Agenda and draft minutes

Cyn dechrau’r cyfarfod dywedwyd nad yw’r Cadeirydd, y Cynghorydd Ann Davies, yn gallu mynychu'r cyfarfod ac, yn ei absenoldeb, y byddai’r Is-gadeirydd, y Cynghorydd Win Mullen-James (a elwir yn ‘Cadeirydd’ o hyn allan), yn cadeirio cyfarfod y Cyngor Llawn.

Dylai’r Aelodau ddatgan unrhyw gysylltiad personol neu gysylltiad sy'n rhagfarnu mewn unrhyw fater a nodwyd i'w ystyried yn y cyfarfod hwn.

Dim.

Rhybudd o eitemau y dylid, ym marn y Cadeirydd, eu hystyried yn y cyfarfod fel materion brys yn unol ag Adran 100B (4) Deddf Llywodraeth Leol, 1972.

Bu i’r Cynghorydd Huw Jones ddiolch i bawb am y negeseuon caredig, y cardiau a’r anrhegion a dderbyniodd yn ystod ei salwch diweddar.

Bu i’r Cadeirydd longyfarch Band Pres Ieuenctid Sir Ddinbych am ennill Gwobr Band Pres Ieuenctid Gogledd Cymru yn ddiweddar.

Nodi ymrwymiadau dinesig a ymgymerwyd gan Gadeirydd y Cyngor (copi ynghlwm).

Roedd rhestr o ddigwyddiadau dinesig a fynychwyd ar ran y Cyngor gan y Cadeirydd a’r Is-Gadeirydd ar gyfer y cyfnod rhwng 1 Hydref 2016 a 25 Tachwedd 2016 wedi’i dosbarthu cyn y cyfarfod.

Roedd y Cynghorydd Ann Davies wedi gofyn am gael tynnu sylw at Wobrau Chwaraeon Cymunedol Sir Ddinbych gan fod cymaint o dalent o fewn y sir. Y siaradwr gwadd oedd Mark Colbourne MBE, cyn-seiclwr tîm paralympaidd Cymru.

Diolchodd y Cynghorydd Brian Blakeley i Siân Davies (Rheolwr Gwyliau a Digwyddiadau) am ei gwaith caled wrth drefnu digwyddiadau, gan gyfeirio at ei digwyddiad diweddaraf, sef Pops Nadolig y Rhyl ddydd Sul 4 Rhagfyr. Casglwyd bron i £1000 ar gyfer plant na fyddent fel arall wedi cael parti nac anrhegion Nadolig.

Dywedodd y Cynghorydd Huw Hilditch-Roberts fod yna nifer fawr o swyddogion o fewn y sir yn gwneud gwaith da ac y dylid diolch iddynt hwythau hefyd am eu gwaith caled.

PENDERFYNWYD derbyn y rhestr o ymrwymiadau dinesig y bu i’r Cadeirydd a'r Is-gadeirydd eu mynychu.

Derbyn cofnodion cyfarfod y Cyngor Sir a gynhaliwyd 18 Hydref 2016 (copi ynghlwm).

Cyflwynwyd cofnodion cyfarfod y Cyngor Llawn ar 18 Hydref 2016.

Materion yn codi:

Tudalen 12 - Dywedodd Pennaeth y Gwasanaethau Cyfreithiol, Adnoddau Dynol a Democrataidd bod ar yr Aelodau eisiau gwahodd Gwasanaeth Ambiwlans Gogledd Cymru i Bwyllgor Archwilio. Mae wedi derbyn cadarnhad yn ddiweddar y bydd uwch gynrychiolydd o'r Gwasanaeth Ambiwlans yn mynychu cyfarfod Pwyllgor Archwilio yn y flwyddyn newydd. Nid yw’r dyddiad wedi’i gadarnhau eto.

PENDERFYNWYD yn amodol ar yr uchod, cadarnhau cofnodion y cyfarfod a gynhaliwyd ar 18 Hydref 2016 fel cofnod cywir a bod y Cadeirydd yn eu llofnodi.

Ystyried adroddiad gan y Rheolwr Gwarchod y Cyhoedd (copi ynghlwm) i'r Cyngor fabwysiadu Grŵp Llywio Cymraeg ffurfiol o fewn Cyfansoddiad y Cyngor.

Cyflwynodd Aelod Arweiniol Datblygu Cymunedol, y Cynghorydd Huw Jones, adroddiad Grŵp Llywio’r Gymraeg (dosbarthwyd eisoes) er mwyn i’r Cyngor sefydlu Pwyllgor Llywio’r Gymraeg ffurfiol o fewn cyfansoddiad y Cyngor.

Mae Comisiynydd y Gymraeg wedi cyflwyno Safonau'r Gymraeg i’r Awdurdod. Mae’r rhan fwyaf o’r safonau wedi bod mewn grym ers 1 Ebrill 2016. Mae safonau pellach, mewn perthynas â datblygu polisi, wedi dod i rym ar 1 Hydref 2016.

