Agenda and draft minutes

Aelodau i ddatgan unrhyw gysylltiad personol neu gysylltiad sy'n rhagfarnu mewn unrhyw fater a nodwyd i'w ystyried yn y cyfarfod hwn

Ni ddatganodd unrhyw un gysylltiad.

Llofnodi Datganiad Dulyn yn swyddogol.

Rhoddodd y Cadeirydd wybodaeth i'r Cyngor llawn am Ddatganiad Dulyn a oedd wedi cael ei gymeradwyo a'i dderbyn yn y Cabinet ar 29 Ebrill 2014. Byddai'r Datganiad yn cael ei lofnodi gan Arweinydd y Cyngor, y Cynghorydd Hugh Evans, yr Aelod Arweiniol Gofal Cymdeithasol a Gwasanaethau Plant, y Cynghorydd Bobby Feeley a Chadeirydd y Cyngor, y Cynghorydd Raymond Bartley.

Drwy lofnodi'r ddogfen, roedd Cyngor Sir Ddinbych yn addo mynd rhagddo â gwaith a oedd yn seiliedig ar egwyddorion Sefydliad Iechyd y Byd a'r Cenhedloedd Unedig i wneud ei gymunedau'n fwy cyfeillgar i oed.

Roedd yr addewid, a elwir yn Ddatganiad Dulyn gan fod arlywyddiaeth yr UE o dan law Iwerddon, yn tynnu sylw at yr angen i greu lleoedd sy'n gyfeillgar i oed, gan ganolbwyntio ar hyrwyddo ymwybyddiaeth o bobl hŷn, eu hawliau, eu hanghenion a'u potensial, yn ogystal â'u cyfraniad cymdeithasol, economaidd a diwylliannol cadarnhaol.

Eglurodd y Cynghorydd Bobby Feeley, yr Aelod Arweiniol Gofal Cymdeithasol, Gwasanaethau Oedolion a Phlant, a hefyd yr Eiriolwr dros Bobl Hŷn wrth Aelodau'r Cyngor fod pobl yn byw yn hirach yn y gymuned, a bod angen ymateb i hynny mewn modd cadarnhaol.  Roedd yn golygu galluogi pobl i fyw'n annibynnol yn eu cartrefi eu hunain, yn ogystal â dathlu a gwrando ar safbwyntiau'r boblogaeth sy'n heneiddio ynglŷn â'r mathau o gyfleoedd y dylid ymchwilio iddynt i'w cadw'n heini ac yn brysur, a chymryd rhan ym mywyd y gymuned leol. 

Wrth i nifer y bobl sy'n byw'n hirach gynyddu, byddai'n bwysig i'r cyngor ystyried dulliau o addasu amgylcheddau ac adeiladau er mwyn adlewyrchu anghenion poblogaeth sy'n heneiddio.

Ar y pwynt hwn, llofnododd y Cynghorwyr Hugh Evans, Bobby Feeley a Raymond Bartley y Datganiad.

Penodi Cadeirydd y Cyngor ar gyfer blwyddyn 2014/15.

Rhoddodd y Cadeirydd a oedd yn ymddeol, y Cynghorydd Raymond Bartley, anerchiad a oedd yn cynnwys myfyrdod ar ei gyfnod fel Cadeirydd a chyfeiriadau at sawl digwyddiad lle bu'n bresennol dros y deuddeg mis diwethaf.

Roedd y Cadeirydd a oedd yn ymddeol a'i gydymaith, ei wraig Dorothy, wedi cael blwyddyn brysur iawn yn ymweld â thros 200 o ddigwyddiadau.  Y digwyddiad mwyaf cofiadwy oedd Eisteddfod Genedlaethol Dinbych, fu'n llwyddiant ysgubol.  Roedd y Cynghorydd Bartley a'i wraig wedi bod i'r Eisteddfod bob dydd ac roedd cannoedd o bobl wedi dod atynt i'w llongyfarch am lwyddiant yr Eisteddfod, neu'n canmol y Sir am eu cefnogaeth a'u hymrwymiad i'r digwyddiad.  Mynegodd y Cynghorydd Bartley ddiolch i bob un aelod o staff fu'n ymwneud ag unrhyw un o'r trefniadau, o'r uwch reolwyr hyd at y rhai a chwaraeodd eu rhan arbennig ac amhrisiadwy eu hunain yn y llwyddiant.  Bu'n enghraifft wych o waith tîm a oedd wedi rhoi Sir Ddinbych ar y map mewn modd ffafriol, a byddai hynny'n destun balchder arbennig i'r Cynghorydd Bartley hyd weddill ei oes.

