Agenda and draft minutes

Derbyniwyd ymddiheuriad am absenoldeb gan y Cynghorydd Bernie Attridge (Cyngor Sir y Fflint).

Dylai’r Aelodau ddatgan unrhyw gysylltiad personol neu sy’n rhagfarnu mewn unrhyw fusnes a nodwyd i’w ystyried yn y cyfarfod hwn.

Dim.

Penodi cadeirydd y Cyd-bwyllgor ar gyfer blwyddyn y Cyngor 2014 / 15

Cynigwyd y Cynghorydd Hugh Jones (Cyngor Bwrdeistref Sirol Wrecsam) i’w benodi fel Cadeirydd y Cyd-bwyllgor gan y Cynghorydd Huw Jones.  Eiliodd y Cynghorydd Ian Roberts y cynnig.  Ni chafwyd unrhyw enwebiadau eraill a phenodwyd y Cynghorydd Hugh Jones yn gadeirydd.

 PENDERFYNWYD - bod y Cynghorydd Hugh Jones yn cael ei benodi’n gadeirydd y Cydbwyllgor ar gyfer blwyddyn y cyngor 2014/15.

Penodi is-gadeirydd y Cyd-bwyllgor ar gyfer blwyddyn y cyngor 2014 / 15.

Cynigwyd y Cynghorydd Huw Jones (Cyngor Sir Ddinbych) fel is-gadeirydd y Cydbwyllgor gan y Cynghorydd Derek Butler; ac fe eiliwyd y cynnig gan y Cynghorydd Hugh Evans.  Heb unrhyw enwebiadau eraill:

PENDERFYNWYD – bod y Cynghorydd Huw Jones yn cael ei benodi’n is-gadeirydd y Cydbwyllgor ar gyfer blwyddyn y cyngor 2014/15.

Ystyried adroddiad (copi ynghlwm) i’r Cyd-bwyllgor fabwysiadu’r cyfansoddiad (sydd ynghlwm fel atodiad).

Cyflwynodd Bennaeth Gwasanaethau'r Gyfraith, AD a Democratiaeth Cyngor Sir Ddinbych adroddiad (wedi’i ddosbarthu’n flaenorol) oedd yn ceisio cymeradwyaeth y Cydbwyllgor i fabwysiadu cyfansoddiad y Cydbwyllgor (rheolau sefydlog).

Cynghorodd y Pennaeth fod y cyfansoddiad atodol eisoes wedi’i gymeradwyo gan adrannau cyfreithiol y 3 awdurdod a’u tystio gyda sêl pob awdurdod.   Amlinellodd rai o rannau allweddol y ddogfen; bod aelodaeth y Cydbwyllgor yn cynnwys aelodau gweithredol pob awdurdod (e.e. Aelodau Cabinet neu'r Bwrdd Gweithredol) a bod gan bob awdurdod ddau aelod, darpariaethau ar gyfer cyfarfod blynyddol a chyfarfodydd bob 4 mis.  Byddai lleoliadau’r cyfarfodydd yn cael eu cylchdroi rhwng pob awdurdod.   Adroddodd ynglŷn â chworwm a threfniadau pleidleisio fel y dengys y rheolau sefydlog a chadarnhaodd y byddai Sir Ddinbych fel awdurdod arweiniol yr AHNE yn paratoi, cyhoeddi a chylchredeg pecynnau rhaglen ar gyfer pob cyfarfod y Cydbwyllgor, ond byddai’r awdurdod sy’n cynnal y cyfarfod yn cynhyrchu'r cofnodion.

Amlygodd Pennaeth y Gyfraith, AD a Democratiaeth wall yn y rheolau sefydlog ac y dylai rheol sefydlog 8.6 gyfeirio at reol sefydlog 14 (nid 4) wrth ymdrin â gweithgarwch niwsans.

