Agenda and draft minutes

Dylai’r Aelodau ddatgan unrhyw gysylltiad personol neu gysylltiad sy'n rhagfarnu mewn unrhyw fater a nodwyd i'w ystyried yn y cyfarfod hwn.

Ni ddatganwyd unrhyw gysylltiad personol na chysylltiad sy'n rhagfarnu.

Rhybudd o eitemau y dylid, ym marn y Cadeirydd, eu hystyried yn y cyfarfod fel materion brys yn unol ag Adran 100B (4) Deddf Llywodraeth Leol, 1972.

Ni chodwyd unrhyw faterion brys.

Cadarnhau cywirdeb cofnodion cyfarfod y Pwyllgor Cynllunio a gynhaliwyd 18 Mai 2016 (copi wedi’i atodi).

Cyflwynwyd cofnodion cyfarfod y Pwyllgor Cynllunio a gynhaliwyd ar 18 Mai 2016.

Tudalen 17 – Eitem 11 – Cais rhif 45/2016/0201 - 14 Gareth Close, Y Rhyl.  Dywedodd y Cynghorydd Meirick Lloyd Davies nad oedd cofnod o'r bleidlais wedi ei gynnwys yn yr eitem hon.  Canlyniad y bleidlais oedd:

CANIATÁU - 15

YMATAL - 1

GWRTHOD - 2

PENDERFYNWYD –yn amodol ar yr uchod, derbyn a chymeradwyo cofnodion y cyfarfod a gynhaliwyd ar 18 Mai 2016 fel cofnod cywir.

Cyflwynwyd ceisiadau a gafwyd lle'r oedd angen penderfyniad gan y pwyllgor ynghyd â'r dogfennau ategol.  Cyfeiriwyd hefyd at yr wybodaeth ategol a gyflwynwyd yn hwyr (taflenni glas) a dderbyniwyd ar ôl cyhoeddi'r Rhaglen ac a oedd yn ymwneud â cheisiadau penodol.  Er mwyn caniatáu ceisiadau aelodau’r cyhoedd i siarad yn gyhoeddus, cytunwyd y dylid amrywio trefn y ceisiadau ar y rhaglen fel y bo’n briodol.

Ystyried cais i godi estyniad llawr cyntaf yn Ross Newydd, Abbey Road, Llangollen (copi ynghlwm)

Cyflwynwyd cais i godi estyniad cefn i'r llawr cyntaf yn Ross Newydd, Abbey Road, Llangollen

Siaradwyr Cyhoeddus-

Mr Edward De Groote (Yn erbyn) - nododd ei wrthwynebiadau i'r cais oherwydd mai dim ond 4-6 modfedd oedd yr estyniad arfaethedig i’r eiddo cyfagos oddi wrth ei wal a oedd yn cynnwys ffenestr liw.  Byddai'r estyniad yn achosi colli goleuni drwy'r ffenestr, nid oedd Mr De Groote yn gallu agor y ffenestr, ac nid oedd unrhyw bosibilrwydd o allu cynnal a chadw'r rhan o'i eiddo oherwydd agosrwydd yr estyniad.

Mr Chris Roberts (O blaid) - manylodd ar y rhesymau dros yr angen am y cais am estyniad i'r eiddo.  Cafwyd cyngor gan gynrychiolydd o Real Planning, Wrecsam a oedd wedi cael blynyddoedd lawer o brofiad yn y maes hwn.  Roedd yr ymgeisydd yn fodlon cynnwys contract cynnal a chadw i gymodi â’r cymydog.  Dywedodd yr ymgeisydd hefyd wrth yr Aelodau bod y cymydog wedi bod yn ymwybodol o’r estyniad arfaethedig cyn symud i mewn i'r eiddo.

Trafodaeth Gyffredinol – Cadarnhaodd yr Aelod Lleol, y Cynghorydd Rhys Hughes, ei fod wedi mynd ar archwiliad safle yn yr eiddo dan sylw ynghyd â'r Cynghorwyr Raymond Bartley, Bill Cowie, y Cynghorydd Tref Bob Lube a'r Swyddog Cynllunio Paul Griffin.  Y rheswm am yr ymweliad safle oedd asesu effaith y cynnig ar amwynderau deiliaid eiddo cyfagos.  Mynegodd y Cynghorydd Hughes ddiolch i Mr De Groote am ganiatáu i'r panel safle gael mynediad i'w gartref i asesu’r ffenestr a’r coridor dan sylw.

