Eitem ar yr agenda
DIWEDDARIAD AR WERTHUSIADAU OPSIYNAU AR GYFER GWASANAETHAU GOFAL MEWNOL
- Meeting of Pwyllgor Craffu Perfformiad, Dydd Gwener, 6 Ionawr 2017 9.30 am (Item 5.)
- View the declarations of interest for item 5.
I ystyried canlyniadau’r dadansoddiad a gynhaliwyd o safbwynt opsiynau posib ar gyfer darparu’r gwasanaethau yn y dyfodol ar safle Awelon yn Rhuthun.
9.35am – 10.20am
Cofnodion:
Bu i'r Cynghorydd Win Mullen-James, Cadeirydd y Grŵp Tasg a Gorffen a
gafodd y dasg o adolygu darpariaeth gofal cymdeithasol fewnol y Cyngor, wrth
gyflwyno canfyddiadau'r Grŵp mewn perthynas â defnyddio Awelon yn y
dyfodol, dalu teyrnged i'r diweddar Gynghorydd Raymond Bartley, a fu'n aelod
ymroddgar o’r Grŵp Tasg a Gorffen a’r Pwyllgor. Roedd y Cynghorydd
Bartley wedi gweithio’n ddiflino i ddiogelu hawliau a lles yr henoed a'r
diamddiffyn yn y Sir trwy gydol ei yrfa, a byddai colled fawr ar ei ôl.
Yn ei chyflwyniad, rhoddodd Cadeirydd y Grŵp Tasg a Gorffen wybod i'r
Pwyllgor bod y Grŵp o'r farn y byddai'r argymhelliad a oedd wedi'i gynnwys
yn yr adroddiad (a ddosbarthwyd ymlaen llaw) yn ateb y galw am ofal a chymorth
yn y trefniadau Gofal Ychwanegol a ffefrir, yn ogystal â chefnogi
gweithgareddau cymunedol ar gyfer trigolion a’r gymuned ehangach o fewn y
cyfleusterau cymunedol newydd. Roedd y Grŵp Tasg a Gorffen hefyd o’r farn
y byddai’r prosiect cyfan yn elwa o gael ei reoli gan 3 defnyddiwr presennol y
safle – y Cyngor, Grŵp Cynefin a Phwyllgor Canolfan Awelon – gan ddod i
gytundeb er lles pawb. O achos hynny
roedd y Grŵp yn argymell y dylent gydweithio i weithredu'r trefniadau
gorau ar gyfer y safle ar sail Opsiynau 2a, 2b, a 3a yn yr adroddiad. Trwy fabwysiadu’r dull
hwn, byddai unigolion sy'n byw yn rhan breswyl y safle ar hyn o bryd yn gallu
aros yno tra bod eu hanghenion yn cael eu bodloni.
Croesawodd y Cadeirydd Rhys Dafis, Cyfarwyddwr Gwasanaethau Adfywio Grŵp
Cynefin, i’r cyfarfod er mwyn trafod y cynigion a’r astudiaeth ddichonoldeb.
Rhoddodd y Cyfarwyddwr Corfforaethol: Cymunedau a Phennaeth y Gwasanaethau
Cymorth Cymunedol fanylion yr astudiaeth ddichonoldeb a gynhaliwyd gan Grŵp
Cynefin, a oedd yn parchu ysbryd penderfyniad y Cabinet ym mis Mai 2016, ac a
oedd yn amlinellu’r casgliadau ar ddiwedd yr astudiaeth.
