Agenda, decisions and draft minutes

Bu i’r Arweinydd –

(i)            dalu teyrnged i waith staff y Cyngor o sawl adran dros y diwrnodau diwethaf wrth ymateb i dywydd eithafol yn y sir mewn amgylchiadau heriol ac anodd, ac fe gyfleodd ei werthfawrogiad

(ii)          gofyn i rai nad oeddent yn aelodau o'r Cabinet ymatal rhag gwneud sylwadau a datganiadau cyffredinol ar eitemau penodol a chanolbwyntio ar ofyn cwestiynau perthnasol ar yr adroddiad penodol a'r argymhellion a oedd dan ystyriaeth.

Y Cynghorydd Bobby Feeley, Aelod Arweiniol Lles ac Annibyniaeth

Nicola Stubbins, Cyfarwyddwr Corfforaethol Cymunedau

Y Cynghorydd Bobby Feeley, Aelod Arweiniol Lles ac Annibyniaeth

Nicola Stubbins, Cyfarwyddwr Corfforaethol Cymunedau

Dylai’r Aelodau ddatgan unrhyw gysylltiad personol neu gysylltiad sy'n rhagfarnu ag unrhyw fater a nodwyd fel un i'w ystyried yn y cyfarfod hwn.  

Dim.

Ni chafodd unrhyw gysylltiad ei ddatgan.

Rhybudd o eitemau y dylid, ym marn y Cadeirydd, eu hystyried yn y cyfarfod fel materion brys yn unol ag Adran 100B(4) Deddf Llywodraeth Leol 1972.  

Dim.

Ni chodwyd unrhyw fater brys.

Derbyn cofnodion cyfarfod y Cabinet a gynhaliwyd ar 21 Tachwedd 2017 (copi ynghlwm).  

PENDERFYNWYD y dylid cymeradwyo cofnodion y cyfarfod a gynhaliwyd ar 21 Tachwedd 2017 fel cofnod cywir ac y dylai’r Arweinydd eu llofnodi.

Cyflwynwyd cofnodion cyfarfod y Cabinet a gynhaliwyd ar 21 Tachwedd 2017.

PENDERFYNWYD y dylid cymeradwyo cofnodion y cyfarfod a gynhaliwyd ar 21 Tachwedd 2017 fel cofnod cywir ac y dylai’r Arweinydd eu llofnodi.

I ystyried adroddiad gan y Cynghorydd Bobby Feeley, Aelod Arweiniol ar gyfer Lles ac Annibyniaeth (copi ynghlwm) yn ceisio cymeradwyaeth y Cabinet ar gyfer Strategaeth Digartrefedd 2017-21 cyn ei gyflwyno i’r Pwyllgor Cydweithredol Rhanbarthol.

PENDERFYNWYD y dylai’r Cabinet gymeradwyo’r Strategaeth Ddigartrefedd cyn ei chyflwyno i’r Pwyllgor Cydweithredol Rhanbarthol ym mis Ionawr 2018, a’i gweithredu hyd at 2021.

Yn absenoldeb y Cynghorydd Bobby Feeley, cyflwynodd y Cynghorydd Tony Thomas yr adroddiad i geisio cymeradwyaeth y Cabinet ar gyfer Strategaeth Ddigartrefedd 2017-21 cyn ei chyflwyno i’r Pwyllgor Cydweithredol Rhanbarthol. Roedd y Strategaeth yn amlinellu cynlluniau a chamau gweithredu'r Tîm Atal Digartrefedd (a’i bartneriaid) i fynd i’r afael â digartrefedd a’i achosion.

Roedd Deddf Tai (Cymru) 2014 yn ei gwneud yn ofynnol i awdurdodau lleol gynnal adolygiad o ddigartrefedd yn eu hardal a datblygu Strategaeth Ddigartrefedd yn seiliedig ar ganfyddiadau'r adolygiad. Roedd y Strategaeth yn manylu ar chwe blaenoriaeth strategol ar gyfer y 4 blynedd nesaf i fynd i’r afael â digartrefedd yn Sir Ddinbych ac, yn y pen draw, i gael gwared ag o’n gyfan gwbl, gydag ymrwymiad cadarn i ymyrryd yn gynnar ac atal.  Roedd y Strategaeth wedi’i datblygu ar ôl ymgynghori'n helaeth ac roedd wedi’i hystyried gan Bwyllgor Archwilio Partneriaethau ym mis Tachwedd pan gafodd ei hargymell i’r Cabinet i’w mabwysiadu.

