Agenda and draft minutes

Dylai’r Aelodau ddatgan unrhyw gysylltiad personol neu gysylltiad sy'n rhagfarnu ag unrhyw fater a nodwyd yn un i'w ystyried yn y cyfarfod hwn.

Datganodd y Cynghorwyr Jason McLellan, Martyn Holland a Meirick Lloyd Davies gysylltiad personol.

Rhybudd o eitemau y dylid, ym marn y Cadeirydd, eu hystyried yn y cyfarfod fel materion brys yn unol ag Adran 100B (4) Deddf Llywodraeth Leol, 1972.

Dim materion brys.

Talodd y Cadeirydd deyrnged i’r Cynghorydd Raymond Bartley a fu farw ychydig cyn y Nadolig. 

Rhoddwyd teyrngedau gan y Cynghorydd Gwyneth Kensler, ar ran Plaid Cymru, y Cynghorydd Joe Welch ar ran y Grŵp Annibynnol, y Cynghorydd Colin Hughes ar ran y Grŵp Llafur a'r Cynghorydd Martyn Holland, ar ran y Grŵp Gwleidyddol.

Cydymdeimlwyd â gwraig a theulu’r Cynghorydd Bartley ac, fel arwydd o barch, fe safodd pawb a oedd yn bresennol mewn tawelwch yn deyrnged iddo.

Yna siaradodd y Cadeirydd ynglŷn â Diwrnod Cofio’r Holocost.   Darllenodd gerdd, Yn gyntaf fe ddaethon nhw, gyda’r Arweinydd, y Cynghorydd Hugh Evans, yn darllen cerdd o’r enw “Birdsong” i ddilyn, a oedd wedi cael ei hysgrifennu’n arbennig ar gyfer thema eleni gan Gillian Clarke, Bardd Cenedlaethol Cymru.

Nodi ymrwymiadau dinesig a ymgymerwyd gan Gadeirydd y Cyngor (copi ynghlwm).

Roedd rhestr o ddigwyddiadau dinesig a fynychwyd gan y Cadeirydd a’r Is-Gadeirydd ar gyfer y cyfnod rhwng 5 Rhagfyr 2016 ac 27 Ionawr 2017 wedi’i dosbarthu cyn y cyfarfod.

Canmolodd y Cadeirydd Sarah Dixon, y Cydlynydd Cyfoethogi Cwricwlwm am drefnu’r digwyddiadau Harry Potter yn yr ysgolion.

Roedd y Cadeirydd hefyd wedi mynychu dangosiad agoriadol y ffilm Star Wars, a oedd â’r gŵr lleol, Spencer Wilding, yn chwarae rhan Darth Vader.

PENDERFYNWYD derbyn y rhestr o ymrwymiadau dinesig a fynychwyd gan y Cadeirydd.

Derbyn cofnodion cyfarfod y Cyngor Sir a gynhaliwyd ar 6 Gorffennaf 2016 (copi ynghlwm).

Cyflwynwyd cofnodion cyfarfod y Cyngor Llawn ar 6 Rhagfyr 2016.

Dymunodd y Cynghorydd Arwel Roberts ddiolch i Bennaeth y Gyfraith, Adnoddau Dynol a Gwasanaethau Democrataidd am y gwaith a wnaed ynghylch “Dronau”.  Estynnodd y Cynghorydd Roberts ei ddiolch i’r Cynghorydd Jason McLellan a’r Grŵp Cadeiryddion ac Is-Gadeiryddion Craffu a drafododd y ‘Dronau’ a hefyd y busnesau a oedd yn dibynnu arnynt.

PENDERFYNWYD yn amodol ar yr uchod, cadarnhau cofnodion y cyfarfod a gynhaliwyd ar 6 Rhagfyr 2016 fel cofnod cywir a bod y Cadeirydd yn eu llofnodi.

Ystyried adroddiad (copi ynghlwm) sy’n rhoi diweddariad ar y broses o bennu'r gyllideb ac yn manylu ar gynigion i gael eu cymeradwyo gan y Cyngor Sir i osod cyllideb refeniw'r Cyngor ar gyfer 2017/2018.

