Agenda and draft minutes

Talodd Is-gadeirydd y Cyngor, y Cynghorydd Arwel Roberts, deyrnged i’r diweddar cyn Gynghorydd Sir a’i gyd-Gynghorydd Tref Rhuddlan, Gareth Rowlands.  Dan arweiniad Cadeirydd y Cyngor, cafwyd munud o dawelwch. 

Cafwyd ymddiheuriadau gan y Cynghorwyr Geraint Lloyd Williams ac Elfed Williams.

Aelodau i ddatgan unrhyw gysylltiad personol neu gysylltiad sy’n peri rhagfarn yn gysylltiedig ag unrhyw fater sydd i’w ystyried yn y cyfarfod hwn.

Ni chafodd unrhyw gysylltiad ei ddatgan.

Hysbysiad o eitemau y dylid, ym marn y Cadeirydd, eu hystyried yn y cyfarfod fel materion brys yn unol ag Adran 100B(4) Deddf Llywodraeth Leol 1972.

Caniataodd y Cadeirydd i’r Cynghorydd Chris Evans rannu’r llwyddiant a’r ymgysylltiad rhagorol a welodd yn ystod ei ymweliad â’r ffair swyddi yn y Rhyl y diwrnod cynt.  Ategodd yr Arweinydd a’r Dirprwy Arweinydd at ei sylwadau.

Dywedodd y Cadeirydd fod dau gwestiwn wedi dod i law. 

Cyfeiriodd y Cynghorydd Terry Mendies at y swyddi swyddogion gorfodi cynllunio gwag a gofynnodd p’un a oedd y Cyngor yn mynd ati’n weithredol i geisio recriwtio dau swyddog gorfodi cynllunio ar hyn o bryd? 

Ymatebodd y Cynghorydd Alan James, Aelod Cabinet Arweiniol Datblygu Lleol a Chynllunio gan gyfeirio at adroddiad a ystyriwyd gan y Pwyllgor Craffu Cymunedau ym mis Rhagfyr 2024 a oedd yn cynnwys nifer o achosion a gofnodwyd fel rhai a oedd yn destun ymchwiliad, a oedd yn oddeutu 590, ac roedd y ffigwr presennol yn debyg hefyd, a thynnodd sylw hefyd at adnoddau staffio a oedd yn cynnwys y ddwy swydd gorfodi.  Fodd bynnag, yn ogystal â’r ddwy swydd lawn amser, roedd y Cyngor wedi gallu sicrhau dwy rôl Swyddog Gwella drwy’r Gronfa Ffyniant Gyffredin, a lluniwyd y rolau hyn i ganolbwyntio ar faterion amgylcheddol ac adfywio canol trefi.  Amlinellodd y Cynghorydd James yr anawsterau a brofwyd o ran recriwtio staff gorfodi priodol a bod y Cyngor yn ailystyried y meini prawf hanfodol ar gyfer y swyddi hyn ar hyn o bryd er mwyn recriwtio staff gorfodi newydd.

Gofynnodd y Cynghorydd Mendies a fyddai modd i staff cynllunio cyfredol gefnogi’r gweithgareddau gorfodi hyn yn ystod y cyfnod heriol hwn o ran recriwtio?  Eglurodd y Cynghorydd James fod y tîm yn ystyried gwahanol ffyrdd i helpu â’r problemau gorfodi ar hyn o bryd a rhoddodd sicrwydd fod gwaith yn mynd rhagddo.  Ychwanegodd y Cynghorydd McLellan hefyd fod gorfodaeth cynllunio’n flaenoriaeth.

Gofynnodd y Cynghorydd Brian Jones am wybodaeth ar y dyddiad agor dros dro ar gyfer cyfleuster newydd Marchnad y Frenhines, ynghyd â faint o fusnesau a oedd wedi llofnodi cytundeb tenantiaeth gyfreithiol i weithredu o adeilad newydd Marchnad y Frenhines?

Soniodd y Cynghorydd McLellan am gynnydd y gwaith paratoadol ar y safle a nododd eu bod yn gobeithio agor yr adeilad ddechrau’r haf.  Ychwanegodd fod 140 o fasnachwyr wedi dangos diddordeb ac y byddai cytundebau ffurfiol yn cael eu trafod yr wythnos hon.  Nododd y Cyfarwyddwr Corfforaethol - Economi a’r Amgylchedd y byddai’r Cyngor mewn sefyllfa i wahodd aelodau i ymweld â’r Farchnad yn fuan. 

Derbyn cofnodion cyfarfod y Cyngor Sir a gynhaliwyd 28 Ionawr 2025 ((copi ynghlwm)).

Cyflwynwyd cofnodion cyfarfod y Cyngor a gynhaliwyd ar 28 Ionawr 2025 (a ddosbarthwyd yn flaenorol).