Cwestiynodd y Cynghorydd Martyn Holland reol sefydlog 13 oedd yn gwahardd datgan anghytundeb.  Cynghorodd y Pennaeth fod y ddarpariaeth yn atal cofnodi anghytundeb yn y cofnodion ar ôl cynnal pleidlais.   Cadarnhaodd y gellir cofnodi anghytundeb yn y cofnodion fel rhan o’r drafodaeth ac y gellir defnyddio pleidlais wedi’i chofnodi i gofnodi sut y pleidleisiodd bob aelod.

 PENDERFYNWYD bod y Cydbwyllgor yn cymeradwyo’r cyfansoddiad (rheolau sefydlog) sydd ynghlwm yn atodiad 1 (yn amodol ar gywiro rheol sefydlog 8.6).

Ysyried adroddiad (copi ynghlwm) i’r aelodau ymgyfarwyddo â chytundeb y Cydbwyllgor a’i oblygiadau ar gyfer yr holl bartïon.

Cyflwynodd Bennaeth y Gyfraith, AD a Democratiaeth adroddiad (wedi’i ddosbarthu’n flaenorol) oedd yn cynnwys gwybodaeth ynglŷn â'r cytundeb cyfreithiol sy’n sylfaen i’r Cydbwyllgor a chyfeiriodd at y pwyntiau canlynol.

·         Roedd y cytundeb yn creu’r Cydbwyllgor ac yn sefydlu ei bwerau.

·         Roedd y cytundeb yn sefydlu grŵp swyddogion i lunio argymhellion ar gyfeiriad strategol a’r gyllideb, i weithredu’r cynllun rheoli, cynllun gweithredu blynyddol a phenderfyniadau’r cydbwyllgor; byddai’r grŵp yn cynnwys aelodau cyfetholedig o Gyfoeth Naturiol Cymru, swyddogion o’r 3 awdurdod perthnasol a gan bartneriaid eraill.

·         Byddai Sir Ddinbych yn darparu arbenigedd ariannol, cymorth cyfreithiol a gweinyddol ar gyfer y Cydbwyllgor a chymorth gyda chofnodion gan yr awdurdod sy’n cynnal cyfarfod y cydbwyllgor.

·        Proses ar gyfer ariannu’r Cydbwyllgor i ddiwallu ei amcanion drwy gyllideb graidd sy’n cael ei darparu gan y 3 awdurdod a chyllid grant gan Gyfoeth Naturiol Cymru.

·        Byddai’n cytundeb yn parhau hyd 2019 ac oni bai y caiff ei newid, ei dynnu’n ôl neu ei ddiddymu yna byddai’n parhau am gyfnod arall o 5 mlynedd wedi hynny.  

·         Gall unrhyw un o’r 3 awdurdod dynnu’n ôl o'r Cydbwyllgor drwy roi dim llai na 18 mis o rybudd i’r awdurdodau eraill a’r Ysgrifennydd (Pennaeth y Gyfraith, AD a Democratiaeth Sir Ddinbych).  

Cyfeiriodd y Cynghorydd Hugh Evans at yr amcanion a nodir ar gyfer y Cydbwyllgor lle y byddai’n ceisio ‘dylanwadu' o blaid pwrpas ddynodedig yr AHNE.  Adroddodd y Cynghorydd Evans nad oedd yn glir beth oedd ystyr diffiniad yr ymagwedd o ddylanwadu a beth oedd y goblygiadau.  Dywedodd ei fod wedi profi effeithiau negyddol  o ran gweithgarwch yr AHNE lle yr oedd yn ceisio dylanwadu ar ganlyniadau penderfyniadau ar eiddo a chymunedau tu hwnt i’r AHNE ei hun.

Eglurodd Swyddog AHNE Bryniau Clwyd a Dyffryn Dyfrdwy (Swyddog AHNE) fod yr AHNE yn ddynodiad cenedlaethol ac roedd angen i’r 3 awdurdod ystyried hynny.  Adroddodd fod angen Cydbwyllgor i hyrwyddo polisïau a phenderfyniadau oedd yn cadw a gwella harddwch naturiol yr AHNE yn unol â’i bwrpas statudol.   Ychwanegodd Bennaeth Gwasanaethau'r Gyfraith, AD a Democratiaeth fod y cytundeb eisoes wedi’i gymeradwyo gan dimau cyfreithiol y 3 awdurdod ac wedi’i gymeradwyo gan Gabinet neu Fwrdd Gweithredol pob awdurdod. 

