Agenda and draft minutes

Penodi Is-Gadeirydd y Pwyllgor ar gyfer blwyddyn  y cyngor 2015/16

Esboniodd y Cydlynydd Archwilio bod y newidiadau i Aelodaeth y Pwyllgor, sef penodi Is-Gadeirydd, yn cael ei ohirio tan y cyfarfod nesaf.

PENDERFYNWYD – bod penodi Is-Gadeirydd y Pwyllgor i gael ei ohirio tan y cyfarfod nesaf.

Dylai’r Aelodau ddatgan unrhyw gysylltiad personol neu gysylltiad sy'n rhagfarnu mewn unrhyw fater a nodwyd i'w ystyried yn y cyfarfod hwn.

Datganodd y Cynghorydd T.M. Parry gysylltiad personol ag eitemau 7 ac 8 ar yr agenda fel cynrychiolydd y Cyngor Sir ar yr AHNE.

Rhybudd o eitemau y dylid, ym marn y Cadeirydd, eu hystyried yn y cyfarfod fel materion brys yn unol ag Adran 100B(4) Deddf Llywodraeth Leol 1972.

Ni chodwyd unrhyw eitemau y dylid, ym marn y Cadeirydd, eu hystyried yn y cyfarfod fel mater o frys yn unol ag Adran 100B(4) Deddf Llywodraeth Leol, 1972.

Derbyn cofnodion cyfarfod y Pwyllgor Archwilio Partneriaethau a gynhaliwyd ar 19 Mawrth, 2015 (copi ynghlwm).

Cyflwynwyd Cofnodion cyfarfod y Pwyllgor Archwilio Partneriaethau a gynhaliwyd ddydd Iau, 19 Mawrth 2014.

Materion yn codi:-

3. Gwasanaethau Llawdriniaethau Aciwt yn Ysbyty Glan Clwyd:-Cadarnhaodd y Cadeirydd fod llythyr wedi ei anfon, fel y cytunwyd, at Brif Weithredwr Bwrdd Iechyd Prifysgol Betsi Cadwaladr, yn gofyn am eglurder ynglŷn â’r mathau o lawdriniaethau a fyddai'n cael eu cynnal yn Ysbyty Glan Clwyd yn y dyfodol.  Eglurodd y Cydlynydd Archwilio bod copi o'r llythyr a'r ymateb wedi'u cynnwys yn yr wybodaeth gefndirol ar gyfer y cyfarfod.

5. Cydlynu Ffrydiau Cyllid Cymunedol: - Cyfeiriodd y Cynghorydd M.Ll. Davies at Gronfa Gymunedol Gwynt y Môr, ac esboniodd fod yr is-orsaf y gwneir cyfeiriad ati mewn gwirionedd ym mhlwyf Cefn Meiriadog ger Llanelwy.

PENDERFYNWYD – yn amodol ar yr uchod, i dderbyn a chymeradwyo’r cofnodion fel cofnod cywir.

Trafodaeth gyda chynrychiolwyr o Bartneriaeth Arfordirol Sir Ddinbych a Chyngor Gwasanaethau Gwirfoddol Sir Ddinbych am eu rôl wrth hybu a chefnogi ymwneud cymunedol, a gan y sector gwirfoddol a'r trydydd sector yn y sir.

9:35am – 10:45am 

Croesawodd y Cadeirydd gynrychiolwyr o Bartneriaeth Arfordirol Sir Ddinbych, o Bartneriaeth Arfordirol y Rhyl ac o Gyngor Gwasanaethau Gwirfoddol Sir Ddinbych i'r cyfarfod i roi cyflwyniad byr ynglŷn â’u sefydliadau a’u swyddogaeth wrth hyrwyddo a chefnogi cyfranogiad cymunedol, y sector gwirfoddol a'r trydydd sector yn y sir.  Roedd copïau o sleidiau’r cyflwyniad yn amlinellu gwaith y tri chorff a’r grwpiau sydd wedi elwa o ganlyniad i’w gwaith wedi eu cyhoeddi fel rhan o bapurau’r Pwyllgor.  Cafwyd trosolwg o’r gwaith y mae Partneriaeth Arfordirol Sir Ddinbych a Phartneriaeth Arfordirol y Rhyl yn ei wneud i reoli a gweinyddu'r arian cymunedol sydd ar gael gan Gronfa Gymunedol RWE Innogy UK Ltd. (arian Ffermydd Gwynt Gogledd Hoyle a Gwastadeddau’r Rhyl), gan gynnwys cyhoeddusrwydd ynglŷn â’r gronfa, y broses o ymgeisio a dyfarnu, y sefydliadau sydd wedi elwa o’r gronfa a'r mathau o brosiectau a ariennir. 

