Eitem ar yr agenda
ARGYMHELLION OMBWDSMON GWASANAETHAU CYHOEDDUS CYMRU YN DILYN YMCHWILIAD I YMDRINIAETH Y CYNGOR Â CHAIS CYNLLUNIO RHIF 42/2012/1368/PO - TIR YN MOUNT HOUSE, BRYNIAU, DISERTH
Ystyried
adroddiad ar ganfyddiadau Adroddiad Ombwdsmon Gwasanaethau Cyhoeddus Cymru ynglŷn
â’r achos, tir yn Mount House, Bryniau, Diserth (copi wedi'i amgáu).
Cofnodion:
Cyflwynwyd adroddiad ar ganfyddiadau Adroddiad
Ombwdsmon Gwasanaethau Cyhoeddus Cymru ynglŷn â’r achos, tir yn Mount
House, Bryniau, Diserth.
Siaradwr Cyhoeddus-
Cyfeiriodd Mr. Rhys Davies (ar ran yr ymgeisydd) –at
y sylwadau hwyr a gyflwynwyd gan yr achwynydd a’r cyngor cyfreithiol a roddwyd
i’r pwyllgor i symud ymlaen i lunio eu penderfyniadau. Roedd yr achwynydd wedi cadarnhau na
ddylid ystyried costau iawndal fel mater ond pe bai’r caniatâd cynllunio yn
cael ei dynnu’n ôl yna byddai’n rhaid talu iawndal i berchennog y tir.
Amlinellodd Pennaeth Cynllunio a Gwarchod y
Cyhoedd y digwyddiadau a arweiniodd at gyflwyno’r adroddiad a’r cais i'r
aelodau ailystyried canfyddiadau ymchwiliad yr Ombwdsmon yn yr achos hwn ac a
ddylid tynnu’r caniatâd cynllunio amlinellol yn ôl. Roedd y Pwyllgor Cynllunio wedi ystyried
adroddiad yr Ombwdsmon yn wreiddiol ym mis Chwefror 2016 ac wedi penderfynu na
fyddai’n briodol dirymu’r caniatâd a oedd wedi’i gymeradwyo. Ers hynny roedd yr achwynydd wedi dwyn
achos Adolygiad Barnwrol yn erbyn y penderfyniad a fyddai’n derbyn gwrandawiad
ym mis Rhagfyr 2016. Yn unol â’r cyngor cyfreithiol roedd y mater wedi’i ddwyn yn ôl o flaen yr
Aelodau i’w ailystyried gan ystyried sail yr hawliad yn yr Adolygiad Barnwrol a
seiliau’r her. Pe bai’r aelodau o blaid cadarnhau eu penderfyniad i beidio â thynnu’r
caniatâd yn ôl yn unol ag argymhelliad y swyddog byddai’r Cyngor mewn sefyllfa
gryfach wrth wynebu’r Adolygiad Barnwrol. Pe bai’r aelodau o blaid tynnu’r caniatâd
cynllunio yn ôl yn ffurfiol, ni fyddai’r Adolygiad Barnwrol yn parhau ond
byddai gan yr ymgeisydd hawl i dderbyn iawndal. Eglurwyd, pe bai’r caniatâd yn cael ei dynnu’n ôl,
byddai’r penderfyniad a wnaed ynglŷn â’r materion a gadwyd yn ôl hefyd yn
cael eu dirymu.
Pwysleisiodd yr Arweinydd Tîm – Lleoedd (SC) y bu
beirniadaethau ynglŷn â’r modd yr oedd y Cyngor wedi delio â’r cais
cynllunio a oedd wedi’u nodi yn yr adroddiad. Tynnodd sylw at y prawf cyfreithiol ar gyfer tynnu
caniatâd yn ôl fel y nodwyd o dan Adran 97 Deddf Cynllunio Gwlad a Thref 1990 a
diffiniad 'hwylus’ yn y cyd-destun hwnnw ac a fyddai’n briodol yn yr achos hwn
o ystyried yr holl ystyriaethau gan gynnwys y ffaith pe bai’r cais yn cael ei
gyflwyno i’r Pwyllgor Cynllunio heddiw mae'n annhebygol y byddai'n derbyn
caniatâd, canfyddiadau’r Ombwdsmon ar ymdriniaeth y Cyngor o’r cais, ac
ystyriaethau iawndal.
Trafodaeth Gyffredinol – Eglurodd y Cynghorydd Stuart Davies nad
oedd unrhyw ystyriaethau perthnasol pellach wedi’u cyflwyno a oedd yn newid ei
safbwynt. O ystyried y prawf statudol ar gyfer tynnu’r caniatâd yn ôl, teimla’r
Cynghorydd Davies y byddai effaith un annedd newydd ar eiddo’r achwynydd yn
fychan, yn enwedig yn dilyn y diwygiadau a wnaed gan yr ymgeisydd mewn ymateb
i’r pryderon a godwyd, ac o ystyried argymhellion yr Ombwdsmon a’r materion
iawndal. O ystyried y sefyllfa gyfreithiol a’r sylwadau a gyflwynwyd cynigodd y
Cynghorydd Davies argymhellion y swyddog a nodwyd yn yr adroddiad. Eglurodd y Cadeirydd y byddai pleidlais ar
wahân ar gyfer yr argymhellion.
