Agenda and draft minutes

Yr Aelodau i ddatgan unrhyw gysylltiad personol neu gysylltiad sy'n rhagfarnu

mewn unrhyw fater a nodwyd i'w ystyried yn y cyfarfod hwn.

Datganodd y Cynghorydd Graham Timms gysylltiad sy’n rhagfarnu yn eitem 10, Rhybudd o Gynnig, oherwydd ei fod yn berchen ar gartref gwyliau

Hysbysiad o eitemau y dylid, ym marn y Cadeirydd, eu hystyried yn y cyfarfod

fel materion brys yn unol ag Adran 100B(4) Deddf Llywodraeth Leol 1972.

Cynigodd y Cyngor Llawn eu cydymdeimlad i'r Cynghorydd Barry Mellor y bu ei wraig Antoinette farw yn ddiweddar

Cynigwyd cydymdeimlad i deulu'r Cyn-gynghorydd Robert Eric Barton a fu farw yn ddiweddar.

Anfonwyd cydymdeimlad i'r AM, Ann Jones, fu farw ei gŵr yn ddiweddar.

Cynhaliwyd munud o dawelwch.

Nododd yr Arweinydd, y Cynghorydd Hugh Evans bod recordio cyfarfodydd wedi cael ei godi a bod y Swyddog Monitro wedi cynghori Arweinwyr Grŵp. 

Cwestiynodd y Cynghorydd Paul Penlington y bu achlysuron lle'r oedd un Cynghorydd yn benodol wedi recordio a rhannu cipluniau o’r sgrin ar y cyfryngau cymdeithasol, a fydd hyn yn cael ei drafod heddiw?

Ymatebodd y Cynghorydd Hugh Evans y bydd yn cael sylw trwy'r protocol ac yn cael ei rannu ond ni fyddai'n cyfeirio at unrhyw Gynghorydd penodol yn ystod y Cyngor Llawn.

Derbyn cofnodion cyfarfod y Cyngor Sir a gynhaliwyd ar 13 Hydref 2020

(copi ynghlwm).

Cyflwynwyd cofnodion cyfarfod y Cyngor Llawn a gynhaliwyd ar 13 Hydref 2020.

CYNIGIODD y Cynghorydd Alan James dderbyn y cofnodion, EILWYD gan y Cynghorydd Bob Murray.

Pleidleisiwyd a chytunwyd yn unfrydol i dderbyn y cofnodion.

PENDERFYNWYD derbyn cofnodion cyfarfod y Cyngor a gynhaliwyd ar 13 Hydref 2020 a’u cadarnhau fel cofnod cywir.

Ystyried adroddiad gan Bennaeth y Gwasanaethau Cyfreithiol, AD a Democrataidd (copi ynghlwm)

Cyflwynodd yr Arweinydd, y Cynghorydd Hugh Evans, yr adroddiad Bargen Dwf Derfynol (a ddosbarthwyd eisoes), i’r Cyngor gyrraedd Cytundeb Bargen Derfynol ar gyfer Bargen Dwf Gogledd Cymru gyda Llywodraeth Cymru a Llywodraeth y DU.

Yn 2016, mabwysiadodd Bwrdd Uchelgais Economaidd Gogledd Cymru Weledigaeth Twf ar gyfer Economi Gogledd Cymru.  Yn ddiweddarach, cafodd y Weledigaeth honno ei mabwysiadau gan y 6 Cyngor yng Ngogledd Cymru.  Yn seiliedig ar y Strategaeth Gweledigaeth Twf, fe baratowyd cais Bargen Dwf a’i gytuno gan bob partner, yn cynnwys Cyngor Sir Ddinbych, gan weithio gyda Llywodraethau Cymru a’r Deyrnas Unedig a’r sector preifat ym mis Hydref 2018. Ym mis Tachwedd 2019, cytunodd Bwrdd Uchelgais Economaidd Gogledd Cymru a Llywodraethau Cymru a’r Deyrnas Unedig ar Benawdau'r Telerau ar gyfer Cytundeb Bargen Derfynol i gael ei gwblhau tuag at ddiwedd 2020.