Aeth y Cynrychiolwyr ati, mewn ymateb i gwestiynau gan yr Aelodau, i:-

·ddweud eu bod yn croesawu ceisiadau gan bob math o brosiectau cymunedol ac ati a bod pob cais yn cael ei ystyried ar ei deilyngdod ei hun yn ôl meini prawf penodol;

·amlinellu aelodaeth Partneriaeth Arfordirol Sir Ddinbych a Phartneriaeth Arfordirol y Rhyl a dweud, yn amodol ar wirio cyfansoddiad y sefydliad a thrafod y mater gydag aelodaeth Partneriaeth Arfordirol y Rhyl, y byddai’r swyddogion yn ysgrifennu'n ffurfiol at y Cyngor yn gofyn i’r Cyngor benodi Cynghorydd Sir i wasanaethu ar Bartneriaeth Arfordirol y Rhyl;

·ddweud fod Partneriaeth Arfordirol y Rhyl wedi dyfarnu arian i Asiantaeth Datblygu Cymunedol Sir Ddinbych i’w chefnogi hyd nes y byddai’n cau ym mis Mawrth 2015, a’u bod o fis Ebrill 2015 wedi sicrhau cytundeb gyda Chanolfan Wellington ar Ffordd Wellington i alluogi lleoli’r offer a arferai fod wedi'i leoli yn yr Asiantaeth Datblygu Cymunedol yn Stryd Bodfor i fod yn hygyrch i’r cyhoedd eu defnyddio yng Nghanolfan Wellington.  Er bob trigolion bellach yn dod yn ymwybodol fod yr offer wedi symud lleoliad, roedd Partneriaeth Arfordirol y Rhyl hefyd yn mynd ati i roi cyhoeddusrwydd i’r lleoliad newydd;

·gadarnhau eu bod wedi cysylltu â Chanolfan y Foryd mewn perthynas â chanfod cartref i hen offer yr Asiantaeth Datblygu Cymunedol ac ati, ond na fu hynny'n llwyddiannus, a dyna pam eu bod yn awr wedi eu lleoli yng Nghanolfan Wellington.  Mynegodd Partneriaeth Arfordirol y Rhyl eu diolch i Ganolfan Wellington am eu cymorth.

Amlinellodd Prif Weithredwr Cyngor Gwasanaethau Gwirfoddol Sir Ddinbych beth yw swyddogaeth ei sefydliad.  Tynnodd sylw at yr ystod eang o sefydliadau sydd yn rhan o’r trydydd sector yn y Sir, yn amrywio o sefydliadau mawr sector cyhoeddus megis cymdeithasau tai i grwpiau bach lleol megis clybiau ar ôl ysgol annibynnol ac ati. Yr hyn sydd ganddynt yn gyffredin yw mai’r hyn sydd yn eu hysgogi yw anghenion y gymuned y maent yn ei gwasanaethu.

Dywedwyd wrth yr Aelodau:-

·hyd at ddiwedd mis Mawrth 2015 fod gan Gyngor Gwasanaethau  Gwirfoddol Sir Ddinbych 50 aelod o staff (rhan-amser a llawn amser) ac o 1 Ebrill, oherwydd toriadau yn y gyllideb, roedd nifer y staff wedi gostwng i 15 (neu i 7 cyfwerth ag amser llawn).  O blith y 7, câi 4 eu hariannu ar gyfer prosiectau penodol - un ohonynt gan Fwrdd Iechyd Prifysgol Betsi Cadwaladr. Mae hyn yn golygu mai dim ond 3 aelod o staff cyfwerth ag amser llawn sy’n weddill i ymdrin â’r holl waith arall, gan gynnwys gweinyddu a chefnogi grwpiau cymunedol i ganfod a gwneud ceisiadau am gyllid;

·roedd swyddog rhan-amser arall wedi ei ariannu'n rhannol gan y Cyngor at ddibenion prosiectau wedi eu hariannu gan ofal cymdeithasol.  Roedd y swyddog hwn a’r swyddog  ...  view the full Cofnodion text for item 6.

