Agenda and draft minutes

Dylai’r Aelodau ddatgan unrhyw gysylltiad personol neu gysylltiad sy'n rhagfarnu mewn unrhyw fater a nodwyd i'w ystyried yn y cyfarfod hwn.

Dim.

Penodi Cadeirydd y Cyngor am y flwyddyn 2015/16.

Rhoddodd y Cadeirydd a oedd yn ymddeol, y Cynghorydd Brian Blakeley, araith gan fyfyrio ar ei gyfnod fel Cadeirydd ac amlygodd nifer o ddigwyddiadau yr oedd wedi eu mynychu yn ystod y deuddeg mis diwethaf.

Roedd wedi cael blwyddyn brysur iawn yn mynychu digwyddiadau. Dywedodd ei fod wedi bod yn anrhydedd cael cynrychioli Sir Ddinbych yn ystod digwyddiadau coffau 100 mlynedd ers dechrau'r Rhyfel Byd Cyntaf. Mae ymweld ag ysgolion a chwrdd â phobl ifanc wedi ei wneud yn ymwybodol o'r holl waith sydd wedi ei wneud yn y sir i wella ysgolion.

Mynegodd ei ddiolch i'r Aelodau am ei ethol fel Cadeirydd ar gyfer 2014/15 ac i'r holl swyddogion a’r staff gweithgar yn Sir Ddinbych am wneud ei flwyddyn fel Cadeirydd yn bleser.

Cyflwynodd y Cadeirydd sy’n ymddeol y sieciau ar gyfer yr arian a godwyd i wahanol elusennau yn ystod ei gyfnod fel Cadeirydd:

(i)              Derbyniodd Eluned Yaxley, Rheolwr Codi Arian, siec am £1,250 ar ran Hosbis Tŷ Gobaith.

(ii)             Derbyniodd Daryl Crowther, Rheolwr Gweithrediadau, siec am £1,250 ar ran RNLI y Rhyl.

Yna, fe gyflwynodd y Cadeirydd a oedd yn ymddeol anrhegion i'w Gaplan, y Parchedig Andy Grimwood, Rheolwr y Gwasanaethau Democrataidd, Pennaeth y Gyfraith, Adnoddau Dynol a’r Gwasanaethau Democrataidd, y Prif Weithredwr, y Cydlynydd Busnes - Swyddog yr Arweinydd, y Gweinyddwr Pwyllgorau ac i’r Rheolwr Cefnogi a Datblygu Aelodau er mwyn cydnabod eu cefnogaeth yn ystod y deuddeng mis diwethaf.

Ar y pwynt hwn, gofynnodd y Cadeirydd sy’n ymddeol am enwebiadau ar gyfer penodi Cadeirydd y Cyngor Sir ar gyfer 2015/2016. Cynigiodd y Cynghorydd Eryl Williams y dylid penodi’r Cynghorydd Gwyneth Kensler yn Gadeirydd, gan amlinellu'r rhinweddau a’r profiad personol y byddai’n eu cyfrannu i’r swydd.

Eiliodd yr Arweinydd, y Cynghorydd Hugh Evans, y cynnig gan ychwanegu y byddai'r Cynghorydd Kensler yn Gadeirydd rhagorol ar gyfer y Sir a’i fod yn falch o gefnogi'r enwebiad.

Gan nad oedd unrhyw enwebiad arall, ac yn dilyn pleidlais trwy godi dwylo, etholwyd y Cynghorydd Gwyneth Kensler yn unfrydol yn Gadeirydd y Cyngor ar gyfer 2015/2016.

Dymunodd y Cadeirydd sy’n ymddeol y gorau i’r Cadeirydd newydd i’r dyfodol a rhoddodd Gadwyn Swydd y Cadeirydd iddi cyn iddi lenwi ei Datganiad Derbyn Swydd.

Talodd y Cadeirydd newydd deyrnged i waith y Cadeirydd blaenorol a rhoddodd fathodyn y Cyn Gadeirydd iddo, plac ac anrheg ar ran y Cyngor.

Enwodd y Cadeirydd newydd Gaynor Morgan Rees fel ei chonsort nad oedd, yn anffodus, yn gallu mynychu cyfarfod blynyddol y Cyngor Blynyddol oherwydd ymrwymiadau blaenorol.