Bu hefyd yn anrhydedd arbennig gallu cynnig £2,000 o nawdd i Ŵyl Gerdd Gogledd Cymru yn Llanelwy.  Defnyddiwyd yr arian hwn i ddarparu gweithdy cerddorol i ddisgyblion yn ysgolion arbennig y sir.  Byddai peth o'r nawdd hefyd yn cael ei ddefnyddio ar gyfer cludiant ysgol, er mwyn galluogi disgyblion o sawl ysgol i ddod i amrywiaeth o weithdai a oedd wedi'u trefnu ar eu cyfer.

Dyma rai o'r uchafbwyntiau eraill:

·        Cystadleuaeth barddoniaeth a baner Dydd Gŵyl Dewi ar gyfer holl ddisgyblion ysgolion cynradd Sir Ddinbych.  Bu'r digwyddiad hwn mor llwyddiannus, byddai'n cael ei gynnal bob blwyddyn o hyn allan.

·        Ymweliadau gan ysgolion â Siambr y Cyngor

·        Cyngherddau Ysgolion Sir Ddinbych

·        Bod yn bresennol ym mhenblwyddi dinasyddion Sir Ddinbych yn 100 oed

Mynegwyd diolch i bawb a oedd wedi cefnogi neu ddod i'r digwyddiadau a gynhaliwyd i godi arian er budd dwy elusen y Cynghorydd Bartley.

Mynegodd y Cynghorydd Bartley hefyd ddiolch i staff y Gwasanaethau democrataidd a oedd wedi cynnal digwyddiadau er mwyn codi arian i elusen Tŷ Gobaith, a llwyddwyd i godi £1,724.00 a anfonwyd ymlaen i'r elusen.  Mynegodd y Cynghorydd Bartley ddiolch i bawb am eu caredigrwydd a'u parodrwydd i feddwl am eraill, a dywedodd ei fod yn ymfalchïo yng ngwaith ei staff.

Cyflwynodd y Cynghorydd Bartley sieciau am yr arian a godwyd yn ystod ei gyfnod fel Cadeirydd (cyfanswm o £4,000) i'r elusennau a ddewiswyd ganddo:

(i)            Derbyniodd Eluned Yaxley, Rheolwr Codi Arian, y siec am £2,000 ar ran hosbis Tŷ Gobaith

(ii)          Derbyniodd Ian Bellingham, Prif Weithredwr, y siec am £2,000 ar ran Hosbis Sant Cyndeyrn, Llanelwy

Yna, aeth y Cynghorydd Bartley yn ei flaen i gyflwyno anrhegion i'w Gaplan, y Parchedig Wayne Roberts, ei Gydymaith, Rheolwr Cefnogi a Datblygu'r Aelodau, y Pennaeth Gwasanaethau Cyfreithiol a Democrataidd, y Rheolwr Gwasanaethau Democrataidd, Swyddog Cefnogi'r Aelodau, Cydgysylltydd Busnes: Swyddfa'r Arweinydd, Gweinyddwyr Pwyllgorau a'r Cydgysylltydd Craffu er mwyn cydnabod eu cefnogaeth dros y deuddeg mis diwethaf.

Mynegodd y Cynghorydd Bartley ddiolch arbennig i'r Prif Weithredwr, y Cyfarwyddwr Corfforaethol: Cwsmeriaid, y Cyfarwyddwr Corfforaethol: Uchelgais Economaidd a Chymunedol a'r Pennaeth Cyllid ac Asedau am eu cymorth a'u cefnogaeth dros y flwyddyn ddiwethaf.

Diolchodd hefyd i Arweinydd y Cyngor, y Cynghorydd Hugh Evans, am ei gyngor, ac am rannu ei wybodaeth a'i brofiad.

Yn olaf, mynegodd y Cynghorydd Bartley ddiolch i'w wraig, Dorothy, am ei chefnogaeth ddiwyro a'i gwasanaeth ymroddedig i Gyngor Sir Ddinbych ar hyd y blynyddoedd.

Wedyn, gwahoddodd y Cynghorydd Bartley enwebiadau er mwyn penodi Cadeirydd newydd y Cyngor Sir ar gyfer 2014/15.  Cynigiodd Joan Butterfield y dylid ethol y Cynghorydd Brian Blakeley yn  ...  view the full Cofnodion text for item 4.