Ystyried adroddiad gan y Swyddog Ardal o Harddwch Naturiol Eithriadol (AHNE) (copi ynghlwm) sy'n amlinellu'r cynnydd a gyflawnwyd â llywodraethu’r AHNE a phrosiectau cysylltiedig.

11am – 11:30am

Roedd copi o adroddiad gan Swyddog yr Ardal o Harddwch Naturiol Eithriadol wedi ei ddosbarthu gyda'r papurau ar gyfer y cyfarfod.

Wrth gyflwyno’r adroddiad pwysleisiodd yr Aelod Arweiniol dros Hamdden, Ieuenctid, Twristiaeth a Datblygu Gwledig mai adroddiad cynnydd oedd hwn ar waith yr Ardal o Harddwch Naturiol Eithriadol, oddi fewn ac oddi allan i'r Ardal o Harddwch Naturiol Eithriadol, ac ar waith y Cydbwyllgor ers cyflwyno’r adroddiad cychwynnol yn y Pwyllgor ddeuddeg mis yn ôl. 

Manylodd yr Aelod Arweiniol a Swyddog yr Ardal o Harddwch Naturiol Eithriadol ar aelodaeth Cydbwyllgor yr Ardal o Harddwch Naturiol Eithriadol a Phartneriaeth yr Ardal o Harddwch Naturiol Eithriadol, a fydd yn cynnal eu cyfarfod cyntaf drannoeth.  Buont hefyd yn amlinellu’r gwaith sy’n mynd rhagddo gyda’r Gwasanaeth Cefn Gwlad mewn ymdrech i chwalu'r rhwystrau rhwng trigolion y dref a thrigolion y wlad, a chyda canolfannau twristiaeth arbenigol megis y Canolfan Ragoriaeth Beicio Gogledd Cymru.  Cadarnhawyd y dylai’r mentrau iechyd a lles sydd yn mynd rhagddynt gefnogi agendâu ataliol y Cyngor a phartneriaid eraill ac arwain yn y tymor hir at boblogaeth iachach.

Wrth ymateb i gwestiynau’r Cynghorwyr dywedodd yr Aelod Arweiniol a Swyddog yr Ardal o Harddwch Naturiol Eithriadol bod:-

·arian wedi ei neilltuo i helpu i ariannu prosiectau a mentrau i ddarparu cludiant ar gyfer trigolion o ardaloedd mwyaf difreintiedig y Sir i’r Ardal o Harddwch Naturiol Eithriadol er mwyn iddynt elwa ar y gwasanaethau a'r amwynderau sydd ar gael yno;

·nid yw’r gwasanaeth bws i Lyn Brennig wedi bod yn rhedeg ers peth amser;

Eglurwyd bod cyfraniad pob awdurdod lleol tuag at gyllideb yr Ardal o Harddwch Naturiol Eithriadol wedi eu gosod gan ddefnyddio fformiwla y cytunwyd arni.  Dros y pum mlynedd nesaf bydd y gyllideb, trwy drafodaeth, wedi ei rhannu’n deg rhwng y tri Awdurdod (Sir Ddinbych, Sir y Fflint a Wrecsam).  Roedd y Cynghorydd Stuart Davies o'r farn, hyd nes bod pob awdurdod yn talu yr un faint â’i gilydd, na ddylai fod gan bob Awdurdod yr un nifer o aelodau ar y Cydbwyllgor.  Tra bo gan Aelodau'r Bartneriaeth ddyletswydd i weithredu’n bennaf er budd y Bartneriaeth a’r Ardal o Harddwch Naturiol Eithriadol, maent wedi eu penodi fel aelodau o’r Bartneriaeth oherwydd eu gwybodaeth o’r ardal a’u diddordeb yng ngwaith y sefydliad.