Roedd Bwrdd Uchelgais Economaidd Gogledd Cymru wedi ymrwymo i gyflawni Cytundeb Bargen Derfynol gyda’r ddwy Lywodraeth cyn diwedd Rhagfyr 2020.

Ar 24 Tachwedd 2020, fe ystyriodd y Cabinet y dogfennau sydd ynghlwm wrth yr adroddiad yma ac argymhelliad y Pwyllgor Craffu Partneriaethau y dylai’r Cabinet a’r Cyngor gefnogi a chymeradwyo’r dogfennau sydd eu hangen er mwyn cwblhau’r Fargen Dwf Derfynol.   Penderfynodd y Cabinet i gefnogi’n ffurfiol y dogfennau angenrheidiol i gwblhau’r Fargen Dwf Derfynol a chymeradwyo’r rhannau hynny o Gytundeb Llywodraethu 2 sy’n ymwneud â swyddogaethau gweithredol.  Fe argymhellodd y Cabinet bod y Cyngor yn cymeradwyo’n ffurfiol y dogfennau fel y’i nodwyd yn yr adroddiad.

Pwysleisiodd yr Arweinydd nod y Fargen Dwf i adeiladu economi mwy cynaliadwy a chadarn yng Ngogledd Cymru mewn partneriaeth â’r sectorau cyhoeddus a phreifat, gyda chymorth £240 miliwn o gyllid gan Lywodraethau’r Deyrnas Unedig a Chymru dros y 15 mlynedd nesaf. Nod y Fargen Dwf oedd darparu buddsoddiad o hyd at £1.1 biliwn i economi Gogledd Cymru er mwyn creu 3,400 – 4,200 o swyddi newydd a chynhyrchu £2 - £2.4 biliwn mewn gwerth ychwanegol gros net erbyn 2036. Darparodd yr Arweinydd gyflwyniad ar y cyd â’r Cyfarwyddwr Corfforaethol: Yr Economi a‘r Parth Cyhoeddus; Pennaeth y Gwasanaethau Cyfreithiol, Adnoddau Dynol a Democrataidd, a’r Pennaeth Cyllid, gan drafod meysydd o’r Fargen Dwf.

Cadarnhawyd mai Cyngor Gwynedd oedd yr awdurdod lletya a’r corff atebol.

Yn ystod trafodaethau codwyd y pwyntiau canlynol:

·         Mynegodd y Cynghorydd Paul Penlington bryderon ynghylch y ganran o bŵer niwclear yn y ddogfennaeth.  Cadarnhaodd y swyddogion nad oedd pŵer niwclear yn rhan arwyddocaol a’r prosiectau.  Roedd pŵer gwynt, dŵr ac ati hefyd yn brosiectau pŵer wedi’u cynnwys yn y prosiect.  Nododd swyddogion nad oedd ganddynt unrhyw bryderon ynghylch ynni niwclear.

·         Roedd ymrwymiad gwleidyddol i gyllid y llywodraeth o £240 miliwn ac roedd trafodaethau gyda'r ddwy lywodraeth yn parhau ar faterion manwl, heb unrhyw fynegiant y byddai'r ymrwymiad gwleidyddol yn cael ei dynnu'n ôl. Fodd bynnag, nid oedd unrhyw ymrwymiad cyfreithiol i ddarparu’r cyllid tan i’r Fargen gael ei harwyddo.

·         Eglurodd y swyddogion y cyfrifiadau cyllido ar gyfer cyfraniadau partner gan gadarnhau y bod prosiectau ar draws y rhanbarth yn cael eu cyllido’n gyfartal, ond ar gyfer prosiectau unigol lle byddai partneriaid penodol yn derbyn mwy o fuddion (adeilad/ased ac ati), disgwylid iddynt dalu am y gofyniad benthyca mewn cysylltiad â’r prosiect hwnnw.

·         Mynegwyd pryderon nad oedd ardaloedd gwledig wedi eu hamlygu yn y Fargen Dwf a chadarnhaodd yr Arweinydd a’r swyddogion fod yna ffrwd ariannu arall ar gael ar gyfer ardaloedd gwledig.  Buddsoddir mewn ardaloedd gwledig ond nid yn uniongyrchol trwy’r Fargen Dwf.