Caplan y Cadeirydd newydd ar gyfer y flwyddyn fydd y Parchedig Wayne Roberts ac mae’r elusennau a ddewiswyd fel a ganlyn:

·       Y Samariaid

·       Mentrau Awtistiaeth

·       Y Mudiad Meithrin, er cof am Hywyn Williams.

Ar y pwynt hwn, cyflwynodd y Cadeirydd newydd dusw o flodau i gonsort y Cadeirydd blaenorol i ddiolch iddi am gefnogi’r Cadeirydd yn ystod y deuddeg mis diwethaf.

Penodi Is-Gadeirydd y Cyngor am y flwyddyn 2015/16.

Gofynnodd y Cadeirydd am enwebiadau ar gyfer swydd yr Is-gadeirydd.

Cynigodd y Cynghorydd Martyn Holland y dylid ethol y Cynghorydd Ann Davies yn Is-gadeirydd y Cyngor ar gyfer 2015/2016. Cyfeiriodd at brofiad helaeth y Cynghorydd Davies ac at ei blwyddyn fel Maer Rhuddlan yn 2014/2015.

Eiliwyd y cynnig hwn gan y Cynghorydd Arwel Roberts a bu iddo gyfeirio at waith cymunedol y Cynghorydd Davies.

Gan nad oedd unrhyw gynnig arall, ac yn dilyn pleidlais trwy godi dwylo, etholwyd y Cynghorydd Ann Davies yn unfrydol yn Is-gadeirydd y Cyngor ar gyfer 2015/2016.

Rhoddodd y Cadeirydd Gadwyn Swydd yr Is-gadeirydd i’r Cynghorydd Ann Davies a llenwodd y Cynghorydd y Datganiad Derbyn Swydd.

Enwodd yr Is-Gadeirydd newydd ei merch, Jane Hugo, fel ei chonsort.

Bu i’r Arweinwyr Grŵp ac Aelodau gydnabod gwaith y Cadeirydd sy'n ymddeol a llongyfarch y Cynghorwyr Gwyneth Kensler ac Ann Davies ar gael eu hethol yn Gadeirydd ac yn Is-gadeirydd yn y drefn honno.

Ar y pwynt hwn (10.55 a.m.) cafwyd egwyl o 20 munud.

Ailddechreuodd y cyfarfod am 11.15 a.m.

Rhybudd o eitemau y dylid, ym marn y Cadeirydd, eu hystyried yn y cyfarfod fel materion brys yn unol ag Adran 100B (4) Deddf Llywodraeth Leol, 1972.

Nid oedd unrhyw fater brys.

Ar y pwynt hwn:

(a)  Talodd y Cynghorydd Eryl Williams deyrnged i Hywyn Williams, Cyfarwyddwr Corfforaethol Cwsmeriaid, a fu farw’n ddiweddar. Cafwyd dwy funud o dawelwch er gof amdano.

(b)  Bu i’r Cadeirydd longyfarch y Cynghorydd James Davies ar ddod yn Aelod Seneddol dros Ddyffryn Clwyd a diolchodd i Chris Ruane am ei holl waith yn ystod y deunaw mlynedd diwethaf fel Aelod Seneddol dros Ddyffryn Clwyd.

(c)  Bu i’r Cynghorydd Hugh Jones longyfarch tîm pêl-droed merched dan 16 Prestatyn am ennill Cwpan Cymru yn y Drenewydd. Dywedodd y Cynghorydd Jones ei fod yn falch iawn bod y tîm yn dod o ysgol yn Sir Ddinbych.

(d)  Talodd y Cynghorydd Julian Thompson-Hill deyrnged i'r Pennaeth Cyllid ac Asedau, Paul McGrady, a fydd yn gadael yr Awdurdod Lleol i ddechrau swydd newydd. Soniodd y Cynghorydd Thompson-Hill am waith a chyflawniadau Paul yn ystod ei flynyddoedd yn Sir Ddinbych. Ar ran yr holl Aelodau, dymunodd y Cynghorydd Thompson-Hill y gorau iddo ar gyfer y dyfodol a diolchodd iddo am ei holl waith caled a phopeth yr oedd wedi ei wneud ar gyfer Sir Ddinbych. Diolchodd Paul McGrady i’r Aelodau am eu dymuniadau da.

