrdd. Byddai manylion y tanc LPG yn unol â’r rheoliadau.

Trafodaeth Gyffredinol – Eglurodd y Prif Swyddog Cynllunio fanylion y datblygiad cymysg a fyddai’n cynnwys chwe thŷ fforddiadwy.

Cadarnhaodd y Cyng. Hugh Evans (Aelod Lleol) bod y cais wedi achosi llawer o bryder i drigolion lleol. Cododd nifer o faterion a ymatebwyd iddynt yn ystod y drafodaeth.

Codwyd y pwyntiau canlynol yn ystod y drafodaeth:

·       Ymwelwyd â'r safle'n ddiweddar a lleddfwyd rhai o’r pryderon. Dywedwyd y gallai'r manylion a gyflwynwyd ar gyfer cymeradwyaeth o ran amodau’r datblygiad gael eu cyflwyno yn ôl i'r pwyllgor cynllunio.

·       Mae datganiad cludiant wedi’i gynnwys gyda'r cais. Bydd y parth 30mya yn cael ei estyn. Mae’r manylion priffordd o ran yr A525 yn cyrraedd y safonau sefydledig.

·       Y cynnig yw codi 63 o anheddau ar 2.6 hectar, sef dwysedd o 24.2 annedd ar bob hectar yn seiliedig ar arwynebedd safle gros. Mae hyn yn is na’r ffigwr o 35 annedd a ganiateir ym Mholisi RD1. O ystyried cyd-destun yr ardal gyfagos, yr ardaloedd helaeth o fannau agored a gynigir, a natur a dwysedd y datblygiad tai presennol ar gyrion y pentref, ystyrir bod dwysedd y datblygiad arfaethedig hwn yn cyd-fynd â chymeriad y tai presennol yn yr ardal.

·       Byddai datblygu fesul cam yn cael ei reoli a byddai’r cais am gymeradwyaeth ar gyfer y Cynllun Adeiladu Fesul Cam/Strategaeth yn cael ei gyflwyno eto i’r Pwyllgor Cynllunio.

·       Hygyrchedd ac integreiddio – mae’r datblygwyr wedi dangos cyswllt posibl â’r datblygiad cyfagos yn y pentref ar eu cynllun. Byddai datblygu’r cyswllt hwn ymhellach yn gofyn am ganiatâd cynllunio. Byddai hyn hefyd yn cael ei gyflwyno i’r Pwyllgor Cynllunio yn y dyfodol.

·       Archeoleg – mae’r Cofnod Amgylchedd Hanesyddol wedi’i wirio ac ni cheir safleoedd archeolegol hysbys yn yr ardal dan sylw, ond mae arteffactau Rhufeinig wedi’u canfod y tu hwnt i’r safle. Nid oes unrhyw wrthwynebiad technegol wedi’i dderbyn.

·       Soniodd y Cyng. Merfyn Parry am agosrwydd y gwaith trin carthion at y datblygiad a bod yna broblemau gorlifiant ar y safle. Gofynnodd am fwy o waith rhwng Sir Ddinbych a Dŵr Cymru.

·       Coed wedi’u diogelu – nid yw’r Arbenigwr Coed wedi gwrthwynebu’r cais, yn amodol ar gynnwys amodau yn gofyn am Ddatganiad Dull Coedyddiaeth a manylion yr ail-blannu a'r tirlunio ysgafn.

·       Roedd y coed ar Ffordd Wrecsam yn agos at gael eu dynodi’n Cofeb Ryfel. Nid yw cofeb ryfel yn ddynodiad cynllunio ac mae colli ac amnewid y coed wedi'i drafod eisoes.

·       Mae’r datblygiad preswyl arfaethedig, yn seiliedig ar gyfrifiadau cydnabyddedig, yn debygol o arwain at yr angen am 15 lle cynradd ac 11 lle uwchradd ychwanegol. Cadarnhawyd, yn seiliedig ar yr wybodaeth ddiweddaraf am gofrestr yr ysgol, bod yna 20 lle cynradd a 268 lle uwchradd gwag yn yr ysgolion cynradd ac uwchradd agosaf. Mae hyn yn golygu bod digon o le ar gyfer plant y datblygiad arfaethedig ac felly ni fyddai angen cyfraniad ariannol.

·       Bu i’r Swyddogion Cynllunio egluro swm y cyfraniad ariannol gan y datblygwr mewn perthynas â thai fforddiadwy. Mae’r cyfraniad yn ymwneud â'r gofyniad am 6.3 tŷ fforddiadwy ac yn cynnwys darparu chwe uned a chyfraniad o £27,000 ar gyfer y 0.3 sy'n weddill.

Ailadroddodd y Cyng. Hugh Evans (Aelod Lleol) y pryderon ynghylch rhai materion, sydd wedi cael sylw, a chadarnhaodd ei fod yn teimlo y byddai’r cais yn effeithio ar y pentref.

Cynnig – Cynigodd y Cyng. Mark Young, ac fe’i eiliwyd gan y Cyng. Julian Thompson-Hill, b y dylid cymeradwyo’r cais yn unol ag argymhellion y swyddog ac yn amodol ar drafodaethau pellach gyda’r Cyngor Cymuned a’r Aelod Lleol, y Cyng. Hugh Evans.

PLEIDLAIS:

CYMERADWYO - 8

YMATAL - 0

GWRTHOD - 7

PENDERFYNWYD CYMERADWYO’R cais yn unol ag argymhellion y swyddog ac yn amodol ar drafodaethau pellach gyda’r Cyngor Cymuned a’r Aelod Lleol, y Cyng. Hugh Evans.