Ymatebodd yr Arweinydd i ymholiad gan y Cynghorydd Will Price a chadarnhaodd yr amserlenni ar gyfer y broses fynegi diddordeb mewn perthynas â Sinema Vue yn y Rhyl, a chadarnhaodd y byddai adroddiad diweddaru’n cael ei gyflwyno i Grŵp Ardal Aelodau’r Rhyl.

PENDERFYNWYD derbyn cofnodion y cyfarfod a gynhaliwyd ar 28 Ionawr 2025 a chadarnhau eu bod yn gywir.

Ystyried adroddiad gan y Pennaeth Cyllid ar Archwilio (copi ynghlwm) sy’n nodi’r cynigion i osod cyllideb gytbwys ar gyfer 2025/26.

Cyflwynodd y Cynghorydd Gwyneth Ellis, yr Aelod Arweiniol Cyllid Perfformiad ac Asedau Strategol, a’r Pennaeth Cyllid ac Archwilio adroddiad (a ddosbarthwyd yn flaenorol) ar Gyllideb y Cyngor 2025 / 2026.

Rhoddwyd gwybod i aelodau fod y Cyngor wedi derbyn Setliad Dros Dro ar gyfer 2025/26 ar 11 Rhagfyr 2024, a oedd yn gynnydd o £14.427 miliwn neu 7% mewn arian parod o gymharu â lefel y cyllid a gafwyd ddechrau 2024-25. Roedd Llywodraeth Cymru wedi llunio tablau fel bod modd cymharu lefelau cyllid 2024/25 a 2025/26 ar draws Cynghorau Cymru. Roedd canran cynnydd Sir Ddinbych yn 4.6%, sy’n is na’r gymhariaeth mewn arian parod a geir uchod oherwydd bod cyllid ychwanegol i gwrdd â chostau cyflogau a phensiynau wedi’i ddarparu yn ystod y flwyddyn ac roedd  Llywodraeth Cymru wedi cynnwys hynny yn y gymhariaeth a ddefnyddir ar gyfer 2024/25.

Mae cynnydd Sir Ddinbych yn cymharu’n ffafriol gyda chyfartaledd Cymru o 4.3% ac mae’n dilyn cynnydd yn nifer y disgyblion a data prydau ysgol am ddim a ddefnyddir i ddosbarthu cyllid i ysgolion.

Eglurodd y Cynghorydd Ellis mai nod heddiw oedd cyflwyno cyllideb gytbwys a rhoddodd wybod bod y broses o osod cyllideb gytbwys wedi bod yn heriol, gyda gwaith yn dechrau flwyddyn yn ôl yn syth ar ôl gosod cyllideb 2023/24.  Rhoddodd wybod bod awdurdodau lleol ar draws y wlad hefyd yn profi’r heriau ariannol yn Sir Ddinbych.  Yn ogystal â hynny, nododd y Cynghorydd Ellis:

·       bod y gyllideb a gyflwynwyd heddiw’n wahanol i’r gyllideb a drafodwyd yn y Cyngor llawn ym mis Tachwedd 2024, gan fod Sir Ddinbych wedi derbyn mwy o gyllid na’r disgwyl gan Lywodraeth Cymru. Fodd bynnag, nid oedd y cynnydd yn y setliad yn ddigon i fantoli’r gyllideb heb i’r Cyngor wneud arbedion eraill a chynyddu lefelau treth y Cyngor.

·       Roedd cyllideb ddrafft y Cyngor wedi cynyddu am sawl rheswm, gan gynnwys chwyddiant cyflogau, y costau ychwanegol sy’n gysylltiedig â chyfraniadau yswiriant gwladol cyflogwyr a’r galw cynyddol ar wasanaethau rheng flaen statudol hanfodol.  Roedd y galw am wasanaethau’n dal i gynyddu ac roedd natur yr anghenion hefyd wedi mynd yn fwy cymhleth mewn meysydd fel Addysg a Gwasanaethau Plant a Gofal Cymdeithasol i Oedolion.

·       Er mwyn gosod cyllideb gytbwys, roedd y cyfraniad mwyaf wedi dod gan setliad ariannol Llywodraeth Cymru, gyda’r gweddill yn dod gan arbedion a chynnydd mewn Treth y Cyngor, roedd yr adroddiad  i’r Cyngor heddiw’n cynnig £4,2 miliwn o arbedion a chynnydd yn nhreth y Cyngor yn gyfystyr â £5.2 miliwn.  Roedd y cynnydd o 5.3% yn nhreth y Cyngor yn ogystal â’r 0.7% sy’n ofynnol ar gyfer yr Awdurdod Tân ac Achub yn dod â’r ffigwr i 6%. 

·       Roedd y cynigion arbedion yn canolbwyntio ar arbedion effeithlonrwydd a chynyddu incwm yn unol â’r polisi ffioedd a thaliadau, ac arbedion ym mhrosiectau trawsnewidiol y Cyngor.

