Eitem ar yr agenda
YMAGWEDD GORFFORAETHOL TUAG AT REOLI "GWYLANOD" AR DRAWS Y SIR
Ystyried
adroddiad gan Bennaeth Cynllunio a Gwarchod y Cyhoedd (copi ynghlwm) yn ceisio
barn y Pwyllgor ar gamau gweithredu arfaethedig i reoli poblogaeth “gwylanod” y
sir.
10.15am – 11am
Cofnodion:
Cyflwynodd Aelod
Arweiniol y Parth Cyhoeddus yr adroddiad (a ddosbarthwyd ymlaen llaw) gan roi
gwybod i’r Pwyllgor bod gwylanod, fel adar eraill, ynghyd â'u nythod a'u hwyau,
wedi'u gwarchod gan y gyfraith dan ddarpariaethau Deddf Cefn Gwlad a Hawliau
Tramwy 2000, er bod nifer yn eu hystyried yn bla. Rhoddwyd gwarchodaeth
ychwanegol i nifer o ‘wylanod’ hefyd, gan fod niferoedd y rhai gwyllt yn
gostwng. Fodd bynnag,
roedd y Cyngor yn cydnabod bod ymddygiad gwylanod mewn blynyddoedd diweddar
wedi dod yn broblem gynyddol i'r Awdurdod, i drigolion, i ymwelwyr ac i fusnesau
lleol ac felly roedd angen gweithredu er mwyn lleihau’r effaith niweidiol ar y
Sir.
Tynnodd yr Aelod
Arweiniol sylw’r aelodau at Atodiad 2 i’r adroddiad, a oedd yn cynnwys cynllun
gweithredu drafft i fynd i’r afael â’r problemau a achosid gan wylanod.
Dywedodd fod Uwch Dîm Arweinyddiaeth
y Cyngor wedi ystyried y cynllun gweithredu hwn eisoes ac roedd swyddogion
bellach yn ceisio casglu barn yr aelodau ar y camau arfaethedig, ynghyd ag
unrhyw gamau gweithredu eraill roedd aelodau'r Pwyllgor yn dymuno eu cynnig.
Roedd nifer o atodiadau’r adroddiad
yn pwysleisio’r cymhlethdodau a oedd ynghlwm ag ymdrin â phroblemau a oedd yn
ymwneud â gwylanod, a'r amryw atebion a dreialwyd mewn ardaloedd eraill yn y DU
i fynd i'r afael â phroblemau a achosid ganddynt.
Pwysleisiodd
aelodau’r Pwyllgor y problemau roedd gwylanod yn eu hachosi yn eu cymunedau
hwythau a'r modd roedd rhai o'r problemau hyn yn cael eu gwaethygu gan bobl ac
arferion gwael e.e. bwydo'r adar, rhoi bagiau sbwriel y tu allan y noson cyn
iddynt gael eu casglu, arferion gwastraff bwyd bwytai a bwytai bwyd brys, ac
ati. Bu iddynt hefyd
restru nifer o gynlluniau y gwyddent fod awdurdodau lleol eraill wedi’u treialu
er mwyn ceisio lleihau niwsans gwylanod a rheoli eu niferoedd h.y. gosod
baneri/balwnau, rhwydi/pigau ar doeau, tyllu wyau mewn nythod, dulliau atal
cenhedlu, ac ati.
Amlygwyd
graddau’r niwsans a pha mor gyffredin oedd gwylanod yn y Sir gan aelodau drwy
gyfeirio at uned fanwerthu yn y Rhyl, lle daethpwyd o hyd i 71 o nythod
gwylanod ar y to wrth ei archwilio. Cyfeiriodd aelod arall at ysgol yn y Sir a oedd
wedi gwario arian o’i chyllideb i ariannu gwaith i ddiogelu’r adeilad a’r
disgyblion rhag gwylanod.
Gan ymateb i gwestiynau’r
aelodau, bu i'r Aelod Arweiniol a Phennaeth Cynllunio a Gwarchod y Cyhoedd:
·
gytuno gyda’r aelodau bod
cymaint o fai ar bobl am y problemau a achosid gan wylanod â’r gwylanod eu
hunain.
Yn sicr, roedd angen addysgu pobl mewn perthynas â bwydo gwylanod
a sut i wella eu dulliau o gael gwared â gwastraff cartref;
·
cadarnhau, yn yr un modd,
bod angen addysgu bwytai a lleoedd bwyta am ffyrdd o gael gwared â’u gwastraff,
ac ati;
·
dweud bod problemau mewn
perthynas â gwylanod yn dod mor gyffredin yng nghefn gwlad ag yr oeddent ar hyd
yr arfordir; a
·
chadarnhau bod yr Uwch Dîm
Arweinyddiaeth o’r farn bod angen ymagwedd amlochrog tuag at reoli gwylanod ac,
er bod ganddynt rai pryderon ynglŷn â pha mor ymarferol oedd gorfodi
unrhyw is-ddeddfau posib’ ynglŷn â bwydo’r gwylanod, efallai y byddai
cymeradwyo is-ddeddf yn fanteisiol o safbwynt datgan yn glir wrth drigolion ac
ymwelwyr nad oedd croeso i arferion o’r fath ac na fyddent yn cael eu goddef.