Gan ymateb i gwestiynau’r Pwyllgor, bu i'r Cyfarwyddwr Corfforaethol:
Cymunedau, Pennaeth y Gwasanaethau Cymorth Cymunedol, Aelod Arweiniol Gofal
Cymdeithasol (Oedolion a Gwasanaethau i Blant), Cadeirydd y Grŵp Tasg a
Gorffen a Chyfarwyddwr Gwasanaethau Adfywio Grŵp Cynefin:
·
gadarnhau bod Opsiwn 3 a
gyflwynwyd gan y Cabinet fis Mai 2016, mewn perthynas ag ymgysylltu â Bwrdd
Iechyd Prifysgol Betsi Cadwaladr (BCUHB) i ymchwilio i ddichonoldeb datblygu
gofal nyrsio ychwanegol yn Rhuthun, yn parhau i gael ei ddilyn. Fodd bynnag, ni
fyddai safle'r ysgol, sydd gyferbyn â'r ysbyty presennol yn y dref, yn dod yn
wag am beth amser. Roedd y cynigion i’w hystyried yn y cyfarfod presennol yn
ymwneud â safle Awelon, a oedd yn endid ar wahân. Gallai unrhyw gynigion y
gallent gael eu cyflwyno yn y dyfodol, unai ar wahân neu ar y cyd â BIPBC ar
gyfer hen safle'r ysgol, o bosibl, wella’r ddarpariaeth iechyd a gofal cymdeithasol
yn ardal Rhuthun ymhellach;
·
eglurwyd swyddogaethau’r
Cyngor a’r Rheoleiddwyr wrth archwilio a monitro gofal a chymorth mewn
lleoliadau gofal ac yng nghartrefi pobl. Roedd hwn yn ddull gweithredu â sawl
lefel. Roedd ansawdd y gofal a'r cymorth a ddarparwyd yn cael ei fonitro'n
ofalus, fel a oedd yn wir am y trefniadau diogelu. Roedd contractau ar gyfer
darparu gofal yn cael eu monitro’n rheolaidd i sicrhau bod holl fanylion y
contractau'n cael eu cyflawni. Darparwyd adroddiad chwarterol ar fonitro ansawdd
gwasanaethau gofal allanol i Grŵp Cadeiryddion ac Is-gadeiryddion
Archwilio (GCIGA);
·
dywedwyd, â’r bwriad o
wella gallu’r Cyngor i fonitro contractau, y byddai ymarfer recriwtio’n cael ei
wneud yn y flwyddyn ariannol newydd am swydd rheoli contractau ychwanegol o
fewn Tîm Rheoli ac Adolygu Contractau’r Cyngor;
·
cadarnhawyd bod mwyafrif y
lleoliadau gofal cymdeithasol a drefnwyd gan y Cyngor o fewn y sector
annibynnol yn y Sir;
·
pwysleisiwyd nad oedd y
cynigion a oedd yn cael eu cyflwyno ar gyfer darparu gwasanaethau gofal
cymdeithasol yn Sir Ddinbych yn y dyfodol yn cael eu gyrru gan yr angen i arbed
arian i'r gyllideb.
Y prif sbardun oedd bodloni gofynion deddfwriaethol a
darparu gwasanaethau a oedd yn unol ag anghenion a dewisiadau preswylwyr ac a oedd
yn gwella canlyniadau ar gyfer yr unigolyn dan sylw. Er bod pwysau cyllidebol wedi dod yn fwy o ffactor mewn blynyddoedd
diweddar, roedd cefnogi annibyniaeth a chefnogi pobl yn eu cartrefi eu hunain
yn nod hirdymor i'r Cyngor. Roedd dull cymhleth Gofal
Ychwanegol yn galluogi i unigolion fod yn rhannol annibynnol ac i barau aros
gyda'i gilydd pan fo un neu'r ddau angen gofal neu lefel wahanol o ofal, mewn
amgylchedd y maen nhw'n ei ystyried yn gartref iddyn nhw, gan wella ansawdd eu
bywyd trwy hynny;
·
cynghorwyd bod dyletswydd
ar y Cyngor i ddefnyddio arian cyhoeddus yn effeithiol ac yn effeithlon. Bwriad y cynigion a gynhwyswyd yn yr
adroddiad oedd gwella canlyniadau ar gyfer unigolion gan fodloni eu hanghenion
dynodedig. Roedd y cynigion sy’n cael eu hystyried ar gyfer Awelon yn datgan yn
benodol na fyddai disgwyl i unrhyw breswylydd presennol symud i leoliad arall
cyhyd ag y byddai modd diwallu eu hanghenion yn ddiogel yn Awelon;
·
cadarnhawyd bod y
buddsoddiad £7m arfaethedig a gynigiwyd ar gyfer Awelon yn fuddsoddiad gan Grŵp
Cynefin ac mai cyfraniad y Cyngor fyddai trosglwyddo'r safle i Grŵp
Cynefin, a oedd eisoes yn gweithredu cyfadeilad o dai Gofal Ychwanegol Llys
Awelon ar y safle;
·
eglurwyd, mewn perthynas
ag Opsiynau 2a, 2b a 3a, bod yr wyth ystafell wely gofal preswyl dros dro yn
ganllaw i faint y byddai eu hangen tra roedd y gwaith ailfodelu ac ailwampio’n
digwydd. Pan fyddai gwaith ar gychwyn, gellid cynyddu neu ostwng y nifer hon i
fodloni’r galw ar yr adeg honno gan breswylwyr a oedd yn dymuno aros yn Awelon.
