Agenda and minutes

Croesawyd pawb i gyfarfod Cabinet cyntaf y Cyngor gan yr Arweinydd a dywedodd ei fod yn edrych ymlaen at weithio efo’r rheiny a oedd yn bresennol a’r Prif Weithredwr a’r Swyddogion.

Dywedodd yr Arweinydd ei fod hefyd yn dymuno’r gorau i Bethan Jones, Cyfarwyddwr Corfforaethol Trawsnewid Busnes ac Adfywio gan mai dyma ei chyfarfod Cabinet olaf a dymunai bob lwc iddi yn ei swydd newydd yn Ynys Môn.

Dymunai’r Arweinydd hefyd estyn ei longyfarchion swyddogol i Ysgolion Sir Ddinbych am eu perfformiad yn Eisteddfod Genedlaethol yr Urdd.

Dim wedi eu derbyn.

Yr Aelodau i ddatgan unrhyw fuddiant personol neu fuddiant sy’n rhagfarnu unrhyw fusnes i’w drafod yn y cyfarfod hwn.

Dim wedi eu derbyn.

Hysbysiad o eitemau y dylid, ym marn y Cadeirydd, eu hystyried yn y cyfarfod fel materion brys dan Adran 100B(4) Deddf Llywodraeth Leol 1972.

Dim.

Derbyn cofnodion cyfarfod y Cabinet a gynhaliwyd ar 24ain Ebrill, 2012 [copi’n amgaeëdig].

Materion yn codi:-

Gan gyfeirio at dudalen 5, dywedodd y Cynghorydd Bobby Feeley y dylai’r ail bwynt bwled ddarllen “getting closer to the community” ac nid “getting closure ……”

PENDERFYNWYD cymeradwyo Cofnodion y cyfarfod a gynhaliwyd ar Ebrill 24^ain, 2012 yn gofnod cywir a’u harwyddo gan yr Arweinydd.

Ystyried adroddiad gan y Cynghorydd H H Evans, Arweinydd y Cyngor (copi’n amgaeëdig) yn rhoi gwybodaeth ar feysydd perfformiad allweddol y Cyngor, a galluogi i’r Cabinet ymgymryd â’i swyddogaeth rheoli perfformiad.

Cyflwynodd y Cynghorydd Barbara Smith yr adroddiad a oedd yn rhoi gwybodaeth ynglŷn â meysydd perfformiad allweddol y Cyngor, i alluogi’r Cabinet i ymgymryd â’i swyddogaeth o reoli perfformiad. 

Paragraff 2.1, mae canran yr holl ddisgyblion sy’n gadael addysg orfodol, hyfforddiant a dysgu sy’n seiliedig ar waith heb gymhwyster allanol cymeradwy, wedi gostwng i 0.8% sy’n cyfartalu ag 11 o ddisgyblion.

Fe eglurodd y Cynghorydd Eryl Williams i’r Pwyllgor y byddai’r dangosydd yn gwella oherwydd y gwaith caled sy’n cael ei wneud i newid agwedd rhai plant tuag at addysg.  Disgwylir i’r niferoedd leihau ymhellach fyth yr haf hwn.

Paragraff 2.2, canran y cyfeiriadau amddiffyn oedolion a gwblhawyd lle mae’r risg wedi ei reoli: fe drafodir y dangosydd hwn yn yr Her Gwasanaeth.

Paragraff 2.3, o’r ddau berson a adroddwyd i fod mewn llety anaddas, roedd un yn feichiog ac ni wnâi’r ail gydweithredu. 

Roedd Pennaeth Gwasanaethau Oedolion a Busnes wedi gohebu ag awdurdodau lleol sy’n perfformio’n dda i drafod materion tebyg.

Ynglŷn â pharagraffu 12.1 a 12.2 cafwyd problemau gyda PARIS ynglŷn â glanhau data.  Roedd wedi dechrau’n awr a byddai diweddariad ar gael yn ystod yr her gwasanaeth nesaf.  Mae pedwar awdurdod lleol yng Nghymru’n cyrchu system PARIS - Sir Ddinbych, Conwy, Sir y Fflint ac Abertawe.  Roedd gwaith yn cael ei wneud ar hyn o bryd i ddefnyddio system genedlaethol.

Cododd y Cynghorydd Eryl Williams fater cyfnod ysgol allweddol 1 a 3.  Mynegodd y Cynghorydd Williams bryder nad yw Estyn yn ystyried bod cyfnod allweddol 3 yn bwysig.  Pryder arall oedd a oedd plant cyfnod allweddol 2 yn cael eu hasesu ar ddiwedd yr ysgol gynradd a dechrau ysgol iau.

