Agenda and draft minutes

Dylai’r Aelodau ddatgan unrhyw gysylltiad personol neu gysylltiad sy'n rhagfarnu ag unrhyw fater a nodwyd fel un i'w ystyried yn y cyfarfod hwn.

Mynegodd y Cynghorwyr Huw Hilditch-Roberts, Brian Blakeley, Graham Timms, Glenn Swingler, Huw Williams, Meirick Lloyd Davies, Tina Jones, Emrys Wynne, Peter Scott ac Anton Sampson gysylltiad personol ag eitem 5 ar y Rhaglen – Trefniadau Clwstwr Ysgolion gan eu bod oll yn Lywodraethwyr Ysgolion mewn ysgolion lleol.

Datganodd yr aelodau cyfetholedig Mike Hall a David Lloyd gysylltiad personol ag eitem 5 ar y Rhaglen – Trefniadau Clwstwr Ysgolion gan eu bod yn Lywodraethwyr ysgolion mewn ysgolion lleol.

Rhybudd o eitemau y dylid, ym marn y Cadeirydd, eu hystyried yn y cyfarfod fel materion brys yn unol ag Adran 100B(4) Deddf Llywodraeth Leol 1972.

Ni chodwyd unrhyw fater brys.

Derbyn cofnodion cyfarfod y Pwyllgor Archwilio Cymunedau a gynhaliwyd ar 18 Ionawr 2018 (copi ynghlwm).

10am – 10.05am

Cyflwynwyd Cofnodion cyfarfod y Pwyllgor Archwilio Cymunedau a gynhaliwyd ar 18 Ionawr  2018.

PENDERFYNWYD y dylid derbyn a chymeradwyo cofnodion y cyfarfod a gynhaliwyd ar 18 Ionawr 2018 fel cofnod cywir.

Ystyried adroddiad gan y Pennaeth Addysg (copi ynghlwm) yn rhoi manylion am yr adborth a dderbyniwyd mewn perthynas â datblygu proses lle gall ysgolion ofyn am i ystyriaeth gael ei rhoi, gan yr Awdurdod Lleol, i symud clwstwr.

10.05am – 10.35am

Cyflwynodd Aelod Arweiniol Addysg, Plant a Phobl ifanc yr adroddiad (a gylchredwyd eisoes) oedd yn rhoi adborth i aelodau ar y gwaith a wnaed gan swyddogion mewn ymateb i gais gan y Pwyllgor, ym Mehefin 2017, y dylid ystyried datblygu proses i hwyluso ysgolion, pe byddent yn dymuno, i wneud cais i adolygu eu trefniadau o ran clwstwr ysgolion.  Yn ystod ei gyflwyniad, dywedodd yr Aelod Arweiniol bod cais y Pwyllgor yn deillio o ystyried Polisi Cludiant I Ddysgwyr newydd y Cyngor, sy’n dod i rym ym Medi 2018, ac yn benodol mewn ymateb i bryderon gan rieni disgyblion yn Ysgol Pantpastynog, Prion ac Ysgol Bro Cinmeirch, Llanrhaeadr ynglŷn ag a fydden nhw yn gymwys am gludiant am ddim i'r ysgol i Ysgol Glan Clwyd neu Ysgol Brynhyfryd, yn dibynnu ar eu cyfeiriad cartref.  Yn ystod y broses o ddatblygu'r Polisi newydd o ran Cludiant I Ddysgwyr daeth yn amlwg bod y trefniadau clwstwr ysgolion a’r berthynas ‘ysgol fwydo’ gydag ysgolion uwchradd yn arbennig o bwysig i ddisgyblion, rhieni / gofalwyr ac ysgolion fel ei gilydd.  O ganlyniad, gwnaed darpariaeth o fewn y polisi newydd Cludiant I Ddysgwyr i gydnabod y berthynas ‘ysgol fwydo’ a darparu cludiant am ddim yn ôl disgresiwn i un ai’r ysgol uwchradd addas agosaf neu’r ysgol uwchradd ‘fwydo’ gydnabyddedig, cyn belled bod cyfeiriad y dysgwr a'r man pigo i fyny ymhellach na thair milltir o’r ysgol uwchradd.  Roedd gan Ysgol Bro Cinmeirch bryderon penodol bod rhieni / gofalwyr yn dewis addysg ffydd cyfrwng Cymraeg er mwyn cael mynediad at Ysgol Pantpastynog ac wedyn er mwyn cael trosglwyddo i Ysgol Glan Clwyd o dan y trefniadau ysgol fwydo os na gellid rhoi cludiant yn ôl disgresiwn i Ysgol Glan Clwyd i ddisgyblion Bro Cinmeirch.