(e)  Rhoddodd y Cynghorydd Joan Butterfield ddeiseb i'r Cadeirydd ar ran gyrwyr tacsis y Rhyl a oedd wedi cael tua 600 o lofnodion i gefnogi eu hawl i wisgo trowsusau byr. Cadarnhaodd Pennaeth y Gyfraith, AD a’r Gwasanaethau Democrataidd y byddai'r ddeiseb yn cael ei phasio ymlaen i'r adran berthnasol ac y byddai Pennaeth yr Adran yn ymateb o fewn yr wythnosau nesaf.

Derbyn cofnodion cyfarfod y Cyngor Sir a gynhaliwyd ar 14 Ebrill 2015 (copi ynghlwm).

Cyflwynwyd cofnodion cyfarfod y Cyngor a gynhaliwyd ar 14 Ebrill 2015.

Materion yn Codi - Tudalen 8 Eitem 5 – Cofnodion (Treth y Cyngor a Materion Cysylltiedig).

Cadarnhaodd y Cynghorydd Huw Hilditch-Roberts fod llythyr wedi ei anfon at Leighton Andrews ac i CLlLC yn eu gwahodd i fynychu'r Pwyllgor Archwilio Cymunedau ar 9 Gorffennaf, a’n bod yn aros am ymateb ynghylch pwy fyddai'n mynychu.

PENDERFYNWYD y dylid cymeradwyo cofnodion y cyfarfod a gynhaliwyd ar 14 Ebrill 2015 fel cofnod cywir ac y dylai’r Arweinydd eu llofnodi.

Ystyried adroddiad gan y Pennaeth Gwella Busnes a Moderneiddio (amgaeir copi) i aelodau gymeradwyo fersiwn derfynol y ddogfen gyflenwi.

Cyflwynodd y Cynghorydd Julian Thompson-Hill yr adroddiad (a gylchredwyd yn flaenorol) i'r Aelodau gymeradwyo'r fersiwn drafft terfynol Dogfen Gyflenwi Blwyddyn 4 y Cynllun Corfforaethol er mwyn ei chyfieithu a'i chyhoeddi.

Diolchodd y Cynghorydd Thompson-Hill i'r Cynghorydd Barbara Smith am y gwaith yr oedd wedi ei wneud yn ystod y flwyddyn ddiwethaf o ran y Cynllun Corfforaethol.

Mae angen penderfyniad i gymeradwyo fersiwn drafft terfynol o Ddogfen Gyflenwi Blwyddyn 4 y Cynllun Corfforaethol. Mae Dogfen Gyflenwi wedi ei chreu ar gyfer pob blwyddyn o'r Cynllun Corfforaethol. Diben y Ddogfen Gyflenwi yw amlinellu rhai o'r prosiectau allweddol a fyddai’n cael eu cychwyn a/neu eu darparu yn ystod y flwyddyn ariannol ar gyfer pob un o'r 7 blaenoriaeth, gyda'r bwriad o ddangos sut y mae’r Cynllun Corfforaethol yn effeithio ar y gwaith sy’n cael ei wneud.

Amlinellwyd cyfraniad y Cyngor i Gynllun Lles Sir Ddinbych yn ystod 2015-16. Byddai'r ddogfen yn cael ei chyhoeddi ar y wefan er mwyn i’r rheoleiddwyr, y cyhoedd a’r partneriaid ei gweld.

Cafwyd trafodaeth a gofynnodd yr Aelodau gwestiynau. Codwyd y materion canlynol:

·       Cysondeb o'r flwyddyn flaenorol. Dywedwyd na fu unrhyw sôn, yn y Cynllun Corfforaethol, am waith dylunio Adolygiad Ysgolion Rhuthun. Eglurwyd fod gwaith ar y gweill ac y byddai gwybodaeth ychwanegol yn cael ei chynnwys o fewn y Cynllun Corfforaethol i adlewyrchu hyn.

·       Mae Sir Ddinbych Ddigidol yn dal yn y broses o gael ei chwblhau ar gyfer ardaloedd gwledig.

·       Mae Swyddog Arweiniol Strategol y Gymraeg wedi ei benodi i sicrhau cydymffurfiaeth â'r Safonau Cymraeg. Cadarnhaodd y Prif Weithredwr y byddai Strategaeth y Gymraeg yn cael ei hystyried yn fanylach.

·       Trafodwyd cyflwr y ffyrdd yn y sir. Cafwyd strategaeth gyllido 3 blynedd gan Lywodraeth Cymru. Mae ffynonellau cyllid pellach yn cael eu harchwilio er mwyn cynnal a chadw’r ffyrdd yn y dyfodol.

