Agenda and draft minutes

Agorwyd y cyfarfod gan Howard Sutcliffe, Swyddog AHNE Bryniau Clwyd a Dyffryn Dyfrdwy a Rheolwr y Gwasanaethau Ceidwaid. Croesawodd bawb i’r cyfarfod ac awgrymodd wrth y Cadeirydd, y Cynghorydd David Hughes a’r Is-Gadeirydd, y Cynghorydd Nigel Williams fod Win Mullen-James - a oedd yn bresennol yn Siambr y Cyngor - yn cadeirio’r cyfarfod oherwydd bod modd iddynt weld rhai a oedd yn bresennol ar-lein ac yn y Siambr. Cytunodd y Cynghorwyr Hughes a Williams.

Cafwyd ymddiheuriadau gan Aelod y Cyd-bwyllgor, y Cynghorydd Emrys Wynne (Cyngor Sir Ddinbych).

Ni ddatganwyd unrhyw gysylltiad.

Ystyried cofnodion (copi ynghlwm) cyfarfod blaenorol Cydbwyllgor AHNE a gynhaliwyd ar 10 Tachwedd 2022.

Cyflwynwyd cofnodion cyfarfod Cyd-bwyllgor Ardal o Harddwch Naturiol Eithriadol Bryniau Clwyd a Dyffryn Dyfrdwy a gynhaliwyd ar 10 Tachwedd 2022.

Cytunwyd bod y cofnodion yn gofnod cywir.

Materion yn codi:

Eitem 4 – Amrywiad i gytundeb cyfreithiol i gynyddu aelodaeth y Cyd-bwyllgor i dri fesul Awdurdod. Nodwyd bod Cyfansoddiad Cyngor Sir Ddinbych yn caniatáu enwebu dirprwy gynrychiolydd pe na bai unrhyw un o’i aelodau’n gallu mynychu. Nid oedd cadarnhad wedi dod i law o ran sefyllfa Cyngor Sir y Fflint a Chyngor Bwrdeistref Sirol Wrecsam. Swyddog AHNE i ddilyn trywydd hyn gyda CBSW.

Eitem 6 – Cofnodion Drafft cyfarfod blaenorol Partneriaeth yr AHNE. Roedd gwobr yn cael ei chyflwyno i’r Grid Cenedlaethol am eu Menter Gwella Tirwedd. Roedd gwahoddiadau wedi’u dosbarthu i’r seremoni wobrwyo.

PENDERFYNWYD: Bod cofnodion cyfarfod Cyd-bwyllgor Ardal o Harddwch Naturiol Eithriadol Bryniau Clwyd a Dyffryn Dyfrdwy a gynhaliwyd ar 10 Tachwedd 2022 yn cael eu cymeradwyo.

Nodi cofnodion cyfarfod Partneriaeth AHNE a gynhaliwyd ar 14 Hydref 2022.

Derbyniwyd cofnodion drafft cyfarfod Partneriaeth Ardal o Harddwch Naturiol Eithriadol Bryniau Clwyd a Dyffryn Dyfrdwy a gynhaliwyd ar 14 Hydref 2022 er gwybodaeth.

Roedd nifer o Wasanaethau wedi bod yn rhan o gynllun gweithredu er mwyn osgoi’r tagfeydd yn Rhaeadr y Bedol yn ystod y blynyddoedd blaenorol gan gynnwys:

·       Rhwystr uchder ar y maes parcio a fyddai’n atal cerbydau mawr rhag mynd i mewn i’r maes parcio.

·       Sicrhau llinellau melyn gweladwy.

Cafodd Baddondy Rhufeinig Prestatyn ei gynnwys mewn arddangosfa yn Llyfrgell Prestatyn, a oedd yn boblogaidd iawn, yn enwedig gyda grwpiau ysgol.

PENDERFYNWYD: Nodi cofnodion cyfarfod Partneriaeth Ardal o Harddwch Naturiol Eithriadol Bryniau Clwyd a Dyffryn Dyfrdwy a gynhaliwyd ar 14 Hydref 2022.

Nodi cofnodion drafft ein Partneriaeth Tirlun Deniadol a gynhaliwyd ar 14 Chwefror 2023. 

