Eitem ar yr agenda

Ystyried adroddiad (copi ynghlwm) i gymeradwyo datblygiad “Parc Dŵr ac Atyniad Hamdden y Rhyl”.

 

 

Cyflwynodd yr Arweinydd, y Cynghorydd Hugh Evans yr adroddiad (a ddosbarthwyd yn flaenorol) i’r Aelodau ystyried cynigion i ddatblygu ‘Parc Dŵr ac Atyniad Hamdden y Rhyl’ – teitl dros dro (RWLA).

 

Ystyriwyd mai uwchraddio’r ddarpariaeth hamdden a thwristiaeth ar yr arfordir ar gyfer y dyfodol oedd elfen fwyaf hanfodol adfywiad cyffredinol y Rhyl - gan ei wneud yn lle gwell i fyw yn ogystal ag yn lle gwych i ymweld ag ef.  Roedd y gadwyn o ddigwyddiadau a arweiniodd at y cynnig datblygu wedi estyn dros 6 mlynedd.

 

Roedd yn bwysig nodi bod y cynigion ar gyfer y ‘Glannau’ newydd wedi’u datblygu mewn ffordd oedd yn cwblhau’r cynllun adfywio arfordirol cyfan ac, oherwydd ei leoliad, roedd yn ymddwyn fel catalydd i ddenu mwy o ymwelwyr i’r Rhyl ac arwain mwy o bobl trwy Ganol y Dref.

 

Roedd y lleoliad yn agos at ganol y dref wedi cael ei ystyried yn bwysig iawn o ran goblygiadau adfywio a chynhyrchu ymwelwyr y datblygiad.

 

Yn ystod tymor y cyngor hwn roedd mwy o gynllunio strategol wedi digwydd.  Byddai Canolfan Ddŵr y Rhyl yn fuddsoddiad ar gyfer cenedlaethau’r dyfodol gyda’r gobaith byddai’r Rhyl yn symud o fod yn brosiect adfywio heriol i fod yn un datblygu economaidd.

 

Cadarnhaodd y Cyfarwyddwr Corfforaethol: Uchelgais Economaidd a Chymunedol wrth yr Aelodau mai’r strategaeth gyfredol oedd i symud y Rhyl i fod yn ardal datblygu economaidd ac mai’r prosiect allweddol oedd i gynyddu’r ymwelwyr â’r dref i greu mwy o swyddi a chaniatáu mwy o gyfleoedd ar gyfer pobl leol. 

 

Roedd y cam adfywio blaenorol wedi creu cartrefi newydd gyda phreswylwyr egnïol a byddai gwaith yn awr yn dechrau gyda datblygu’r glannau. 

 

Dangosodd yr Asesiad Effaith Economaidd gyllid ychwanegol yn dod i mewn i’r dref ynghyd â 60 o swyddi ychwanegol ar gyfer pobl leol a fyddai mewn lle da ar gyfer y swyddi hynny pan fyddent ar gael.

 

Rhoddodd y Pennaeth Cyfleusterau, Asedau a Rheoli gyflwyniad i roi mwy o fanylion am atyniad Parc Dŵr a Hamdden y Rhyl.  Rhoddwyd eglurhad ynghylch y ddau opsiwn a’r rhesymau pam fod swyddogion yn ystyried Opsiwn 2 i fod yr opsiwn a ffafrir, ar sail cost ond yn bwysicaf oll profiad y cwsmer a phreswylwyr.

 

Roedd Cyngor Tref y Rhyl am wneud cyfraniad cyfalaf o £2filiwn, ynghyd â chyfraniad oddi wrth Lywodraeth Cymru o £800,000. Byddai’r cyfraniadau hyn yn gostwng cyfraniad cyfalaf y Cyngor a chostau Benthyca Darbodus gan tua £159,000.

 

At ddibenion yr achos busnes, roedd y targedau incwm yn geidwadol iawn a’r disgwyl oedd y byddai’r rhain yn uwch.  Roedd partneriaethau lleol yn gyfforddus bod tybiaethau incwm yr achos busnes yn seiliedig ar breswyliaeth o 60% yn gyraeddadwy erbyn blwyddyn 5 a’u bod yn sylfaen ddarbodus ar gyfer cyllidebu.   Hanes cyfredol y Cyngor (model hamdden cryf – Nova) oedd lefel preswyliaeth o 75% ar draws ei gyfleusterau eraill.

 

Y camau nesaf oedd ddechrau’r broses gynllunio gydag ymgysylltu cyhoeddus llawn ynglŷn ag elfennau cynllunio'r cynllun.  Pe cafwyd caniatâd cynllunio ym mis Gorffennaf 2017, byddai’r prosiect yn dechrau ar y safle ym mis Medi 2017 gyda’r cyfleuster newydd yn agos yn gynnar yn 2019.

 

Eglurodd y Pennaeth Cyllid yr opsiynau ar gyfer ariannu blynyddoedd 1-4.

 

Cadarnhaodd yr Aelod Arweiniol - Cyllid, y Cynllun Corfforaethol a Pherfformiad mai’r argymhelliad oddi wrth y Grŵp Buddsoddi Strategol oedd cytuno ar Opsiwn 2. Rhoddwyd sicrwydd bod hwn wedi bod yn brosiect a adolygwyd yn llym iawn.    Byddai’n dibynnu’n helaeth ar y preswyliaeth yn taro’r targed o 60% ac erbyn blwyddyn 5 byddai’r Cyngor yn edrych ar gynnig niwtral o ran cost ar gyfer y prosiect.