Trafododd y Cabinet yr adroddiad gyda swyddogion ac roeddent yn awyddus i ddeall effaith diwygio'r gyfundrefn les ar ddigartrefedd a sut roedd Sir Ddinbych yn cymharu â gweddill y wlad yn sgil y pwysau cynyddol a'r galw am wasanaethau, ynghyd â mesurau i fynd i'r afael â phroblemau penodol, gan gynnwys yr effaith ar bobl ifanc a theuluoedd.

Wrth ymateb i gwestiynau’r aelodau, bu i’r swyddogion –

·        gadarnhau bod effaith fawr wedi bod mewn ardaloedd lle roedd credyd cynhwysol wedi’i gyflwyno ac roedd y Tîm Atal Digartrefedd, ynghyd â phartneriaid, yn gweithio i ddod o hyd i'r grwpiau hynny a effeithiwyd er mwyn lliniaru effaith y newidiadau hyn gymaint â phosib’ a darparu cyngor a chymorth yn gynnar

·        o ran galw cyffredinol, roedd yn anodd cymharu ffigyrau yn sgil y newidiadau deddfwriaethol diweddar ond roedd llawer o alw'n dal i fod, a oedd yn anodd ei ateb mewn rhai achosion

·        ymhelaethu ar ddefnyddio llai o lety gwely a brecwast ar gyfer pobl ifanc a oedd yn dilyn datblygu Llwybr Cadarnhaol Pobl Ifanc a defnyddio llety dros dro mwy addas a gwahanol opsiynau

·        pwysleisio pwysigrwydd y sector rhentu preifat i ddiwallu anghenion o ran tai a datblygu cynnig i landlordiaid, gan gynnwys taliadau anogaeth i landlordiaid, i gynyddu nifer y tai a oedd ar gael i unigolion a theuluoedd a oedd yn ddigartref neu dan fygythiad o fod yn ddigartref

·        trafod yr heriau wrth gyfathrebu gyda’r 'rhai digartref cudd’ a’r rhai nad oeddent yn cydnabod eu statws neu nad oeddent yn dymuno derbyn cymorth y gwasanaeth – roedd llawer yn cael ei wneud drwy sawl rhaglen allgymorth ac ymateb gyda gwasanaethau hyblyg a oedd wedi’u harwain gan anghenion unigolion; roedd offerynnau hunan-help ar y we yn ddull arall ar gyfer y rhai nad oeddent yn dymuno cael cymorth uniongyrchol

·        roedd y costau uwch ar ôl cyflwyno Deddf Tai 2014 wedi’u cydnabod gan Lywodraeth Cymru yn y ddarpariaeth o gyllid ar gyfer y flwyddyn nesaf

·        prif sail y Strategaeth oedd yr adolygiad o ddigartrefedd a gynhaliwyd yn 2016, a oedd yn gynhwysfawr iawn ac a oedd yn arwain yn allweddol ar yr hyn yr oedd ei angen yn lleol, gan fodloni gofynion cyfreithiol y Ddeddf ar yr un pryd

·        ymhelaethu ar y cysylltiadau cryf a oedd rhwng adrannau, yn enwedig Cynllunio a Gwarchod y Cyhoedd, a oedd â rheolaeth reoleiddio dros safonau tai a landlordiaid ac a oedd wedi ysgogi gwell ansawdd a disgwyliadau

·        cydnabod bod ymyrraeth gynnar yn allweddol ac adrodd ar gamau i ymgysylltu ag unigolion a theuluoedd yn gynnar i atal digartrefedd a fyddai, yn y dyfodol, yn cynnwys presenoldeb ffisegol ar y rhiniog

·        roedd cyfeiriad mwy eglur tuag at feini prawf ar gysylltiadau lleol  ...  view the full Cofnodion text for item 5.