Penodi Is-Gadeirydd y Cyngor ar gyfer blwyddyn 2014/15.

Gofynnodd y Cadeirydd am enwebiadau ar gyfer penodi Is-gadeirydd.

Cynigiodd Eryl Williams y dylid ethol y Cynghorydd Gwyneth Kensler yn Is-gadeirydd y Cyngor ar gyfer blwyddyn 2014/15 y Cyngor.   Cyfeiriodd at brofiad helaeth y Cynghorydd Kensler a'i hymroddiad i'r sir. 

Eiliodd Hugh Evans yr enwebiad gan gyfeirio at waith diflino'r Cynghorydd Kensler er budd y gymuned.

Gan nad oedd unrhyw enwebiadau pellach, ac yn dilyn pleidlais drwy godi llaw, cafwyd penderfyniad unfryd i ethol y Cynghorydd Gwyneth Kensler yn Is-gadeirydd y Cyngor ar gyfer blwyddyn 2014/15 y Cyngor.

Gwisgodd y Cadeirydd y Cynghorydd Kensler â Chadwyn Swydd yr Is-gadeirydd, wedyn cwblhaodd hithau ei Datganiad Derbyn Swydd.

Dywedwyd mai cydymaith yr Is-gadeirydd newydd fyddai Gaynor Morgan Rees, nad oedd, yn anffodus, wedi gallu dod i gyfarfod llawn y Cyngor oherwydd ymrwymiadau blaenorol.

Talodd Arweinwyr y Grwpiau deyrnged i waith y Cadeirydd a oedd yn ymddeol dros y deuddeg mis diwethaf, a llongyfarch y Cynghorydd Brian Blakeley ar gael ei ethol yn Gadeirydd a Gwyneth Kensler ar gael ei hethol yn Is-gadeirydd.

Hysbysiad o eitemau y dylid, ym marn y Cadeirydd, eu hystyried yn y cyfarfod fel materion brys dan Adran 100B(4) Deddf Llywodraeth Leol 1972.

Dim materion brys.

Derbyn cofnodion cyfarfod y Cyngor Sir a gynhaliwyd 8 Ebrill 2014 (copi ynghlwm).

Cyflwynwyd cofnodion cyfarfod y Cyngor a gynhaliwyd ar 8 Ebrill, 2014.

Dywedodd Joe Welch nad oedd ei bresenoldeb yng nghyfarfod 8 Ebrill 2014 wedi'i nodi ar y cofnodion. 

Mewn perthynas ag eitem 9, Y Cynllun Cyfalaf, dywedodd y Cynghorydd Huw Hilditch-Roberts ei fod wedi cyfeirio at gaffael, ac nad oedd hynny wedi'i nodi ar y cofnodion.

Mewn perthynas ag eitem 11, Panel Annibynnol Cymru ar Gydnabyddiaeth Ariannol, dywedodd y Cynghorydd Arwel Roberts ei fod wedi gofyn am welliant ac nad oedd wedi mynegi gwrthwynebiad.

Materion yn Codi - Mewn perthynas ag eitem 9, Y Cynllun Cyfalaf, holodd y Cynghorydd Rhys Hughes a oedd Polisi Amgylcheddol bellach wedi'i lunio.  Cadarnhaodd y Pennaeth Gwasanaethau Cyfreithiol a Democrataidd y byddai'n cadarnhau hyn ac yn adrodd yn ôl wrth yr aelodau.

PENDERFYNWYD yn amodol ar yr uchod, y dylid cymeradwyo bod cofnodion cyfarfod y Cyngor, a gynhaliwyd ar 8 Ebrill 2014, yn gywir.

Bydd yr Uwcharolygydd Alex Goss o Heddlu Gogledd Cymru yn rhoi cyflwyniad ar lafar i gynyddu gwybodaeth yr Aelodau am swyddogaeth a hygyrchedd Canolfan Gyfathrebu’r Heddlu. 

Ar ran Heddlu Gogledd Cymru, cymeradwyodd yr Uwch-arolygydd Alex Goss y Cadeirydd a'r Is-gadeirydd ar gael eu penodi, a dymunodd yn dda iddynt ar gyfer y 12 mis nesaf.