Cefnogodd y Cynghorydd Stuart Davies y pryderon a godwyd gan y Cynghorydd Evans, gan ychwanegu ei fod yn byw mewn ardal yr effeithir arni gan weithgareddau’r AHNE ac yn ei farn ef roedd hyn yn cyfyngu’n annheg ar ryddid trigolion a busnesau.  Adroddodd y Cynghorydd Hugh Jones y gallai’r Cydbwyllgor weithredu o fewn ei gylch gorchwyl yn unig, ac roedd ganddo brosesau eglur a byddai’n datblygu rhaglen gwaith i’r dyfodol i weithredu arno.

PENDERFYNWYD nodi’r adroddiad.

Ystyried adroddiad (copi ynghlwm) ar sefyllfa ariannol bresennol yr AHNE ac i gymeradwyo'r gyllideb ar gyfer 2014/15

Cyflwynodd Rheolwr Cyllid a Sicrwydd Sir Ddinbych adroddiad (a ddosbarthwyd yn flaenorol) ar gyllidebau refeniw’r AHNE.  Adroddodd fod y broses gosod cyllideb ar gyfer y flwyddyn gyfredol yn cydnabod fod yn rhaid i’r AHNE gael cyllideb i weithredu ac y gallai gael ei gymeradwyo’n ffurfiol gan y Cydbwyllgor yn awr.  Adroddodd y Rheolwr Cyllid a Sicrwydd ar y gorwariant bychan a’r tanwariant yn y cyllidebau craidd ac ardal yn y drefn honno a chynghorodd fod y gyllideb ar gyfer 2014 /15 yn bendant ond rhybuddiodd efallai y bydd anawsterau yn y blynyddoedd sydd i ddod.

Wrth amlygu bod yn rhaid i’r Cydbwyllgor gytuno ar gyllideb bob blwyddyn a bod gofyn i’r 3 awdurdod ddarparu cyfraniad priodol, cynghorodd y Cynghorydd Hugh Jones y byddai angen i’r Cydbwyllgor gyfarfod i drafod drafft y gyllideb mewn pryd er mwyn cyflwyno argymhellion ynglŷn â chyllid i’r awdurdodau.

 Trafododd yr Aelodau'r mater o sicrhau fod y gyllideb yn cael ei rhannu’n deg rhwng yr awdurdodau.  Mewn ymateb eglurwyd fod y rhan fwyaf o’r AHNE yn Sir Ddinbych ac felly roedd rhan fwyaf y gwaith a’r gwariant yn Sir Ddinbych.

PENDERFYNWYD nodi’r adroddiad a bod y gyllideb a osodwyd ar gyfer 2014/15 yn cael ei chymeradwyo’n ffurfiol.

Ystyried adroddiad (copi ynghlwm) i gwblhau’r trefniadau llywodraethu ar gyfer y cytundeb cyfreithiol.

Cyflwynodd Swyddog yr AHNE adroddiad (a ddosbarthwyd yn flaenorol) ynghylch cadarnhau trefniadau llywodraethu ar gyfer cytundeb cyfreithiol y Cydbwyllgor.  Fe gynghorodd fod Partneriaeth yr AHNE yn cael ei thrawsnewid fel rhan o’r cytundeb gyfreithiol gan ddisodli'r Cydbwyllgor Ymgynghorol Dros Dro gyda Phartneriaeth yr AHNE (Grŵp Budd-ddeiliaid) a fforymau perthnasol.  

Adroddodd Swyddog yr AHNE mai cynhyrchu cynllun rheoli oedd prif faes gwaith y Bartneriaeth a chyfeiriodd at y rhestr o aelodau fyddai’n ffurfio Partneriaeth yr AHNE fel y dengys yr adroddiad.  