·       Pont Rhuddlan. Mae’r bont yn strwythur CADW. Nid oes gan CADW unrhyw arian ar gyfer y gwaith atgyweirio sy’n ofynnol. Yn anffodus, nid oes gan y Cyngor arian ar gael i Sir Ddinbych i gynorthwyo gyda'r gwaith o atgyweirio’r bont.

·       Rydym yn aros am ymrwymiad gan Lywodraeth Cymru ar gyfer yr ysgol ffydd newydd. Mater arall oedd y safle arfaethedig, sy’n profi'n ddadleuol. Disgwylir penderfyniad ynghylch hyn. Mae’r ysgol ffydd yn dal yn flaenoriaeth addysg.

·       Dywedwyd fod sbwriel a thipio anghyfreithlon yn y sir yn broblem. Mae Sir Ddinbych yn cyflogi Swyddog Cadwch Gymru'n Daclus, John Kelly, sydd ar gael i fynychu Grwpiau Ardal yr Aelodau ar gais.

·       Cafodd cynlluniau i fyfyrwyr gymryd rhan ynddynt eu hannog, e.e. Menter yr Ifanc.

·       Cadarnhawyd bod y Cynlluniau Tref ac Ardal yn endid ar wahân i'r Cynllun Corfforaethol. Mae cyllideb wedi ei chytuno arni i sicrhau bod Cynlluniau Tref ac Ardal yn cael eu cyflwyno a’u cyhoeddi.

·       Mae sicrhau bod pobl ddiamddiffyn yn cael eu diogelu ac yn gallu byw mor annibynnol â phosibl yn fater allweddol i Sir Ddinbych. Mae risgiau yn bodoli oherwydd y sefyllfa ariannol anodd sydd ohoni, ond mae'r Sir yn benderfynol o amddiffyn defnyddwyr gwasanaeth a phlant.

·       Cododd y Cynghorydd Alice Jones faterion yn ymwneud â Bodelwyddan, yn enwedig gan nad oedd wedi ei gynnwys yn y Cynlluniau Tref ac Ardal. Eglurwyd bod fersiwn drafft o Gynllun Tref Bodelwyddan yn derbyn sylw.

Cytunwyd y byddai ychwanegiadau yn cael eu gwneud i'r Ddogfen Gyflenwi Flynyddol cyn ei chwblhau, ei chyfieithu a’i chyhoeddi.

PENDERFYNWYD, yn amodol ar y newidiadau uchod a gytunwyd arnynt, bod yr Aelodau yn cymeradwyo fersiwn drafft o Ddogfen Gyflenwi Flynyddol y Cynllun Corfforaethol.

Ystyried adroddiad gan y Dirprwy Swyddog Monitro (copi ynghlwm) i Aelodau nodi’r adroddiad fel rhan o ymdrech y Pwyllgor Safonau i gynyddu safonau ymddygiad moesegol a chydymffurfio â Chod Ymddygiad Aelodau.

Cyflwynodd Ei Anrhydedd y Barnwr Ian Trigger, Cadeirydd y Pwyllgor Safonau, yr Adroddiad Blynyddol (a gylchredwyd yn flaenorol).

Bu i’r Barnwr Trigger longyfarch y Cynghorwyr Gwyneth Kensler ac Ann Davies ar gael eu penodi’n Gadeirydd ac Is-gadeirydd yn y drefn honno.

Dyma Adroddiad Blynyddol cyntaf y Pwyllgor Safonau i'r Cyngor Llawn ac mae’n ymwneud â’r flwyddyn galendr o fis Ionawr i fis Rhagfyr 2014 yn unig. Bydd Cadeirydd y Pwyllgor Safonau yn cyflwyno adroddiad yn flynyddol i'r Cyngor Llawn er mwyn rhoi gwybod i’r Aelodau am dueddiadau, materion o ran cydymffurfio â'r Cod Ymddygiad Aelodau yn gyffredinol ar draws y Sir a gwaith y Pwyllgor o ran codi safonau ymddygiad ar lefel y Sir yn ogystal ag ar lefelau Cynghorau Tref, Dinas a Chymuned.

Mae dull rhagweithiol wedi ei gymryd o ran y gwaith a wneir gan Aelodau'r Pwyllgor Safonau. Diben mynychu cyfarfodydd Cynghorau Tref, Dinas a Chymuned yw cynorthwyo, yn hytrach na beirniadu.

