Eitem ar yr agenda
EFFAITH Y CYNNYDD MEWN TALIADAU PARCIO CEIR AR Y SIR
- Meeting of Pwyllgor Craffu Cymunedau, Dydd Iau, 27 Hydref 2016 9.30 am (Item 8.)
- View the declarations of interest for item 8.
Archwilio’r effaith y mae’r cynnydd mewn
taliadau parcio ceir yn ei gael ar ganol trefi’r sir.
Cofnodion:
Yn ei gyflwyniad, atgoffodd y Cadeirydd y Pwyllgor fod y fethodoleg ar
gyfer gosod prisiau parcio priodol ar draws y sir wedi’i archwilio gan y
Pwyllgor ym mis Gorffennaf 2015 a bod y Pwyllgor wedi argymell bod y pris
parcio is o'r ddau a gynigiwyd yn cael ei weithredu. Roedd penderfyniadau ynglŷn â ffioedd a phrisiau parcio yn bŵer
wedi’i ddirprwyo i'r Prif Swyddog ac ar ôl ystyried yr holl wybodaeth berthnasol
roedd y Swyddog Arweiniol wedi penderfynu y byddai’n well codi’r pris uchaf o’r
ddau.
O ganlyniad, pan weithredwyd y penderfyniad
derbyniwyd rhyw faint o ymatebion anffafriol gan breswylwyr a busnesau. Mewn ymateb i'r pryderon hyn roedd y Pwyllgor wedi gofyn fod adroddiad ar
effaith y cynnydd mewn prisiau ar drefi’r sir yn cael ei gyflwyno i’w ystyried
gan yr aelodau. Croesawodd y Cadeirydd ddau aelod o’r cyhoedd a
oedd yn bresennol yn y cyfarfod ac fe’u cynghorwyd y gallant rannu eu sylwadau
gyda’r Pwyllgor ar ôl cyflwyno’r adroddiad ffurfiol.
Gan gyflwyno’r adroddiad a’r atodiadau cysylltiol, atgoffodd Aelod
Arweiniol y Parth Cyhoeddus y Pwyllgor mai’r cynnydd mewn prisiau parcio a
gyflwynwyd ym mis Ebrill 2016 oedd y cynnydd cyntaf yn Sir Ddinbych ers 2009.
Pwysleisiodd nad oedd yr holl brisiau wedi cynyddu, er enghraifft roedd cost
trwydded parcio flynyddol wedi parhau'r un fath.
Roedd y fenter hirsefydlog sy’n caniatáu i bob
cyngor tref enwebu pum diwrnod parcio am ddim yn eu tref bob blwyddyn wedi’i
gadw hefyd, ynghyd â’r arfer o ganiatáu parcio am ddim ym mhob tref o 3pm yn
ddyddiol yn y 4 wythnos cyn y Nadolig.
Hysbysodd yr Aelod Arweiniol y Pwyllgor fod dau
gyngor tref, ar ôl clywed am y prisiau parcio newydd, wedi bod yn arloesol ac
wedi penderfynu rhoi cymhorthdal ar gyfer prisiau parcio yn eu trefi penodol
o’u harian eu hunain, roedd eraill o’r farn nad oedd hyn yn hanfodol.
Wrth annerch y Pwyllgor
nododd aelod o’r cyhoedd:
- ei bod hi wedi synnu mai dim ond 35 cwyn a dderbyniwyd,
yn enwedig gan ei bod yn ymwybodol o ddeiseb a gyflwynwyd o ardal Rhuthun
a oedd yn cynnwys dros 1,100 o lofnodion;
- roedd prisiau parcio meysydd parcio arhosiad byr
wedi cynyddu 300%, a oedd yn golygu bod meysydd parcio Sir Ddinbych yn
ddrytach na’r rhai mewn awdurdodau cyfagos;
- gan mai dim ond mewn meysydd parcio arhosiad hir y
gellir prynu trwyddedau parcio roedd yn cyfyngu opsiynau parcio ar gyfer
pobl anabl.
Yn dilyn trafodaeth,
codwyd y pwyntiau canlynol gan yr Aelodau:
- roedd angen hyrwyddo argaeledd trwyddedau parcio
blynyddol yn ehangach;
- pryderon y byddai cynnydd mor sylweddol mewn prisiau
parcio yn golygu y byddai pobl yn mynd i siopa ymhellach i ffwrdd, lle’r
oedd y prisiau yn is.