 

Yn ystod trafodaeth codwyd y pwyntiau canlynol:

·       Y gwersi a ddysgwyd ers y prosiect Nova – roedd angen cymryd amser ar atyniad Glannau y Rhyl gan y byddai’n gyfleuster mor fawr.  Bu astudiaethau manwl o’r chwaraeon dŵr i’r gogledd o’r A55 a dadansoddiad manwl o flynyddoedd olaf yr Heulfan.  Ymagwedd y cyfleuster wastad oedd i ychwanegu at atyniadau eraill.

·       Bu’n benderfyniad anodd i gau yr Heulfan ond byddai’r atyniad glannau newydd yn ased i’r arfordir a Sir Ddinbych fel sir.

·       Byddai Canolfan Hamdden y Rhyl yn cadw’r pwll nofio gan fod ysgolion lleol a chlybiau nofio yn defnyddio’r cyfleuster ar gyfer gwersi nofio.

·       Byddai’r atyniad glannau newydd yn cynnwys parc sblasio dan do a thu allan – byddai’r cyfleuster dan do ar agor trwy’r flwyddyn.  Byddai strwythur dringo mawr, darpariaeth bwyd a diod, lle gwylio dan do a thu allan ac ystafelloedd newid tu mewn a thu allan yn cael eu cynnwys yn y cyfleuster.

·       Byddai’r parc sglefrio yn cael ei adleoli yn dilyn trafodaeth gyda’r gymuned a phobl ifanc a oedd yn defnyddio'r parc.

·       Ynglŷn â fforddiadwyedd a theithio i’r cyfleuster.  Bydd wedi ei leoli mewn man canolog ar gyfer mynediad hawdd gan fysus, trenau a pharcio ceir  Byddai cerdyn gostyngiad yn cael ei gynnig i breswylwyr Sir Ddinbych a oedd yn ddeiliaid cerdyn hamdden.  Y gost a ragamcanwyd ar hyn o bryd ar gyfer tocyn teulu fyddai £39.

·       Byddai’r maes parcio tanddaearol gerllaw ardal y tŵr awyr yn cael ei uwchraddio er mwyn sicrhau bod cymaint â phosibl o ddefnyddwyr ceir yn ei ddefnyddio.

·       Mynegodd nifer o Gynghorwyr bryder ynglŷn â’r risg o ran y swm o £2filiwn a oedd i ddod oddi wrth Gyngor Tref y Rhyl.  Gofynnwyd sut oedd y Cyngor Tref yn bwriadu cynhyrchu’r nawdd.  Eglurodd y Cyfarwyddwr Corfforaethol: Uchelgais Economaidd a Chymunedol wrth yr Aelodau nad y Cyngor Llawn oedd y fforwm i godi’r mater hwn ac mai mater i Gyngor Tref y Rhyl oedd sut yr oeddent am godi’r arian.

·       Byddai’r cyfleuster glannau yn darparu cyflogaeth trwy gydol y flwyddyn ar gyfer pobl leol a fyddai’n helpu gydag adfywio’r dref.

·       Byddai marchnata’r cyfleuster yn holl bwysig a byddai’r cyngor yn darparu marchnata rhagorol o ran y cyfryngau cymdeithasol, presenoldeb ar-lein ac ati. Gyda’r fframwaith, byddai Alliance Leisure a Neptune yn bartneriaid i’r Cyngor i gynorthwyo’r cyfleuster i gynyddu ei lefelau preswyliaeth.

·       Nodwyd bod angen rhoi elw yn ôl i hamdden ac y bu cynlluniau yn y dyfodol i wneud gwaith ar wahanol ganolfannau hamdden ledled y sir

·       Byddai arwyddion ffyrdd a llwybrau yn cael achrediad i gynorthwyo gyda chyfeirio pobl trwy’r dref ac oddi ar yr A55.

 

CYNIGODD y Cynghorydd Hugh Evans yr argymhelliad, ac EILIWYD hynny gan y Cynghorydd Barry Mellor.

 

Estynnwyd diolch i’r tîm cyfan am eu gwaith a’u parodrwydd i fwrw ymlaen a buddsoddi a gwella'r Rhyl.

 

PLEIDLAIS:

O blaid - 27

Ymatal - 1

Yn erbyn – 0

 

PENDERFYNWYD bod y Cyngor yn:

·       Cymeradwyo argymhelliad y Grŵp Buddsoddi Strategol i fabwysiadu Opsiwn 2 yr achos busnes i ddatblygu Parc Dŵr ac Atyniad Hamdden newydd yn y Rhyl fel rhan o raglen gyffredinol Adfywio a Datblygu Glannau’r Rhyl fel y’i disgrifir yn Atodiad B. Mae hyn yn cynnwys rhagdybiaethau o £2filiwn o gyfraniad ariannol gan Gyngor Tref y Rhyl ac £800,000 o gronfa Cynllun Cymorth Buddsoddi mewn Twristiaeth (TISS) Llywodraeth Cymru.

·       Cytuno i’r strategaeth gyllido a nodir yn Adran 6.

·       Cyfarwyddo swyddogion i symud ymlaen â’r camau nesaf o weithredu, gan gynnwys ceisio cymeradwyaeth cynllunio a sicrhau cyfraniadau cyllidol gan Gyngor Tref y Rhyl a Llywodraeth Cymru gan alluogi’r cyfleuster i fod ar agor erbyn dechrau 2019.