·         Byddai pob penderfyniad a wneir gan Fwrdd Uchelgais Economaidd Gogledd Cymru yn cael ei gyhoeddi gan bob Awdurdod Lleol.  Byddai adroddiad chwarterol yn cael ei gynhyrchu a byddai’n cael ei gyflwyno ddwy waith  ...  view the full Cofnodion text for item 5.

YN Y CYFFORDD HON (11.40 A.M.) ROEDD TORRI 15 COFNOD

Y CYFARFOD A DDERBYNIWYD AM 11.55 A.M.

Ystyried adroddiad gan yr Uwch Swyddog, Cynllunio Strategol a Thai (copi ynghlwm)

Cyflwynodd yr Aelod Arweiniol Tai a Chymunedau, y Cynghorydd Tony Thomas, Adroddiad Tai a Digartrefedd Sir Ddinbych (a gylchredwyd ymlaen llaw) i geisio cymeradwyaeth yr Aelodau i fabwysiadu Strategaeth Tai a Digartrefedd ddiwygiedig Sir Ddinbych ac i gefnogi’r Cynllun Gweithredu cysylltiedig.

Cymeradwyodd y Cyngor Strategaeth Dai bresennol Sir Ddinbych ar 1 Rhagfyr 2015 ac roedd yn nodi gweledigaeth a nodau tai’r Cyngor ar gyfer cyfnod o bum mlynedd. Yn bwysig, roedd yn cynorthwyo’r Cyngor i gyflawni blaenoriaethau’r Cynllun Corfforaethol drwy ddarparu fframwaith a chynllun gweithredu i ddarparu (gan weithio gyda phartneriaid) pob swyddogaeth sy’n gysylltiedig â thai (preifat a chyhoeddus). Roedd y strategaeth hefyd yn cyd-fynd â’r Cynllun Datblygu Lleol.

Mae’r strategaeth bresennol yn nodi 5 “thema” er mwyn targedu ardaloedd blaenoriaeth ar gyfer gweithredu:

·         Mwy o gartrefi i ddiwallu'r angen a’r galw lleol

·         Creu cyflenwad o dai fforddiadwy

·         Sicrhau cartrefi diogel ac iach

·         Cartrefi a chymorth i bobl ddiamddiffyn

·         Hyrwyddo a chefnogi cymunedau

Roedd gan y Strategaeth Dai hon Grŵp Llywio a oedd yn cynnwys Aelodau Arweiniol, Penaethiaid Gwasanaeth, Rheolwyr a Swyddogion ac roedd ganddynt gynllun gweithredu clir a mecanweithiau monitro. Cafodd Grŵp Strategol Tai a Digartrefedd ei sefydlu i ddatblygu dull mwy cydlynol a bu iddynt gytuno i uno’r Strategaeth Dai a’r Strategaeth Ddigartrefedd yn un strategaeth wedi’i diweddaru.

Cadeiriwyd y grŵp hwn gan yr Aelod Arweiniol Tai a Chymunedau (y Cynghorydd Tony Thomas) ochr yn ochr â’r Aelod Arweiniol Lles ac Annibyniaeth (y Cynghorydd Bobby Feeley).

Blaenoriaeth ddioded y grŵp oedd datblygu dull corfforaethol i fynd i'r afael â digartrefedd gan fod pandemig Covid-19 wedi rhoi llawer mwy o bwysau ar y gwasanaeth.

Yn ystod y trafodaethau codwyd y pwyntiau canlynol:

·         Materion yn ymwneud â defnyddio gwesty’r Westminster i ddarparu llety i bobl ddigartref. Cadarnhawyd fod gan bawb a dderbyniodd lety weithiwr cefnogi a’u bod hefyd wedi derbyn asesiad iechyd a lles a chynlluniau gofal. Mae gwaith yn mynd rhagddo i sicrhau bod unigolion gyda phroblemau alcohol a chyffuriau yn derbyn cymorth.

·         Mae adroddiadau am broblemau ymddygiad gwrthgymdeithasol yn yr ardaloedd lle darparwyd llety i bobl ddigartref. Cadarnhawyd y bydd Grŵp Aelodau Ardal y Rhyl yn trafod y strategaeth.