Cafwyd trafodaeth a chadarnhawyd bod deddfwriaeth yn ei lle ar gyfer mynediad ar gyfer cynnal yr eiddo ond roedd hyn yn y tu allan i gylch gwaith y Pwyllgor Cynllunio.

Cynnig - Cynigiodd y Cynghorydd Rhys Hughes y dylid caniatáu'r cais yn groes i argymhelliad y Swyddog oherwydd y ffaith fod y ffenestr yr effeithir arni yn gwasanaethu rhan o’r eiddo nad oes neb yn byw ynddo.  Eiliwyd gan y Cynghorydd Arwel Roberts.

PLEIDLAIS:

CANIATÁU - 7

YMATAL - 1

GWRTHOD - 11

PENDERFYNWYD y dylid GWRTHOD y cais yn unol ag argymhelliad y swyddog a nodwyd yn yr adroddiad.

Ystyried cais i godi adeilad amaethyddol ar dir ger Efail y Waen, Bodfari, (copi ynghlwm).

Cyflwynwyd cais i godi adeilad amaethyddol ar dir ger Efail Y Waen, Bodfari, Dinbych.

Siaradwr Cyhoeddus -

Huw Evans (O blaid) - eglurodd i Aelodau fod yr ymgeisydd wedi gofyn i Mr Evans roi sicrwydd ynghylch y defnydd y bwriedir ei wneud o'r adeilad amaethyddol.  Roedd hyn o ganlyniad i gam-wybodaeth a ddosbarthwyd yn ystod yr ymgynghoriad.  Roedd yr ymgeisydd yn bwriadu defnyddio'r adeilad ar gyfer defnydd amaethyddol yn unig.  Byddai maint ac adeiladwaith yr adeilad yn gweddu i adeiladau eraill ac yn cadw cymeriad yr ardal o'u cwmpas.

Trafodaeth Gyffredinol - Cadarnhaodd y Prif Swyddog Cynllunio ar dudalen 54 yr adroddiad, paragraff 1.6.1, fod y datganiad yn anghywir.  O edrych ar luniau’r cyflwyniad, roedd y tir ar ochr ogleddol y gwrych wedi cael ei werthu i'r ymgeisydd.  Roedd y tir ar yr ochr ddeheuol wedi bod yn destun cynnig, ond roedd yn parhau ym mherchenogaeth Sir Ddinbych.

Cynnig – Cynigodd y Cynghorydd Merfyn Parry argymhelliad y swyddog i gymeradwyo’r cais, a chafodd ei eilio gan y Cynghorydd Rhys Hughes.

PLEIDLAIS:

CYMERADWYO - 19

YMATAL - 0

GWRTHOD - 0

PENDERFYNWYD y dylid CYMERADWYO’R cais yn unol ag argymhelliad y swyddogion a nodwyd yn yr adroddiad.

Ystyried cais i amrywio amod rhif 2(a) caniatâd cynllunio 41/2010/1177/PF yn cyfyngu'r defnydd o ganolfan addysg a hyfforddiant coedwig i ddim mwy na 300 diwrnod mewn unrhyw flwyddyn galendr yn Warren Woods Cyf. The Warren, Ffordd yr Wyddgrug, Bodfari, Dinbych (copi ynghlwm).

Cyflwynwyd cais i ddileu amod rhif 2(a) caniatâd cynllunio 41/2010/1177/PF yn cyfyngu'r defnydd o ganolfan addysg a hyfforddiant coedwig i ddim mwy na 300 diwrnod mewn unrhyw flwyddyn, Warren Woods Cyf. The Warren, Ffordd yr Wyddgrug, Bodfari.

Siaradwr Cyhoeddus - Rob Waterfield (O blaid) – rhoddodd fanylion ar rinweddau'r cais. Eglurodd fod y caniatâd cynllunio ar hyn o bryd yn caniatáu 200 diwrnod mewn unrhyw flwyddyn ac oherwydd hyn roeddynt yn gwrthod gwaith oherwydd y cyfyngiad.  Felly, maent yn gofyn am gynnydd i 300 diwrnod mewn unrhyw flwyddyn, er mwyn gwneud defnydd priodol o'r cyfleuster.