Cyflwynodd yr Aelod Arweiniol Cyllid, Cynllun Corfforaethol a Pherfformiad, y Cynghorydd Julian Thompson Hill adroddiad Cynigion Terfynol - Cyllideb 2017/18 (a ddosbarthwyd yn flaenorol).

Roedd yr adroddiad yn nodi goblygiadau Setliad Llywodraeth Leol 2017/2018 a chynigion i gwblhau'r gyllideb ar gyfer 2017/2018.

Roedd yn ofynnol yn ôl y gyfraith i'r Cyngor bennu cyllideb gytbwys y gellir ei chyflawni cyn dechrau pob blwyddyn ariannol a gosod lefel sy'n deillio o Dreth y Cyngor i ganiatáu i filiau gael eu hanfon at breswylwyr.

Pwrpas yr adroddiad oedd darparu trosolwg o broses y gyllideb ac effaith Setliad Llywodraeth Leol ac ystyried cynigion i osod y gyllideb ar gyfer 2017/18, gan gynnwys lefel Treth y Cyngor.

Derbyniwyd y Setliad Llywodraeth Leol Terfynol ar gyfer 2017/18 ar 21 Rhagfyr ac roedd yn darparu cynnydd o ran arian parod o 0.6%.  Roedd y Setliad Dros Dro yn rhoi cynnydd o 0.5%.  Er bod y Setliad yn darparu ar gyfer cynnydd o ran arian parod, mewn termau real roedd yn doriad gan nad oedd yn rhoi unrhyw ystyriaeth i chwyddiant na phwysau o ran y galw ar wasanaethau. 

Gan fod y cyllid ar gyfer y Cynllun Cwtogi Treth y Cyngor wedi cael ei rewi am sawl blwyddyn, roedd yn rhaid i’r Cyngor ariannu cost y cynnydd mewn Treth y Cyngor a amcangyfrifwyd i fod yn £350,000.  Byddai’r cynigion yn caniatáu £200,000 o fuddsoddiad newydd mewn blaenoriaethau.

Lefel y cynnydd mewn Treth y Cyngor a gynigwyd oedd 2.75%.  Roedd hyn yn unol â rhagdybiaethau ynghylch chwyddiant am y flwyddyn i ddod ac roedd yn debyg o fod yn is na lefel cyfartalog y cynnydd yng Nghymru.

Yn y Gweithdy Cyllideb ym mis Tachwedd 2016, bu peth trafodaeth ynghylch lefel cynnydd Treth y Cyngor ac effaith canlyniadol lefelau cynnydd is neu uwch ar y gyllideb.

O ystyried yr ystod o bwysau roedd y Cyngor yn ei wynebu, yn arbennig y pwysau parhaus ar gyllidebau gofal cymdeithasol a thrywydd cyffredinol chwyddiant, credid fod cynnydd o 2.75% yn ddarbodus ac yn gynaliadwy.

Atgoffwyd yr Aelodau gan yr Arweinydd, y Cynghorydd Hugh Evans, mai hon fyddai'r gyllideb olaf fyddai’r Cyngor cyfredol yn ei phennu a hon fyddai’r bwysicaf.  Tymor y Cyngor cyfredol fu’r un mwyaf heriol i Sir Ddinbych ei wynebu, ond yn ystod y tymor hwnnw, roedd Cyngor Sir Ddinbych yn parhau i fod yn un o'r cynghorau oedd yn perfformio orau yng Nghymru.  Byddai angen i’r Cyngor newid sut byddai’n darparu gwasanaethau yn y dyfodol.

Aeth yr Arweinydd ymlaen i ddiolch i’r Cynghorydd Julian Thompson-Hill, Aelod Arweiniol Cyllid, y Cynllun Corfforaethol a Pherfformiad a’r Tîm Cyllid am eu gwaith yn ystod tymor y cyngor cyfredol.