Dywedodd y Pennaeth Addysg a Gwasanaethau Plant wrth Aelodau bod angen sefydlu Gweithgor er mwyn symud cais y Pwyllgor i ystyried datblygu proses ar gyfer ysgolion cynradd sydd am newid eu trefniadau clwstwr ysgolion ymlaen.    Atodwyd trosolwg o gylch gwaith y Gweithgor fel Atodiad 3 i’r adroddiad.  Gwahoddwyd pob ‘clwstwr ysgolion uwchradd' ar draws y sir i benodi dau gynrychiolydd i wasanaethau ar y Gweithgor.  Roedd y cynrychiolwyr clwstwr a bendodwyd yn cynnwys trawstoriad o arbenigedd ysgolion h.y. penaethiaid, rheolwyr busnes a chyllid a llywodraethwyr.    Roedd cynrychiolaeth awdurdodau lleol ar y Gweithgor yn cynnwys aelodau o’r timau Cyllid Ysgolion a Chludiant Dysgwyr.  Dywedodd y Pennaeth Gwasanaeth wrth y Pwyllgor bod y Gweithgor, wrth ddwyn ei waith i ben, wedi penderfynu nad oedd angen datblygu proses i alluogi ysgolion cynradd i wneud cais i newid eu trefniadau clwstwr.  Yn eu barn nhw dylai'r Cyngor barhau i ganolbwyntio ar yr Agenda Moderneiddio Ysgolion.  Roedd eu barn yn debyg i farn Gwasanaeth Addysg y Cyngor.

Wrth ymateb i gwestiynau aelodau dywedodd yr Aelod Arweiniol, y Pennaeth Addysg, a’r Rheolwr Adnoddau a Chynllunio:

·         tra bo deddfwriaeth yn nodi bod gofyniad ar awdurdodau lleol i ddarparu cludiant am ddim i'r ysgol i ddisgyblion oedd yn dewis derbyn addysg cyfrwng Cymraeg, cyn belled a’u bod yn mynychu'r ysgol addas agosaf ac yn bodloni’r meini prawf pellter, roedd darparu cludiant am ddim i'r ysgol i ysgolion ffydd yn ôl disgresiwn yr awdurdod lleol.  Fodd bynnag, roedd Sir Ddinbych yn ymdrin ag ysgolion cyfrwng Cymraeg ac ysgolion ffydd yn yr un modd wrth benderfynu ar hawl cludiant i’r ysgol;

·         roedd deddfwriaeth cludiant i ddysgwyr yn nodi fod yn rhaid i’r cyfnod o amser yr oedd disgwyl i ddisgybl ei deithio er mwyn derbyn addysg fod yn rhesymol;

·         roedd dewis rhieni yn flaenoriaeth pan fyddai rhieni / gofalwyr yn dewis ysgol i’w plentyn, roedd dyletswydd yr Awdurdod yn hyn o  ...  view the full Cofnodion text for item 5.

Ystyried adroddiad gan Bennaeth Cynllunio a Gwarchod y Cyhoedd (copi ynghlwm) sy'n rhoi manylion ar y cynnydd a wnaed mewn cyflawni'r Cynllun Gweithredu Rheoli Gwylanod a cheisio safbwyntiau’r Pwyllgor ar gamau arfaethedig i'w cymryd yn y dyfodol

10.35am - 11.05am

Cyflwynodd Aelod Arweiniol Tai, Rheoleiddio a’r Amgylchedd adroddiad y Pennaeth Cynllunio a Gwarchod y Cyhoedd a’i atodiadau cysylltiol (a gylchredwyd eisoes), er mwyn diweddaru aelodau ar y cynnydd a wnaed hyd yma o ran rhoi Cynllun Gweithredu Rheoli Gwylanod a chamau gweithredu arfaethedig ar waith i liniaru’r niwsans a achosir gan wylanod yn y sir.