- roedd gan bob tref ei anghenion unigol, ac roedd yr
effaith yn waeth yn Rhuthun gan fod y gost ar gyfer gyrwyr wedi'i
gymorthdalu gan arian a roddwyd gan gronfa a sefydlwyd gan aelodau lleol
yn ystod cyfnod swydd y Cyngor blaenorol tan eleni. Fodd bynnag, roedd y gronfa wedi dod i ben yn awr ac
roedd hyn wedi digwydd yr un pryd â chyflwyno’r prisiau newydd, felly
roedd Rhuthun wedi profi effaith ddwbl. Roedd Cyngor Tref Rhuthun wedi penderfynu peidio â
mabwysiadu'r ymagwedd a fabwysiadwyd gan Gynghorau Tref Dinbych a
Phrestatyn o gymorthdalu'r costau parcio yn eu trefi;
- er bod incwm mwyafrif y meysydd parcio wedi cynyddu
ers cyflwyno’r prisiau newydd, roedd llai o docynnau wedi’u gwerthu;
- y ffaith fod prisiau parcio yn llawer is yn yr
Wyddgrug nac yn Rhuthun;
- teimlad nad oedd parcio ceir yn broblem fawr yn y
Rhyl oherwydd y ffaith fod y siopau mawr wedi adleoli i Brestatyn, fodd
bynnag roedd pobl yn anfodlon parcio yn y maes parcio tanddaearol a
weithredwyd gan y Cyngor oherwydd bod ceir sy’n cael eu gadael yno’n cael
eu fandaleiddio;
- ni ddylid defnyddio nifer y cwynion fel yr unig
feincnod ar gyfer anfodlonrwydd preswylwyr ac eraill gyda’r prisiau
newydd, dylid rhoi ystyriaeth i ddefnyddwyr blaenorol y meysydd parcio a
oedd yn awr yn gyrru i rywle arall i siopa neu ganfod gofodau parcio, gan
effeithio ar ardaloedd preswyl ar adegau;
- pryderon ynglŷn â diffyg gofodau parcio
dynodedig ar gyfer beiciau modur/ sgwteri ym meysydd parcio’r sir a oedd
yn golygu bod cerbydau llai yn defnyddio gofodau parcio llawn mewn meysydd
parcio penodol;
- cydnabod bod y cynnydd diweddar mewn prisiau parcio
wedi achosi pryder ymysg preswylwyr, fodd bynnag, roeddent yn llawer is na
rhai ardaloedd eraill, yn enwedig ardaloedd twristiaeth. Cyfeiriodd un cynghorydd at nifer y lleoedd yr oedd
wedi ymweld â nhw yn ystod yr haf ar draws Gogledd Cymru a Swydd Amwythig. Dim ond mewn dau le yr oedd wedi peidio â pharcio
mewn maes parcio cyhoeddus oherwydd prisiau gormodol, roedd y ddau yn
lleoliadau mewn trefi twristiaeth arfordirol yng Ngwynedd;
Cofrestrodd y Cynghorydd Rhys Hughes ei
wrthwynebiad personol i gynghorau tref yn cymorthdalu prisiau parcio yn eu
trefi, gan ei fod yn credu y dylai’r prisiau fod yr un fath ac yn gyson ar
draws y sir.
Nododd yr aelodau eraill oedd yn bresennol, er y byddai
pawb yn hoffi parcio am ddim, yn yr hinsawdd economaidd bresennol y gwirionedd
oedd nad oedd hynny’n bosibl os oedd y cyngor am fuddsoddi yn ei feysydd
parcio.
Er y cydnabuwyd y gall prisiau parcio gael effaith
ar nifer ymwelwyr yng nghanol trefi ac ar fusnesau yn gyffredinol, roedd
arferion siopa’r cyhoedd wedi newid hefyd. Roedd pobl yn tueddu i ymweld â pharciau siopa y tu allan i drefi, ac roedd
siopa ar ddydd Sul a siopau 24 awr ar gael mewn nifer o leoedd yn awr, ynghyd â
siopa ar y we. Roedd yr holl agweddau hyn wedi effeithio ar siopa
yng nghanol trefi.