Byddai unedau ‘dros dro' yn parhau i fod ar gael cyhyd ag y byddai eu hangen.
Ni fyddent yn destun cyfyngiadau amser. I sicrhau y gall y datblygiad barhau mor amserol a
diffwdan â phosibl, ni fyddai unrhyw drigolion ‘preswyl' newydd yn cael eu
derbyn i Awelon;
·
cadarnhawyd y gellid
diwallu anghenion sydd wedi'u diffinio fel 'anghenion preswyl' ar hyn o bryd
mewn cyfleusterau gofal ychwanegol, a'u bod mewn gwirionedd yn cael eu diwallu
mewn cyfleusterau gofal ychwanegol a oedd yn bod eisoes. Mantais y cyfleusterau
gofal ychwanegol oedd nad oedd angen i breswylwyr symud oddi yno pan oedd angen
mwy o gymorth arnynt, ond byddai eu pecynnau gofal yn cael eu newid i ddiwallu
eu hanghenion mwy dwys. Er nad oedd gan y Cyngor ganiatâd cyfreithiol i
ddarparu gofal nyrsio yn ei leoliadau, byddai datblygu cyfleusterau gofal
ychwanegol yn golygu llai o amharu â tharfu ar fywydau pobl ddiamddiffyn pan
fyddent angen mwy o ofal;
·
cadarnhawyd bod y Cyngor a
Grŵp Cynefin am weithio'n agos gyda Phwyllgor Canolfan Awelon a cheisio
pennu eu gofynion nhw a'u cynnwys yn y cynlluniau terfynol ar gyfer y
cyfadeilad. Y nod yn y pen draw fyddai gwella’r cynnig sydd ar gael yn y
ganolfan gymunedol ar gyfer y gymuned leol;
·
cynghorwyd, o safbwynt Grŵp
Cynefin, y byddent am ddatblygu cyfleuster integredig er budd preswylwyr a’r
gymuned ehangach a fyddai’n cyflawni gweledigaeth greiddiol y Grŵp i wella
ansawdd bywyd y preswylwyr. Roedd hyn yn debyg i’w dull ar gyfer datblygu tai
gofal ychwanegol yn Ninbych. Roedd ymgynghoriad ar y cynlluniau hynny ar hyn o
bryd;
·
cynghorwyd, ar gyfer Grŵp
Cynefin o safbwynt gwerth am arian, mai Opsiwn 2a fyddai fwyaf cost effeithiol.
Fodd bynnag, roeddent yn fodlon gweithio gyda’r ddau bartner arall i ddatblygu
unrhyw un o’r tri opsiwn a ffefrir. Efallai, ar ddiwedd yr ymarfer hwn, y bydd
yr opsiwn terfynol yn cynnwys elfen o'r tri opsiwn a ffefrir;
·
eglurwyd pam y pennwyd
Opsiwn 1 yn anymarferol. Roedd hyn oherwydd y risg a oedd yn gysylltiedig ag
addasu hen adeilad a oedd yn aneffeithlon o ran ynni ac na fyddai yn ateb
cynaliadwy yn y tymor hir ar gyfer darparu gwasanaethau gofal cymdeithasol
modern.