Dywedodd Pennaeth Cynllunio a Gwarchod y Cyhoedd wrth aelodau mai cynllun Cyngor cyfan yw’r Cynllun Gweithredu, Atodiad 3 yr adroddiad, gyda chamau gweithredu wedi eu dyrannu i nifer o wasanaethau eu symud ymlaen a'u gweithredu.  Y flaenoriaeth ar hyn o bryd oedd darparu’r ymgyrch ymwybyddiaeth gyhoeddus, a amlinellir yn Atodiad 4, a gweithio gyda busnesau bwyd i leihau gwastraff bwyd, sy'n denu gwylanod.  Ar hyn o bryd y ffocws yw addysgu’r cyhoedd a pherswadio trigolion, ymwelwyr a busnesau i weithio gyda’r Cyngor mewn ymgais i leihau’r niwsans a’r llanast a achosir gan wylanod.

Amlinellodd Arweinydd Tîm y Cyngor: Rheoli Cyfathrebu ac Ymgyrchu y camau gweithredu a’r mentrau sydd yn mynd rhagddynt fel rhan o’r ymgyrch ymwybyddiaeth gyhoeddus, a gymeradwywyd ym mis Chwefror 2018. Roedd y rhain yn cynnwys:

·         ymgyrch cyfryngau cymdeithasol fyddai’n cynnwys fideos codi ymwybyddiaeth;

·         cysylltu â chynghorau dinas, tref a chymuned er mwyn ceisio eu cefnogaeth i'r gwaith, a'u hannog i gefnogi gwaith y Cyngor drwy rannu gwybodaeth gyda thrigolion a sicrhau bod y strydoedd a mannau cyhoeddus yn cael eu cadw yn daclus ac yn lân;

·         annog busnesau, trigolion ac ymwelwyr i waredu unrhyw wastraff bwyd yn gyfrifol ac yn ddiogel;

·         cysylltu gydag ysgolion er mwyn addysgu plant am y poendod a achosir gan wylanod ac anifeiliaid eraill a’r angen i waredu gwastraff bwyd a sbwriel yn ddiogel.  Rhagdybiwyd y byddai'r ymagwedd hon yn ddefnyddiol er mwyn cyfathrebu’r un neges i rieni ac ati gan y byddent hwy yn debygol o wrando ar farn eu plant ar faterion;

·         Rhedeg cystadleuaeth dylunio poster drwy Raglen Cyfoethogi'r Gwasanaeth Addysg, gyda’r poster buddugol yn cael ei ddefnyddio ar gyfer ymgyrch ymwybyddiaeth y Cyngor.

Rhannodd y Cynghorydd Anton Sampson boster gyda’r Pwyllgor oedd wedi cael ei ddefnyddio gan Gyngor Bwrdeistref Great Yarmouth mewn ymgais i annog pobl i waredu gwastraff bwyd ayb yn gyfrifol, tra rhannodd y Cynghorydd Brian Blakeley nifero gwynion a sylwadau roedd wedi eu derbyn gan drigolion.