Yn ystod y drafodaeth, soniwyd am y materion canlynol:

·       Effeithlonrwydd ynni – roedd y cyngor yn aelod o fframwaith caffael a oedd yn golygu’r cyfraddau gorau oedd ar gael ar gyfer nwy a thrydan.  Roedd pris olew wedi codi a oedd wedi golygu cynnydd mewn prisiau.  Mae’r Awdurdod Lleol yn gwneud ei orau i gadw costau ynni cyn lleied â phosibl e.e. gosod goleuadau LED yn lle goleuadau stryd, ac roedd gwaith wedi cael ei wneud ynghylch rhoi caeadau ar byllau nofio er mwyn cadw ynni.  Roedd llawer o adeiladau Fictoraidd yn perthyn i’r Cyngor nad oedd yn effeithlon o ran ynni, felly, roedd amrywiaethau o ran costau allanol.

·       Doedd gan Sir Ddinbych ddim mewnbwn ym mhraesept yr Heddlu gan eu bod yn gorff ymreolaethol y mae Sir Ddinbych yn casglu arian ar eu rhan ac yn anfon y swm maent yn ddisgwyl atynt.  Hon oedd y ffordd fwyaf effeithlon i’r holl elfennau gael eu casglu gyda’i gilydd.

·       Roedd yr holl grantiau a gyhoeddwyd hyd  ...  view the full Cofnodion text for item 6.

Ystyried adroddiad (copi ynghlwm) i fabwysiadu Rheoliadau Cynlluniau Gostyngiadau Treth y Cyngor a Gofynion Rhagnodedig (Cymru) 2013, a Rheoliadau Diwygiadau i Ofynion Rhagnodedig (Cymru) 2016 mewn perthynas â blwyddyn ariannol 2017/2018.

Cyflwynodd yr Aelod Arweiniol Cyllid, Cynllun Corfforaethol a Pherfformiad, y Cynghorydd Julian Thompson Hill yr Adroddiad Cynllun Gostyngiad Treth y Cyngor 2017/18 (a ddosbarthwyd yn flaenorol).

Roedd Deddf Diwygio Lles 2012 yn cynnwys darpariaethau i ddiddymu budd-dal treth y cyngor yn ei ffurf bresennol ar draws y DU.  O 31 Mawrth 2013 roedd budd-dal treth y cyngor wedi dod i ben ac roedd y cyfrifoldeb am ddarparu cefnogaeth ar gyfer treth y cyngor a'r arian sy'n gysylltiedig ag ef, wedi cael ei drosglwyddo i Lywodraeth Cymru.  Roedd Llywodraeth Cymru, mewn partneriaeth ag awdurdodau lleol yng Nghymru, wedi cyflwyno cynllun newydd i ddarparu cymorth treth y cyngor a fabwysiadwyd gan y Cyngor ym mis Ionawr 2013.

CYNIGODD y Cynghorydd Julian Thompson-Hill argymhellion yr adroddiad, ac fe’i EILIWYD gan y Cynghorydd Colin Hughes.

PLEIDLAIS:

O blaid - 34

Ymatal - 0

Yn erbyn – 0

PENDERFYNWYD bod Aelodau yn:

·       Mabwysiadu'r Cynlluniau Lleihau Treth y Cyngor a Rheoliadau Gofynion Rhagnodedig (Cymru) 2013, a Rheoliadau Diwygiadau i Ofynion Rhagnodedig (Cymru) 2017, o ran blwyddyn ariannol 2017/18.

·       Cymeradwyo’r 3 elfen ddewisol o’r cynllun, a ddangosir yn adran 4.2, yn cael eu parhau yn 2017/18.

Ar y pwynt hwn (12.10 pm) cafwyd egwyl o 25 munud.

Ailddechreuodd y cyfarfod am 12.35 p.m.

Ystyried adroddiad (copi ynghlwm) i gymeradwyo datblygiad “Parc Dŵr ac Atyniad Hamdden y Rhyl”.

Cyflwynodd yr Arweinydd, y Cynghorydd Hugh Evans yr adroddiad (a ddosbarthwyd yn flaenorol) i’r Aelodau ystyried cynigion i ddatblygu ‘Parc Dŵr ac Atyniad Hamdden y Rhyl’ – teitl dros dro (RWLA).