Cyn dod â’r drafodaeth i ben, cytunodd y Pwyllgor y dylid cynnal un o gyfarfodydd y Pwyllgor yn ardal Llangollen i’r dyfodol i alluogi aelodau lleol a Swyddog yr Ardal o Harddwch Naturiol Eithriadol i ddangos mannau o ddiddordeb i’r aelodau etholedig.  Roedd anogaeth hefyd ar yr Aelodau i fynychu’r nifer o ddigwyddiadau sydd wedi eu trefnu yn yr Ardal o Harddwch Naturiol Eithriadol yn ystod misoedd y gwanwyn a'r haf.

Yn dilyn trafodaeth bellach:-

PENDERFYNWYD – bod y Pwyllgor, yn amodol ar y sylwadau uchod, yn cefnogi’r cynnydd a wnaed o ran Llywodraethiant yr Ardal o Harddwch Naturiol Eithriadol, a’r prosiectau a gyflawnwyd yn ystod y deuddeg mis cyntaf.

Ystyried adroddiad gan y Rheolwr Gwasanaethau Cefn Gwlad a Threftadaeth (copi ynghlwm) sy'n rhoi manylion ymgynghoriad Cam 2 ar yr Adolygiad o Dirweddau Dynodedig yng Nghymru.

11:30am – 12pm

Roedd copi o'r adroddiad gan Reolwr Gwasanaethau Cefn Gwlad a Threftadaeth Sir Ddinbych wedi'u dosbarthu gyda'r papurau ar gyfer y cyfarfod.

Wrth gyflwyno'r adroddiad pwysleisiodd yr Aelod Arweiniol dros Hamdden, Ieuenctid, Twristiaeth a Datblygu Gwledig ei fod wedi gofyn i’r broses graffu ystyried yr alwad hon am dystiolaeth oherwydd fod arno eisiau barn y Cyngor ar yr argymhellion a nodir gan Weinidog Llywodraeth Cymru dros Adnoddau Naturiol yn dilyn Adolygiad Cam 1 o Dirweddau Dynodedig yng Nghymru.  Tynnodd sylw'r Aelodau yn benodol at y paragraff yn llythyr y Gweinidog at Gadeirydd yr Adolygiad, yn cyfeirio at y nifer presennol o Awdurdodau Cynllunio yng Nghymru.  Roedd yr Aelod Arweiniol yn bryderus yn benodol y gallai'r adolygiad hwn o bosibl arwain at sefyllfa lle byddai’r Cyngor yn colli ei bwerau cynllunio drwy'r drws cefn.  Roedd y Pwyllgor yn cytuno â barn yr Aelod Arweiniol ynglŷn â hyn a gwnaethant gais i’r llythyr drafft, a welir yn Atodiad 2, gael ei ddiwygio i adlewyrchu'r pwyntiau canlynol - a bod y pwynt ynglŷn â’r posibilrwydd o golli pwerau cynllunio yn ymddangos yn gynnar yn y llythyr, cyn ei gyflwyno ger bron y Cabinet am gymeradwyaeth.

·                 Caiff datganiad y Gweinidog ynglŷn â dyfodol Awdurdodau'r Parciau Cenedlaethol fel Awdurdodau Cynllunio a gostyngiad yn nifer yr awdurdodau cynllunio yng Nghymru ei ddehongli fel ffordd anuniongyrchol o gymryd y cyfrifoldeb dros gynllunio oddi wrth Gyngor Sir Ddinbych. Tra bo cefnogaeth i system gynllunio fwy gwydn, sy’n meddu ar sgiliau arbenigol, mae'r Pwyllgor yn credu mai’r lleoliad gorau ar gyfer y system yw’r awdurdod lleol;

