Agenda and minutes

Cytunodd Sylvia Harris i weithredu fel Cadeirydd gan nad oedd Maxine Bradshaw yn gallu bod yn y cyfarfod a chan nad oedd yna safle is-gadeirydd.

ADLEWYRCHIAD TAWEL

Dechreuodd y cyfarfod gydag ychydig funudau o adlewyrchu tawel.

Darllenodd y Cadeirydd lythyr a dderbyniwyd gan yr Aelod Cyfetholedig, Mairwenna Lloyd.  Roedd wedi ymddiswyddo yn ôl cyngor ei Doctoriaid oherwydd salwch.  Mynegodd y Cadeirydd ei thristwch o dderbyn ymddiswyddiad Aelod mor ymroddedig o’r Pwyllgor gan y bu Mairwenna’n aelod mor amlwg o CYSAG am flynyddoedd lawer.  Roedd y Pwyllgor am i’w dymuniadau gorau gael eu cyfleu i Mairwenna.  Yr Uwch Gynghorydd Dysgu Addysg Grefyddol i ysgrifennu at Mairwenna ar ran CYSAG.

Aelodau i ddatgan unrhyw fuddiannau personol neu niweidiol mewn unrhyw fusnes sydd wedi ei nodi i’w ystyried yn y cyfarfod hwn.

Ni chafwyd unrhyw ddatganiadau o fuddiant personol na niweidiol.

Hysbysiad o eitemau y dylid eu hystyried, ym marn y Cadeirydd, yn y cyfarfod fel mater o frys yn unol ag Adran 100B(4) Deddf Llywodraeth Leol 1972.

Ni chodwyd unrhyw faterion brys.

Gofynnodd yr Uwch Gynghorydd Dysgu AG (UGD:AG) am enwebiadau ar gyfer swydd is-gadeirydd.  Roedd yn ofynnol i’r enwebai fod yn gynrychiolwyr enwad crefyddol gan fod y Cadeirydd, Maxine Bradshaw, yn gynrychiolydd o Gymdeithas yr Athrawon.

Fe enwebwyd ac fe eiliwyd y Parch. Martin Evans-Jones yn is-gadeirydd.

PENDERFYNWYD penodi’r Parch. Martin Evans-Jones yn is-gadeirydd CYSAG.

I dderbyn a chymeradwyo cofnodion cyfarfod CYSAG Sir Ddinbych a gynhaliwyd ar Fehefin 29^ain 2012 (copi’n amgaeedig) ac i ystyried unrhyw faterion sy’n codi.

Cyflwynwyd cofnodion cyfarfod y Cyngor Ymgynghorol Sefydlog ar Addysg Grefyddol (CYSAG) a gynhaliwyd ar Fehefin 29^ain, 2012 (a ddosbarthwyd yn flaenorol).

Cywirdeb –

Tudalen 8 – dylai ddarllen “Fe aeth oddeutu 450 o ddisgyblion…” nid “150”.

Tudalen 9, Eitem 9 – dylai ddarllen Ysgol Esgob Morgan ac nid Ysgol Morgan.

Materion yn Codi –  Dim.

PENDERFYNWYD derbyn a chymeradwyo cofnodion y cyfarfod CYSAG a gynhaliwyd ar Fehefin 29^ain 2012 yn gofnod cywir, yn amodol ar yr uchod.

Cyflwyniad gan Gymdeithas Dyneiddwyr Prydain ar “Sut y gall Cymdeithas y Dyneiddwyr gefnogi gwaith CYSAG”.

Adroddodd yr Uwch Gynghorydd Dysgu AG (UGD:AG) bod Cymdeithas Dyneiddwyr Prydain wedi ei gwahodd i’r cyfarfod i roi cyflwyniad â’r teitl “Sut y gall Cymdeithas y Dyneiddwyr gynorthwyo gwaith CYSAG” ond, hyd yma, ni chafwyd unrhyw ymateb.  Cadarnhaodd yr UGD:AG y byddid yn ail-drefnu’r eitem ar gyfer cyfarfod yn y dyfodol.

PENDERFYNWYD gwahodd Cymdeithas Dyneiddwyr Prydain i gyfarfod CYSAG yn y dyfodol.

I ystyried adroddiad gan yr Uwch Ymgynghorydd Dysgu Addysg Grefyddol (copi’n amgaeedig) yn dadansoddi canlyniadau archwiliadau diweddar o bedair ysgol a gynhaliwyd rhwng Mawrth 2012 a Mai 2012.

Cyflwynodd yr UGD:AG Ddadansoddiad o’r Adroddiad Archwilio (a ddosbarthwyd yn flaenorol).

Roedd pedair ysgol wedi cael Archwiliad Estyn yn haf 2012, sef:

Ø      Ysgol Hiraddug, Dyserth

Ø      Ysgol Y Faenol, Bodelwyddan

Ø      Ysgol Uwchradd Dinbych

Ø      Ysgol Dinas Brân, Llangollen.