I ystyried adroddiad gan y Cynghorydd Bobby Feeley, Aelod Arweiniol ar gyfer Lles ac Annibyniaeth (copi ynghlwm) yn ceisio cymeradwyaeth y Cabinet ar gyfer y Cynllun cyn ei gyflwyno i’r Pwyllgor Cydweithredol Rhanbarthol.

PENDERFYNWYD y dylai’r Cabinet gymeradwyo Cynllun Cefnogi Pobl/Atal Digartrefedd 2018/19, ei gyflwyno i’r Pwyllgor Cydweithredol Rhanbarthol ym mis Ionawr 2018, a’i weithredu yn 2018/19.

Yn absenoldeb y Cynghorydd Bobby Feeley, cyflwynodd y Cynghorydd Tony Thomas yr adroddiad i geisio cymeradwyaeth y Cabinet ar gyfer Cynllun Cefnogi Pobl/Atal Digartrefedd Sir Ddinbych 2018/19 cyn ei gyflwyno i’r Pwyllgor Cydweithredol Rhanbarthol.

Roedd y Cynllun yn amlinellu cynlluniau a gweithredoedd y Tîm Atal Digartrefedd (a'i bartneriaid) wrth fynd i'r afael â digartrefedd a'i achosion, gyda phwyslais arbennig ar ddatblygiad gwasanaeth a gomisiynwyd dros y flwyddyn nesaf.  Roedd y Cynllun hefyd yn rhan allweddol o gyflawni rhannau o'r Strategaeth Ddigartrefedd (a drafodwyd o dan yr eitem flaenorol).  Roedd pum blaenoriaeth strategol wedi’u nodi ar gyfer y Cynllun, a fyddai hefyd yn cynnwys cynllun gwario llawn ar gyfer y Grant Cefnogi Pobl ar ôl i Lywodraeth Cymru gadarnhau’r gyllideb.  Roedd y Cynllun wedi’i ddatblygu ar ôl ymgynghori'n helaeth ac roedd wedi’i hystyried gan Bwyllgor Archwilio Partneriaethau pan gafodd ei argymell i’r Cabinet i’w fabwysiadu.

Wrth ymateb i gwestiynau ynglŷn â lefelau cyllid, dywedodd swyddogion bod elfen Cefnogi Pobl y cyllid wedi'i neilltuo at y dibenion hynny gan Lywodraeth Cymru am y ddwy flynedd nesaf.  Roedd cynllun gwario’n cael ei ddatblygu bob blwyddyn ynghyd â chynllun arian at raid ar sail toriadau disgwyliedig yn sgil cael gwybod yn hwyr am y lefel union o gyllid i awdurdodau lleol unigol gan Lywodraeth Cymru. Eglurodd Rheolwr y Gwasanaethau Cyfreithiol mai’r darpariaethau deddfwriaethol cywir o dan yr adran ‘pŵer i wneud y penderfyniad’ yn yr adroddiad oedd Rhan 2 o Ddeddf Tai (Cymru) 2014.

PENDERFYNWYD y dylai’r Cabinet gymeradwyo Cynllun Cefnogi Pobl/Atal Digartrefedd 2018/19, cyn ei gyflwyno i’r Pwyllgor Cydweithredol Rhanbarthol ym mis Ionawr 2018 a’i weithredu yn 2018/19.

Ystyried adroddiad gan y Cynghorydd Bobby Feeley, Aelod Arweiniol dros Les ac Annibyniaeth (copi amgaeedig), yn ceisio cymeradwyaeth y Cabinet i’r Cyngor ymrwymo i gytundeb cyfreithiol yn ymwneud â’r Gronfa Gofal Integredig.

