Eitem ar yr agenda
ASESIAD POBLOGAETH GOGLEDD CYMRU
Ystyried
adroddiad (copi ynghlwm) i geisio cymeradwyaeth y Cyngor Sir ar gyfer Asesiad
Poblogaeth drafft Gogledd Cymru cyn i’r fersiwn derfynol gael ei chynhyrchu
erbyn 1 Ebrill 2017.
Cofnodion:
Cyflwynodd Aelod
Arweiniol Gofal Cymdeithasol, Gwasanaethau Oedolion a Phlant yr adroddiad (a
ddosbarthwyd yn flaenorol) i ddarparu gwybodaeth gyffredinol ynglŷn ag
Asesiad Poblogaeth drafft Gogledd Cymru, a oedd wedi'i gynhyrchu mewn
partneriaeth â phum Awdurdod Lleol arall Gogledd Cymru, Bwrdd Iechyd Prifysgol
Betsi Cadwaladr ac Iechyd Cyhoeddus Cymru.
Roedd yn rhaid
i’r Asesiad Poblogaeth gael ei gynhyrchu ar sail gyfreithiol dan Adran 14 o
Ddeddf Gwasanaethau Cymdeithasol a Llesiant (Cymru) 2014 a Rheoliadau Gofal a
Chefnogaeth (Asesiad Poblogaeth) Cymru 2015. Rhaid ei gynhyrchu ar y cyd gan y
chwe awdurdod lleol yng Ngogledd Cymru a’r Bwrdd Iechyd Lleol. Pan fydd wedi’i gwblhau, rhaid iddo gael ei
gyhoeddi ar wefan Sir Ddinbych a’i gyflwyno i Lywodraeth Cymru.
Darparodd y
Rheolwr Gwasanaeth: Datblygu Strategol eglurhad manwl i'r Aelodau o'r Asesiad
Poblogaeth.
Byddai'r asesiad
poblogaeth yn sicrhau bod gwasanaethau’n cael eu cynllunio a’u datblygu mewn
ffordd effeithlon ac effeithiol gan bartneriaid sector cyhoeddus i hyrwyddo
lles pobl a chanddynt anghenion gofal a chymorth.
Cadarnhaodd
Swyddog Strategaeth a Datblygu ei fod wedi cyfrannu at ysgrifennu'r bennod sy'n
ymwneud â phlant a phobl ifanc.
Roedd poblogaeth
plant a phobl ifanc wedi aros yn eithaf sefydlog yn ystod y pum mlynedd
diwethaf. Bu cynnydd yn nifer y plant ar
y gofrestr amddiffyn plant a nifer y plant sy'n derbyn gofal yng Ngogledd
Cymru. Bu cynnydd mewn troseddau seibr
ac erledigaeth hefyd.
Yn ystod
trafodaeth fanwl, codwyd y pwyntiau canlynol:
·
Y defnydd o garafanau fel man preswylio gan bobl oedd
wedi'u cofrestru y tu allan i'r sir. Roedd hyn yn rhoi pwysau ychwanegol
ar wasanaethau presennol e.e. ysbytai, meddygon, ysgolion ac ati. Roedd y braesept wedi'i seilio ar nifer y
bobl sydd wedi'u cofrestru yn y sir.
Cadarnhaodd y Rheolwr Gwasanaeth:
Datblygu Strategol y byddai'n gwirio'r ystadegau gyda chydweithwyr o ran cadarnhau'r
sefyllfa bresennol. Ar y pwynt hwn,
cadarnhaodd y Cyfarwyddwr Corfforaethol: Uchelgais Economaidd a Chymunedol bod darn o waith
ar y gweill ynglŷn â phobl sy'n byw mewn carafanau a byddai'n sicrhau bod
cydweithwyr Cynllunio a Gwarchod y Cyhoedd yn hysbysu'r Aelodau. Nodwyd hefyd
bod carafanau sengl ar ddarnau o dir gyda phobl yn byw ynddynt a byddai'n rhaid
cynnwys y rhain yn yr archwiliad.
·
Roedd y gwaith sydd ar y gweill rhwng y chwe Awdurdod
Lleol a'r Bwrdd Iechyd Lleol yn gofyn am strategaeth y byddai camau'n cael eu
cymryd yn dilyn yr adroddiad hwn. Cadarnhaodd y Rheolwr Gwasanaeth:
Datblygu Strategol y byddai'n sicrhau y nodir y newidiadau a bod yr adroddiad
yn gywir o ran hynny.
·
Byddai
gweithio gyda chyn-filwyr yn ofynnol gan fod ganddynt anghenion penodol ac
roedd niferoedd mawr ohonynt yn ddigartref.
·
Mân
droseddau yn cael eu cyflawni gan blant oedran ysgol diamddiffyn rhwng 3pm a
4pm. Cafwyd cais bod ymchwil yn cael ei
gynnal o ran diwedd diwrnod yr ysgol a'r amser yr oedd rhieni yn dychwelyd o'u
gwaith. Cadarnhaodd y Swyddog
Strategaeth a Datblygu y byddai'r cwestiwn yn cael ei adrodd yn ôl i'r
Grŵp Llywio a byddai'r ymateb yn cael ei gynnwys mewn dogfen arall.
·
Yn
ystod y 2 flynedd ddiwethaf, bu gwelliant sylweddol o ran lles gofalwyr
ifanc. Roedd Sir Ddinbych wedi bod yn
gweithio mewn partneriaeth gyda'r gwasanaethau cymdeithasol, Wrecsam a Chyngor
Conwy, ynghyd â'r Bwrdd Iechyd ac roedd y gwaith yn mynd rhagddo'n dda.