Ystyriwyd mai uwchraddio’r ddarpariaeth hamdden a thwristiaeth ar yr arfordir ar gyfer y dyfodol oedd elfen fwyaf hanfodol adfywiad cyffredinol y Rhyl - gan ei wneud yn lle gwell i fyw yn ogystal ag yn lle gwych i ymweld ag ef.  Roedd y gadwyn o ddigwyddiadau a arweiniodd at y cynnig datblygu wedi estyn dros 6 mlynedd.

Roedd yn bwysig nodi bod y cynigion ar gyfer y ‘Glannau’ newydd wedi’u datblygu mewn ffordd oedd yn cwblhau’r cynllun adfywio arfordirol cyfan ac, oherwydd ei leoliad, roedd yn ymddwyn fel catalydd i ddenu mwy o ymwelwyr i’r Rhyl ac arwain mwy o bobl trwy Ganol y Dref.

Roedd y lleoliad yn agos at ganol y dref wedi cael ei ystyried yn bwysig iawn o ran goblygiadau adfywio a chynhyrchu ymwelwyr y datblygiad.

Yn ystod tymor y cyngor hwn roedd mwy o gynllunio strategol wedi digwydd.  Byddai Canolfan Ddŵr y Rhyl yn fuddsoddiad ar gyfer cenedlaethau’r dyfodol gyda’r gobaith byddai’r Rhyl yn symud o fod yn brosiect adfywio heriol i fod yn un datblygu economaidd.

Cadarnhaodd y Cyfarwyddwr Corfforaethol: Uchelgais Economaidd a Chymunedol wrth yr Aelodau mai’r strategaeth gyfredol oedd i symud y Rhyl i fod yn ardal datblygu economaidd ac mai’r prosiect allweddol oedd i gynyddu’r ymwelwyr â’r dref i greu mwy o swyddi a chaniatáu mwy o gyfleoedd ar gyfer pobl leol. 

Roedd y cam adfywio blaenorol wedi creu cartrefi newydd gyda phreswylwyr egnïol a byddai gwaith yn awr yn dechrau gyda datblygu’r glannau. 

Dangosodd yr Asesiad Effaith Economaidd gyllid ychwanegol yn dod i mewn i’r dref ynghyd â 60 o swyddi ychwanegol ar gyfer pobl leol a fyddai mewn lle da ar gyfer y swyddi hynny pan fyddent ar gael.

Rhoddodd y Pennaeth Cyfleusterau, Asedau a Rheoli gyflwyniad i roi mwy o fanylion am atyniad Parc Dŵr a Hamdden y Rhyl.  Rhoddwyd eglurhad ynghylch y ddau opsiwn a’r rhesymau pam fod swyddogion yn ystyried Opsiwn 2 i fod yr opsiwn a ffafrir, ar sail cost ond yn bwysicaf oll profiad y cwsmer a phreswylwyr.

Roedd Cyngor Tref y Rhyl am wneud cyfraniad cyfalaf o £2filiwn, ynghyd â chyfraniad oddi wrth Lywodraeth Cymru o £800,000. Byddai’r cyfraniadau hyn yn gostwng cyfraniad cyfalaf y Cyngor a chostau Benthyca Darbodus gan tua £159,000.

At ddibenion yr achos busnes, roedd y targedau incwm yn geidwadol iawn a’r disgwyl oedd y byddai’r rhain yn uwch.  Roedd partneriaethau lleol yn gyfforddus bod tybiaethau incwm yr achos busnes yn seiliedig ar breswyliaeth o 60% yn gyraeddadwy erbyn blwyddyn 5 a’u bod yn sylfaen ddarbodus ar gyfer cyllidebu.   Hanes cyfredol y Cyngor (model hamdden cryf – Nova) oedd lefel preswyliaeth o 75% ar draws ei gyfleusterau eraill.

Y camau nesaf oedd ddechrau’r broses gynllunio gydag ymgysylltu cyhoeddus llawn ynglŷn ag elfennau cynllunio'r cynllun.  Pe cafwyd caniatâd cynllunio ym mis Gorffennaf 2017, byddai’r prosiect yn dechrau ar y safle ym mis Medi 2017 gyda’r cyfleuster newydd yn agos yn gynnar yn 2019.