Trafodaeth Gyffredinol – Cynigiodd yr Aelod Arweiniol dros Foderneiddio a Thai, y Cynghorydd Barbara Smith, ymddiheuriadau gan Mrs Elena Fowler, y cymydog a oedd wedi siarad yn y cyfarfod blaenorol yn erbyn cais arall a gyflwynwyd gan Warren Woods Ltd. Cadarnhaodd y Cynghorydd Smith fod Mr Waterfield wedi cytuno i dyfu’r gwrych ar y bwnd i gynyddu preifatrwydd i eiddo Mrs Fowler.  Cytunwyd i symud y man pasio a oedd i fod i gael ei ychwanegu y tu allan i’r fynedfa i eiddo Mrs Fowler.

Cadarnhaodd y Prif Swyddog Cynllunio bod yr amod ynglŷn â mannau pasio wedi ei ddiwygio i roi ystyriaeth i bryderon y cymydog.  Byddai’r amod i ddefnyddio'r safle am 300 diwrnod, yn golygu bod angen i'r ymgeisydd gadw cofrestr o nifer y diwrnodau o hyfforddiant y cynhaliwyd fel bod rheolaeth yn ei le i fonitro dyddiau agor.

Cynnig – Cynigodd y Cynghorydd Meirick Davies, ac eiliodd y Cynghorydd Win Mullen-James, i gymeradwyo’r cais yn unol ag argymhellion y swyddog a amlinellwyd yn yr adroddiad.

PLEIDLAIS:

CANIATÁU - 19

YMATAL - 0

GWRTHOD - 0

PENDERFYNWYD y dylid CYMERADWYO’R cais yn unol ag argymhelliad y swyddogion a nodwyd yn yr adroddiad.

Ystyried cais i godi storfa fwyd (Dosbarth 1A) ar Dir (Triongl Rhuddlan) yn Marsh Road, Rhuddlan (copi ynghlwm).

Cyflwynwyd cais ar gyfer codi siop fwyd (Dosbarth A1) ar Dir (Triongl Rhuddlan) yn Marsh Road, Rhuddlan, y Rhyl.

Siaradwr Cyhoeddus -

Bryn Richards, Cyfarwyddwr Eiddo Aldi gyfer canolbarth a gogledd Cymru (O blaid) – manylodd ar rinweddau'r cais.   Byddai'r siop yn darparu swyddi y mae eu dirfawr angen ar gyfer pobl leol, gan gymryd pwysau oddi ar siopau’r Rhyl a Phrestatyn a lleihau amseroedd teithio i gwsmeriaid.  Roedd y datblygwr wedi cytuno i sefydlu system reoli traffig i gynorthwyo gyda phryderon traffig.

Trafodaeth Gyffredinol - Cadarnhaodd yr Aelod Lleol, y Cynghorydd Arwel Roberts, ei fod wedi derbyn nifer o negeseuon gan drigolion lleol o blaid y datblygiad.  Mae nifer fawr o bobl oedrannus yn byw yn Rhuddlan a byddai'r datblygiad yn ysgafnhau'r pwysau arnynt i deithio i'r Rhyl neu Brestatyn i wneud eu siopa.

Cadarnhaodd yr Aelod Lleol, y Cynghorydd Ann Davies, hefyd ei bod wedi derbyn llythyrau o gefnogaeth gan drigolion lleol ar gyfer y datblygiad.  Roedd angen datblygu’r safle ac roedd yn gyfle da i greu swyddi ac annog buddsoddiad i'r pentref.

Cynnig – Cynigodd y Cynghorydd Arwel Roberts argymhelliad y swyddogion i gymeradwyo’r cais, ac eiliwyd hynny gan y Cynghorydd Cefyn Williams.

PLEIDLAIS:

CYMERADWYO - 19

YMATAL - 0

GWRTHOD - 0

PENDERFYNWYD y dylid CYMERADWYO’R cais yn unol ag argymhelliad y swyddogion a nodwyd yn yr adroddiad.

Ystyried cais i dorri 1 Castanwydden sydd wedi’i chynnwys yng Ngorchymyn Diogelu Coed Gwesty Talardy 1975 cyf A1 yng Ngwesty Talardy Y Roe, Llanelwy (copi ynghlwm).

Cyflwynwyd cais i dorri 1 Castanwydden sydd wedi’i chynnwys yng Ngorchymyn Diogelu Coed Gwesty Talardy 1975 cyf A1.