Ceisiodd y Cynghorydd Mark Young eglurhad a fyddai’n briodol iddo
bleidleisio ar y mater gan nad oedd yn aelod pan gymeradwywyd y caniatâd
cynllunio amlinellol gwreiddiol. Cynghorodd yr Arweinydd Tîm – Lleoedd (SC) gan ei fod wedi cwblhau’r
hyfforddiant cynllunio gofynnol ac fel aelod o’r Pwyllgor Cynllunio, roedd yn
briodol iddo gymryd rhan yn y broses o wneud penderfyniadau.
Amlygodd y Cynghorydd Huw Hilditch-Roberts fod yr
aelodau wedi’u cynghori yn ystod eu hyfforddiant y dylid ystyried pob cais ar
ei rinweddau ei hun a oedd yn groes i safbwynt yr Ombwdsmon y dylai bod yr
aelodau’n ymwybodol o ddau achos o wrthod caniatâd yn yr un lleoliad ac yn yr
achos hwn gallai hyn effeithio ar y penderfyniad. Cadarnhaodd y swyddogion nad oeddent wedi ystyried
yr achosion o wrthod rhoi caniatâd cynllunio blaenorol fel ystyriaeth
berthnasol er fod yr Ombwdsmon yn teimlo eu bod yn berthnasol. Ar ôl ystyried safbwynt yr Ombwdsmon
ceisiodd y swyddogion gynnwys mwy o gefndir hanesyddol yn yr adroddiadau
ceisiadau cynllunio ond roeddent yn parhau i fod o’r farn nad oedd y ceisiadau
a wrthodwyd yn flaenorol yn berthnasol yn yr achos hwn. Dywedodd y Cynghorydd Huw Hilditch-Roberts
y byddai ystyried ceisiadau hanesyddol yn ‘cymylu’r dyfroedd’ ac fel Pwyllgor
Cynllunio dylai’r aelodau ystyried y cais presennol fel y'i cyflwynwyd ar ei
rinweddau ei hun. Gofynnodd y Cynghorydd Hilditch-Roberts am gael nodi’r pwynt hwn yng
nghofnodion y cyfarfod.
O ran ystyriaethau iawndal, eglurodd yr Arweinydd
Tîm y cyngor a dderbyniwyd gan y Prisiwr Dosbarth o ran y symiau iawndal posibl
fyddai’n daladwy yn dilyn penderfyniad y Pwyllgor Cynllunio i dynnu'r caniatâd
yn ôl neu beidio.
Cymerodd y Cadeirydd y cyfle i ddiolch i’r
swyddogion am eu cyngor a chyfoeth y wybodaeth a gyflwynwyd er mwyn i’r
pwyllgor wneud penderfyniad ar sail gwybodaeth lawn.
Cynnig (1) – Cynigodd y Cynghorydd Stuart Davies bod
argymhelliad y swyddog (a) yn cael ei dderbyn fel y nodwyd yn yr adroddiad, ac
fe’i eiliwyd gan y Cynghorydd Mark Young.
PLEIDLAIS:
O BLAID - 21
YN ERBYN – 0
YMATAL - 1
PENDERFYNWYD bod Aelodau yn nodi ac yn derbyn
argymhellion Ombwdsmon Gwasanaethau Cyhoeddus Cymru a) i c) gan ystyried y
mesurau y cytunwyd arnynt ac a weithredwyd gan Swyddogion.
Cynnig (2) – Cynigodd y Cynghorydd Stuart Davies bod
argymhelliad y swyddog (b) yn cael ei dderbyn fel y nodwyd yn yr adroddiad, ac
fe’i eiliwyd gan y Cynghorydd Dewi Owens.
PLEIDLAIS:
O BLAID - 21
YN ERBYN – 0
YMATAL - 1
PENDERFYNWYD ar
ôl ystyried y materion a chyngor yn yr adroddiad hwn bod y Cyngor yn cadarnhau
na fydd yn ceisio dirymiad ffurfiol y caniatâd cynllunio yn unol ag
argymhellion y swyddog ac am y rhesymau a nodwyd yn yr adroddiad.
Cynnig (3) – Cynigodd y Cynghorydd Stuart Davies bod
argymhelliad y swyddog (c) yn cael ei dderbyn fel y nodwyd yn yr adroddiad, ac
fe’i eiliwyd gan y Cynghorydd Dewi Owens.
PLEIDLAIS:
O BLAID - 21
YN ERBYN – 0
YMATAL - 1
PENDERFYNWYD bod yr Aelodau'n cytuno i gyfarwyddo’r
Prisiwr Dosbarth ymhellach i asesu effaith unrhyw ddatblygiad a gwblhawyd
(testun cais materion a gadwyd yn ôl yn gysylltiedig â'r caniatâd amlinellol)
ar eiddo’r achwynwyr, o fewn mis o gwblhau'r datblygiad, a thalu swm sy'n
cyfateb i'r gwahaniaeth mewn gwerth cyn ac ar ôl y datblygiad.
Dogfennau ategol:
- MOUNT HOUSE, BRYNIAU, DYSERTH, Eitem 9. PDF 219 KB
- MOUNT HOUSE - APP 1, Eitem 9. PDF 2 MB
- MOUNT HOUSE - APP 1A, Eitem 9. PDF 125 KB
- MOUNT HOUSE - APP 1B, Eitem 9. PDF 46 KB
- MOUNT HOUSE - APP 1C, Eitem 9. PDF 161 KB
- MOUNT HOUSE - APP 1D, Eitem 9. PDF 118 KB
- MOUNT HOUSE - APP 2, Eitem 9. PDF 2 MB
- MOUNT HOUSE - APP 3, Eitem 9. PDF 82 KB
- MOUNT HOUSE - APP 4, Eitem 9. PDF 312 KB