Rhoddodd yr Uwch-arolygydd Alex Goss, Pennaeth y Gyd-ganolfan Gyfathrebu, Llanelwy, Heddlu Gogledd Cymru, ynghyd â Paul Shea, Rheolwr Canolfan Gyfathrebu'r Heddlu (CGH) gyflwyniad er mwyn cynyddu gwybodaeth yr Aelodau am swyddogaeth a hygyrchedd Canolfan Gyfathrebu'r Heddlu (CGH), a hefyd i gyfeirio at y galwadau a gafwyd, gan gynnwys galwadau 999 amhriodol.

Aeth Paul Shea drwy'r cyflwyniad.  Roed y cyflwyniad yn trafod:

·        Nifer y galwadau a dderbyniwyd

·        Y dull o drin galwadau

·        Rhifau cyswllt a ffyrdd eraill o gysylltu

·        Beth fyddai’n digwydd wrth dderbyn galwad

·        Sut i reoli digwyddiad difrifol

·        Galwadau 999 amhriodol

Cafwyd trafodaeth, a gofynnodd yr aelodau gwestiynau.  Trafodwyd y materion canlynol:

·        Yr hyfforddiant a gaiff staff cyn dechrau eu swydd, ynghyd â hyfforddiant parhaus

·        Y gosb am wneud defnydd amhriodol o 999 ac am wastraffu amser yr Heddlu.  Roedd gan Heddlu Gogledd ddyletswydd gofal i bawb yng Ngogledd Cymru, ac roedd angen cadw'r llinellau ffôn 999 ar gyfer galwadau brys hanfodol.

·        Byddai unrhyw gymorth posib gan gynghorwyr a chymunedau i gael gwared â'r galwadau ffôn 999 amhriodol yn cael ei groesawu.

·        Gwybodaeth ddilynol ar ôl riportio trosedd.  Roedd opsiynau'n cael eu harchwilio ar hyn o bryd, ac un o'r datrysiadau posib oedd "olrhain fy nhrosedd", a fyddai ar gael ar y rhyngrwyd.

·        Cau ffyrdd o ganlyniad i ddamweiniau.  Roedd y penderfyniad i gau ffordd ai peidio yn dibynnu ar ba mor ddifrifol oedd y ddamwain.  Byddai'r Heddlu'n osgoi cau ffyrdd onid oedd gwir angen gwneud hynny.  O benderfynu cau ffordd, byddai Heddlu Gogledd Cymru wedyn yn cysylltu ag Adran Briffyrdd yr awdurdod lleol i weithredu'r penderfyniad hwnnw.

·        Roedd gwybodaeth leol gan staff wedi'i chynnwys yn y broses recriwtio. Roedd hi'n bryd uwchraddio'r systemau teleffoni i system ffôn seiliedig ar sgiliau.  Crybwyllwyd hefyd y byddai timau'n cael eu rhannu yn y dyfodol er mwyn gwella gwybodaeth leol

·        Cafwyd cynnydd yn nifer y galwadau iechyd meddwl ac roedd hynny wedi achosi problemau.  Canlyniad y galwadau yn aml fyddai anfon swyddog allan.  Cadarnhaodd yr Uwch-arolygydd Goss nad mater i'r Heddlu oedd problemau iechyd meddwl, ac nad y ddalfa oedd y lle priodol i rywun â phroblemau iechyd meddwl.  Pobl broffesiynol ddylai fod yn delio â'r achosion hyn, nid Heddlu Gogledd Cymru.

Os oedd yr aelodau’n dymuno ymweld â Chanolfan Gyfathrebu'r Heddlu, dywedodd yr Uwch-arolygydd Goss y dylent gysylltu ag ef ac y byddai'n trefnu'r ymweliad.

PENDERFYNWYD y dylai'r aelodau nodi ac ystyried y cyflwyniad, a chysylltu â'r Uwch-arolygydd Alex Goss os oeddent yn dymuno ymweld â Chanolfan Gyfathrebu'r Heddlu.

Yn y fan hon (11.50am) cafwyd egwyl o 20 munud.

 Ailddechreuwyd y cyfarfod am 12.10pm

Ystyried adroddiad gan y Swyddog Gwella Corfforaethol a'r Cydlynydd busnes: Swyddfa’r Arweinydd (copi ynghlwm) i'r Aelodau gymeradwyo fersiwn derfynol y ddogfen gyflenwi.

Cyflwynodd yr Aelod Arweiniol Moderneiddio a Pherfformiad, y Cynghorydd Barbara Smith ac Arweinydd y Cyngor, y Cynghorydd Hugh Evans, adroddiad (a gylchredwyd yn flaenorol) i hysbysu'r Aelodau am Ddogfen Gyflenwi Blwyddyn 3 (2014/15) ar gyfer Cynllun Corfforaethol 2012/17 a Blaenoriaethau Cynllun Corfforaethol yr Aelodau Cabinet i'w cyflawni erbyn 2017.