·         Mae tai gwag wedi bod yn broblem ac mae gwaith yn parhau i gysylltu â pherchnogion y tai hyn i geisio’u helpu i ddod â’r tai gwag yn ôl ar y farchnad dai.

·         Mae Cyngor Sir Ddinbych wedi bod yn gweithio gyda Chyngor Bwrdeistref Sirol Conwy ar fenter Tai yn Gyntaf, menter wedi’i hariannu ar wahân.

·         Gofynnwyd i’r argymhelliad nodi bod y “Cyngor yn cymeradwyo’r Strategaeth Tai a Digartrefedd a’r Cynllun Gweithredu cysylltiedig fel fframwaith ar gyfer bwrw ymlaen â materion tai a digartrefedd”. Roedd pawb yn cytuno y dylid ychwanegu digartrefedd.

Ar y pwynt hwn, diolchodd yr Aelodau i’r Tîm Digartrefedd am eu gwaith caled yn ystod y pandemig.

Yn dilyn trafodaeth, cynigiodd y Cynghorydd Tony Thomas yr argymhellion ac eiliwyd hynny gan y Cynghorydd Bobby Feeley, a chafwyd pleidlais.

Pleidleisiwyd yn unfrydol o blaid yr adroddiad.

PENDERFYNWYD bod y Cyngor yn cymeradwyo’r Strategaeth Tai a Digartrefedd a'r Cynllun Gweithredu cysylltiedig fel fframwaith ar gyfer bwrw ymlaen â materion tai a digartrefedd.

Ystyried adroddiad gan y Rheolwr AD a'r Arbenigwr Talu a Gwobrwyo (copi ynghlwm)

Cyflwynodd yr Aelod Arweiniol Cyllid Perfformiad ac Asedau Strategol, y Cynghorydd Julian Thompson-Hill Adroddiad Datganiad ar Bolisi Tâl (a ddosbarthwyd yn flaenorol).

Cyflwynodd yr Aelod Arweiniol Cyllid, Perfformiad ac Asedau Strategol, y Cynghorydd Julian Thompson-Hill yr adroddiad (a ddosbarthwyd yn flaenorol) i geisio cymeradwyaeth y Cyngor o’r Datganiad ar Bolisi Tâl a oedd wedi cael ei ddrafftio yn unol â gofynion 38 (1) y Ddeddf Lleoliaeth 2011 ac yn cynnwys holl drefniadau tâl cyfredol ar gyfer grwpiau’r gweithlu o fewn y Cyngor, gan gynnwys Prif Swyddogion a’r gweithwyr ar y cyflogau isaf.

Cadarnhawyd y dylai’r adroddiad fod wedi cael ei gyflwyno i’r Cyngor Llawn ym Mawrth 2020, ond yn sgil pandemig Covid cafodd ei oedi.  Byddai adroddiad yn cael ei gyflwyno i’r Cyngor ym Mawrth 2021 ar gyfer y flwyddyn ariannol ganlynol.

Codwyd y Cyflog Byw Go Iawn gan aelodau a chadarnhawyd y byddai adroddiad mewn perthynas  â’r Cyflog Byw Go Iawn yn cael ei gyflwyno i’r Cyngor Llawn ym mis Ionawr neu fis Chwefror 2021.

Yn dilyn trafodaethau, cynigodd y Cynghorydd Julian Thompson-Hill yr argymhellion, ac fe’i heiliwyd gan y Cynghorydd Tony Thomas a chynhaliwyd pleidlais.

Pleidleisiodd y mwyafrif o aelodau o blaid yr adroddiad, ni wnaeth unrhyw un ymatal ac fe bleidleisiodd dau aelod yn erbyn yr adroddiad.  Felly,

PENDERFYNWYD bod y Cyngor yn cytuno ag argymhelliad y Panel Tâl Uwch Arweinyddiaeth o ran newid Polisi Tâl 2020/21 (copi yn Atodiad A).

Ystyried adroddiad gan Pennaeth y Gwasanaethau Cyfreithiol, AD a Democrataidd a'r Prif Archwilydd Mewnol (copi ynghlwm)

Cyflwynodd y Cynghorydd Barry Mellor (Cadeirydd y Pwyllgor Llywodraethu Corfforaethol) Adroddiad Blynyddol y Pwyllgor Llywodraethu Corfforaethol (a ddosbarthwyd yn flaenorol) i hysbysu bob Aelod am waith y Pwyllgor yn 2019/20.