PENDERFYNWYD bod y Cabinet yn –

(a)       nodi cynnwys yr adroddiad;

(b)       cymeradwyo bod y Cyngor yn ymrwymo i’r cytundeb cyfreithiol rhwng Bwrdd Iechyd Prifysgol Betsi Cadwaladr a chwe awdurdod lleol gogledd Cymru, i reoleiddio’r drefn lywodraethol a’r prosesau ar gyfer y gofynion gwario ac adrodd mewn perthynas â TGCh, ac yn

(c)        cadarnhau eu bod wedi darllen, deall ac ystyried yr Asesiad o’r Effaith ar Les (Atodiad 1) fel rhan o’u hystyriaethau.

Yn absenoldeb y Cynghorydd Bobby Feeley, cyflwynodd y Cynghorydd Tony Thomas yr adroddiad i geisio cymeradwyaeth y Cabinet i'r Cyngor fod yn rhan o gytundeb cyfreithiol rhwng Bwrdd Iechyd Prifysgol Betsi Cadwaladr a’r chwe awdurdod lleol ar draws Gogledd Cymru mewn perthynas â’r Gronfa Gofal Integredig er mwyn gwneud trefniadau cyllid a llywodraethu rhanbarthol yn ffurfiol.

Roedd y Gronfa Gofal Integredig yn rhan o raglen ehangach o gydweithio ar ofal cymdeithasol ac iechyd a ddaeth yn sgil Deddf Gwasanaethau Cymdeithasol a Llesiant (Cymru) 2014 ac roedd yn darparu ffrwd gyllid wedi’i rheoleiddio, drwy gyllidebau cyfun, i leihau’r pwysau ar yr ysbyty ac yn y gymuned, gan fod ar gyfer derbyniadau i'r ysbyty a rhyddhau o'r ysbyty yn rhanbarthol yn bennaf.  Roedd trefniadau eisoes ar waith a byddai’r cytundeb cyfreithiol yn ffurfioli ac yn rheoleiddio’r gweithgareddau penodol hynny a’r ffrwd gyllid.

Roedd y Cynghorydd Julian Thompson-Hill yn cefnogi’r argymhellion ac yn cefnogi trosglwyddo i drefniadau mwy ffurfiol y gellid eu defnyddio fel achos prawf er mwyn rheoli tensiynau yn gynnar cyn bwrw ymlaen â'r rhaglen gydweithio ehangach rhwng iechyd a gofal cymdeithasol.  Mewn ymateb i ymholiad ynglŷn â rôl y tîm ymateb cyflym, dywedodd y swyddogion bod cymorth yn y cartref bellach yn cael ei reoli o fewn prosiectau eraill, gyda nifer o wasanaethau'n gweithio ochr yn ochr â gwasanaethau gofal yn y cartref, a oedd hefyd yn cynnwys ail-alluogi ac ymyrraeth glinigol.

Roedd y Cabinet yn cefnogi ffurfioli trefniadau a’r gwaith a wnaed i ddarparu gwasanaethau'n rhanbarthol ac felly –

PENDERFYNWYD bod y Cabinet yn –

 (a)      nodi cynnwys yr adroddiad;

 (b)      cymeradwyo bod y Cyngor yn ymrwymo i’r cytundeb cyfreithiol rhwng Bwrdd Iechyd Prifysgol Betsi Cadwaladr a chwe awdurdod lleol Gogledd Cymru, i reoleiddio’r drefn lywodraethol a’r prosesau ar gyfer y gofynion gwario ac adrodd mewn perthynas â TGCh, ac yn

 (c)       cadarnhau eu bod wedi darllen, deall ac ystyried yr Asesiad o’r Effaith ar Les (Atodiad 1) fel rhan o’u hystyriaethau.

I ystyried adroddiad gan y Cynghorydd Julian Thompson-Hill, Aelod Arweiniol dros Gyllid, Perfformiad ac Asedau Strategol (copi ynghlwm) yn ceisio cymeradwyaeth y Cabinet i gychwyn caffael a llunio contract i benodi asiantaeth i ddarparu staff dros dro i’r Cyngor eu defnyddio.