Siaradwr Cyhoeddus -

Colin Hardy (Yn erbyn) - eglurodd i Aelodau ei fod yn byw’n lleol a hefyd yn Gynghorydd Dinas.  Manylodd ar rinweddau cadw'r goeden.  Cyflogwyd arbenigwr coed annibynnol preifat ar ran y Cyngor Dinas.  Er y bu rhywfaint o fân ddifrod i'r goeden, argymhellodd yr arbenigwr y byddai adfywiad bron yn sicr os cyflwynwyd gostyngiad uchder o 50% a lleihau lledaeniad y canopi yn ôl at y prif goesyn gan arwain at docio cyffredinol ar y goeden. 

Trafodaeth Gyffredinol - cafwyd trafodaeth a hysbysodd y Cynghorydd Bill Cowie yr Aelodau fod coeden wedi cael ei thorri ar y safle yn flaenorol yn 2015 ac nad oedd coeden wedi’i phlannu yn ei lle eto.  Gan gyfeirio at adroddiad yr Ymgynghorydd Coed Annibynnol, cadarnhawyd nad oedd unrhyw arwyddion o bydredd, twf ffwng, newyn dŵr na chlefyd.  Roedd digonedd o dwf epicormig ar goesau’r goeden a fyddai'n parhau, gan awgrymu bod adfywiad bron yn sicr.  Byddai cael gwared ar bwysau a throsoledd yn gadael coeden iach, gynaliadwy mewn cyflwr mwy diogel.

Mynegodd y Cynghorwyr Julian Thompson Hill a Meirick Lloyd Davies eu cefnogaeth i achub y goeden a gwrthod y cais.

Cynnig – Cynigodd y Cynghorydd Bill Cowie y dylid gwrthod y cais yn erbyn argymhelliad y Swyddog, ac fe’i eiliwyd gan y Cynghorydd Dewi Owens.

PLEIDLAIS:

CYMERADWYO - 5

YMATAL - 1

GWRTHOD - 13

PENDERFYNWYD y dylid GWRTHOD caniatâd yn groes i argymhelliad y Swyddogion, oherwydd gwerth amwynder y goeden ac nad oedd y cynnig yn cyfiawnhau cael gwared ar y goeden.

Ystyried cais i wneud newidiadau i fynedfa bresennol i gerbydau yn Castell, Waen, Llanelwy (copi ynghlwm).

Cyflwynwyd cais am newidiadau i’r fynedfa bresennol i gerbydau yn Castell, Waen, Llanelwy.

Siaradwr Cyhoeddus -

Mrs Day (O blaid) – manylodd ar rinweddau’r cais oherwydd peryglon y trac cul a oedd yn cael trafferth ymdopi â'r cerbydau mawr a’r cerbydau dosbarthu sy'n blocio y ffordd.  Byddai'n dal gan yr eiddo cyfagos fynediad llawn a byddai'r ymgeisydd yn dilyn cyfarwyddiadau gan Adran Gynllunio Cyngor Sir Ddinbych.

Trafodaeth Gyffredinol – Cadarnhaodd yr Aelod Lleol, y Cynghorydd Barbara Smith fod y fynedfa i Castell yn beryglus iawn ac roedd y dogfennau cynllunio yn nodi’r materion dan sylw yn glir.  Ychydig o dir amaethyddol a fyddai’n cael ei golli ac roedd diogelwch yn hollbwysig.

Cynnig – Cynigodd y Cynghorydd Meirick Lloyd Davies argymhelliad y swyddog i gymeradwyo’r cais, ac fe’i eiliwyd gan y Cynghorydd Merfyn Parry.

PLEIDLAIS:

CANIATÁU - 17

YMATAL - 0

GWRTHOD - 0

PENDERFYNWYD y dylid CYMERADWYO’R cais yn unol ag argymhelliad y swyddogion a nodwyd yn yr adroddiad.

Ar y pwynt hwn (11.00 am) cafwyd toriad.

Ailddechreuodd y cyfarfod am 11.15 a.m.

Ystyried cais i Amrywio amod rhif 10 o ganiatâd cynllunio rhif 10 caniatâd cynllunio cyfeirnod 01/867/97 i ddarllen 'Bydd danfon nwyddau i'r siop yn cael ei gyfyngu i’r oriau rhwng 5:00-23:00 bob dydd a bydd danfon nwyddau i'r orsaf betrol a chiosg yn cael ei gyfyngu i oriau 6:30-22:00 bob dydd' yn Wm Morrison Supermarkets Plc., Ffordd Y Ffair, Dinbych (copi ynghlwm).