Roedd gofyn statudol i'r Cyngor, dan ddarpariaethau Mesur Llywodraeth Leol Cymru 2011, fod â Phwyllgor Archwilio. Y Pwyllgor yw pwyllgor dynodedig y Cyngor at y diben hwn.

Mae Cyfansoddiad y Cyngor yn gofyn bod aelodaeth y Pwyllgor yn wleidyddol gytbwys ac yn cynnwys chwe Aelod Etholedig. Nid oes gofyniad statudol i'r Pwyllgor fod yn wleidyddol gytbwys. Ond mae’n rhaid cael o leiaf un aelod lleyg annibynnol sef, ar hyn o bryd, Mr Paul Whitham.

Mae Swyddog Adran 151 y Cyngor, Swyddog Monitro a Phennaeth Archwilio Mewnol, neu eu cynrychiolwyr, yn bresennol ymhob cyfarfod. Yn ychwanegol at hynny, mynychir pob cyfarfod gan swyddogion o Swyddfa Archwilio Cymru.

Yn ystod y cyfnod dan sylw yn yr adroddiad hwn, mae’r Pwyllgor wedi cael nifer o adroddiadau blynyddol mewnol ar faterion yn ymwneud â llywodraethu.

Yn ogystal, mae’r Pwyllgor wedi cynnal hunanasesiad o’i berfformiad ei hun a’i gymharu â’r arfer orau bresennol. Gwnaed yr asesiad hwn yn erbyn rhestr wirio o ganllaw’r Sefydliad Siartredig Cyllid Cyhoeddus a Chyfrifyddiaeth (CIPFA) “Pwyllgorau Archwilio – Canllaw Ymarferol ar gyfer Awdurdodau Lleol a’r Heddlu Rhifyn 2018”.

Cymerodd y Cyng. Barry Mellor y cyfle hwn i ddiolch i gynrychiolwyr Swyddfa Archwilio Cymru a'r holl swyddogion sy’n mynychu’r cyfarfodydd Llywodraethu Corfforaethol. Yn benodol, cydnabu faint o waith a wneir gan y tîm Archwilio Mewnol. Diolchwyd i bob aelod o’r Pwyllgor gan fod y rhaglenni yn aml yn hir a’r aelodau bob amser yn paratoi’n dda ar gyfer y cyfarfodydd.

Diolchwyd hefyd i’r Aelodau Arweiniol am eu presenoldeb mewn Pwyllgorau ac am eu cefnogaeth.

Mynegodd aelodau eu diolch i’r Cadeirydd ac aelodau’r Pwyllgor Llywodraethu Corfforaethol am eu holl waith caled.

Cafwyd pleidlais a chytunwyd yn unfrydol i nodi Adroddiad Blynyddol y Pwyllgor Llywodraethu Corfforaethol ac Archwilio.

PENDERFYNWYD bod Aelodau o’r Cyngor Llawn yn nodi cynnwys Adroddiad Blynyddol y Pwyllgor Llywodraethu Corfforaethol ac Archwilio.

Cyflwynodd y Cynghorydd Joan Butterfield, ar ran y Grŵp Llafur, y Rhybudd o Gynnig canlynol ar gyfer sylw’r Cyngor Llawn (copi ynghlwm)

Cyflwynodd y Cynghorydd Joan Butterfield, ar ran y Grŵp Llafur, y Rhybudd o Gynnig canlynol ar gyfer sylw’r Cyngor Llawn:

Bod Cyngor Sir Ddinbych yn:

Ysgrifennu at holl ddarparwyr Gofal Cymdeithasol sector preifat y sir, yn nodi y dylent adolygu eu polisïau absenoldeb salwch, fel y byddant o leiaf yn talu’r un ddarpariaeth salwch â mae staff Awdurdodau Lleol yn dderbyn, gan gynnwys tâl llawn i staff sydd ar absenoldeb salwch oherwydd coronafeirws.

Bydd hyn yn helpu i gyfrannu’n llawn tuag at ymladd y feirws peryglus hwn.