Roedd angen penderfynu cymeradwyo fersiwn ddrafft derfynol Dogfen Gyflenwi Blwyddyn 3 y Cynllun Corfforaethol.  Roedd Dogfen Gyflenwi wedi cael ei llunio ar gyfer pob blwyddyn o'r Cynllun Corfforaethol.  Pwrpas y Ddogfen Gyflenwi oedd amlinellu rhai o'r prosiectau allweddol a fyddai'n cael eu dechrau ac/neu eu cyflawni yn ystod y flwyddyn ariannol ar gyfer pob blaenoriaeth, gyda'r bwriad o ddangos sut oedd y Cynllun Corfforaethol yn effeithio ar y gwaith a oedd yn cael ei gyflawni.

Mewn perthynas â blaenoriaethau Aelodau'r Cabinet ar gyfer 2017, gofynnwyd i'r Cyngor nodi'r Dulliau o Fesur Llwyddiant a bennwyd gan Aelodau'r Cabinet yn eu portffolios er mwyn cyflawni yn erbyn holl flaenoriaethau'r Cynllun Corfforaethol.

Cafwyd trafodaeth, a gofynnodd yr aelodau gwestiynau.  Codwyd y materion canlynol:

·        Roedd y ddogfen yn cynnwys llawer o fyrfoddau.  Byddai'r ddogfen yn cael ei hail-lunio i fod yn haws ei darllen a byddai'r swyddogion yn sicrhau bod yr wybodaeth wedi'i chyfleu'n glir.

·        Sicrhau gostyngiad o 20% i amser teithio staff.  Byddai gweithio symudol, gan gynnwys Skype a mynediad o bell, yn lleihau’r amser y byddai'n rhaid i'r staff ei dreulio'n teithio.

·        Dewis rhieni o ran ysgol a ffafrir.  Roedd yna ddogfen meini prawf cymhwysedd ar gyfer pob ymgeisydd y byddai'n ofynnol i bob rhiant ei llofnodi  Pe bai’r rhieni'n dewis peidio anfon eu plentyn i'r ysgol agosaf at eu cartref, byddai'n ofynnol iddynt dalu i ddarparu cludiant i'r ysgol.

·        Arolwg Preswylwyr.  Cafwyd cadarnhad bod yr arolwg preswylwyr, yn y gorffennol, wedi cael ei rannu ar hap ymhlith preswylwyr gan gwmni proffesiynol ar ran Cyngor Sir Ddinbych.   Yn 2014, roedd yr arolwg preswylwyr wedi cael ei gynnal yn fewnol.

·        Cyfeiriodd y Cynghorydd Cefyn Williams at safon y ffyrdd yn Sir Ddinbych.  Dywedodd y Cynghorydd Williams fod safon gwaith cynnal y ffyrdd wedi dirywio, ac y gallai felly achosi damwain ddifrifol yn y dyfodol.  Roedd safon y gwaith a gwblhawyd ar y priffyrdd yn wael iawn gan y byddai tyllau'n ymddangos unwaith eto cyn pen deunaw mis ar ôl y gwaith trwsio.  Roedd y ffaith nad oedd digon o gyllid ar gael i gwblhau gwaith ar yr holl ffyrdd yr oedd angen eu gwella o fewn y sir wedi'i gadarnhau.  Roedd cyllideb wedi'i neilltuo bob blwyddyn ar gyfer gwelliannau priffyrdd.  Cyflwynwyd y cynlluniau gwella ffyrdd yng nghyfarfodydd Grŵp Ardal yr Aelodau i'w cymeradwyo neu eu diwygio.  Dywedodd y Cynghorydd David Smith, os oedd yr aelodau'n gwybod am unrhyw ffyrdd mewn cyflwr gwirioneddol ddrwg, y dylent gysylltu ag ef ac y byddai'n trosglwyddo'r wybodaeth i'r Adran Briffyrdd.  Argymhellodd y Cynghorydd Hugh Evans y dylid trafod cyflwr gwael priffyrdd y sir mewn Pwyllgor Archwilio, er mwyn cynnal trafodaeth fanylach ar hynny. 

