Eitem ar yr agenda
ADRODDIAD AR YR OPSIYNAU AR GYFER DEFNYDDIO CARTREF GOFAL PRESWYL AWELON YN Y DYFODOL
- Meeting of Cabinet, Dydd Mawrth, 24 Ionawr 2017 10.00 am (Item 8.)
- View the declarations of interest for item 8.
Ystyried
adroddiad gan y Cynghorydd Bobby Feeley, Aelod Arweiniol y Gwasanaethau Gofal
Cymdeithasol, Oedolion a Phlant (copi’n amgaeedig) yn manylu ar y dewisiadau ar
gyfer y defnydd o gartref gofal preswyl Awelon yn y dyfodol.
Penderfyniad:
PENDERFYNWYD bod y Cabinet yn
–
(a) cadarnhau eu bod
wedi ystyried yr Asesiad o Effaith ar Les fel rhan o’u hystyriaethau;
(b) cytuno nad yw
Opsiynau 1 a 3b Astudiaeth Ddichonoldeb Grŵp Cynefin yn ddewisiadau
ymarferol am y rhesymau a nodir yn atodiadau 1 a 5 yn y drefn honno;
(c) cytuno bod
trafodaethau’n cael eu cynnal rhwng Aelodau lleol, Swyddogion, Grŵp
Cynefin a phwyllgor Canolfan Awelon i weithio drwy Opsiynau 2a, 2b a 3a i symud
ymlaen gyda'r cyfluniad gorau ar gyfer y safle sy'n diwallu anghenion pob parti
ac yn golygu'r amhariad lleiaf ar breswylwyr/ tenantiaid presennol, a
(d) gofyn i
swyddogion weithio gyda chynrychiolwyr o’r grwpiau cymuned sy’n defnyddio
Canolfan Awelon ar hyn o bryd, er mwyn nodi cyfleusterau amgen addas iddynt eu
defnyddio yn ystod y broses adeiladu.
Cofnodion:
Cyflwynodd
y Cynghorydd Bobby Feeley adroddiad a oedd yn manylu ar yr opsiynau ar gyfer
defnyddio Cartref Gofal Preswyl Awelon yn y dyfodol gan ofyn am gymeradwyaeth i
waith trwy opsiynau penodol i barhau â’r cynllun gorau ar gyfer y safle i
fodloni anghenion pawb ac i amharu po leiaf bosib’ ar y preswylwyr/tenantiaid presennol.
Roedd
yr argymhellion wedi’u seilio ar waith y Grŵp Tasg a Gorffen (a sefydlwyd
i adolygu darpariaeth gofal cymdeithasol fewnol y Cyngor) a’r Pwyllgor
Archwilio Perfformiad. O
ganlyniad i hynny, gwahoddodd yr Arweinydd y Cynghorydd Barry Mellor, Cadeirydd
y Pwyllgor Archwilio Perfformiad, i drafod gwaith archwilio'r pwyllgor ar
ganfyddiadau'r Grŵp Tasg a Gorffen ar yr astudiaeth ddichonoldeb a
gomisiynwyd ar gyfer safle Awelon yn Rhuthun, a ystyriwyd yn eu cyfarfod ar 6
Ionawr 2016.
Dywedodd
y Cynghorydd Mellor bod y pwyllgor yn credu bod yr argymhellion yn ateb
ymarferol i fodloni'r galw am ofal a chefnogaeth ar ffurf trefniadau gofal
ychwanegol yn ardal Rhuthun ac i gefnogi gweithgareddau cymunedol trwy
ddatblygu cyfleusterau cymunedol newydd. Cytunodd y pwyllgor y byddai’r
prosiect yn elwa o gael ei reoli gan y tri sy'n defnyddio'r safle ar hyn o
bryd: y Cyngor, Grŵp Cynefin a Phwyllgor Canolfan Awelon – a’r canlyniad
oedd yr argymhelliad eu bod yn cydweithio i weithredu’r cynllun gorau ar gyfer
y safle ar sail Opsiynau 2a, 2b a 3a yn yr adroddiad. Trafodwyd pob un o’r pump
opsiwn yn yr astudiaeth ddichonoldeb ac roedd y pwyllgor yn fodlon nad oedd
Opsiwn 1 na 3b yn ymarferol am y rhesymau a nodwyd yn yr adroddiad. O ganlyniad, derbyniodd y pwyllgor
gasgliad ac argymhellion y Grŵp Tasg a Gorffen (fel y’u nodir yn adroddiad
y Cabinet). Roedd
y pwyllgor wedi ychwanegu at yr argymhelliad y dylid cynnwys trafodaethau
ynglŷn â gofynion o ran arwynebedd llawr ar gyfer Canolfan Awelon – nid
oedd yr amod hon wedi’i chynnwys yn argymhellion y Cabinet gan y gallai’r
trafodaethau ddod o hyd i drefniant gwell ac roedd y Cynghorydd Mellor yn
fodlon â'r rhesymeg honno.