·
Cytunwyd
bod yn rhaid i'r Asesiad fod yn fwy na dogfen llawn geiriau. Byddai'r Asesiad yn hysbysu cynllun ardal
Gogledd Cymru yr oedd yn rhaid ei gynhyrchu erbyn 1 Ebrill 2018. Byddai'n rhaid
i Sir Ddinbych barhau i weithio gydag Awdurdodau partner, y Bwrdd Iechyd Lleol
a'r trydydd sector i gynhyrchu'r cynllun hwn.
Anogwyd yr Aelodau hefyd i gyfrannu at y gwaith ar gyfer y cynllun
ardal.
·
Roedd
gan Ogledd Cymru gyfran uchel o blant o du allan i'r rhanbarth a oedd yn derbyn
gofal yn lleol ac roedd y niferoedd yn cynyddu.
Roedd hyn yn rhoi pwysau ychwanegol ar wasanaethau lleol. Roedd gwybodaeth yn cael ei chasglu a
byddai'n rhan o'r cam nesaf a'r elfen partneriaeth allweddol.
·
Roedd
Sir Ddinbych yn cynyddu darpariaeth Tai Gofal Ychwanegol fel dewis amgen i ofal
preswyl (oni bai bo gofal nyrsio neu iechyd meddwl yn ofynnol). Roedd dadansoddiad ym mis Chwefror 2016, heb
gynnwys Nyrsio Iechyd Meddwl yr Henoed, yn awgrymu bod digon o welyau cartref
gofal yn y rhan fwyaf o'r ardaloedd er mwyn diwallu'r galw a gormod o gapasiti
mewn ardaloedd penodol.
·
Pobl
yn symud i gartrefi gofal o du allan i'r rhanbarth – byddai rhai o'r lleoliadau
hynny'n rai hunan-ariannu. Pe bai pobl angen bod yn agosach at eu teuluoedd,
gallant brynu gwely mewn cartref gofal yn uniongyrchol, ac yn yr un modd pe bai
unrhyw un angen symud o Sir Ddinbych i ardal arall. Byddai'n rhaid mynd i'r afael â hyn yn y dyfodol.
·
Byddai'n
rhaid mynd i'r afael ag effaith Carchar y Berwyn, Wrecsam. Roedd Strategaeth Digartrefedd yn cael ei
datblygu ar hyn o bryd. Roedd
carcharorion yn cael eu hatgyfeirio at swyddog tai i ddelio â'u hanghenion cyn
eu rhyddhau o'r carchar. Byddai'n rhaid
mynd i'r afael â hyn ac ymgynghori â chydweithwyr gydag adroddiad yn ôl i'r
Cyngor mewn 2-3 mis.
·
Roedd
yr iaith Gymraeg yn flaenoriaeth allweddol.
Roedd 25% o boblogaeth Sir Ddinbych yn siaradwyr Cymraeg. Roedd rhai
heriau i recriwtio staff sy'n siarad Cymraeg mewn rhai ardaloedd.
·
Roedd pedwar ward yn Sir Ddinbych ymysg yr ugain ardal
mwyaf difreintiedig yng Nghymru (Llywodraeth Cymru 2014). Roedd y ffigurau yn
cael eu cynhyrchu bob tair blynedd gyda'r ffigurau nesaf yn 2018.
·
Cyfeiriwyd
at gyfraddau uchel ar gyfer ysmygu a lefelau gordewdra yn Sir Ddinbych o
gymharu ag awdurdodau eraill Gogledd Cymru.
Eglurodd y
Cyfarwyddwr Corfforaethol: Cymunedau bod yn rhaid cynhyrchu a chyhoeddi Asesiad
Poblogaeth Gogledd Cymru erbyn 1 Ebrill 2017 ond gellir atgyfeirio unrhyw
benodau i'r pwyllgor archwilio. Roedd yn
ofyniad statudol ei gyhoeddi a'i gytuno erbyn 1 Ebrill 2017 ond roedd yn
ddogfen fyw, ac roedd hwn yn un maes o wybodaeth a allai lunio a datblygu
hynny.
Eglurodd Aelod
Arweiniol Gofal Cymdeithasol, Gwasanaethau Oedolion a Phlant, fod gwaith wedi'i
gyflawni ar draws Gogledd Cymru gyda'r chwe Awdurdod Lleol a Bwrdd Iechyd
Prifysgol Betsi Cadwaladr.
Cadarnhaodd bod
mater Carchar y Berwyn yn cael ei arwain gan Gyngor Sir Wrecsam, a bod yr
Asesiad Poblogaeth yn cael ei arwain gan Gyngor Bwrdeistref Sirol Conwy.
Ar y pwynt hwn,
diolchodd yr Aelod Arweiniol i Gwynfor Griffiths, y Rheolwr Gwasanaeth:
Datblygu Strategol, am yr holl waith a wnaed ganddo dros y blynyddoedd. Roedd yn ymddeol ddiwedd mis Mawrth 2017 a
dymunwyd yn dda iddo ar ei ymddeoliad.
PENDERFYNWYD bod yr Aelodau yn
cymeradwyo'r Asesiad Poblogaeth drafft, yn amodol ar yr uchod,wrth aros i’r
fersiynau terfynol gael eu cynhyrchu.
Dogfennau ategol:
- Report - Population Assessment WELSH, Eitem 4. PDF 106 KB
- Appendix 1 -Governance, Eitem 4. PDF 170 KB
- Appendix 2 Summary report - Cymraeg - final, Eitem 4. PDF 539 KB
- Appendix 3 EIA NW Population Assessment 0.4, Eitem 4. PDF 147 KB