·         Roedd newid yr enw o 'Ardaloedd o Harddwch Naturiol Eithriadol' i 'Tirweddau Cenedlaethol' yn ddiangen a byddai’n arwain at ddryswch.  Yn fwy na hynny, nid yw’r enw newydd yn mynegi gwerthoedd disgrifiadol nac emosiynol y tirweddau. Hefyd, ar y llwyfan Prydeinig, ni fyddai dynodiad mwyach yn cydorwedd gyda'r teulu o Ardaloedd o Harddwch Naturiol Eithriadol yn Lloegr a Gogledd Iwerddon.  Cwestiynwyd hefyd y costau a fyddai’n gysylltiedig â newid yr enw a’r isadeiledd sy'n gysylltiedig â’r newid – yn benodol arwyddion a'r neges y byddai hynny yn ei anfon yn ystod adeg o gynni;

·          Teimlai'r Aelodau fod enw presennol y dynodiad, y drefn lywodraethu a strwythurau gweithredol eraill ar gyfer Ardal o Harddwch Naturiol Eithriadol Bryniau Clwyd a Dyffryn Dyfrdwy yn fwy na digonol ac y dylid cadw pethau fel y maent;

·          dylid gohirio unrhyw gynigion o ran gwneud newidiadau i’r dynodiad hyd nes bod map newydd Llywodraeth Leol Cymru yn wybyddus a bod y cynigion yn ymwneud â strwythurau llywodraeth leol yng Nghymru i’r dyfodol yn gliriach. 

Er bod manteision posibl o gael un 'dynodiad' ar gyfer ardaloedd o harddwch naturiol, yn enwedig os caiff yr arian sydd ar gael ar hyn o bryd i'r Parciau Cenedlaethol ei ryddhau ar gyfer pob ardal o 'Dirwedd Cenedlaethol’ roedd yr Aelodau’n gryf o'r farn nad rŵan yw’r amser priodol i weithredu newidiadau o'r fath.  Mae angen cytuno yn gyntaf ar fap llywodraeth leol yng Nghymru i’r dyfodol a'r strwythurau i’w gefnogi.  Yn dilyn trafodaeth fanwl:-

PENDERFYNODD Y PWYLLGOR – yn amodol ar gynnwys y pwyntiau uchod yn yr ymateb drafft, i argymell cymeradwyo ymateb swyddogol y Cyngor Sir Ddinbych i Gam 2 yr Alwad am Dystiolaeth ar gyfer yr Adolygiad o Dirweddau Dynodedig yng Nghymru.

Ystyried adroddiad gan y Cydlynydd Archwilio (copi wedi’i amgáu) yn gofyn am adolygiad o raglen waith y pwyllgor a rhoi’r wybodaeth ddiweddaraf i’r aelodau ar faterion perthnasol.

12pm – 12:20pm

Roedd copi o adroddiad gan y Cydlynydd Archwilio, a oedd yn gofyn i'r Pwyllgor adolygu a chytuno ar ei Raglen Gwaith i'r Dyfodol ac yn rhoi diweddariad ar faterion perthnasol, wedi ei ddosbarthu gyda'r papurau ar gyfer y cyfarfod. 

Roedd copi o ‘ffurflen ar gyfer cynigion Aelodau’ wedi ei chynnwys yn Atodiad 2, roedd Rhaglen Gwaith i’r Dyfodol y Cabinet wedi’i chynnwys yn Atodiad 3, ac roedd tabl yn rhoi crynodeb o benderfyniadau diweddar y Pwyllgor a’r cynnydd a wnaed o ran eu gweithrediad wedi ei gynnwys yn Atodiad 4. 

Rhoddodd y Pwyllgor ystyriaeth i fersiwn ddrafft y Rhaglen Gwaith i'r Dyfodol ar gyfer cyfarfodydd y dyfodol, Atodiad 1, a chytunwyd ar y newidiadau a’r ychwanegiadau canlynol:-

                    25 Mehefin 2015:- Cytunodd yr Aelodau bod yr Aelodau Arweiniol perthnasol yn cael eu gwahodd i fynychu’r cyfarfod er mwyn ystyried tair eitem o fusnes sydd wedi eu rhestru ar y rhaglen gwaith i’r dyfodol.

30 Gorffennaf 2015:- Cyfeiriodd y Cynghorydd J. Butterfield at Adroddiad Clwstwr Cymunedau yn Gyntaf Sir Ddinbych, a gofynnodd am gynnwys adroddiad arbennig ar Faes Chwarae Antur y Rhyl.  Awgrymodd y Cynghorydd Butterfield y dylid darparu manylion mewn perthynas â:-

·                 cyfranogiad y Cyngor i'r prosiect.