Byddai’r cyfleuster gofal ychwanegol newydd arfaethedig
yn darparu o leiaf yr un lefel o ofal preswyl ag ar hyn o bryd, ond yn ceisio
darparu pecyn byw a gofal mwy cyfannol o lawer a fyddai’n gwella lles pob
preswylydd unigol;
·
cynghorwyd, pe bai Opsiwn
1 yn cael ei argymell, y byddai angen i'r Cyngor ddod o hyd i bartner newydd i
ddarparu’r datblygiad a byddai angen buddsoddi tua £2m i adnewyddu’r adeilad
presennol;
·
Pwysleisiwyd mai’r brif
ystyriaeth mewn perthynas â’r cynigion oedd y model gofal y dylid ei ddarparu
yn y dyfodol. Roedd disgwyl i’r Cyngor gomisiynu/darparu gwasanaethau a oedd yn
gwella canlyniadau ar gyfer preswylwyr ac a oedd yn gynaliadwy yn y tymor hir
gan ystyried y newidiadau demograffig a allai fod yn y dyfodol. Trwy ddatblygu
cyfleusterau gofal ychwanegol unigryw, yn debyg i’r rhai a gynigir ar gyfer
safle Awelon, gellid cynnig canlyniadau gwell i breswylwyr gan y byddai ystod ehangach
o ddewisiadau ar gael iddyn nhw yn y dyfodol;
·
sicrhawyd yr aelodau y
byddai iechyd, diogelwch a lles preswylwyr yn ystod y gwaith ailfodelu o'r pwys
mwyaf i'r holl bartneriaid a byddai ymdrechion parhaus i'w cefnogi a'u sicrhau
nhw a'u teuluoedd/gofalwyr cyn dechrau'r gwaith, yn ogystal ag ar ôl ei
gwblhau;
·
cynghorwyd y byddai Grŵp
Cynefin yn ffurfio Grŵp Partneriaeth pe bai cymeradwyaeth i ddatblygu'r
cynnig, fel yr oedd wedi'i wneud â datblygiadau tebyg mewn mannau eraill, i
ymgysylltu â phreswylwyr, teuluoedd, gofalwyr a budd-ddeiliaid gan geisio
lleihau ofnau a chamsyniadau a dod o hyd i atebion i broblemau hysbys, ac ati.
Roedd Grŵp Cynefin hefyd yn y gorffennol wedi ailymweld â phreswylwyr,
budd-ddeiliaid ac aelodau Grwpiau Partneriaeth ddeuddeng mis ar ôl cwblhau'r
prosiect i werthuso'r prosiect a'i effaith ar eu bywydau. Roedd yr un camau
gweithredu'n debygol o gael eu mabwysiadu ar gyfer y prosiect hwn;
·
byddai cynllun y
cyfleuster gofal ychwanegol ar safle Awelon yn ‘gyfeillgar i Ddementia'
drwyddo, yn debyg i’r cynllun sy’n cael ei gynnig ar gyfer cyfleuster gofal
ychwanegol Grŵp Cynefin yn Ninbych;
·
byddai fflat yn y
cyfleuster hefyd, at ddefnydd teuluoedd/ffrindiau a fyddai'n dod i ymweld;
·
roedd y cynigion i’r rhan
fwyaf o fflatiau fod yn unedau â dwy ystafell wely wedi’u seilio ar ddewisiadau
defnyddwyr gwasanaeth, ac roedd y rhain hefyd yn ymarferol ar gyfer preswylwyr
a fyddai angen gofalwyr dros nos;
·
cynghorwyd na fyddai Grŵp
Cynefin yn gyfrifol am ddarparu gwasanaethau gofal yn y cyfleuster newydd,
byddai darparwr annibynnol yn cael ei gomisiynu i’r diben hwnnw, yn dilyn
tendr. O ganlyniad, ni fyddai holl staff presennol Awelon yn cael eu
trosglwyddo. Roedd rhai o’r staff yn debygol o dderbyn cynnig i gael eu
trosglwyddo i Grŵp Cynefin h.y. staff y ffreutur. Er hynny, roedd swyddogion y Cyngor eisoes wedi trafod â staff ynglŷn
â goblygiadau posibl y cynigion sy'n cael eu hystyried iddyn nhw. Roedd yr holl
staff gofal yn fedrus iawn ac felly fe fyddai galw mawr am eu sgiliau mewn
lleoliadau iechyd a gofal cymdeithasol. Byddai’r Cyngor, drwy ei Adran AD, yn
gwneud pob ymdrech i gefnogi staff i ddod o hyd i swyddi eraill.