Cyflwynwyd cais i amrywio amod rhif 10 o ganiatâd cynllunio cyfeirnod 01/867/97 i nodi 'Cyfyngir dosbarthiad nwyddau i'r siop i rwng 5:00-23:00 o’r gloch bob dydd a chyfyngir dosbarthiad nwyddau i'r orsaf betrol a chiosg i 6:30-22:00 o'r gloch bob dydd' yn Wm Morrison Supermarkets Plc., Ffordd Y Ffair, Dinbych.

Cynnig – Cynigodd y Cynghorydd Meirick Lloyd Davies argymhelliad y Swyddog i gymeradwyo’r cais, ac fe’i eiliwyd gan y Cynghorydd Merfyn Parry.

PLEIDLAIS:

CYMERADWYO - 19

YMATAL - 0

GWRTHOD - 0

PENDERFYNWYD y dylid CYMERADWYO’R cais yn unol ag argymhelliad y swyddogion a nodwyd yn yr adroddiad.

Ystyried adroddiad yn argymell bod Aelodau yn cymeradwyo Canllawiau Cynllunio Atodol drafft ar “Ddatblygiad Preswyl” fel sail ar gyfer ymgynghori cyhoeddus (copi ynghlwm).

Cyflwynodd y Cynghorydd David Smith, Aelod Arweiniol y Parth Cyhoeddus adroddiad yn cyflwyno dogfen ddrafft Canllaw Cynllunio Atodol (CCA) ar Ddatblygiad Preswyl fel sail ar gyfer ymgynghoriad cyhoeddus.  Atgoffodd y Cynghorydd Smith aelodau o wahanol gamau’r broses cyn i’r Pwyllgor Cynllunio fabwysiadu’r dogfennau CCA yn derfynol.

Cynnig – Cynigodd y Cynghorydd Meirick Lloyd Davies argymhelliad y swyddog, ac fe’i eiliwyd gan y Cynghorydd Bob Murray.

PLEIDLAIS:

O BLAID - 18

YMATAL - 0

YN ERBYN - 0

PENDERFYNWYD bod yr aelodau'n cytuno ar y Canllawiau Cynllunio Atodol drafft ar Ddatblygu Preswyl, fel y nodwyd yn Atodiad 1 sydd ynghlwm i’r adroddiad, i ymgynghori’n gyhoeddus arno am leiafswm o wyth wythnos.

Ystyried adroddiad yn argymell bod Aelodau yn cymeradwyo Canllawiau Cynllunio Atodol drafft ar “Rwymedigaethau Cynllunio” fel sail ar gyfer ymgynghori cyhoeddus (copi ynghlwm).

Cyflwynodd y Cynghorydd David Smith, Aelod Arweiniol y Parth Cyhoeddus adroddiad yn cyflwyno dogfen ddrafft Canllaw Cynllunio Atodol (CCA) ar Rwymedigaethau Cynllunio fel sail ar gyfer ymgynghoriad cyhoeddus.  Atgoffodd y Cynghorydd Smith Aelodau o wahanol gamau’r broses cyn i’r Pwyllgor Cynllunio fabwysiadu’r dogfennau CCA yn derfynol.

Cynnig – Cynigodd y Cynghorydd Merfyn Parry i gyd-fynd ag argymhelliad y swyddog, ac fe’i eiliwyd gan y Cynghorydd Julian Thompson-Hill.

PLEIDLAIS:

O BLAID - 19

YMATAL - 0

YN ERBYN - 0

PENDERFYNWYD bod yr aelodau'n cytuno ar y Canllawiau Cynllunio Atodol drafft ar Rwymedigaethau Cynllunio, fel y nodwyd yn Atodiad 1 sydd ynghlwm i’r adroddiad, i ymgynghori’n gyhoeddus arno am leiafswm o wyth wythnos.

Ar y pwynt hwn, cadarnhaodd y Cynghorydd David Smith y byddai'r Grŵp Llywio'r CDLl nesaf yn cael ei gynnal am 10.00am ar 20 Gorffennaf yng Rhuthun.

Daeth y cyfarfod i ben am 11.30 a.m.