Codwyd y mater, o fewn yr adran brofiadau dysgu, fod Ysgol Y Faenol yn llai effeithiol yn hyrwyddo dinasyddiaeth fyd-eang.  Cadarnhaodd yr UGD:AG y byddai’n cysylltu ag Ysgol y Faenol i drafod pa gymorth y gellid ei roi i gynorthwyo â’r mater yma. 

Rhoddwyd awgrym y gellid rhoi gwahoddiad i Swyddog Gwella Ysgolion Ysgol y Faenol ddod i gyfarfod CYSAG yn y dyfodol i gael diweddariad.  Cytunwyd i hyn.

Codwyd mater pellach ynglŷn ag Ysgol Dinas Brân gan ei fod wedi ei ddatgan o fewn yr adroddiad nad oedd y rhan fwyaf o wersi tiwtor dosbarth a chynulliadau yn cyfarfod â’r gofyniad statudol ar gyfer y weithred ddyddiol o addoli cyfunol.  Esboniodd yr UGD:AG ei fod wedi ymweld ag Ysgol Dinas Bran a byddai’n mynd i gyfarfod y Gymuned Dysgu Proffesiynol nesaf i drafod sut y gellid unioni hyn ar gyfer y dyfodol.  Yn anffodus, roedd yr un broblem wedi ei hadrodd yn dilyn archwiliad blaenorol Estyn.  Yn dilyn yr adroddiad blaenorol, roedd swm mawr o waith wedi ei wneud efo’r ysgol ond roedd cynnal cysondeb dros nifer o flynyddoedd wedi bod yn anodd.

PENDERFYNWYD :-

• derbyn a nodi’r adroddiad;
• bod llythyr i’w anfon at bob un o’r pedair ysgol yn eu hysbysu bod eu Hadroddiad Archwilio wedi ei ystyried, eu llongyfarch am y nodweddion da a nodwyd ac yn eu hatgoffa o wasanaethau’r Uwch Gynghorydd Dysgu AG a Swyddogion Gwella Ysgolion o ran unrhyw feysydd sydd i’w datblygu neu faterion allweddol sydd angen delio â nhw;
• i ofyn i’r Awdurdod Lleol ddosbarthu llythyrau i’r ysgolion dan sylw.
• I wahodd Swyddog Gwella Ysgolion Ysgol y Faenol i gyfarfod CYSAG yn y dyfodol i gael diweddariad ynglŷn ag hyrwyddo dinasyddiaeth fyd-eang.

I ystyried adroddiad gan yr Uwch Ymgynghorydd Dysgu Addysg Grefyddol (copi’n amgaeedig) i gymeradwyo Adroddiad Blynyddol Drafft CYSAG.

Cyflwynodd yr Uwch Gynghorydd Dysgu AG (UGD:AG) yr adroddiad (a ddosbarthwyd yn flaenorol).

Adroddodd UGD:AG ei bod yn ofyniad statudol i CYSAG gynhyrchu Adroddiad Blynyddol o’i waith, ac roedd yr Adroddiad Blynyddol i’w roi ar gael i’r Adran Addysg a Sgiliau cyn Rhagfyr 31^ain 2012.  Mae’n rhaid i aelodau ystyried mai’r adroddiad drafft i law oedd ar gyfer 2011-2012 ac nid y flwyddyn gyfredol.  Gofynnodd yr UGD:AG am i’r adroddiad blynyddol gael ei wirio  o ran cywirdeb.  Y diwygiadau a oedd yn ofynnol oedd y canlynol:-

Ø      Tudalen 22  3bii – dylai hyn ddarllen “AdAS” nid APADGOS

Ø      Tudalen 24 APADGOS i’w ddiwygio i AdAS.

Ø      Tudalen 25 – ar waelod y dudalen roedd yna ddyblygu %.

Ø      Tudalen 26 - Dylai’r ail linell o’r top ddarllen “mwyafrif y disgyblion yn derbyn…..” dileu’r gair “i”.

Ø      Tudalen 31 – 3 b) ii) dylai hyn ddarllen AdAS nid APADGOS.

Ø      Tudalen 32 - Cynrychioli Enwadau Crefyddol - mae Methodistiaid â “Heulwen Ellis” fel yr aelod ond dylai ddarllen “Y Parch. Martin Evans-Jones” gan iddo gymryd drosodd gan Heulwen oddeutu 2 flynedd ynghynt.  Cadarnhaodd yr UGD:AG y byddai’n gwirio hyn.

Codwyd y mater ynglŷn â nifer y seddi aelodaeth gwag.  Dywedodd UGD:AG y bu yna anawsterau gyda chymryd y lleoedd aelodaeth.  Awgrymwyd y gellid cysylltu â Vicky Barlow, Prifathro newydd Ysgol Santes Ffraid, Dinbych i fod yn aelod o CYSAG a hefyd Isobel Barros-Curtis, Prifathro Ysgol Plas Brondyffryn, Dinbych ar ran y Cymdeithasau Athrawon.