Darllenodd yr Aelod Arweiniol neges yr oedd wedi’i derbyn yn ddiweddar gan
berthnasau cyn-breswylydd y cyfleuster gofal ychwanegol yn y Rhyl. Ynddi
roeddent yn diolch i staff y cyfleuster am eu gofal diwyd am eu perthynas trwy
gydol ei chyfnod yno, gan bwysleisio'r gofal urddasol roeddent wedi'i roi iddi
hi ac iddyn nhw yn ystod ei dyddiau olaf. Ym marn yr Aelod Arweiniol, roedd hyn
yn crynhoi holl gysyniad gofal ychwanegol. Cafwyd hefyd enghraifft gan
Gadeirydd y Grŵp Tasg a Gorffen o’r modd yr oedd y cyfleuster gofal
ychwanegol wedi cyfoethogi bywyd un preswylydd ac wedi gwella ei iechyd/hiechyd
cyffredinol gan nad oedd bellach yn profi arwahanrwydd cymdeithasol.
Dywedodd Cyfarwyddwr Gwasanaethau Adfywio Grŵp Cynefin bod croeso i
gynghorwyr ymweld ag unrhyw un o’u mentrau gofal ychwanegol i weld y
cyfleusterau a oedd ar gael ac i siarad â phreswylwyr.
Cyn gorffen y drafodaeth, caniataodd Cadeirydd y Pwyllgor i aelod o’r
cyhoedd a oedd yn bresennol siarad o flaen y Pwyllgor. Wrth siarad, gofynnodd
i'r Pwyllgor ystyried maint arwynebedd llawr Canolfan newydd arfaethedig Awelon
yn fanwl. Roedd hi o’r
farn na ddylai fod ag arwynebedd llawr sy'n llai na'r cyfleuster presennol.
Gofynnodd i'r Pwyllgor hefyd ystyried pwy a ddylai gael y cyfrifoldeb o reoli'r
cyfleuster cymunedol yn y dyfodol. Yn ei barn hi, byddai wastad angen rhyw lefel o 'ofal
preswyl' wrth symud tua'r dyfodol, neu fel arall fe fyddai ysbytai lleol yn
parhau i fod yn llawn.
Pwysleisiodd aelodau’r Pwyllgor yr angen i Ganolfan newydd Awelon gael ei
chynllunio mewn modd a oedd yn bodloni anghenion y preswylwyr a'r gymuned
ehangach. Roedd Canolfan bresennol Awelon yn cael ei defnyddio’n aml gan y
gymuned leol, fel y dangosodd yr aelodau yn y cyfarfod. Felly, byddai'n bwysig
bod unrhyw gynllun yn y dyfodol yn addas ar gyfer ystod eang o ddefnyddwyr ac yn
bodloni anghenion y preswylwyr ar yr un pryd, ac na fyddai defnydd y cyhoedd
o'r ganolfan gymunedol yn tarfu ar breifatrwydd y preswylwyr. Gofynnodd yr aelodau hefyd am i'r Cyngor wneud pob
ymdrech i gefnogi grwpiau cymunedol i ddod o hyd i fannau addas eraill i gynnal
eu digwyddiadau dros gyfnod y gwaith ailfodelu.
Diolchodd y Cadeirydd i bawb a oedd ynghlwm â llunio astudiaeth
ddichonoldeb fanwl iawn ac am eu gwaith wrth ddod â’r cynigion gerbron y
Pwyllgor i’w hystyried. Diolchodd hefyd
i bawb a oedd yn bresennol am archwilio’r cynigion yn ddyfal.