Diolchodd
yr Arweinydd a’r Cynghorydd Bobby Feeley i’r Cynghorydd Mellor am ei adroddiad
cynhwysfawr, a diolchwyd i’r Grŵp Tasg a Gorffen a’r Pwyllgor Archwilio
Perfformiad am eu gwaith caled. Cyfeiriodd
y Cynghorydd Feeley at y cynigion am gyfleusterau modern a chynaliadwy a
fyddai’n galluogi’r preswylwyr i barhau i fod yn annibynnol a pheidio â phrofi
arwahanrwydd cymdeithasol. Pwysleisiodd
y byddai’r argymhellion yn sicrhau po leiaf bosib’ o amharu ar y preswylwyr
presennol ac y gallent aros ar y safle tra roedd gwaith adeiladu’n mynd
rhagddo, a byddai pawb sydd ynghlwm â’r Ganolfan yn cael gwybod am y
datblygiadau diweddaraf. Byddai’r
opsiynau a argymhellir, a ddatblygwyd gyda Grŵp Cynefin, yn cynyddu’r
nifer o fflatiau gofal ychwanegol i tua 57 a byddai’n cynnwys gofal seibiant a
chanolfan gymunedol newydd. Manylodd
y Cynghorydd Feeley ar y broses hirwyntog hyd yma a diolchodd i'r swyddogion am
eu hymroddiad a'u gwaith caled. Talodd
deyrnged i’r Cynghorydd Raymond Bartley hefyd, a fu’n aelod ymroddgar a phrysur
o’r Grŵp Tasg a Gorffen.
Cydnabu’r
Cabinet y gwaith caled a oedd ynghlwm ag adolygu darpariaeth gofal cymdeithasol
fewnol y Cyngor a arweiniai at yr argymhellion diweddaraf ar gyfer safle Awelon
gan groesawu'r gwaith ailddatblygu a’r buddsoddiad. Cytunai'r Aelodau â
chanfyddiadau'r Grŵp Tasg a Gorffen a'r Pwyllgor Archwilio Perfformiad
mai'r opsiynau a argymhellwyd oedd y ffordd orau o barhau â'r mater a
moderneiddio gwasanaethau er lles Rhuthun a’r ardal o'i hamgylch.
Wrth
ystyried yr adroddiad, codwyd y materion canlynol –
·
pwysleisiodd y Cynghorydd David
Smith bwysigrwydd Canolfan Awelon fel cyfleuster cymunedol a oedd yn cael ei
ddefnyddio'n aml iawn
·
er ei fod yn cydnabod y
trafodaethau a oedd ar fynd ar hyn o bryd i reoli’r trefniadau hynny, roedd y
dal i bryderu am effaith y cyfnod adeiladu ar ddefnyddwyr y ganolfan a chredai
y dylai'r Cyngor wneud mwy o waith i gynnig cyfleusterau eraill. O ganlyniad i hynny, roedd y
Cabinet yn cytuno y dylai eu penderfyniad adlewyrchu proses o ddod o hyd i
gyfleusterau addas eraill i'r grwpiau cymunedol hynny eu defnyddio. Nodwyd nad
oedd yr effaith negyddol dros dro ar Ganolfan Awelon yn ystod y cyfnod adeiladu
wedi’i nodi yn yr Asesiad o Effaith ar Les ac roedd galwadau i sicrhau bod
asesiadau’n fwy trylwyr yn y dyfodol
·
roedd y Cabinet yn falch o
nodi bod Grŵp Cynefin wedi mabwysiadu polisi Iaith Gymraeg cynhwysfawr a’u
bod yn gallu darparu eu holl wasanaethau’n ddwyieithog
·
gallai trafodaethau
ynglŷn â’r cynllun gorau ddechrau ar ôl i'r Cabinet gymeradwyo'r opsiynau
ac roedd Grŵp Cynefin yn rhagweld y byddai modd llunio cynigion manwl ar
yr opsiwn a ffefrir mewn tua tri mis
·
i sicrhau y gellid parhau â’r
datblygiad ar amser ac mor rhwydd â phosib’, argymhellodd Pennaeth y
Gwasanaethau Cymorth Cymunedol na ddylid derbyn unrhyw breswylwyr parhaol
newydd ar ôl cymeradwyo'r argymhellion. Gofynnodd y Cynghorydd Huw
Hilditch-Roberts am i’r mater o dderbyn gael ei drafod ymhellach rhwng aelodau
lleol ac awgrymodd yr Arweinydd i’r mater gael ei drafod yng Ngrŵp Ardal
Aelodau Rhuthun.