Wrth ymateb i gwestiynau'r Aelodau, cadarnhaodd yr Aelod Arweiniol, Cyfarwyddwr Corfforaethol:  Uchelgais Economaidd a Chymunedol, Pennaeth Gwasanaeth, ac Arweinydd Tîm:  Rheoli Cyfathrebu ac Ymgyrchoedd mai:

·         gwastraff bwyd oedd y prif bryder gan ei fod yn atynnu gwylanod. Pe gellid lleihau mynediad at wastraff bwyd rhagdybir y byddai’r problemau a achosir gan wylanod yn lleihau;

·         roedd archwiliadau dyletswydd gofal busnesau i sicrhau bod ganddynt gytundebau gwaredu gwastraff masnachol a’u bod yn defnyddio cynwysyddion gwrth bla ar gyfer gwastraff bwyd yn mynd rhagddynt.  Roedd gwiriadau tebyg yn cael eu cynnal ar lefydd gwerthu bwyd yn ystod archwiliadau hylendid bwyd arferol.  Ar hyn o bryd roedd ystyriaeth yn cael ei roi i a ddylid cynnwys diogelu gwastraff bwyd fel maes cydymffurfedd ar gyfer archwiliadau hylendid bwyd;

·         mae gwaith glanhau stryd yn cael ei wneud yn rheolaidd mewn trefi arfordirol er mwyn ceisio lleihau faint o sbwriel sydd yno a chadw'r strydoedd a’r celfi stryd yn lân ac yn daclus;

·         roedd heboga wedi ei ddefnyddio’n llwyddiannus mewn blynyddoedd diweddar i gadw gwylanod draw, effaith tymor byr yn unig oedd hynny ac unwaith roedd yr adar ysglyfaethus wedi mynd daeth y gwylanod yn ôl.  Roedd heboga hefyd yn weddol ddrud ac felly ddim yn gynaliadwy yn y tymor hir;

·         roedd y Cyngor yn bwriadu lobïo LlC, Cymdeithas Llywodraeth Leol Cymru (CLlLC) a Chyfoeth Naturiol Cymru er mwyn  cael ymgyrch genedlaethol neu  ...  view the full Cofnodion text for item 6.

Ystyried adroddiad gan y Rheolwr Traffig, Parcio a Diogelwch y Ffyrdd (copi ynghlwm) sy’n rhoi'r diweddaraf i aelodau ar weithredu’r gofrestr rheoli asedau meysydd parcio a’r rhaglen fuddsoddi gysylltiedig, tra’n ceisio eu safbwyntiau arnynt ac ar waith y Grŵp Tasg a Gorffen Meysydd Parcio traws-wasanaeth

11.15am – 11.45am

Cyflwynodd Aelod Arweiniol Priffyrdd, Cynllunio a Theithio Cynaliadwy adroddiad y Rheolwr Traffig, Parcio a Diogelwch ar y Ffyrdd (a gylchredwyd eisoes) er mwyn diweddaru'r Pwyllgor ar y cynnydd a wnaed o safbwynt rhoi'r Cofrestr Rheoli Asedau Meysydd Parcio a'r Rhaglen Fuddsoddi ar waith.  Hefyd yn yr adroddiad oedd manylion y cynnydd a wnaed gan y Grŵp Tasg a Gorffen Meysydd Parcio o ran datblygu mesurau i wella profiad ymwelwyr defnyddwyr meysydd parcio.  Rhoddwyd trosolwg i Aelodau o’r amrywiol elfennau o’r gwaith a wnaed hyd yma fel rhan o ddatblygiad y Gofrestr Rheoli Asedau a'r Rhaglen Fuddsoddi arfaethedig (a amlinellir yn Atodiad B yr adroddiad) ac ar yr ymyraethau a nodwyd gan y Grŵp Tasg a Gorffen gan y Rheolwr Traffig, Parcio a Diogelwch ar y Ffyrdd.

Wrth ymateb i gwestiynau'r Pwyllgor, dywedodd yr Aelod Arweiniol, Cyfarwyddwr Corfforaethol:  Uchelgais Economaidd a Chymunedol a'r Rheolwr Traffig, Parcio a Diogelwch ar y Ffyrdd:

·         eu bod yn fodlon gyda’r cynnydd a wnaed wrth ddatblygu amrywiol agweddau o’r gwaith oedd angen ei wneud.  Roedd cwblhau arolwg y meysydd parcio wedi cymryd cyfnod sylweddol o amser, ond roedd y rhan fwyaf o’r gwaith cynllunio bellach wedi ei gwblhau.  Roedd Swyddogion wedi ymweld â phob Grŵp Ardal Aelodau er mwyn eu briffio ar y cynigion a cheisio eu cefnogaeth ar gyfer y cynlluniau;