PENDERFYNWYD :

• cymeradwyo’r adroddiad yn amodol ar yr uchod
• gofyn i’r Awdurdod Lleol drefnu i gyfieithu’r adroddiad i’r Gymraeg, ei brintio a’i ddosbarthu i bob ysgol a choleg yn Sir Ddinbych, a phob derbynnydd arall fel sy’n ofynnol yn ôl y Gyfraith ac fel sydd wedi ei nodi yn yr adroddiad
• i wahodd Prifathro Ysgol y Santes Ffraid, Dinbych a hefyd Brifathro Ysgol Plas Brondyffryn, Dinbych, i ddod yn aelodau CYSAG ar ran y Cymdeithasau Athrawon.

I dderbyn cofnodion cyfarfod diwethaf y Gymdeithas a gynhaliwyd ar Fehefin 29^ain 2012 (i ddilyn).

Fe ymddiheurodd yr Uwch Gynghorydd Dysgu AG i aelodau CYSAG am nad oedd cofnodion cyfarfod blaenorol CCYSAGauC wedi eu derbyn hyd yma, ond fe fydden nhw ar gael yng nghyfarfod nesaf CYSAG.

Rhoddodd yr UGD:AG adroddiad llafar.  Cynhaliwyd y CYSAGauC blaenorol yng Nghanolfan Busnes Conwy.  Rhoddodd  Lesley Frances o Ganolfan y Santes Fair gyflwyniad.  Roedd y Santes Fair wedi gwneud prosiect ar ddigwyddiad y Gadeirlan a gynhaliwyd y Nadolig diwethaf ac wedi nodi adborth gan ddisgyblion am eu profiad yn y Gadeirlan.  Dangoswyd fod y digwyddiad yma wedi cael effaith bositif ar y rheiny a oedd wedi bod yn bresennol yn enwedig ynglŷn â chrefydd Nadolig.

Yn ei gyflwyniad roedd gan Lesley dystiolaeth gadarn yn dangos cymaint yr oedd AG yn gwella safonau mewn ysgolion.  Roedd yna rai pobl a oedd â diddordeb gwirioneddol a phryder ynglŷn ag AG yn symud ymlaen ac yr oedd yn gam positif fod AG yn cael ei gynghori gan unigolion mor wybodus.  Dywedodd yr UGD:AG fod y cyflwyniad yn un eithriadol bositif. 

PENDERFYNWYD derbyn y cyflwyniad llafar.

I dderbyn diweddariad geiriol gan yr Uwch Ymgynghorydd Dysgu AG ynglŷn â chystadleuaeth i ysgolion i gynhyrchu adnoddau a fydd yn cynnwys Llythrennedd a Rhifedd mewn Addysg Grefyddol yng Nghyfnod Allweddol 2 a/neu Gyfnod Allweddol 3.

Rhoddodd yr UGD:AG adroddiad llafar yn hysbysu Aelodau o Lythrennedd/Rhifedd o fewn cystadleuaeth AG i ysgolion. 

Dywedodd yr UGD:AG wrth y Pwyllgor y cytunwyd yn y cyfarfod diwethaf i ddileu dyddiad cau’r gystadleuaeth llythrennedd a rhifedd tan ddiwedd y tymor yma.  Roedd hynny oherwydd mai dim ond un cais a dderbyniwyd cyn hynny.  Cytunwyd y byddid yn dod â’r 5 cais uchaf i’r cyfarfod nesaf.  UGD:AG i anfon e-bost at athrawon yn eu hannog i anfon cais i mewn.

Crybwyllwyd, yn hytrach na chael cystadleuaeth, y gellid ei hyrwyddo o fewn model gwahanol e.e. ymarfer rhannu.  Cadarnhaodd yr UGD:AG y rhoddwyd cynnig ar hyn yn y gorffennol.  Gobeithiwyd y byddai’r symbyliad o £200 o wobr yn annog mwy o geisiadau.

Cadarnhaodd UGD:AG y byddai’n gwirio hefyd a oedd

e-byst a anfonwyd i ysgolion yn cael eu dargyfeirio i’r Adrannau perthnasol.

PENDERFYNWYD bod yr UGD:AG i hysbysu ysgolion o’r gystadleuaeth.

Fe gynhelir cyfarfod nesaf CYSGA Sir Ddinbych am 10.00 a.m. ar ddydd Gwener, Chwefror 1^af 2013 yn Siambr y Cyngor, Ffordd Plas Nant, Prestatyn.

Y cyfarfod nesaf i’w gynnal ar ddydd Gwener, Chwefror 1^af 2013 am 10.00 a.m.

Lleoliad – Siambr y Cyngor, Ffordd Plas Nant, Prestatyn.

Wrth gau’r cyfarfod diolchodd y Cadeirydd i bawb am eu presenoldeb.

Daeth y cyfarfod i ben am 11.00 a.m.