Cynigiwyd ac eiliwyd mân ddiwygiad i’r argymhelliad a dderbyniwyd gan y Grŵp
Tasg a Gorffen (fel y’i nodir yn yr adroddiad). Wrth bleidleisio, roedd
mwyafrif y Pwyllgor yn gytûn, felly:
PENDERFYNWYD: o ystyried y sylwadau a wnaed yn ystod y cyfarfod a chasgliadau’r Asesiad
Lles, argymell i’r Cabinet:
a)
y dylai ystyried yr Asesiad o Effaith ar Les yn rhan
o’i ystyriaethau;
b)
ei fod yn cytuno â’r Pwyllgor nad yw Opsiynau 1 a 3b yn Astudiaeth
Ddichonoldeb Grŵp Cynefin yn ddewisiadau ymarferol am y rhesymau a nodir
yn atodiadau 1 a 5 yn y drefn honno; ac
c)
ei fod yn awdurdodi i drafodaethau gael eu cynnal
rhwng Aelodau lleol, swyddogion, Grŵp Cynefin a phwyllgor Canolfan Awelon
i weithio drwy Opsiynau 2a, 2b a 3a i barhau â’r cynllun gorau ar gyfer y safle
sy'n diwallu anghenion pawb ac sy’n amharu leiaf ar drigolion/tenantiaid
presennol, a bod y trafodaethau hyn yn cynnwys gofynion gofod llawr ar gyfer
Canolfan Gymunedol Awelon.
(Ar bwynt addas,
byddai hyn yn galluogi clirio Safle Awelon a dechrau ar y gwaith ar yr
estyniad. Roedd y grŵp tasg a gorffen yn credu y byddai cynyddu nifer yr
unedau Gofal Ychwanegol a ddatblygir (fel y nodir yn Opsiwn 2a) yn darparu’r
trefniadau gorau ar gyfer darparu Tai Gofal Ychwanegol gyda Chyfleusterau
Cymunedol ar safle Awelon. Fodd bynnag, cydnabuwyd bod angen cynnal
trafodaethau pellach gyda phwyllgor Canolfan Awelon i sicrhau y gall y cynllun
terfynol ddarparu’r gweithgareddau cymunedol y maent eisoes yn eu darparu.
Mae
hyn yn bodloni'r dewis a ffefrir gan y Cabinet yn dilyn trafod ym mis Mai 2016
a bydd yn sicrhau hyd at 35 o fflatiau Gofal Ychwanegol eraill ar y safle a
galluogi’r preswylwyr sydd eisoes yn derbyn gwasanaethau gofal preswyl i barhau
i aros ar y safle drwy gydol y cyfnod datblygu os ydynt yn dymuno hynny, ynghyd
â pharhau i ddarparu cyfleusterau cymunedol i hyrwyddo annibyniaeth a lleihau
arwahanrwydd cymdeithasol.)
Yna, cynigiwyd, eiliwyd a phleidleisiwyd ar yr argymhelliad gwreiddiol, fel
y’i nodir yn yr adroddiad. Gan fod mwyafrif y Pwyllgor wedi ymatal rhag
pleidleisio ar yr argymhelliad gwreiddiol, bydd yr argymhelliad diwygiedig fel
y'i nodir uchod yn cael ei gyflwyno i'r Cabinet i'w gymeradwyo. Gofynnodd yr Aelodau
hefyd am i’r adroddiad i’r Cabinet ddatgan yn eglur pam nad yw Opsiwn 1 yn cael
ei ystyried yn ddewis ymarferol.
Dogfennau ategol:
- Awelon Report 060117, Eitem 5. PDF 143 KB
- Awelon Report - App 1 060117, Eitem 5. PDF 89 KB
- Awelon Report - App 2 060117, Eitem 5. PDF 88 KB
- Awelon Report - App 3 060117, Eitem 5. PDF 90 KB
- Awelon Report - App 4 060117, Eitem 5. PDF 89 KB
- Awelon Report - App 5 060117, Eitem 5. PDF 123 KB
- Awelon Report - App 6 060117, Eitem 5. PDF 17 MB
- Awelon Report - App 7 060117, Eitem 5. PDF 424 KB