·                 y cyfrifoldeb am redeg, rheoli a chyllido’r cyfleuster.

·                 nifer y staff cyflogedig a gwirfoddol sy’n cymryd rhan, a chadarnhad bod gwiriadau'r Swyddfa Cofnodion Troseddol wedi'u cynnal.

Cytunodd Cyfarwyddwr y Gwasanaethau Cymdeithasol a’r Cydlynydd Archwilio i fynd ar drywydd y materion a godwyd a'r cwestiynau a ofynnwyd gan yr Aelodau ynghylch Maes Chwarae Antur y Rhyl.

Roedd Grŵp Cadeiryddion ac Is-gadeiryddion Archwilio wedi cyfarfod ar 2 Ebrill.   Mewn ymateb i'r ffurflen gais gan swyddog cytunodd y Pwyllgor i gynnwys yn y rhaglen gwaith i’r dyfodol, ar gyfer mis Hydref 2015, eitem i ystyried adroddiad ar Gynllun Lleol Cefnogi Pobl Sir Ddinbych 2016/19, Atodiad 1 yr adroddiad.

Yn ystod cyfarfod mis Mawrth 2015 penderfynodd y Pwyllgor drefnu cyfarfod arbennig gyda chynrychiolwyr o Fwrdd Iechyd Prifysgol Betsi Cadwaladr.    Mae cynrychiolwyr o Fwrdd Iechyd Prifysgol Betsi Cadwaladr bellach wedi cadarnhau eu bod ar gael i fynychu cyfarfod ar 17 Medi 2015.

Roedd y Pwyllgor wedi gwahodd Awdurdod Tân ac Achub Gogledd Cymru i fynychu cyfarfod mis Gorffennaf i drafod effaith ac effeithiolrwydd cyfraniad cynyddol y Cyngor at gyllideb flynyddol yr Awdurdod Tân ac Achub.  Fodd bynnag, roeddent yn teimlo y byddai'n amhriodol iddynt fynychu ym mis Gorffennaf gan eu bod yn  ymgynghori ar eu Cynllun Lleihau Risg yn ystod yr Hydref.  O ganlyniad, mae’r eitem fusnes honno wedi ei haildrefnu dros dro ar gyfer mis Tachwedd 2015.

Yn dilyn cyfarfod blynyddol y Cyngor ar 12 Mai 2015 gofynnwyd i’r Pwyllgorau Archwilio benodi/ail-benodi Aelodau i wasanaethu ar y Grwpiau Herio Gwasanaethau.  Yn Atodiad 5 mae rhestr gyfredol o gynrychiolwyr y Pwyllgor.

Nodwyd bod enwau rhai o’r gwasanaethau wedi newid yn ystod y flwyddyn ddiwethaf.  Eglurodd aelodau o'r Grŵp Llafur oherwydd ansicrwydd ynghylch dyfodol eu haelodaeth ar y Pwyllgor na fyddent yn gallu cyflwyno enwebiadau.  Cytunwyd ar yr enwebiadau canlynol:-

·                 Y Cynghorydd T.M. Parry:-Gwasanaethau Priffyrdd ac Amgylcheddol.

·                 Y Cynghorydd M.Ll. Davies:- Y Gyfraith, Adnoddau Dynol a’r Gwasanaethau Democrataidd.

·                 Y Cynghorydd J.R. Bartley:- Cynllunio a Gwarchod y Cyhoedd.

Yn dilyn trafodaeth bellach:-

PENDERFYNWYD - yn amodol ar yr uchod, cymeradwyo’r Rhaglen Gwaith fel y caiff ei hamlinellu yn Atodiad 1 yr adroddiad.

Derbyn unrhyw ddiweddariadau gan gynrychiolwyr ar amrywiol Fyrddau a Grwpiau Cyngor

Ni dderbyniwyd unrhyw adroddiadau gan gynrychiolwyr y pwyllgor.

Daeth y Cyfarfod i ben am 12.10pm.