·         disgwylid y byddai’n cymryd pum mlynedd i gwblhau’r rhaglen wella gyfan.  Roedd y broses o'i rhoi ar waith yn ei chamau cynnar a dim ond oddeutu 12 peiriant talu ac arddangos newydd oedd wedi eu gosod hyd yma.  Cyllideb Gwasanaeth Meysydd Parcio oedd yn talu am gost y gwaith hwn;

·         roedd angen mwy o waith proffilio cyllideb ar gyfer y rhaglen fuddsoddi cyn ei datblygu fel Achos Busnes i’w gyflwyno i Grŵp Buddsoddi Strategol y Cyngor er mwyn ei gymeradwyo; 

·         byddai'r gwaith yn cael ei wneud fesul cam.  Yn ystod y ddwy flynedd gyntaf byddai peiriannau talu ac arddangos cyfredol yn cael eu disodli gan beiriannau fyddai’n cymryd taliadau cerdyn ac yn cynhyrchu proffiliau data gwell o ddefnydd pob maes parcio.    Byddai arwyddion mewn meysydd parcio yn cael eu gwella yn ystod camau cyntaf y cynllun gan y byddai hyn yn gwella’r profiad ymwelwyr drwy roi gwybodaeth glir o safbwynt ardaloedd arhosiad byr / arhosiad hir y meysydd parcio.  Byddai gwelliannau mwy cosmetig h.y. goleuo a thirlunio yn cael eu huwchraddio yn ystod camau olaf y cynllun buddsoddi;

·         roedd angen gwneud gwaith pellach er mwyn asesu effaith rhai o’r ymyraethau a gyflwynwyd gan Grŵp Tasg a Gorffen Meysydd Parcio h.y. tocynnau talu ac arddangos y gellir eu trosglwyddo rhwng meysydd parcio arhosiad hir ar draws y sir, trwyddedau parcio di bapur ayb;

·         roedd y cynllun buddsoddi yn cynnwys buddsoddiad o £1.3 miliwn dros gyfnod o bum mlynedd mewn 44 o‘r meysydd parcio yr oedd y Sir yn berchen arnynt.  Tra roedd y cynllun yn hyblyg, byddai gwaith yn cael ei gyflawni ar ôl ymarfer blaenoriaethu;

·         byddai cytundeb y Cyngor am beiriannau talu ac arddangos sy’n derbyn taliad dros y ffôn yn rhedeg am ddwy flynedd arall.  Fodd bynnag doedd yr adnodd yma ddim yn cael ei defnyddio yn aml, felly byddai’r peiriannau talu ac arddangos o bosib yn cael eu disodli gan beiriannau sy’n darparu swyddogaethau gwahanol pan fyddai'r contract yn dod i ben;

·         ni fyddai’r gwaith ailwampio i’w gwblhau ar y maes parcio tanddaearol yn y Rhyl yn ffurfio rhan o’r cynllun buddsoddi hwn.  Roedd yr achos busnes ar gyfer y gwaith hwnnw wedi ei gymeradwyo yn ddiweddar gan Grŵp Buddsoddi Strategol a Chabinet y Cyngor; 

·         nod y Cynllun Buddsoddi Meysydd Parcio pum mlynedd o hyd yw  ...  view the full Cofnodion text for item 7.

Ystyried adroddiad gan y Rheolwr Risg Llifogydd (copi ynghlwm) sy’n gofyn i'r Pwyllgor ystyried p’run ai oes angen i'r Cyngor, yng ngoleuni'r gwersi a ddysgwyd o lifogydd Gorffennaf 2017, weithredu neu adolygu arferion gweithio er mwyn lliniaru rhag risg o lifogydd yn y sir yn y dyfodol

11.45am – 12.15pm

Cyflwynodd Aelod Arweiniol Priffyrdd, Cynllunio a Theithio Cynaliadwy adroddiad y Rheolwr Perygl Llifogydd (a gylchredwyd eisoes) oedd yn nodi darganfyddiadau’r ymchwiliad i'r llifogydd yng ngogledd y sir ar 19 Gorffennaf 2017.  Yn atodol i’r adroddiad oedd copi o'r adroddiad terfynol a gynhyrchwyd yn unol ag Adran 19 Deddf Rheoli Llifogydd a Dŵr 2010. O dan ddarpariaethau'r Ddeddf roedd angen i’r Cyngor ymchwilio, paratoi a chyhoeddi’r adroddiad hwn mewn ymateb i achosion o lifogydd o fewn ei ffiniau daearyddol.