Mae Fforwm Safonau Gogledd Cymru wedi ei sefydlu i rannu arfer da a dysgu oddi wrth ddulliau ein gilydd wrth godi safonau, rhannu cost unrhyw ddigwyddiad hyfforddi a datblygu dogfennau a allai gynorthwyo Swyddogion Monitro, fel protocolau hunan reoleiddio neu weithdrefnau gwrandawiadau safonau.

Diolchodd y Barnwr Trigger i'r Swyddog Monitro a'r Dirprwy Swyddog Monitro am eu gwaith caled ar gyfer y Pwyllgor Safonau ac am drefnu a chynnal digwyddiadau hyfforddi hanfodol.

PENDERFYNWYD bod yr Aelodau yn nodi cynnwys Adroddiad Blynyddol y Pwyllgor Safonau.

Ystyried adroddiad gan y Dirprwy Swyddog Monitro (copi ynghlwm) i’r Cyngor ystyried argymhelliad y Panel Penodiadau Arbennig ynghylch y ddau unigolyn i eistedd fel Aelodau Lleyg ar y Pwyllgor Safonau.

Cyflwynodd Pennaeth y Gyfraith, Adnoddau Dynol a'r Gwasanaethau Democrataidd yr adroddiad (a gylchlythyrwyd yn flaenorol) er mwyn i'r Aelodau benodi dau aelod lleyg annibynnol i'r Pwyllgor Safonau.

Oherwydd ymddeoliad dau aelod annibynnol o'r Pwyllgor Safonau, roedd angen penodi dau aelod annibynnol newydd.

Mae’n ofynnol bod unrhyw swydd wag ar gyfer aelod annibynnol yn cael ei hysbysebu mewn o leiaf dau bapur newydd lleol. Sefydlwyd Panel Penodiadau Arbennig ac ymgynghorwyd â'r holl Cynghorau Tref, Dinas a Chymuned er mwyn ystyried enwebu aelod o'r Panel.

Argymhellodd y Panel Penodiadau Arbennig mai’r ddau unigolyn mwyaf priodol i eistedd ar y Pwyllgor Safonau fel aelodau lleyg yw:-

(i)              Anne Mellor

(ii)             Julia Hughes

PENDERFYNWYD penodi Anne Mellor a Julia Hughes yn Aelodau Lleyg Annibynnol o’r Pwyllgor Safonau.

Ar y pwynt hwn (1.05 p.m.) cafwyd toriad am ginio.

Ailddechreuodd y cyfarfod am 2.00 p.m.

Ar y pwynt hwn, cytunwyd i newid trefn y rhaglen gan fod yn rhaid i’r Cynghorydd Jason McLellan adael y cyfarfod yn fuan.

I ystyried adroddiad gan y Pennaeth Gwasanaethau Cyfreithiol, Democrataidd ac Adnoddau Dynol (copi ynghlwm) i’r Cyngor ystyried Adroddiad Blynyddol y Pwyllgor Llywodraethu Corfforaethol (Atodiad i ddilyn).

Cyflwynodd y Cynghorydd Jason McLellan Adroddiad Blynyddol y Pwyllgor Llywodraethu Corfforaethol (a gylchlythyrwyd yn flaenorol) ar gyfer blwyddyn ariannol 2014/15.

Mae’n ddyletswydd statudol ar y Cyngor, dan ddarpariaethau Mesur Llywodraeth Leol Cymru 2011 i gael Pwyllgor Archwilio. Y Pwyllgor Llywodraethu Corfforaethol yw pwyllgor dynodedig y Cyngor ar gyfer y diben hwn.

Mae prif feysydd gwaith y Pwyllgor fel a ganlyn:

Ø  Rôl Archwilio sy'n ystyried adolygiadau archwilio mewnol, archwiliadau allanol a’r strategaeth archwilio mewnol.

Ø  Rheoli Risg.

Ø  Rheolaeth Ariannol.

Ø  Adolygu a monitro polisïau meysydd fel twyll, llygredd a rhannu pryderon.

Ø  Rheoli Gwybodaeth, ceisiadau Rhyddid Gwybodaeth a Diogelu Data.

Ø  Monitro ac adolygu gweithrediad cyfansoddiad y Cyngor.

Ø  Monitro a Diweddaru'r Cynllun Gwella Llywodraethu.

Ø  Adolygu cwynion a’r polisi cwyno ac ystyried adborth gan gwsmeriaid.