PENDERFYNWYD bod y Cabinet yn cymeradwyo –

(a)       dechrau’r broses gaffael yn defnyddio Fframwaith ESPO MSTAR2, Rhif 653F;

(b)       bod Cyngor Sir Ddinbych yn cydweithio gyda Chyngor Sir y Fflint i arwain a rheoli’r broses gaffael;

(c)        bod y pwyllgor archwilio priodol yn derbyn adroddiad gan y swyddogion perthnasol ym mis Ionawr 2018 o ran y broses gaffael a’r dewisiadau amgen sydd ar gael i’r Cyngor yn seiliedig ar y gwerth gorau, a

(d)       bod y Cabinet yn derbyn adroddiad i ddyfarnu’r contract i’r cynigiwr sy’n cynnig y budd economaidd mwyaf ym mis Chwefror 2018.

Cyflwynodd y Cynghorydd Julian Thompson-Hill yr adroddiad i geisio cymeradwyaeth y Cabinet i ddechrau caffael cydweithredol gyda Chyngor Sir y Fflint a llunio contract i benodi asiantaeth i gyflenwi staff dros dro i’r Cyngor eu defnyddio.

Daeth cytundeb cyfredol y Cyngor i gyflenwi staff asiantaeth i ben fis Chwefror 2018.  Gan fod angen parhaus am staff asiantaeth ac o ystyried y gofynion deddfwriaethol, cynigiwyd y dylid cynnal proses dendro gystadleuol gan ddefnyddio'r fframwaith MSTAR2 (Gwasanaethau a Reolir ar gyfer Staff Asiantaeth Dros Dro).  Byddai’r contract yn para tair blynedd, gyda dewis i roi estyniad o flwyddyn arall.

Yn ystod y drafodaeth a ddilynodd, ceisiodd y Cabinet eglurder ynglŷn ag elfen gwerth am arian y contract arfaethedig, manylion am y contract, ac a oedd dulliau darpariaeth eraill wedi'u hystyried.  Nododd yr aelodau bod arbedion o dros £200,000 y flwyddyn wedi’u gwneud gan ddefnyddio’r fframwaith presennol ac er y cydnabyddid y byddai’r contract newydd arfaethedig hefyd yn debygol o gael effaith gadarnhaol ar y Cyngor yn ariannol, roedd pryder ynglŷn â’r diffyg manylder a ddarparwyd yn yr adroddiad er mwyn rhoi'r sicrwydd ar werth am arian, yn enwedig o gofio y byddai gwariant arfaethedig dros £4m dros bedair blynedd o dan y contract newydd, a chredai'r Cabinet y byddai'r mater yn elwa o’i archwilio ymhellach.  Trafodwyd yr amserlenni ar gyfer y broses gaffael a bod y cytundeb cyfredol yn dod i ben ac, o ystyried bod yr amser yn brin, cytunwyd y dylid dechrau'r broses gaffael ond y dylid gofyn i'r pwyllgor archwilio priodol ystyried caffael cydweithredol ac opsiynau eraill ar sail y gwerth gorau cyn gynted â phosib, gyda'r bwriad o gyflwyno adroddiad yn ôl i'r Cabinet i ystyried a ddylid parhau â'r broses neu dynnu yn ôl i ddewis opsiwn a fyddai o fwy o fantais.

PENDERFYNWYD bod y Cabinet yn cymeradwyo –

 (a)      dechrau’r broses gaffael gan ddefnyddio Fframwaith ESPO MSTAR2 Rhif 653F;

 (b)      bod Cyngor Sir Ddinbych yn cydweithio gyda Chyngor Sir y Fflint i arwain a rheoli’r broses gaffael;

 (c)       bod y pwyllgor archwilio priodol yn derbyn adroddiad gan y swyddogion perthnasol ym mis Ionawr 2018 ar y broses gaffael a’r dewisiadau eraill sydd ar gael i’r Cyngor yn seiliedig ar y gwerth gorau, a

 (d)      bod y Cabinet yn derbyn adroddiad i ddyfarnu’r contract i’r cynigiwr sy’n cynnig y budd economaidd mwyaf ym mis Chwefror 2018.

I ystyried adroddiad gan y Cyng. Julian Thompson-Hill, Aelod Arweiniol Cyllid, Perfformiad ac Asedau Strategol (copi’n amgaeedig) yn manylu ar y sefyllfa ariannol ddiweddaraf a’r cynnydd a wnaed yn erbyn y strategaeth gyllidebol a gytunwyd arni.