Roedd y Pwyllgor
yn cefnogi’r holl gamau gweithredu a gynigiwyd gan yr Uwch Dîm Arweinyddiaeth.
Ar ben hynny, awgrymodd yr aelodau y
dylid cymryd y camau canlynol mewn perthynas â rheoli gwylanod ledled y Sir:
·
gan ei bod yn hysbys y
gallai gwylanod hedfan hyd at 60 milltir yn ystod y nos a chan nad oeddent yn
poeni am ffiniau sirol, roedd yn hanfodol bod y Cyngor yn dod a'i gamau
gweithredu arfaethedig i'w rheoli at sylw awdurdodau lleol eraill, gan ofyn am
eu cefnogaeth a'u cymorth i fabwysiadu dulliau tebyg;
·
dylai holl safleoedd y
Cyngor Sir fod â mesurau atal gwylanod wedi'u gosod;
·
os oedd problem hysbys o
ran pobl yn bwydo gwylanod, dylid gofyn i Dîm Gorfodi Diogelwch Cymunedol y
Cyngor gyflwyno rhybuddion i unigolion a oedd yn bwydo'r adar ac os nad oedd
ceisio perswadio yn ddigon, yna dylid cyflwyno rhybuddion cosb benodedig;
·
ystyried cyflwyno
is-ddeddf neu Orchymyn Gwarchod Mannau Cyhoeddus i atal pobl rhag bwydo’r
gwylanod, er mwyn codi ymwybyddiaeth y cyhoedd am y broblem o fwydo gwylanod;
·
Lansio ymgyrch i geisio
addysgu preswylwyr ac ymwelwyr i beidio â bwydo'r gwylanod, gan dynnu eu sylw
tuag at beryglon yr arfer hon i bobl ac i'r gwylanod eu hunain (yn debyg i'r
dulliau y mae sŵau’n eu defnyddio);
·
Lansio ymgyrch i godi
ymwybyddiaeth wrth ddosbarthu calendrau sbwriel am yr angen am osod y sbwriel
allan ar y diwrnod casglu ei hun, er mwyn sicrhau nad yw gwylanod, plâu eraill
nac anifeiliaid yn gallu cael gafael arno h.y. ‘amod’ ar gyfer casglu sbwriel;
·
Cyflwyno ‘Siarter Wylanod’
ar gyfer busnesau masnachol i sicrhau bod eu gwastraff bwyd yn ddiogel ac nad
yw ar gael yn hawdd i adar nac anifeiliaid pan oedd yn cael ei adael y tu
allan;
·
ystyried ymgymryd â
gweithgarwch gorfodi y 'tu allan i oriau' pe bai’n dod yn amlwg bod gwastraff
bwyd yn cael ei adael allan mewn modd anniogel yn rheolaidd; ac
·
ystyried effeithiolrwydd
a'r gost arfaethedig o ddefnyddio dulliau atal cenhedlu i reoli niferoedd y
gwylanod.
Ar ddiwedd y
drafodaeth:
Penderfynwyd: - bod yr aelodau
(i)
wedi ddarllen,
deall ac ystyried yr Asesiad o Effaith ar Les (Atodiad 1) yn rhan o’i
ystyriaethau; ac
(ii)
yn amodol ar
gynnwys y camau gweithredu a argymhellwyd uchod, yn cefnogi’r camau gweithredu
corfforaethol y cytunwyd arnynt gan yr Uwch Dîm Arweinyddiaeth, fel ag y maent
yn Atodiad 2 i’r adroddiad.
Dogfennau ategol:
- Seagulls Report 230317, Eitem 6. PDF 211 KB
- Seagulls Report - App 1 230317.docx, Eitem 6. PDF 410 KB
- Seagulls Report - App 2 230317, Eitem 6. PDF 232 KB
- Seagulls Report - App 3 230317.docx, Eitem 6. PDF 6 MB
- Seagulls Report - App 4 230317.docx, Eitem 6. PDF 64 KB
- Seagulls Report - App 5 230317.docx, Eitem 6. PDF 69 KB
- Seagulls Report - App 6 230317.docx, Eitem 6. PDF 137 KB
- Seagulls Report - App 7 230317.docx, Eitem 6. PDF 274 KB