Diolchodd y Cynghorydd Jason McLellan i bob aelod o’r Pwyllgor Llywodraethu Corfforaethol ac i Paul Whitham (Aelod Lleyg), y Pennaeth Archwilio Mewnol, y Prif Gyfrifydd ac i Paul McGrady am eu gwaith caled yn ystod y flwyddyn ddiwethaf.

PENDERFYNWYD - bod yr Aelodau yn nodi cynnwys Adroddiad Blynyddol y Pwyllgor Llywodraethu Corfforaethol.

Ystyried adroddiad gan y Cydlynydd Archwilio (copi ynghlwm) i’r Cyngor ystyried Adroddiad Blynyddol y Pwyllgorau Archwilio ar gyfer 2014/2015.

Cyflwynodd y Cynghorydd Huw Hilditch-Roberts Adroddiad Blynyddol y Pwyllgor Archwilio (a gylchredwyd yn flaenorol) i’r Aelodau ei ystyried.

Er mwyn cydymffurfio ag Erthygl 6.3.7 Cyfansoddiad y Cyngor, mae’n rhaid i Bwyllgorau Archwilio adrodd yn flynyddol i'r Cyngor llawn am eu gwaith a gwneud argymhellion ar raglenni gwaith y dyfodol a dulliau gweithio diwygiedig os yn briodol.

Byddai dau fersiwn o'r Adroddiad Blynyddol ar gael - fersiwn cryno a fersiwn llawn.

Byddai'r Adroddiad Blynyddol yn dilyn y fformat cryno fel y cymeradwywyd gan y Grŵp Cadeiryddion ac Is-Gadeiryddion Archwilio. Byddai hyn yn rhoi trosolwg cryno i'r darllenydd o sut y mae archwilio yn gweithredu, gwaith a ymgymerwyd gan y tri Pwyllgor Archwilio ac yn hysbysu trigolion ynghylch sut y gallant gymryd rhan a chyfrannu at y broses archwilio.

Yn ogystal â chynnwys crynodeb o benderfyniadau pob Pwyllgor Archwilio, mae’r Adroddiad Blynyddol yn canolbwyntio ar amlinellu gwaith y Pwyllgorau Archwilio o ran herio cynlluniau'r Cyngor i gyflawni ei flaenoriaethau corfforaethol erbyn 2017.

Yn y dyfodol, y pedwar maes allweddol y bydd y Pwyllgorau Archwilio yn canolbwyntio arnynt wrth bennu eu rhaglenni gwaith yw:

Ø  Y blaenoriaethau corfforaethol a chyflwyno'r Cynllun Corfforaethol.

Ø  Arbedion yn y gyllideb a'u heffaith ar Sir Ddinbych a’i thrigolion.

Ø  Meysydd blaenoriaeth uchel eraill y gall archwilio ddylanwadu arnynt ac effeithio ar newid.

Ø  Meysydd eraill brys neu annisgwyl o flaenoriaeth uchel.

PENDERFYNWYD bod yr Aelodau'n nodi Adroddiad Blynyddol y Pwyllgorau Archwilio ar gyfer 2014/15

Ystyried adroddiad gan y Rheolwr Gwasanaethau Democrataidd (copi ynghlwm) i’r Cyngor benodi un aelod o'r Grŵp Llafur i'r Panel Heddlu a Throsedd.

Cyflwynodd Pennaeth y Gyfraith, Adnoddau Dynol a'r Gwasanaethau Democrataidd adroddiad (a gylchlythyrwyd yn flaenorol) ar gyfer penodi un aelod o'r Grŵp Llafur i Banel yr Heddlu a Throsedd Gogledd Cymru (y Panel) am o leiaf un flwyddyn.

Mae aelodau’r Panel yn cynnwys aelodau etholedig o chwe Awdurdod Lleol Gogledd Cymru yn seiliedig ar gydbwysedd gwleidyddol. Oherwydd ymddiswyddiad y Cynghorydd Bill Tasker mae angen penodi aelod etholedig newydd ar gyfer Cyngor Sir Ddinbych.

Cynigiodd y Cynghorydd Peter Prendergast y Cynghorydd Brian Blakeley i wasanaethu ar Banel yr Heddlu a Throsedd.

PENDERFYNWYD penodi’r Cynghorydd Brian Blakeley i Banel yr Heddlu a Throsedd Gogledd Cymru (y Panel) am o leiaf un flwyddyn.