Fe fu’r Cynghorydd Williams a Karen Evans yn ymweld â Tower Hamlets yr wythnos diwethaf.  Mae Sir Ddinbych a Tower Hamlets ag ardaloedd difreintiedig a chefnog o fewn eu hardaloedd ond nid oedd Tower Hamlets yn cynnwys cyfnod allweddol 3 yn eu ffigurau o gwbl. Teimlai Tower Hamlets fod cyfnodau allweddol 2 a 4 yn dangos yn union be safon yr oedd plant wedi ei gyrraedd ac fe ddosbarthwyd cyfnod allweddol 4 yn gyfnod pwysicaf.

Croesawodd y Cynghorydd Julian Thompson-Hill yr adroddiad.  Roedd oddeutu £15miliwn wedi ei wario ar ffyrdd ledled y Sir ac nid oedd ymatebion i’r arolwg preswylwyr yn ymatebol o’r ffaith yma.  Mae angen ymchwilio canfyddiad y cyhoedd yn gyffredinol.  Mynegodd y Cynghorydd Thompson-Hill bryder ynglŷn â mesur dangosyddion ar y blaenoriaethau.

Rhoddodd Rheolwr y Tîm Gwella Corfforaethol ymateb drwy esbonio’r canlynol:-

(a)               Mae Mesurau Perfformiad yn mesur perfformiad y Cyngor.

(b)               Mae Dangosyddion yn dynodi a ydi’r hyn mae Sir Ddinbych yn ei wneud yn cael effaith.

Dywedodd y Cynghorydd Williams ei bod yn hanfodol fod rhestrau’r gwaith priffyrdd sydd ar ôl yn gadarn ac yn gywir.

Dywedodd y Prif Weithredwr mai dyma’r adroddiad olaf ar y Cynllun Corfforaethol cyfredol.  Roedd angen adolygu Dangosyddion Perfformiad ac roedd yna hefyd gyfle i adolygu blaenoriaethau a’r ffordd y byddid yn eu mesur.

Cyfeiriodd at:-

(a)               y ddau berson ifanc yn y ddalfa a oedd wedi eu crybwyll yn flaenorol mewn adroddiadau oherwydd bod y Llys wedi cymeradwyo bod eu llety’n anaddas.

(b)               Ynglŷn â’r ffyrdd, roedd yna fuddsoddi mewn gwella ffyrdd ond nid oedd Sir Ddinbych wedi gallu arddangos y gwelliannau i aelodau’r cyhoedd ac roedd angen unioni hynny.

Dywedodd y Pennaeth Busnes a Chynllunio wrth y Cabinet fod cynllun corfforaethol newydd yn cael ei ddatblygu gyda blaenoriaethau a dangosyddion newydd.  Byddai Aelodau’n cael eu cynnwys yn y broses.   

Byddid yn cyflwyno’r Adroddiad Perfformiad Corfforaethol i gyfarfod y Pwyllgor Craffu Perfformiad ar Fehefin 28^ain 2012.

PENDERFYNWYD, yn amodol ar  ...  view the full Cofnodion text for item 5.

Ystyried adroddiad gan y Cynghorydd Julian Thompson-Hill, Aelod Arweiniol Cyllid ac Asedau (copi’n amgaeëdig) ar yr alldro refeniw terfynol ar gyfer 2011/12 ac argymhell y sefyllfa i’r Cyngor Llawn. Hefyd argymell i’r Cyngor sut dylid trin y cronfeydd wrth gefn a’r balansau fel y manylwyd yn yr adroddiad.

Cyflwynodd y Cynghorydd Julian Thompson-Hill yr adroddiad i’r Cabinet ystyried:-

(a)               safle alldro refeniw terfynol ar gyfer 2011/12 a chymeradwyo’r safle i’r Cyngor Llawn. 

(b)               cymeradwyo i’r Cyngor Llawn driniaeth y cronfeydd wrth gefn a’r gweddillion fel y’u nodir yn yr adroddiad

Dywedodd y Cynghorydd Thompson-Hill fod yr adroddiad hwn yn cael ei gyflwyno hefyd i’r Cyngor Llawn ar Orffennaf 10^fed 2012.  Roedd y datganiad o gyfrifon blynyddol i’w cyflwyno i archwilwyr allanol ar ddiwedd  y mis.

Rhoddodd y Cynghorydd Thompson-Hill grynodeb o’r adroddiad.