Nid oedd unrhyw dystiolaeth fesuradwy i ddangos a
oedd y cymhorthdal o £50mil a roddwyd gan yr aelodau lleol i ardal Rhuthun i
gymorthdalu prisiau parcio dros gyfnod o bum mlynedd wedi gwneud gwahaniaeth i
nifer yr ymwelwyr neu’r busnesau yn y dref. Atgoffwyd aelodau’r Pwyllgor hefyd fod gan Sir Ddinbych ei ganolfannau
siopa y tu allan i drefi e.e. Tweedmill a Pharc Manwerthu Clwyd a oedd yn
cyflogi nifer o breswylwyr ac yn cyfrannu at yr economi leol.
Gan ymateb i’r pwyntiau
a godwyd eglurodd yr Aelod Lleol a'r swyddogion fod:
- nifer y cwynion a dderbyniwyd, cyfanswm o 35, yn
cyfeirio at nifer y cwynion unigol penodol a dderbyniwyd drwy Ganolfan
Gwasanaethau Cwsmer y Cyngor. Nid oedd deisebau a lofnodwyd wedi’u cynnwys yn y
ffigurau hyn;
- roedd argymhelliad 9 yn atodiad 2 yn cydnabod bod
angen hyrwyddo argaeledd y trwyddedau parcio blynyddol ac archwilio
hyfywedd yr opsiwn o dalu am drwyddedau blynyddol mewn rhandaliadau;
- roedd trwyddedau parcio ar gael mewn meysydd parcio
arhosiad hir yn unig, ond yr unig eithriad oedd maes parcio Heol y
Farchnad yn Llangollen. Y rheswm dros hyn
oedd bod meysydd parcio arhosiad hir yn fwy tebygol o gael eu defnyddio
gan bobl sy'n gweithio yn hytrach na siopwyr;
- er bod canran o 300% o gynnydd yn ymddangos fel
cynnydd hynod o sylweddol, mewn arian mewn perthynas â meysydd parcio
arhosiad byr roedd cost arhosiad
byr wedi cynyddu o 20c;
- ni fyddai’r Cyngor eisiau diwygio costau parcio yn
rheolaidd gan fod costau sylweddol yn gysylltiedig ag ymarfer o'r fath
h.y. roedd ail-raglennu peiriannau talu ac arddangos ar draws y sir wedi
costio £11mil, nid oedd hyn yn cynnwys costau staffio;
- Roedd Grŵp Ardal Aelodau Dinbych wedi gofyn i
swyddogion y Gwasanaethau Parcio fynychu cyfarfod Cyngor Tref Dinbych i
drafod y cynnydd mewn prisiau parcio. Yn dilyn y cyfarfod hwnnw roedd y Cyngor Tref wedi
cynnig cyflwyno cymhorthdal;
- er bod nifer y tocynnau a werthwyd yn is nag yn
ystod yr un cyfnod yn y flwyddyn flaenorol, roedd nifer y trwyddedau
blynyddol a werthwyd wedi cynyddu'n sylweddol o 18%. Roedd angen gwaith pellach ar y data hwn, gan
gynnwys arolwg nifer ymwelwyr er mwyn dadansoddi'r gwir effaith ar
fusnesau canol y dref, ond roedd y dadansoddiad cychwynnol o ffigurau
gwerthu tocynnau yn awgrymu bod unigolion a oedd yn prynu dau docyn hanner
diwrnod yn y gorffennol yn awr yn prynu trwyddedau blynyddol gan fod hyn
yn rhatach yn y pen draw;
- mewn perthynas â ffioedd parcio yn Sir y Fflint,
roedd cyngor tref yr Wyddgrug yn cymorthdalu’r prisiau parcio yn y dref ac
roedd prisiau parcio mewn ardaloedd eraill yn y sir yn uwch. O ran cymharu â siroedd eraill roedd prisiau newydd
Sir Ddinbych yn cyd-fynd â Chyngor Bwrdeistref Sirol Conwy a’r awdurdodau
cyfagos eraill;
- nid oedd argaeledd gofodau parcio, arhosiad byr ac
arhosiad hir, yn gymaint o broblem yn y Rhyl ag ydoedd mewn mannau eraill