PENDERFYNWYD bod y Cydbwyllgor yn:-

(i)        Cymeradwyo penodiad is-grŵp yn cynnwys y Cynghorwyr Derek Butler, Huw Jones ac Ian Roberts i benodi Partneriaeth yr AHNE (yn amodol ar gadarnhad ffurfiol aelodaeth yr is-grŵp drwy weithdrefnau penderfyniadau dirprwyol pob awdurdod);

(ii)       Byddai dyddiad ar gyfer cyfarfod Fforwm yr AHNE a Chyngor Tref a Chymuned yn cael ei gadarnhau ar ôl ymgynghori gyda’r cyfranogwyr; gyda gwahoddiad i aelodau etholedig y 3 awdurdod.

Derbyn dogfennau (copïau i'w darparu yn y cyfarfod) ar y canlynol:

·        Strategaeth Twristiaeth Gynaliadwy

·        Rhaglen Waith Newid yn yr Hinsawdd

Cyflwynodd Swyddog yr AHNE adroddiad ar lafar a chyflwyno Strategaeth Twristiaeth Gynaliadwy a Chynllun Gweithredu.  Cynhyrchwyd y Strategaeth gan y Cwmni Twristiaeth ar ôl cynnal gweithdai ymgynghori er mwyn deall y sefyllfa i ddatblygu twristiaeth gynaliadwy.

Byddai digwyddiad cyhoeddusrwydd i hyrwyddo’r Strategaeth yn cael ei gynnal yng Nghorwen yr wythnos ganlynol.

Dosbarthodd Swyddog yr AHNE rhaglen waith newid hinsawdd ac egluro fod y ddogfen yn llunio awgrymiadau sut y gallai ffermydd, trigolion a busnesau o fewn yr AHNE addasu i liniaru effeithiau newid hinsawdd.  Cynghorwyd yr Aelodau fod gan y rhaglen ddogfennau cysylltiol gan gynnwys un ar gyfer plant oedd yn ceisio ymdrin â’r bwlch mewn darpariaeth a gobeithir y byddai’n denu teuluoedd ac eraill sydd â diddordeb mewn materion sy’n ymwneud â newid hinsawdd i’r AHNE.

Holodd y Cynghorydd Hugh Jones os oedd polisi dosbarthu ar gyfer y dogfennau hyn, a chadarnhawyd fod rhwydwaith ddosbarthu dda yn Sir Ddinbych, ond nad oedd pwyntiau dosbarthu, megis canolfannau croeso, yn Sir y Fflint a Wrecsam wedi’u cysylltu cystal.

PENDERFYNWYD bod Strategaeth Gyfathrebu, gan gynnwys monitro effeithiolrwydd cyfathrebu, yn cael eu hychwanegu at raglen gwaith i’r dyfodol y Cydbwyllgor.

Ystyried adroddiad (copi ynghlwm) ar gyfer datblygu rhaglen waith i’r dyfodol ar gyfer y Cyd-bwyllgor

Cyflwynodd Swyddog yr AHNE adroddiad (a ddosbarthwyd yn flaenorol) ar ddatblygiad rhaglen gwaith i’r dyfodol ar gyfer y Cydbwyllgor er mwyn ystyried blaenoriaethau a meysydd gwaith y pwyllgor ar gyfer y dyfodol.   Ystyriodd yr Aelodau'r materion canlynol:

·        Roedd Strategaeth Edeyrnion yn cael ei datblygu gan bartneriaid yn ne’r AHNE

·        Bwriad y Strategaeth Estyn Allan a Gwirfoddolwyr oedd cynyddu nifer y gwirfoddolwyr a gwneud y gorau o’u cyfraniad at amcanion yr AHNE. 