Eglurodd y Pennaeth Cyllid yr opsiynau ar gyfer ariannu blynyddoedd 1-4.

Cadarnhaodd yr Aelod Arweiniol - Cyllid, y Cynllun Corfforaethol a Pherfformiad mai’r argymhelliad oddi wrth y Grŵp Buddsoddi Strategol oedd cytuno ar Opsiwn 2. Rhoddwyd sicrwydd bod hwn wedi bod yn brosiect a adolygwyd yn llym iawn.    Byddai’n dibynnu’n helaeth ar y preswyliaeth yn taro’r targed o 60% ac erbyn blwyddyn 5 byddai’r Cyngor yn edrych ar gynnig niwtral o ran cost ar gyfer y prosiect.

Yn ystod trafodaeth codwyd  ...  view the full Cofnodion text for item 8.

Cyflwynodd y Cynghorwyr Mark Young y Rhybudd o Gynnig canlynol i’w ystyried gan y Cyngor Llawn:

“Bod Cyngor Sir Ddinbych yn newid parcio ar gyfer Deiliaid Bathodyn Glas i gael eu heithrio rhag talu (parcio am ddim) mewn meysydd parcio a reolir gan Gyngor Sir Ddinbych, ac felly yn trin pobl anabl yn deg ac yn gyfartal yn ein Awdurdod ac ar draws Gogledd Cymru.”

Cyflwynodd y Cynghorydd Mark Young y Rhybudd o Gynnig canlynol i'w ystyried gan y Cyngor Llawn.

 “Bod Cyngor Sir Ddinbych yn gwneud parcio am ddim ar gyfer deiliaid Bathodyn Glas ym meysydd parcio’r Cyngor yn Sir Ddinbych, a thrwy hynny'n trin pobl anabl mewn modd teg a chyfartal yn ei Awdurdod ac ar draws Gogledd Cymru".

Eglurodd Pennaeth y Gwasanaethau Cyfreithiol, Adnoddau Dynol a Gwasanaethau Democrataidd mai’r sefyllfa gyfreithiol mewn perthynas â deiliaid bathodyn glas oedd i ddarparu hygyrchedd nid parcio am ddim.  Awgrymwyd bod y mater yn cael ei anfon i’r Grŵp Cadeiryddion ac Is-Gadeiryddion Archwilio i’w drafod mewn Pwyllgor Archwilio, yn dilyn hynny, byddai’r broses yn darparu argymhelliad i’r swyddogaeth Weithredol.

Ar y pwynt hwn, cododd pawb eu dwylo i gytuno â hynny’n unfrydol.

PENDERFYNWYD bod y Rhybudd o Gynnig ynglŷn â pharcio am ddim ar gyfer deiliaid bathodyn glas yn cael ei gyflwyno i’r grŵp Cadeiryddion ac Is-Gadeiryddion Archwilio i’w ystyried.

Ystyried Rhaglen Gwaith i’r Dyfodol y Cyngor (copi ynghlwm).

Cyflwynodd y Swyddog Monitro/ Pennaeth y Gwasanaethau Cyfreithiol, Adnoddau Dynol a Democrataidd Raglen Gwaith i'r Dyfodol y Cyngor (a ddosbarthwyd yn flaenorol).

14 Chwefror 2017 – Adolygu’r Cydbwysedd Gwleidyddol – byddai’r eitem hon bellach yn cael ei thrafod yng nghyfarfod blynyddol y Cyngor i'w gynnal ar 23 Mai 2017.

4 Ebrill 2017 – Cydnabyddiaeth i Aelodau – byddai’r eitem hon bellach yn cael ei thrafod yng nghyfarfod blynyddol y Cyngor i'w gynnal ar 23 Mai 2017.

PENDERFYNWYD, yn amodol ar yr uchod, y dylid cymeradwyo a nodi Rhaglen Gwaith i'r Dyfodol y Cyngor.

Daeth y cyfarfod i ben am 2.20 pm.