Cyflwynodd y Cynghorydd Joe Welch y Rhybudd o Gynnig canlynol ar ran y Grŵp Annibynnol i'w ystyried gan y Cyngor Llawn:

Er mwyn arbed arian i Gyngor Sir Ddinbych mae ar y Grŵp Annibynnol eisiau cynnig bod treuliau aelodau am fynychu cyfarfodydd yn cael eu trafod ymhellach yn y Gweithdy Cyllideb ar 5 Mehefin 2015

Cyflwynodd y Cynghorydd Joe Welch y Rhybudd o Gynnig canlynol ar ran y Grŵp Annibynnol ar gyfer sylw’r Cyngor Llawn:

Gyda'r nod o arbed arian i Gyngor Sir Ddinbych, byddai'r grŵp Annibynnol yn hoffi cynnig bod treuliau aelodau am fynychu cyfarfodydd yn cael eu trafod ymhellach yn y Gweithdy Cyllideb ar 5 Mehefin 2015.

Cadarnhaodd y Cynghorydd Julian Thompson-Hill y byddai'r eitem yn cael ei hychwanegu at raglen y Gweithdy Cyllideb ar 5 Mehefin 2015.

PENDERFYNWYD bod y Rhybudd o Gynnig a gyflwynwyd gan y Grŵp Annibynnol ynghylch trafod treuliau aelodau am fynychu cyfarfodydd yn cael ei gynnwys fel eitem ar raglen y Gweithdy Cyllideb ar 5 Mehefin 2015.

Ystyried Rhaglen Gwaith i’r Dyfodol y Cyngor (copi ynghlwm).

Cyflwynodd Pennaeth y Gyfraith, Adnoddau Dynol a’r Gwasanaethau Democrataidd Raglen Gwaith i'r Dyfodol y Cyngor (a gylchredwyd yn flaenorol).

PENDERFYNWYD cymeradwyo a nodi Rhaglen Gwaith i'r Dyfodol y Cyngor.

Ystyried adroddiad i’r Aelodau gymeradwyo Polisi Tâl y Cyngor ar gyfer y flwyddyn fwrdeistrefol 2015/2016 (copi i ddilyn).

Cyflwynodd yr Arweinydd, y Cynghorydd Hugh Evans, yr adroddiad (a gylchredwyd yn flaenorol).

Mae Deddf Lleoliaeth 2011 yn gofyn i Awdurdodau Lleol baratoi datganiadau ar bolisïau tâl. Mae’n rhaid i'r datganiadau hyn fynegi polisïau’r awdurdod mewn perthynas ag ystod o faterion yn ymwneud â thâl ei weithlu; yn enwedig o ran uwch aelodau staff (neu "brif swyddogion") a gweithwyr ar y cyflogau isaf. Mae’n rhaid i’r Cyngor gymeradwyo Datganiadau ar Bolisïau Tâl yn flynyddol, a’u cyhoeddi ar y wefan berthnasol.

Cafwyd trafodaeth ynglŷn â hyn.

PENDERFYNWYD:

      I.          Bod y Cyngor yn cytuno ar y Datganiad ar Bolisïau Tâl ar gyfer 2015/16.

    II.          Y bydd y Cyngor yn talu’r codiadau tâl costau byw cenedlaethol blynyddol i Brif Swyddogion pan benderfynir gwneud hynny yn unol â gofynion cytundebol presennol.

  III.          Sefydlu Pwyllgor Cydnabyddiaeth Ariannol i benderfynu ar daliadau a chydnabyddiaeth i Uwch Dîm Arweinyddiaeth y Cyngor, sy’n cynnwys  y Cyfarwyddwyr a’r Penaethiaid Gwasanaeth.

  IV.          Y gall y Prif Weithredwr roi honorariwm o hyd at 15% o dâl gwirioneddol Penaethiaid Gwasanaeth am gyfnod nad yw’n hwy na 12 mis, pan fo gofyn iddynt gyflawni dyletswyddau ychwanegol ar ben eu swyddi gwirioneddol am gyfnod o amser. Fel arfer, byddai hyn i gyflenwi yn ystod absenoldeb tymor hir; yn dilyn ailstrwythuro pan fo cyfrifoldeb am wasanaethau ychwanegol wedi eu rhoi i’r Pennaeth Gwasanaeth; neu gyfrifoldeb am brosiect mawr y tu hwnt i’w portffolio arferol.

DAETH Y CYFARFOD I BEN AM 2.50 P.M.