Trafododd yr Aelodau gynhyrchiant canllawiau cynllunio atodol ar gyfer yr AHNE, ac roedd y Cynghorydd Hugh Evans yn pryderu fod perygl y byddai’r AHNE yn niweidio ei enw da wrth geisio dylanwadu ar ganlyniadau ceisiadau cynllunio a dylid bod yn ofalus yn hyn o beth.  Roedd y drafodaeth a ddilynodd yn cynnwys:

·        Pryderon y gallai costau ychwanegol i gydymffurfio â chanllawiau’r AHNE atal trigolion a busnesau rhag cyflwyno cais, gan arwain at ddiffyg datblygiad o fewn yr AHNE.

·        Dadleuodd y Cynghorydd Carolyn Thomas mai bwriad y canllawiau oedd darparu cyngor defnyddiol i’w ystyried cyn cyflwyno cais cynllunio.

·        Rôl yr AHNE i hyrwyddo ei amcanion a rôl yr awdurdodau cynllunio i benderfynu ar deilyngdod a safbwyntiau’r rhai sy’n hyrwyddo neu’n gwrthwynebu’r ceisiadau cynllunio.  Dywedodd y Cynghorydd Derek Butler mai rôl y Cydbwyllgor oedd eirioli amcanion yr AHNE ac y byddai cyrff ac unigolion eraill yn gwneud yr un fath o ran eu hamcanion a'u cylch gwaith.

PENDERFYNWYD:

(i)        Bod adolygiad o arian a chyllid yr AHNE yn cael ei ychwanegu at y rhaglen gwaith i’r dyfodol; a

(ii)       Chymeradwyo’r Rhaglen Gwaith i’r Dyfodol.

Ystyried adroddiad ar lafar ar yr ymgynghoriad

Darparodd Swyddog yr AHNE adroddiad ar lafar ynglŷn â’r adolygiad fyddai’n archwilio dynodiadau tirwedd a phwrpas a buddion dynodi tirweddau Cymru dan un math o ddynodiad.   Cynghorwyd yr Aelodau y byddai’r adolygiad hefyd yn ystyried trefniadau llywodraethu'r tirweddau dynodedig ac yn ystyried Mesur Cynllunio (Cymru) o ran trefniadau ar gyfer cynllunio yn y dyfodol mewn Parciau Cenedlaethol.

Mewn ymateb i gwestiynau, cynghorwyd yr aelodau mai prif amcan adolygiad Llywodraeth Cymru oedd y trefniadau llywodraethu.  Trafodwyd y posibilrwydd o osod dynodiad tebyg i barc cenedlaethol ar yr AHNE ynghyd â’r posibilrwydd y gallai llywodraethu parciau cenedlaethol ddychwelyd i fod yn gyfrifoldeb i’r awdurdodau lleol unwaith eto.

Cynghorwyd yr Aelodau  y gallai’r Aelodau gyfrannu at yr ymgynghoriad naill ai fel Cydbwyllgor neu fel unigolion ac roedd y Cydbwyllgor Gweithredu Dros Dro eisoes wedi cyflwyno sylwadau ysgrifenedig.

Roedd y Cynghorydd Hugh Jones o’r farn nad oedd gan y Cydbwyllgor ddigon o wybodaeth ynglŷn â’r adolygiad i lunio ymateb i Lywodraeth Cymru ar hyn o bryd.

Adroddodd Rheolwr y Gwasanaethau Democrataidd fod rhaglen gwaith i’r dyfodol y Cydbwyllgor yn nodi y dylid cynnal cyfarfodydd 2015 ym mis Ionawr, Mehefin a Thachwedd.   Cynghorodd yr Aelodau y byddai’n well ganddynt pe bai’r cyfarfodydd yn cael eu cynnal ar foreau Gwener lle bo modd.

Gan fod y cadeirydd newydd yn Gynghorydd gyda Chyngor Bwrdeistref Sirol Wrecsam, cytunwyd y dylid ystyried Wrecsam fel lleoliad ar gyfer cyfarfod mis Ionawr y Cydbwyllgor.

PENDERFYNWYD bod cyfarfodydd y Cydbwyllgor yn cael eu trefnu ar gyfer mis Ionawr, Mehefin a Thachwedd 2015.