PENDERFYNWYD bod y Cabinet yn –

(a)       nodi'r cyllidebau a bennwyd ar gyfer 2017/18 a'r cynnydd yn erbyn y strategaeth y cytunwyd arni;

(b)       cefnogi cyflwyno Achos Busnes Llawn ar gyfer codi ysgol Gatholig newydd ar gyfer disgyblion 3-16 oed i Lywodraeth Cymru (gweler Atodiad 4).

Cyflwynodd y Cynghorydd Julian Thompson-Hill adroddiad yn rhoi manylion ynglŷn â'r sefyllfa ariannol ddiweddaraf a'r cynnydd a wnaed yn erbyn y strategaeth gyllid y cytunwyd arni.  Darparodd y crynodeb canlynol o sefyllfa ariannol y Cyngor –

·        rhagwelwyd y byddai cyllidebau gwasanaethau a rhai corfforaethol yn bodloni’r costau drwy ddefnyddio arian corfforaethol at raid

·        roedd gwerth £0.902 miliwn o arbedion effeithlonrwydd mewn gwasanaethau eisoes wedi'u cytuno yn rhan o'r gyllideb, gan ddisgwyl y byddent i gyd yn cael eu cyflawni – byddai unrhyw eithriad yn cael ei adrodd wrth y Cabinet

·        amlygwyd y risgiau ar hyn o bryd a’r gwahaniaethau mewn perthynas â meysydd gwasanaeth unigol, a

·        darparwyd diweddariad cyffredinol ar y Cyfrif Refeniw Tai, y Cynllun Cyfalaf Tai a'r Cynllun Cyfalaf (gan gynnwys elfen y Cynllun Corfforaethol)

Gofynnwyd i aelodau’r Cabinet gymeradwyo cyflwyno achos busnes llawn am adeilad ysgol a chyfleusterau newydd ar gyfer Ysgol Gatholig 3-16 oed i Lywodraeth Cymru.

Wrth ymateb i gwestiwn ynglŷn â sut y byddai’r tywydd garw’n effeithio ar gyllid, cyfeiriodd y Cynghorydd Julian Thompson-Hill at y gronfa wrth gefn er mwyn cynnal a chadw yn y gaeaf a sefydlwyd i gynorthwyo â galw mawr pe bai tywydd garw.  Nodwyd nad oedd cludiant i’r ysgol wedi bod ar waith mewn sawl ardal, a fyddai’n arbed arian.

PENDERFYNWYD bod y Cabinet yn –

 (a)      nodi'r cyllidebau a bennwyd ar gyfer 2017/18 a'r cynnydd yn erbyn y strategaeth gyllid y cytunwyd arni;

 (b)      cefnogi cyflwyno achos busnes llawn ar gyfer ysgol Gatholig newydd a chyfleusterau ar gyfer disgyblion 3-16 oed i Lywodraeth Cymru (gweler Atodiad 4).

Derbyn Rhaglen Gwaith i’r Dyfodol y Cabinet sydd wedi’i hamgáu, a nodi'r cynnwys.  

PENDERFYNWYD nodi Rhaglen Gwaith i'r Dyfodol y Cabinet.

Cyflwynwyd Rhaglen Gwaith i'r Dyfodol y Cabinet i’w hystyried.

Byddai adroddiad ar y gwasanaeth a reolir i ddarparu gweithwyr asiantaeth yn cael ei drefnu at fis Chwefror 2018.

PENDERFYNWYD nodi Rhaglen Gwaith i'r Dyfodol y Cabinet.

PENDERFYNWYD gwahardd y Wasg a’r Cyhoedd o’r cyfarfod ar gyfer yr eitemau busnes canlynol, dan ddarpariaethau Adran 100A Deddf Llywodraeth Leol 1972, ar y sail y byddai gwybodaeth eithriedig yn debygol o gael ei datgelu fel y’i diffinnir ym Mharagraffau 14 Rhan 4 Atodlen 12A y Ddeddf.