Yn ystod y drafodaeth dywedodd y Cynghorydd Paul Penlington fod Llywodraeth Cymru wedi delio â’r Rhybudd o Gynnig ac felly cynigiodd ddiwygiad bod CSDd yn ysgrifennu at ddarparwyr preifat i wneud yn siŵr eu bod yn ymwybodol o’r cynllun ychwanegol.

Cynigiodd y Cynghorydd Paul Penlington ddiwygio’r Rhybudd o Gynnig ac eiliwyd hynny gan y  Cynghorydd Rhys Thomas.

Cafwyd pleidlais ar y diwygiad. Pleidleisiodd y rhan fwyaf o’r aelodau o blaid y diwygiad; pleidleisiodd 9 yn erbyn ac ymatalodd un aelod. Felly cymeradwywyd y diwygiad i'r Rhybudd o Gynnig.

Yna cynhaliwyd pleidlais ar y cynnig a gymeradwywyd.  Pleidleisiodd y rhan fwyaf o’r aelodau o blaid; 0 yn erbyn ac un aelod yn ymatal.

Felly:

PENDERFYNWYD fod Cyngor Sir Ddinbych yn ysgrifennu at ddarparwyr preifat i wneud yn siŵr eu bod yn ymwybodol o’r cynllun ychwanegol.

Cyflwynodd y Cynghorydd Mabon ap Gwynfor y Rhybudd o Gynnig canlynol ar gyfer sylw’r Cyngor Llawn (copi ynghlwm)

Cyflwynodd y Cynghorydd Mabon ap Gwynfor y Rhybudd o Gynnig canlynol ar gyfer sylw’r Cyngor Llawn:

Mae Cyngor Sir Ddinbych yn gal war Lywodraeth Cymru i newid y Ddeddf Gynllunio fel ei bod yn orfo dol cael hawl cynllunio i drosi tŷ anedd yn dŷ haf /uned wyliau, ac yn addasu’r fframwaith bolisi i ganiatáu gosod trothwyon o ran uchafswm niferoedd o dai haf mewn unrhyw ardal.

Ar y pwynt hwn, datganodd y Cynghorydd Graham Timms gysylltiad sy'n rhagfarnu oherwydd ei fod yn berchen ar gartref gwyliau ac fe adawodd y cyfarfod ar gyfer yr eitem hon.

Cynigodd y Cynghorydd Mark Young ddiwygiad bod y Rhybudd o Gynnig yn cael ei gyflwyno i’r Pwyllgor Craffu ar gyfer trafodaeth bellach. Eiliwyd hyn gan y Cynghorydd Martyn Holland.

Pleidleisiwyd ar y diwygiad. Pleidleisiodd yr Aelodau’n unfrydol o blaid y diwygiad.  Felly, cymeradwywyd y diwygiad i’r Rhybudd o Gynnig.

Yna, pleidleisiwyd ar y prif gynnig fel a ganlyn. Pleidleisiodd yr Aelodau’n unfrydol o blaid cyflwyno’r Rhybudd o Gynnig i’r Pwyllgor Craffu ar gyfer trafodaeth bellach.

Felly:

PENDERFYNWYD cyflwyno’r Rhybudd o Gynnig i’r Pwyllgor Craffu ar gyfer trafodaeth bellach.

Rhybudd o Gynnig gan Grŵp y Ceidwadwyr Cymreig i'w ystyried gan y Cyngor Llawn (copi ynghlwm)

Tynnodd y Cynghorydd Martyn Holland y Rhybudd o Gynnig yn ôl.

Ystried Rhaglen Gwaith i’r Dyfodol y Cyngor (copi ynghlwm).

Cyflwynodd Pennaeth y Gwasanaethau Cyfreithiol, Adnoddau Dynol a Democrataidd Raglen Gwaith i'r Dyfodol y Cyngor (dosbarthwyd yn flaenorol).

26 Ionawr 2021 - Cyflog Byw Go Iawn i’w ychwanegu

23 Chwefror 2021 - Datganiad Polisi Tâl i’w ychwanegu

PENDERFYNWYD yn amodol ar yr uchod, y dylid cymeradwyo a nodi rhaglen gwaith i'r dyfodol y Cyngor.

Y CYFARFOD A GASGLWYD YN 2.15 P.M.