yn y sir, gan fod gan y dref nifer o feysydd parcio cyhoeddus a phreifat
sy’n hawdd eu cyrraedd;
- roeddent yn ymwybodol o ddiffyg gofodau parcio
dynodedig ar gyfer beiciau modur/sgwteri anabledd/beiciau yn y sir ac
roeddent yn gweithio ar gynlluniau i fynd i’r afael â’r diffyg hwn;
- roedd pob maes parcio sy’n eiddo i'r cyngor ar draws
y sir yn destun yr un cynllun codi tâl; fodd bynnag roedd rhai cynghorau
tref wedi dewis cymorthdalu'r prisiau ac felly’n ad-dalu’r Cyngor Sir gyda
balans yr incwm sy’n ddyledus o'r meysydd parcio hynny. Felly roedd y Cyngor Sir yn derbyn taliad llawn ar
gyfer pob tocyn a brynwyd;
- roedd y Cyngor wedi ymrwymo i fuddsoddi ym meysydd
parcio’r sir yn hir dymor. Roedd adolygiad rheoli asedau ar y gweill mewn
perthynas â'r holl feysydd parcio sy'n eiddo i'r cyngor er mwyn nodi lefel
y gwaith cynnal a chadw a gwella yr oedd ei angen ym mhob un, gan gynnwys
rhestr o brosiectau blaenoriaeth. Rhagwelwyd y byddai disodli’r holl beiriannau talu
ac arddangos gyda pheiriannau gwell yn costio oddeutu £300mil i £400mil.
- roedd angen diweddaru a gwella’r arwyddion ac
ymgymryd â gwaith y parth cyhoeddus er mwyn sicrhau bod meysydd parcio yn
groesawgar, yn enwedig gan eu bod yn borth i Sir Ddinbych ar gyfer
twristiaid ac ati;
- gellir cyflwyno cynllun rheoli asedau drafft i’r
pwyllgor archwilio i’w ymgynghori maes o law os yw aelodau yn dymuno
hynny.
- gwnaed penderfyniad i beidio ag amrywio cost parcio
am awr rhwng meysydd parcio arhosiad byr ac arhosiad hir Dim ond y gyfradd tair awr oedd wedi'i hamrywio.
- roedd trafodaethau ar y gweill gydag Adran
Gwasanaethau Eiddo’r Cyngor ynglŷn â hyfywedd agor meysydd parcio
staff fel meysydd parcio talu ac arddangos ar benwythnosau a gŵyl y
banc ac ati, yn benodol yr un yn Neuadd y Sir, nawr fod yr adeilad a’r tir
yn eiddo i’r Cyngor;
- roedd swyddogion gorfodi parcio yn gorfodi rheolau
parcio ar ddydd Sul hyd at ddiwedd mis Hydref, ac yn parhau â'r gwaith
gorfodi ar ddydd Sul ar ôl y dyddiad hwnnw pan gynhelir digwyddiadau;
- dylid archwilio nifer o opsiynau arloesol i
gynorthwyo i gyflawni’r blaenoriaethau corfforaethol o ddatblygu'r economi
leol, i ddarparu strydoedd glân a thaclus, a buddsoddi ym meysydd parcio'r
sir. Roedd y rhain yn cynnwys
trwyddedau parcio y gellir eu trosglwyddo, cynlluniau taleb parcio gwesty
a llety gwely a brecwast ac ati; a
- byddai rhannu gwybodaeth ynglŷn â’r newidiadau
i brisiau parcio wedi elwa o gyfathrebu'n well ar draws y sir, yn enwedig
o ran buddiannau prynu trwyddedau blynyddol.
Cynghorodd y Cadeirydd y Pwyllgor y byddai’r broses
penderfyniadau dirprwyol gan Brif Swyddog yn y dyfodol yn destun yr un lefel o
archwilio, gan gynnwys opsiwn i alw penderfyniad i mewn i’w archwilio, fel y
gwneir ar gyfer penderfyniadau dirprwyol gan Aelodau Cabinet ac Aelodau
Arweiniol ar hyn o bryd.