Mae Sir Ddinbych, sydd ar y cyfan yn sir ddwyieithog a chanddi ddiwylliant a threftadaeth gyfoethog, yn annog dwyieithrwydd wrth ryngweithio o ddydd i ddydd gyda chymunedau, trigolion a staff.

Mae gan y Cyngor Grŵp Llywio'r Gymraeg a gadeirir gan Aelod Arweiniol Datblygu Cymunedol. Mae’r Grŵp Llywio yn cynnwys cynrychiolwyr swyddogion, sef Cyfarwyddwr Corfforaethol: Cymunedau, Rheolwr Gwarchod y Cyhoedd ac Arweinydd Tîm Cyfathrebu.

Yn ystod y drafodaeth i ddilyn, codwyd y materion canlynol:

·       Bydd y pwyllgor yn cynnwys 11 cynghorwr gan gynnwys, lle bo’n bosib, yr Aelod Cabinet Arweiniol sy’n gyfrifol am faterion yn ymwneud â’r Gymraeg.

·       Bydd y pwyllgor yn wleidyddol gytbwys, gyda sedd yr Aelod Cabinet Arweiniol yn cyfri tuag at gyfrifiadau’r cydbwysedd gwleidyddol. Bydd aelodaeth y pwyllgor ar agor i gynghorwyr gweithredol a chynghorwyr anweithredol. Cyfrifoldeb y grwpiau gwleidyddol fydd dyrannu cynghorwyr i’r pwyllgor.

·       Ni fydd unrhyw gyfyngiad ar gynghorwyr yn mynychu cyfarfodydd fel sylwedyddion ac eithrio pan ystyrir materion lle byddai’n rhaid i’r aelod ddatgan cysylltiad personol neu gysylltiad sy’n rhagfarnu.

·       Gan y byddai'r pwyllgor yn bwyllgor cyhoeddus, byddai rhwydd hynt i aelodau o'r cyhoedd, ysgolion a chyrff eraill fynychu. Byddai'r pwyllgor yn gallu galw ar dystion arbenigol a defnyddwyr gwasanaeth i lywio ei waith.

·       Cadarnhawyd y byddai’r pwyllgor yn bwyllgor ymgynghorol ac na fyddai ganddo bwerau dirprwyol i wneud penderfyniadau oni bai am rai meysydd o’i drafodion ei hun e.e. penodi cadeirydd, cadarnhau cofnodion a.y.b.

·       Mae swyddogion y Gwasanaethau Democrataidd wedi addasu cylch gorchwyl Grŵp Llywio'r Gymraeg ac fe gynigir defnyddio’r cylch gorchwyl hwn ar gyfer Pwyllgor Llywio'r Gymraeg.

·       Bydd y Cynllun Gweithredu yn cael ei ddatblygu yn defnyddio’r strategaeth a bydd yn cael ei gyflwyno i Grŵp Llywio'r Gymraeg ddydd Gwener 9 Rhagfyr 2016.

·       Byddai’r pwyllgor yn monitro’r cynnydd wrth weithredu Safonau’r Gymraeg.

·       Nod y pwyllgor fydd hyrwyddo'r Gymraeg o fewn y sir.

Cafodd yr argymhelliad ei gynnig gan y Cynghorydd Meirick Lloyd Davies a’i eilio gan y Cynghorydd Cefyn Williams.

PHENDERFYNWYD bod y Cyngor yn:

(i)               Mabwysiadu Pwyllgor Llywio'r Gymraeg a chymeradwyo ei ychwanegiad at brif strwythur pwyllgor y Cyngor;

(ii)              Cadarnhau cwmpas/cylch gwaith Pwyllgor Llywio'r Gymraeg.

Cyflwydnodd y Cynghorydd Arwel Roberts y rhybudd o Gynnig canlynol i’w ystyried gan y Cyngor llawn.

“Tynnwyd fy sylw at y ffaith fod dronau’n hedfan o gwmpas Rhuddlan a'r Rhyl yn gyson ar hyn o bryd. Mae technoleg yn beth bendigedig ond mae’n debyg bod y peiriannau hedfan hyn yn hofran o amgylch tai a gerddi pobl. Mae’r gyfraith yn nodi na ddylid eu hedfan dros ardaloedd adeiledig nac o fewn 50 medr o bobl nad oes gennych reolaeth drostynt.

Gellir prynu’r dronau hyn yn weddol rhad gyda chamerâu arnynt, maent yn fforddiadwy ac felly’n hygyrch i unrhyw un.

Rwy’n credu eu bod wedi eu gwahardd ym Mharciau Brenhinol Llundain a dylid cael parth gwahardd dros holl barciau a thraethau Sir Ddinbych.

Gallai trip i’r parc lleol olygu rhai rhieni blin iawn ac ni fyddai trigolion am weld pobl yn gyrru’r dronau rheoli o bell hyn dros eu heiddo.  