Dywedodd y Cynghorydd David Smith fod Atodiad 3 yn peri pryder.  Roedd yna gryn symudiad a oedd yn golygu y byddai ysgolion yn defnyddio eu cronfeydd wrth gefn.  Os byddai’r tueddiad hwn yn parhau, byddai ysgolion yn wynebu anawsterau ariannol.

Dywedodd Cyfarwyddwr Corfforaethol, Cwsmeriaid fod y tueddiad yn gwella.  Yn flaenorol roedd yna amryw o ysgolion ag anawsterau ariannol difrifol ond roedd y Rheolwyr Cyllid yn awr wedi eu dyrannu i glystyrau ysgolion i’w cynorthwyo.  Roedd yr ymyriadau hyn i atal ysgolion rhag mynd i ddiffygion.

Dywedodd y Cynghorydd Eryl Williams fod ysgolion yn gyfrifol am eu cyllidebau eu hunain ac na allai Sir Ddinbych amodi sut yr oedd eu cyllidebau i’w gwario.

Cododd y Cynghorydd Bobby Feeley fater y posibilrwydd o’r Cyngor brynu ei gytundeb PFI.  Cadarnhaodd y Cynghorydd Thompson-Hill fod yna drafod wedi bod ond nid oedd Llywodraeth Cymru’n fodlon cynorthwyo Sir Ddinbych ar hyn o bryd.

Eglurodd y Pennaeth Cyllid ac Asedau y byddai angen i Lywodraeth Cymru ddarparu Sir Ddinbych â chyllid ond nid oedd yn barod i wneud hynny.

Fe eglurodd y Cynghorydd Huw Ll Jones fater y gorwario yn Theatr Pafiliwn y Rhyl.  Dywedodd fod y tîm a weithiodd â Phafiliwn Llangollen yn awr yn gweithio â Phafiliwn y Rhyl ond yn anffodus, o fewn yr wythnos gyntaf o waith, roedd yn ofynnol i’r Cyngor ddychwelyd grant o £94k.  Fe fu yna symudiadau staff yn cynnwys y gweinyddwr yn gadael ac ymddeoliad cynnar Rheolwr y Theatr.  Roedd y Pennaeth Hamdden, Llyfrgelloedd a Datblygu Cymunedol yn cynllunio gwneud arbedion o £50k eleni.

Cododd y Cynghorydd Gwyneth Kensler fater y llinellau ffôn.  Er mwyn gwneud cynilion effeithlonrwydd roedd rhai swyddogion yn awr yn rhannu rhifau ffôn.  Cyfrifoldeb y swyddogion oedd newid eu rhif ffôn ar y fewnrwyd ond nid oedd y rhifau’n gywir bob amser.  Dywedodd ei bod yn bwysig fod y rhifau’n gywir.

PENDERFYNWYD:-

(a)   Bod y Cabinet yn cytuno i gymeradwyo’r safle alldro refeniw terfynol ar gyfer 2011/2012 i’r Cyngor llawn

(b)   Bod y Cabinet yn cytuno i gymeradwyo’r driniaeth o’r cronfeydd wrth gefn a gweddillion fel y’u nodir yn yr adroddiad.

Ystyried adroddiad gan y Cynghorydd Julian Thompson-Hill, Aelod Arweiniol Cyllid ac Asedau (copi’n amgaeëdig) i’r Aelodau gydnabod y cyllidebau a’r targedau arbed ar gyfer y flwyddyn a’r cynnydd mewn perthynas â’r strategaeth gyllidebol a gytunwyd.

Cyflwynodd y Cynghorydd Julian Thompson-Hill yr adroddiad i’r Cabinet nodi’r cyllidebau a’r targedau cynilion am y flwyddyn a’r cynnydd yn erbyn strategaeth y gyllideb a gytunwyd.

Adroddodd y Cynghorydd Thompson-Hill mai dyma’r adroddiad cyntaf ar gyfer y flwyddyn ariannol 2012/13.  Yn y cam yma nid oedd yna unrhyw wyriadau oddi wrth strategaeth cyllideb gytûn 2012/13 fel y’i diffinnir yn y Cynllun Ariannol Tymor Canolig, y Cynllun Cyfalaf a’r Cynllun Busnes Stoc Tai.

Rhoddodd y Cynghorydd Thompson-Hill grynodeb o’r adroddiad.

Cododd y Cynghorydd Bobby Feeley fater Genesis.  Adroddodd fod y cynllun yn cael ei noddi gan Lywodraeth Cymru ar gyfer merched a oedd â theuluoedd ifanc a bod y tanwariant yn y Gwasanaethau Plant yn gorfod delio â’r diffyg mewn cyllid.