·
Gofynnodd
y Cynghorydd Huw Hilditch-Roberts am nodi yn y cofnodion ei fod yn credu y
dylid cadw gwlâu preswyl yn Rhuthun ar gyfer gofal preswyl yn y dyfodol. Fodd bynnag, roedd yn deall yr
angen am gyfaddawdu ac roedd wedi’i sicrhau y byddai’r cynigion yn darparu
ffordd wahanol o ddarparu gofal sydd o’r un ansawdd ac sydd â gwell
cyfleusterau ar y safle. Yn
ateb i’w gwestiwn ynglŷn â darparu gofal seibiant yn yr adeilad newydd,
soniodd y swyddogion am y drefn mewn cyfleusterau gofal ychwanegol eraill lle
roedd fflatiau'n cael eu rhentu a'u dodrefnu ar gyfer gofal seibiant, yn unol â
hynny.
PENDERFYNWYD bod y Cabinet yn
–
(a) cadarnhau eu bod
wedi pwyso a mesur yr Asesiad o Effaith ar Les yn rhan o’u hystyriaethau;
(b) cytuno nad yw
Opsiynau 1 a 3b o astudiaeth ddichonoldeb Grŵp Cynefin yn opsiynau
ymarferol am y rhesymau a nodwyd yn atodiadau 1 a 5, yn y drefn honno, i’r
adroddiad;
(c) cytuno i
drafodaethau gael eu cynnal rhwng aelodau lleol, swyddogion, Grŵp Cynefin
a phwyllgor Canolfan Awelon i weithio ar Opsiynau 2a, 2b a 3a i barhau â'r
cynllun gorau ar gyfer y safle sy'n bodloni anghenion pawb ac sy'n golygu po
leiaf bosibl o amharu ar breswylwyr/tenantiaid presennol; a
(d) gofyn i
swyddogion weithio gyda chynrychiolwyr y grwpiau cymunedol sy’n defnyddio
Canolfan Awelon ar hyn o bryd i ddod o hyd i gyfleusterau addas eraill iddyn
nhw eu defnyddio yn ystod y broses o adeiladu
(Ar adeg
addas, byddai hyn yn caniatáu gallu clirio safle Awelon a dechrau gwaith ar yr
estyniad. Roedd y grŵp tasg a
gorffen o’r farn mai datblygu’r nifer uchaf bosib’ o unedau Gofal Ychwanegol
(fel a nodir yn Opsiwn 2a) fyddai’n creu’r trefniadau gorau ar gyfer darparu
Tai Gofal Ychwanegol gyda Chyfleusterau Cymunedol ar safle Awelon. Fodd bynnag, cydnabuwyd bod angen mwy o
drafod â phwyllgor Canolfan Awelon i sicrhau y gallai’r cynllun terfynol
ddarparu’r gweithgareddau cymunedol sydd ar gael eisoes.
Roedd hyn yn bodloni'r dewis a ffefrir gan y
Cabinet yn dilyn trafod ym mis Mai 2016 (gweler paragraff 2.2 yn yr adroddiad),
a byddai'n diogelu hyd at 35 o fflatiau Gofal Ychwanegol eraill ar y safle, gan
alluogi’r preswylwyr hynny a oedd yn derbyn gwasanaethau gofal preswyl i aros
ar y safle yn ystod y gwaith datblygu os oeddent yn dymuno, yn ogystal â
pharhau i ddarparu cyfleusterau cymunedol i hyrwyddo annibyniaeth a lleihau
arwahanrwydd cymdeithasol.
Dogfennau ategol:
- IN HOUSE CARE SERVICES REPORT, Eitem 8. PDF 143 KB
- IN HOUSE CARE SERVICES REPORT - APP 1 OPTION 1, Eitem 8. PDF 125 KB
- IN HOUSE CARE SERVICES REPORT - APP 2 OPTION 2A, Eitem 8. PDF 88 KB
- IN HOUSE CARE SERVICES REPORT - APP 3 OPTION 2B, Eitem 8. PDF 90 KB
- IN HOUSE CARE SERVICES REPORT - APP 4 OPTION 3A, Eitem 8. PDF 89 KB
- IN HOUSE CARE SERVICES REPORT - APP 5 OPTION 3B, Eitem 8. PDF 123 KB
- IN HOUSE CARE SERVICES - APP 6 FEASIBILITY REPORT, Eitem 8. PDF 17 MB
- IN HOUSE CARE SERVICES - APP 7 IMPACT ASSESSMENT, Eitem 8. PDF 424 KB