Derbyniwyd cofnodion drafft cyfarfod Partneriaeth Ein Tirlun Darluniadwy a gynhaliwyd ar 14 Chwefror 2023 er gwybodaeth.

Roedd gwaith wedi’i gwblhau ym Mhorthdy Castell Dinas Brân. Roedd y rwbel a gafodd ei symud fel rhan o’r gwaith cloddio wedi’i ddefnyddio i wella’r llwybr mynediad igam-ogam.

Byddai’r gwasanaeth Bws Darluniadwy yn rhedeg am y drydedd flwyddyn o amgylch safleoedd yn ardal Dyffryn Dyfrdwy gan gynnwys maes parcio Pafiliwn Llangollen, er mwyn helpu i liniaru rhai o’r materion parcio.

Roedd gwaith paratoi’n mynd rhagddo gan weithio gydag artistiaid lleol a chymunedau ar gyfer arddangosfa olaf y flwyddyn yn Oriel Dory yn Llangollen.

Roedd trafodaethau’n cael eu cynnal rhwng y Bartneriaeth a chyllid y Loteri am bosibilrwydd o ymestyn y prosiect, i wneud iawn am y 2 flynedd a gollwyd i gyfyngiadau Covid.

PENDERFYNWYD: nodi cofnodion drafft cyfarfod Partneriaeth Ein Tirlun Darluniadwy a gynhaliwyd ar 14 Chwefror 2023.

Derbyn diweddariad ar lafar gan Swyddog a Rheolwr Gwasanaeth Ceidwad AHNE Bryniau Clwyd a Dyffryn Dyfrdwy

Atgoffodd Swyddog yr AHNE a Rheolwr y Gwasanaethau Ceidwaid, Howard Sutcliffe (HS) y Pwyllgor fod y cytundeb cyfreithiol ar gyfer y Cyd-bwyllgor wedi’i adolygu a’i ddiweddaru 18 mis yn ôl. Wrth symud ymlaen, byddai adolygiad yn cael ei gynnal o’r Cylch Gorchwyl ar gyfer y Bartneriaeth a chylch gorchwyl newydd ar gyfer y Cefnogwyr, yn ogystal ag adolygu’r gweithgorau, gan eu cysylltu â phenawdau penodau sydd wedi’u cynnwys yn y Cynllun Rheoli.

Roedd ymgyrch recriwtio ar gyfer Cefnogwyr AHNE o Gynghorau Cymuned i gynorthwyo â gwaith cadwraeth ymarferol a stiwardio ardaloedd prysur ar benwythnosau yn mynd rhagddo. Bu cyfarfod yng Ngholeg Llysfasi a groesawyd, roedd adborth yn cynnwys awydd am gyswllt mwy rheolaidd.

Byddai hyfforddiant ar gyfer Cefnogwyr AHNE / ceidwaid gwirfoddol yn dechrau cyn hir.

PENDERFYNWYD: nodi’r diweddariad ar yr adolygiad 10 mlynedd a llywodraethu’r AHNE.

Ystyried adroddiad (copi ynghlwm) gan y Pennaeth Cyllid ac Eiddo ac Uwch Swyddog Cyllid a Sicrwydd.

Dywedodd y Pennaeth Cyllid ac Eiddo, Steve Gadd (SG) nad y datganiad blynyddol oedd yr adroddiad – roedd hwnnw wedi’i gymeradwyo yn y cyfarfod blaenorol – ond adroddiad monitro arferol oedd hwn.

Roedd yr adroddiad yn dangos nad oedd achos pryderu, er gwaetha’r cyfnod anodd o chwyddiant uwch. Ni fu unrhyw orwariant ac o ganlyniad i arian ychwanegol gan Lywodraeth Cymru, dim ond ychydig o gyllid a ddefnyddiwyd o’r cronfeydd wrth gefn, a fyddai’n cael ei gario ymlaen i’r flwyddyn ariannol nesaf.

Diolchodd y Pwyllgor i’r Uwch Swyddog Cyllid a Sicrwydd, Paula O’Hanlon, am ei chymorth parhaus â cheisiadau grant a chyllidebu ac ati, gan bwysleisio pwysigrwydd dilyniant ar ddarparu prosiectau’r AHNE.