Dywedodd Cyfarwyddwr Corfforaethol Demograffeg, Lles a Chynllunio y gwnaethpwyd ymdrechion i ddelio â phroblemau ariannu.  Roedd Llywodraeth Cymru’n noddwyr y cynllun ac roedd angen iddyn nhw sicrhau na fyddai’r sefyllfa hon yn digwydd eto cyn diwedd y cynllun yn 2013.

Holodd yr Arweinydd am gyfanswm y ffigwr benthyca o £135miliwn ac a oedd hwn wedi gostwng.

Cadarnhaodd y Pennaeth Cyllid ac Asedau fod y ffigwr yn statig.

PENDERFYNWYD fod y Cabinet yn nodi’r cyllidebau a’r targedau arbedion am y flwyddyn a’r cynnydd a wnaethpwyd yn erbyn strategaeth y gyllideb a gytunwyd.

Cydnabod Rhaglen amgaeëdig o Waith y Cabinet i’r Dyfodol a chydnabod y cynnwys.

Cyflwynodd y Cynghorydd H.H. Evans Flaenrageln Waith y Cabinet i’w ystyried.

Ynglŷn â’r Mesur Iechyd Meddwl, dywedodd y Cynghorydd Bobby Feeley na fyddai hi na Chyfarwyddwr Corfforaethol Demograffeg, Lles a Chynllunio’n gallu mynychu cyfarfod y Cabinet ym mis Gorffennaf ac felly byddai angen i gynrychiolydd arwain ar yr adroddiad yn eu lle.

PENDERFYNWYD bod y Cabinet yn derbyn y Flaenraglen Waith. 

Yn y pwynt yma (11.35am) fe ohiriwyd y cyfarfod ar gyfer toriad.

Fe ail-alwyd y cyfarfod am 11.45am

RHAN II

Penderfynwyd,  yn unol ag Adran 100A Deddf Llywodraeth Leol, 1972 gwahardd y Wasg a’r Cyhoedd o’r cyfarfod ar gyfer yr eitemau busnes canlynol gan ei bod yn debygol  y byddai gwybodaeth eithriedig yn cael ei datgelu iddyn nhw fel  y’i diffinnir ym mharagraffau 14 Rhan 4 o Atodlen 12A Deddf Llywodraeth Leol 1972.

Ystyried adroddiad cyfrinachol gan y Cynghorydd Bobby Feeley, Aelod Arweiniol Gofal Cymdeithasol a Gwasanaethau Plant (copi’n amgaeëdig) ar argymhelliad i ddyfarnu contract 24 mis (gyda’r opsiwn i’w ymestyn am flwyddyn neu ddwy arall) i Cymryd Rhan.

Cyflwynodd y Cynghorydd Bobby Feeley adroddiad Dyfarniad Cytundeb Prosiect Cymorth fel y bo’r Angen ABBA i’r Cabinet i gymeradwyo’r argymhelliad i ddyfarnu cytundeb 24 mis (gyda’r opsiwn o ymestyn am flwyddyn neu ddwy arall) i Gymryd Rhan.

PENDERFYNWYD bod y Cabinet yn dyfarnu cytundeb 24 mis (efo’r opsiwn i ymestyn am flwyddyn neu ddwy arall) i Gymryd Rhan.

Ystyried adroddiad cyfrinachol gan y Cynghorydd Julian Thompson-Hill, Aelod Arweiniol Cyllid ac Asedau (copi’n amgaeëdig) i gymeradwyo caffael Teitl trwy ddefnyddio Gorchymyn Pryniant Gorfodol ar gyfer tir y tu ôl i 21-37 Rhodfa’r Gorllewin ac yn cyffinio Maes Parcio Crescent Road, y Rhyl.

Cyflwynodd y Cynghorydd Julian Thompson-Hill yr adroddiad i gael cymeradwyaeth i gaffael y Teitl drwy ddefnyddio Gorchymyn Prynu Gorfodol ar gyfer tir yng nghefn 21-37 West Parade ac yn gyfagos â Maes Parcio Crescent Road, y Rhyl.

PENDERFYNWYD fod y Cabinet yn cymeradwyo defnyddio pwerau Prynu Gorfodol i gaffael buddiant rhydd-ddaliad priffordd fabwysiedig a thir arall ar y Cynllun yn Atodiad A fel Plotiau 2, 3 a 4 a ddefnyddir fel priffordd a thir mynediad yng nghefn 21-37 West Parade ac o gwmpas Maes Parcio Crescent Road yn unol ag Adran 226(1)(b) Deddf Cynllunio Gwlad a Thref 1990.

Daeth y cyfarfod i ben am 11.50am.