·        Gwella amodau byw yn nhai'r sector preifat.   Bwriedir addasu 320 o anheddau mewn meddiant preifat er mwyn galluogi pobl anabl i fyw'n annibynnol yn eu cartrefi eu hunain.  Roedd y Cynghorydd Joan Butterfield wedi gofyn am ddadansoddiad o'r wybodaeth ynghylch pwy fyddai'n derbyn y cyllid o fewn y sector preifat.

PENDERFYNWYD:

(i)            Yn amodol ar unrhyw newidiadau a gytunir, y dylai'r Aelodau gymeradwyo drafft terfynol y ddogfen Gyflenwi fel bo modd ei chyfieithu a'i chyhoeddi.

(ii)          Y dylai'r Cyngor nodi cynnwys Atodiad 2 mewn perthynas â phortffolio pob Aelod Cabinet.

Ystyried adroddiad gan y Cydlynydd Archwilio (copi ynghlwm) i’r Cyngor ystyried Adroddiad Blynyddol y Pwyllgorau Archwilio ar gyfer 2013/2014.

Cyflwynodd y Cynghorydd Huw Hilditch-Roberts Adroddiad Blynyddol Pwyllgorau Archwilio'r Cyngor (a gylchredwyd yn flaenorol) i'w ystyried gan yr Aelodau.

I gydymffurfio ag Erthygl 6.3.7 yng Nghyfansoddiad y Cyngor, rhaid i Bwyllgorau Archwilio roi adroddiad blynyddol i'r Cyngor llawn ar eu gwaith, a gwneud argymhellion ynghylch rhaglenni gwaith i'r dyfodol a dulliau gweithio diwygiedig os yw'n briodol.

Ar ôl trafodaeth hir, codwyd y pwyntiau canlynol:

·        Roedd presenoldeb aelodau Archwilio mewn Grwpiau Herio Gwasanaethau ac ar gyrff eraill allanol yn hynod bwysig, ac anogwyd  aelodau Archwilio i fod yn bresennol.  Os nad oedd aelodau Archwilio yn gallu bod yn bresennol am unrhyw reswm, gofynnwyd iddynt anfon aelod arall yn eu lle os oedd modd.

·        Mae Aelodau Arweiniol y Cabinet bellach yn mynychu'r Pwyllgor Archwilio, sydd o gymorth mawr i'r Aelodau Archwilio.

·        Roedd eitem sefydlog wedi'i chynnwys ar Raglen y Cabinet i drafod eitemau wedi'u cyfeirio o'r Pwyllgorau Archwilio.

·        Pe bai cais yn dod i law i ychwanegu eitem at raglen cyfarfod Pwyllgor Archwilio, byddai'n cael ei gyflwyno gerbron y Grŵp Cadeiryddion ac Is-gadeiryddion Archwilio a fyddai wedyn yn penderfynu pa Bwyllgor Archwilio fyddai'n briodol i drafod y mater.  Fel arall, byddai'r Grŵp Cadeiryddion ac Is-gadeiryddion Archwilio weithiau'n penderfynu nad oedd y mater yn briodol i'w ystyried gan Bwyllgor Archwilio.

Mynegodd y Cynghorydd Joan Butterfield ddiolch i Grŵp y Cadeiryddion ac Is-gadeiryddion Archwilio ac i'r swyddogion cefnogi am lunio adroddiad mor fanwl a chlir.

PENDERFYNWYD y dylai'r Cyngor dderbyn Adroddiad Blynyddol Pwyllgorau Archwilio'r Cyngor 2013/14

Ystyried rhaglen gwaith i’r dyfodol y Cyngor (copi ynghlwm).

Cyflwynodd y Pennaeth Gwasanaethau Cyfreithiol a Democrataidd Raglen Gwaith y Cyngor i'r Dyfodol (a gylchredwyd yn flaenorol).

Cyfeiriodd yr Aelod Arweiniol Cyllid ac Asedau at ddyddiadau'r gweithdai a oedd i ddod ar y Gyllideb, a drefnwyd ar gyfer mis Gorffennaf 2014.

Dyma'r dyddiadau:

·        9 Gorffennaf 2014 (drwy'r dydd)

·        14 Gorffennaf 2014 (drwy'r dydd)

·        30 Gorffennaf 2014 (hanner diwrnod – sesiwn y prynhawn)

PENDERFYNWYD yn amodol ar yr uchod, y dylid cymeradwyo a nodi Rhaglen Gwaith y Cyngor i'r Dyfodol.

Daeth y cyfarfod i ben am 1.30pm