Ar ddiwedd y drafodaeth roedd y Pwyllgor o’r farn
nad oedd unrhyw elw o adolygu'r prisiau parcio ar hyn o bryd ac y byddai’n well
mabwysiadu dull rhagweithiol o reoli a buddsoddi ym meysydd parcio’r Cyngor. Hefyd roedd angen hysbysu’r preswylwyr ynglŷn â'r cynlluniau a'r
datblygiadau ar gyfer meysydd parcio'r Cyngor. Yn dilyn trafodaeth fanwl:-
PENDERFYNWYD, yn amodol ar y sylwadau uchod, bod y Pwyllgor yn argymell:
(i)
Bod y Cyngor yn cadw’r cynllun codi tâl presennol ar gyfer y Sir gyfan
(fel y nodwyd yn Atodiad B yr adroddiad).
(ii)
Gallai’r Swyddogion ddiwygio’r trefniadau rheoli yn y meysydd parcio, gan
gynnwys cyflwyno amrywiadau i’r cynllun codi tâl ar draws y Sir, drwy
drafodaethau gyda GGAau, Cynghorau Tref a'r Aelod Arweiniol.
(iii)
Dylai’r swyddogion fynychu pob un o’r chwe Grŵp Ardal Aelodau dros y
chwe mis nesaf (Hydref 2016 i fis Mawrth 2017) i drafod y trefniadau rheoli ar
gyfer y meysydd parcio yn eu hardal.
(iv)
datblygu cynllun rheoli asedau meysydd parcio i gynorthwyo i
flaenoriaethu buddsoddiad, gan gynnwys peiriannau talu ac arddangos modern;
gwell arwyddion; gwella gwaith cynnal a chadw cyffredinol; gwelliannau
amgylcheddol gan gynnwys plannu ychwanegol ac ati.
(v)
opsiynau i’w harchwilio ar gyfer defnyddio peiriannau talu am barcio i
gyflwyno talebau i’w defnyddio mewn siopau lleol, caffis a chyfleusterau’r
Cyngor. Gallai hyn amrywio o dalebau syml wedi'u hargraffu ar gefn pob tocyn i
beiriannau talu sy’n cynnig amryw o opsiynau.
(vi)
dylid galluogi trosglwyddo tocynnau talu ac arddangos rhwng y meysydd
parcio o fewn y Sir i wella hyblygrwydd yn enwedig ar gyfer ymwelwyr, er mwyn i
rywun allu prynu tocyn diwrnod cyfan mewn un maes parcio, a fyddai’n caniatáu
iddynt barcio mewn unrhyw faes parcio arall y Cyngor yn Sir Ddinbych ar y
diwrnod hwnnw.
(vii)
archwilio estyniad posibl i’r system trwyddedau parcio presennol i
gynnwys mwy o opsiynau ar gyfer twristiaid. Er enghraifft, gellir gwerthu
trwyddedau parcio sy’n para am wythnos, neu benwythnos yn y siopau papur newydd
lleol, fel y gwneir mewn lleoedd fel Jersey.
(viii)
swyddogion i ystyried opsiynau ar gyfer cynlluniau taleb parcio ar gyfer
gwestai a llety gwely a brecwast a fyddai’n caniatáu i westeiwyr roi taleb
parcio i’w gwesteion ar gyfer cyfnod eu harhosiad, ac osgoi yr amgylchiadau pan
fu'n rhaid i westeion godi a mynd i brynu tocyn talu ac arddangos yn gynnar yn
y bore i osgoi dirwy.
(ix)
Gwella'r gwaith o hyrwyddo'r trwydded parcio arhosiad hir blynyddol ac
ystyried cyflwyno'r gallu i dalu mewn rhandaliadau a
(x)
dylid cyflwyno adroddiad cynnydd pellach i’r Pwyllgor mewn chwe mis
ynglŷn ag effaith y cynnydd mewn prisiau parcio, ynghyd â chynllun drafft
rheoli asedau meysydd parcio i dderbyn sylwadau’r aelodau arno.
Dogfennau ategol:
- Parking Charges Impact Scrutiny Report v3, Eitem 8. PDF 100 KB
- APPENDIX A, Eitem 8. PDF 15 KB
- APPENDIX B, Eitem 8. PDF 29 KB
- APPENDIX C income comparison, Eitem 8. PDF 36 KB
- APPENDIX D1, Eitem 8. PDF 43 KB
- APPENDIX D2, Eitem 8. PDF 43 KB
- APPENDIX E, Eitem 8. PDF 27 KB
- Appendix F, Eitem 8. PDF 25 KB