PENDERFYNWYD: nodi Sefyllfa Derfynol a Chyfrifon 2022/23 Cyd-bwyllgor yr AHNE.

Derbyn diweddariad gan gynrychiolydd o Gyfoeth Naturiol Cymru.

Rhoddodd HS y wybodaeth ddiweddaraf am roi Statws Parc Cenedlaethol yng Ngogledd Ddwyrain Cymru o neges e-bost a ddaeth i law gan Gyfoeth Naturiol Cymru (CNC). Eglurodd ei bod yn broses ddeddfwriaethol araf, ond gobeithiwyd y byddai modd sefydlu statws Parc Cenedlaethol cyn diwedd tymor y Senedd (Mai 2026).

Roedd tîm cyfan wedi’i benodi i’r prosiect yn 2022 ac roeddent wedi dechrau gwaith yn yr ardal chwilio. Rhagwelwyd y byddent mewn sefyllfa cyn hir i rannu’r wybodaeth honno gyda budd-ddeiliaid – Awdurdodau Lleol a Chyd-bwyllgor yr AHNE ac ati. Byddai cynrychiolydd o CNC, Ash Pierce, yn cael gwahoddiad i gyfarfod nesaf Cyd-bwyllgor yr AHNE ar 23 Mehefin.

Gofynnodd Aelodau’r Pwyllgor i Gyd-bwyllgor yr AHNE fod yn rhan o ymgynghoriad ystyrlon dros yr ardal chwilio a gytunwyd yn hytrach na’i fod yn cael ei ddarparu fel fait accompli.

PENDERFYNWYD:

       I.          Bod diweddariad e-bost CNC yn cael ei ddosbarthu i aelodau Cyd-bwyllgor yr AHNE a

     II.          bod yr adroddiad diweddaru ar Barc Cenedlaethol ar gyfer Gogledd Ddwyrain Cymru yn cael ei nodi.

Ystyried rhaglen gwaith i’r dyfodol (copi ynghlwm) gan y Swyddog AHNE.

Cyflwynodd HS y rhaglen gwaith i'r dyfodol a rhoddodd ddiweddariad ar lafar ar gynnydd yr eitemau a restrwyd, gan amlygu:

·       Roedd newidiadau i ddyraniadau grant CNC gan arwain at golli £20,000 wedi’i gwmpasu gan Gyllid Llenwi Bwlch Llywodraeth Cymru.

·       Roedd y Cynllun Twristiaeth yn datblygu, roedd Eryri Bywiol wedi’u comisiynu i ddarparu golwg ar y cyd.

·       Roedd gan raglen Tirweddau Cynaliadwy, Lleoedd Cynaliadwy ddwy flynedd arall i redeg.

·       Roedd dau Swyddog Ffermio/Ymgysylltu wedi’u penodi.

·       Roedd prosiect Awyr Dywyll Cymru Gyfan yn datblygu’n dda. Roedd 5 digwyddiad wedi’u cynnal yn AHNE Bryniau Clwyd a Dyffryn Dyfrdwy fel rhan o’r prosiect Awyr Dywyll.

·       Roedd cais wedi’i gyflwyno i’r Gymdeithas Awyr Dywyll Ryngwladol – dim ond 8 cais oedd yn cael eu derbyn bob blwyddyn.

·       Roedd Canllawiau Cynllunio Atodol Goleuo Da wedi’u cymeradwyo ar gyfer Cyngor Sir Ddinbych a Chyngor Bwrdeistref Sirol Wrecsam – roedd Cyngor Sir y Fflint yn gweithio ar ei fabwysiadu.

PENDERFYNWYD: nodi’r Rhaglen Gwaith i'r Dyfodol.

Er gwybodaeth, dyddiadau cyfarfodydd nesaf Cydbwyllgor AHNE yw:

·       23 Mehefin 2023 (CBC) ac

·       17 Tachwedd 2023 (CSFf)

Cynigiwyd bod y Pwyllgor yn cynnal cyfarfod byr ar 23 Mehefin 2023 ac wedyn taith o amgylch yr AHNE [Karen Weaver i wirio argaeledd a threfnu]

PENDERFYNWYD: nodi dyddiadau cyfarfodydd y dyfodol.

Daeth y cyfarfod i ben am 10.45 am