Amlinellodd y Rheolwr Perygl Llifogydd ddyletswyddau’r cyngor o safbwynt ymchwilio i'r llifogydd a ddigwyddodd, a dywedodd mai dim ond unwaith mewn 50 mlynedd y byddai disgwyl i faint o law a gwympodd yng ngogledd ysir ar 19 Gorffennaf 2017 gwympo mewn diwrnod.  Aeth ymlaen i amlinellu’r broses o ymchwilio achos a maint y llifogydd, a dywedodd ei fod wedi cymryd cryn dipyn o amser i gasglu a dadansoddi’r dystiolaeth a’r wybodaeth a gasglwyd oherwydd yr ardal ddaearyddol eang a effeithiwyd.  Daeth yr ymchwiliad i’r canlyniad mai achos y llifogydd oedd digwyddiad glawog oherwydd nad oedd gormod o ddŵr wyneb yn gallu mynd i’r systemau draenio a charthion yn ddigon cyflym i’w alluogi i ddraenio i ffwrdd.  Roedd faint o law a gwympodd y diwrnod hwnnw yn fwy na’r capasiti sydd o fewn y systemau draenio a charthion lleol i lifo'n gyson.  Aeth Aeth y diffyg capasiti hwn yn waeth oherwydd rhwystrau mewn pibellau ac oherwydd problemau mewn gorsafoedd pwmpio, cyfrifoldeb Dŵr Cymru Welsh Water (DCWW) oedd y ddau beth yma.  Pwysleisiodd y Rheolwr Perygl Llifogydd bod DCWW a Chyfoeth Naturiol Cymru wedi gweithio’n agos gyda'r Cyngor wrth gyflawni'r gwaith o ymchwilio i'r llifogydd a dywedodd yr Aelod Arweiniol wrth y Pwyllgor bod y swyddog wedi adeiladu perthynas waith dda gyda’r ddau sefydliad, ac roedd y ddau yn derbyn bod gan yr holl bartneriaid gyfrifoldebau o ran rheoli perygl llifogydd yn yr ardal hon.

Manylodd aelodau o ardal y Rhyl am nifer o broblemau hir dymor yn ymwneud â llifogydd yn ardal y Rhyl gan gynnwys cambr y ffordd yn Ffordd Derwen, dŵr yn llifo oddi ar gaeau chwarae Ysgol Dewi Sant, tipio anghyfreithlon ar dir y mae Network Rail yn berchen arno a phroblemau gyda draeniau a ffosydd cerrig y mae’n berchen arnynt, problemau ar Ffordd Elan a chae newydd Clwb Rygbi'r Rhyl.  Dywedodd Pennaeth Gwasanaethau Priffyrdd ac Amgylcheddol bod achos nifer o’r problemau hyn yn gymhleth iawn.  Oherwydd y cymhlethdodau roedd y Cyngor wedi cael cyllid gan Lywodraeth Cymru i gyflawni astudiaeth fanwl i’r math o waith fyddai ei angen i wella'r sefyllfa.  Er hynny, ni allai neb roi sicrwydd pendant na fyddai digwyddiad o'r fath yn fyth yn digwydd eto, y cwbl oedd modd ei wneud oedd lleihau'r perygl o lifogydd yn y dyfodol.  Disgwylir canlyniadau'r astudiaethau draenio yn Ffordd Derwen, y Rhyl ym mis Medi 2018. Yn yr un modd, disgwylir canlyniadau'r cydweithio a fu rhwng DCWW a Chyfoeth Naturiol Cymru, i ymchwilio a ellid gwella rheolaeth Ffos Y Rhyl a Gwter Prestatyn yn ogystal â'r draeniau a'r carthffosydd cyfagos, tua’r un pryd.