I ystyried adroddiad cyfrinachol gan y Cynghorydd Brian Jones, Aelod Arweiniol dros Briffyrdd, Cynllunio a Theithio Cynaliadwy (copi ynghlwm) yn ceisio cymeradwyaeth y Cabinet i ddyfarnu contractau ar gyfer gwasanaethau bysiau lleol.

PENDERFYNWYD bod y Cabinet yn rhoi caniatâd i Bennaeth y Gwasanaethau Priffyrdd ac Amgylcheddol, ac Aelod Arweiniol Priffyrdd, Cynllunio a Chludiant Cynaliadwy, i ddyfarnu contractau hyd at y terfyn ac o fewn y gyllideb sydd ar gael yn unol â’r cynigion yn yr atodiad i’r adroddiad. Mae’n bosibl y bydd angen gwneud mân newidiadau i fanylion y cynllun yn dilyn ymgysylltu’n ffurfiol gyda’r contractwyr ac wrth i’r sefyllfa ddod yn gliriach.

Cyflwynodd y Cynghorydd Brian Jones yr adroddiad cyfrinachol yn ceisio cymeradwyaeth y Cabinet i ddyrannu contractau ar gyfer gwasanaethau bysiau lleol yn unol â Rheolau’r Weithdrefn Gontractau i’r cynigwyr a oedd yn cynnig y fantais ariannol fwyaf.

Roedd swyddogion wedi tendro ystod o opsiynau ac roedd cyflenwyr yn gallu cynnig am gontractau unigol ar gyfer dau neu fwy o gontractau ynghyd.  Roedd nifer o ardaloedd heb wasanaethau ond roedd angen cymeradwyaeth gan y Cabinet er mwyn i’r swyddogion allu dyfarnu contractau’n ffurfiol yn unol â'r amserlenni perthnasol.  Os nad oedd darparwyr yn gallu derbyn yr hyn a gynigiwyd iddynt ar y cam dyfarnu ffurfiol, byddai newidiadau dilynol yn cael eu rheoli gan ddefnyddio'r arian a oedd ar gael yn y gyllideb.

Yn ystod trafodaeth faith, bu'r swyddogion yn ymateb i gwestiynau ar ystod o faterion gan gynnwys y broses werthuso a sicrhau'r gwerth gorau am arian, profi bod ymchwil digonol wedi'i wneud, tocynnau a phrisiau, a gweithrediad penodol gwasanaethau penodol mewn gwahanol ardaloedd yn y sir ynghyd ag ymarferoldeb llwybrau a gwasanaethau penodol.  Trafodwyd rhywfaint ynglŷn â’r potensial am fysiau trydan, a oedd yn dal i gael ei ystyried, a chan fod amser yn brin i wneud cais am gyllid mewn perthynas â hynny, cytunwyd y dylai’r Grŵp Buddsoddi Strategol ystyried y sefyllfa ddiweddaraf ymhellach y prynhawn hwnnw.  O ran y cyllid a oedd ar gael, dywedodd y swyddogion bod y cynigion yn seiliedig ar gyllidebau a rhagdybiaethau cyfredol ac fe fynegodd y Cabinet bryder bod Llywodraeth Cymru wedi rhoi gwybod yn hwyr bod cyllid ar gael a chytunwyd y byddai'r mater yn cael ei drafod gyda nhw'n uniongyrchol.

PENDERFYNWYD bod y Cabinet yn rhoi caniatâd i Bennaeth y Gwasanaethau Priffyrdd ac Amgylcheddol, ac Aelod Arweiniol Priffyrdd, Cynllunio a Chludiant Cynaliadwy, i ddyfarnu contractau hyd at y terfyn ac o fewn y gyllideb sydd ar gael yn unol â’r cynigion yn yr atodiad i’r adroddiad.  Mae’n bosibl y bydd angen gwneud mân newidiadau i fanylion y cynllun yn dilyn ymgysylltu’n ffurfiol gyda’r contractwyr ac wrth i’r sefyllfa ddod yn fwy eglur.

Daeth y cyfarfod i ben am 12.20 p.m.