Dylid gwahardd y dronau yma o holl ardaloedd cyhoeddus Sir Ddinbych.”

Cyflwynodd y Cynghorydd Arwel Roberts y Rhybudd o Gynnig canlynol i'w ystyried gan y Cyngor Llawn.

“Tynnwyd fy sylw at y ffaith fod nifer o achosion o ddronau yn cael hedfan o gwmpas Rhuddlan a'r Rhyl. Mae technoleg yn beth bendigedig ond mae’n debyg bod y peiriannau hedfan hyn yn hofran o amgylch tai a gerddi pobl. Mae’r gyfraith yn nodi na cheir eu hedfan dros ardaloedd adeiledig nac o fewn 50 medr o bobl nad oes gennych reolaeth drostynt.

Gellir prynu’r dronau hyn yn weddol rhad gyda chamerâu arnynt, maent yn fforddiadwy ac felly’n hygyrch i unrhyw un.

Rwy’n credu eu bod wedi’u gwahardd ym Mharciau Brenhinol Llundain a dylid cael parth gwahardd dros holl barciau a thraethau Sir Ddinbych. Gallai trip i’r parc lleol olygu rhai rhieni blin iawn ac nid oes ar drigolion eisiau gweld pobl yn hedfan dronau rheoli o bell dros eu heiddo.

Dylid gwahardd hedfan y dronau hyn dros ardaloedd cyhoeddus Sir Ddinbych.”

Cadarnhaodd Pennaeth y Gwasanaethau Cyfreithiol, Adnoddau Dynol a Democrataidd bod Gorchymyn Llywio yn yr Awyr 2016 yn nodi'r gyfraith sy'n ymwneud â defnyddio a gweithredu awyrennau. Mae'r diffiniad o awyren sy’n destun y rheoliad hwn yn cynnwys awyrennau bach heb griw, sef unrhyw awyren heb griw, ac eithrio balŵn neu farcud, sydd â màs o ddim mwy na 20kg heb danwydd (h.y. dronau neu awyrennau model).

Mae hefyd yn cynnwys awyrennau gwyliadwriaeth bychain heb griw a ddiffinnir fel awyrennau bychain heb griw sydd ag offer gwylio neu gaffael ddata (e.e. dronau gyda chamerâu).

Awgrymodd Pennaeth Gwasanaethau Cyfreithiol, Adnoddau Dynol a Democrataidd y dylid cyflwyno adroddiad i Grŵp Cadeiryddion ac Is-gadeiryddion Archwilio er mwyn trafod y mater ymhellach.

Mae rheolau gweithredu awyrennau o’r fath yn gofyn bod y gweithredwyr yn gallu gweld yr awyren ac mae rheolau yn bodoli o ran pa mor uchel y gellir eu hedfan ac ymhle. Mae yna hefyd reolau o ran hedfan awyrennau gwyliadwriaeth o fewn pellteroedd penodol i dagfeydd neu bobl neu wrth ymyl cerbydau a.y.b.

Mae angen trwydded neu ganiatâd yr Awdurdod Hedfan Sifil i ddefnyddio dronau at ddibenion masnachol.

Yn dilyn trafodaeth:

PENDERFYNWYD bod Pennaeth y Gwasanaethau Cyfreithiol, Adnoddau Dynol a Democrataidd / y Swyddog Monitro yn darparu adroddiad i'r Pwyllgor Archwilio am y fframwaith rheoleiddio sy'n ymwneud â dronau a gallu’r Cyngor o ran cyflwyno cyfyngiadau pellach.

Ystyried Rhaglen Gwaith i’r Dyfodol y Cyngor (copi ynghlwm).

Cyflwynodd y Swyddog Monitro/Pennaeth y Gwasanaethau Cyfreithiol, Adnoddau Dynol a Democrataidd Raglen Gwaith i'r Dyfodol y Cyngor (dosbarthwyd eisoes).

Dywedodd Pennaeth y Gwasanaethau Cyfreithiol, Adnoddau Dynol a Democrataidd y bydd Sesiwn Friffio’r Cyngor yn cael ei chynnal cyn cyfarfod y Cyngor Llawn ar 31 Ionawr 2017. Testun y sesiwn fydd cymeradwyo Canolfan Ddyfrol y Rhyl. Nid yw dyddiad y sesiwn friffio wedi’i gadarnhau eto, ond bydd yn cael ei chynnal 25, 26 neu 27 Ionawr 2017. Unwaith y cytunir ar ddyddiad, bydd y gwahoddiadau yn cael eu hanfon at yr holl gynghorwyr.

PENDERFYNWYD, yn amodol ar yr uchod, y dylid cymeradwyo a nodi Rhaglen Gwaith i'r Dyfodol y Cyngor.

Daeth y cyfarfod i ben am 11.05 a.m.