Gan ymateb i gwestiynau gan yr Aelodau, dywedodd y swyddogion:

·         Roedd DCWW yn cynnal astudiaeth i ardal Bro Berllan Rhuddlan er mwyn deall maint y llifogydd a’r problemau draenio yno;

·         Roedd cafnau roedd y Cyngor yn berchen arnynt yn cael eu gwagu o leiaf unwaith y flwyddyn, gyda’r rheiny oedd yn achosi problemau yn cael eu gwagu’n fwy rheolaidd.  Os oedd aelodau’n ymwybodol o gafnau a allai gynyddu’r perygl o lifogydd neu oedd angen eu gwagu dylent gysylltu â’r Ganolfan Gwasanaeth i Gwsmeriaid i adrodd am y mater;

·         roedd y Cyngor yn  ...  view the full Cofnodion text for item 8.

Ystyried adroddiad gan y Cydlynydd Archwilio (copi ynghlwm) yn gofyn am adolygiad o raglen gwaith i’r dyfodol y pwyllgor a rhoi’r diweddaraf i’r aelodau ar faterion perthnasol.

12.15pm – 12.30pm

Cyflwynodd y Cydlynydd Archwilio adroddiad (a gylchredwyd ymlaen llaw) sy’n gofyn i’r Aelodau adolygu Rhaglen Waith y Pwyllgor ac yn rhoi diweddariad ar faterion perthnasol. 

Canolbwyntiodd y drafodaeth ar y canlynol –

• ail-gadarnhawyd y tair eitem ar y rhaglen gwaith ar gyfer cyfarfod nesaf y Pwyllgor, a chytunwyd i wahodd yr Aelodau Cabinet Arweiniol perthnasol i’r cyfarfod hwnnw;

·         nododd aelodau bod y Grŵp Cadeiryddion ac Is-Gadeiryddion Archwilio wedi cyfarfod i ystyried nifer o eitemau posibl i fod yn destun archwilio, a oedd wedi eu cynnwys ar raglen waith y Pwyllgor;

• anogwyd aelodau i gwblhau’r holiadur Archwilio a oedd wedi ei gylchredeg, er mwyn gwerthuso effeithiolrwydd Archwilio;
• eglurodd y Cydlynydd Archwilio wrth aelodau bod newid yn aelodaeth y Pwyllgor Archwilio Cymunedau wedi creu sedd wag ar Grŵp Herio’r Gwasanaeth Ariannol. Ceisiwyd penodiad aelod er mwyn cynrychioli’r Pwyllgor, enwebodd y Cynghorydd Timms y Cadeirydd, y Cynghorydd Huw Williams i gynrychioli Archwilio. Roedd y Pwyllgor i gyd yn cytuno â’r penodiad.
• cyfeiriwyd at friff gwybodaeth y Pwyllgor, a oedd yn cynnwys diweddariad ar gamau gweithredu o’r cyfarfod diwethaf; ynghyd â gwybodaeth bellach yn ôl y gofyn

Felly:

Penderfynwyd: -  cymeradwyo rhaglen gwaith i'r dyfodol y Pwyllgor yn amodol ar yr uchod

Derbyn unrhyw ddiweddariadau gan gynrychiolwyr y Pwyllgor ar wahanol Fyrddau a Grwpiau’r Cyngor.

12.30pm – 12.45pm

Adroddodd gynrychiolwyr y Pwyllgor ar eu presenoldeb mewn cyfarfodydd fel a ganlyn -

Roedd y Cynghorydd Graham Timms wedi mynychu’r Her Gwasanaeth ar Gyfer Adnoddau, Asedau a Thai a nododd fod adroddiad diweddaru wedi ei gynnwys yn y briff diweddaru gwybodaeth.

Daeth y cyfarfod i ben am 13.15pm.