·       Roedd Cynllun Gostyngiadau Treth y Cyngor ar gael i helpu’r rhai mwyaf diamddiffyn.

·       Nid oedd y gyllideb a gyflwynwyd wedi rhagweld unrhyw incwm ychwanegol a allai gael ei gynhyrchu yn hwyrach yn y flwyddyn gan y llywodraeth i ariannu’r cynnydd mewn cyfraniadau yswiriant gwladol. 

Cyfeiriodd y Pennaeth Cyllid ac Archwilio aelodau at y Cynllun Ariannol Tymor Canolig yn atodiad un, a oedd yn cynnwys cynigion ar gyfer gosod cyllideb gytbwys heddiw a’r pwysau cyllidebol sydd wedi arwain at y lefel ofynnol o arbedion. 

Rhoddwyd gwybod i aelodau am y goblygiadau cyllidebol ar gyfer ysgolion, gan gynnwys gwobrau tâl athrawon a staff nad ydynt yn athrawon, cynnydd yng nghyfraniadau yswiriant gwladol cyflogwyr a phwysau chwyddiannol eraill.  Rhoddodd y Pennaeth Cyllid ac Archwilio wybod bod y rhain wedi arwain at ddyrannu £5.2 miliwn i ysgolion a oedd yn gyfystyr  ...  view the full Cofnodion text for item 5.

Ystyried adroddiad gan y Pennaeth Cyllid ac Archwilio (copi ynghlwm) i bennu lefelau Treth y Cyngor ar gyfer 2025/26.

Cyflwynodd y Cynghorydd Gwyneth Ellis, Aelod Arweiniol Cyllid, Perfformiad ac Asedau Strategol a’r Pennaeth Cyllid ac Archwilio adroddiad (a ddosbarthwyd yn flaenorol) i helpu’r Cyngor i wneud penderfyniadau i sicrhau fod Treth y Cyngor a materion cysylltiedig yn gyfreithiol ddilys.

Cytunodd Aelodau i gynnal pleidlais.

O blaid y cynnig:

Y Cynghorwyr Blakely-Walker, Butterfield, Chamberlain-Jones, Chard, Clewett, Davies, Ellis, Elson, Chris Evans, Hugh Evans, Justine Evans, Feeley, Harland, Heaton, Hilditch-Roberts, Hogg, Holliday, Hughes, Irving, James, Brian Jones, Delyth Jones, Keddie, King, Matthews, May, McLellan, Mellor, Mendies, Metri, Parry, Price, Roberts, Sampson, Sandilands, Scott, Thomas, Cheryl Williams, Wynne ac Young.

Yn erbyn y cynnig:

Dim.

Bu i’r canlynol ymatal rhag pleidleisio:

Dim.

PENDERFYNWYD:

(i) Bod y Cyngor Sir, fel yr Awdurdod Bilio, wedi ystyried y praeseptau a dderbyniwyd gan Gomisiynydd Heddlu a Throsedd Gogledd Cymru a’r Cynghorau Tref a Chymuned ac yn cyhoeddi lefelau Treth y Cyngor ar gyfer blwyddyn ariannol 2025/26.

Bod y symiau y mae’r Cyngor wedi’u cyfrifo ar gyfer blwyddyn ariannol 2025/26, yn unol ag Adrannau 32 i 34(1) o Ddeddf Cyllid Llywodraeth Leol 1992 (y Ddeddf) a Rheoliadau Addasu Cyfrifiadau Angenrheidiol (Cymru) 2008 fel y’u cyflwynir yn Atodiad A, adran 3.

(iii) Bod y symiau y mae’r Cyngor wedi’u cyfrifo ar gyfer blwyddyn ariannol 2025/26, yn unol ag Adrannau 34(2) i 36(1) o Ddeddf Cyllid Llywodraeth Leol 1992 (y Ddeddf) fel y’u cyflwynir yn Atodiad A, adran 4.

(iv) Bod symiau Treth y Cyngor ar gyfer blwyddyn ariannol 2025/26 ar gyfer pob un o'r categorïau o anheddau fel y’u cyflwynir yn Atodiad C.

(v) Y pennir lefel y gostyngiad ar gyfer Dosbarthiadau A, B a C fel y rhagnodir yn Rheoliadau Treth y Cyngor (Dosbarthau Rhagnodedig ar Anheddau) (Cymru) 2004 yn sero ar gyfer blwyddyn ariannol 2025/26 ar yr amod na fydd unrhyw newidiadau mewn deddfwriaeth neu’r amgylchiadau’n lleol.

Ystyried adroddiad gan y Rheolwr Caffael Cydweithredol a Fframwaith (copi ynghlwm) i ddarparu gwybodaeth ynghylch diweddariadau i Reolau’r Weithdrefn Gontractau i gyd-fynd â Deddf Caffael 2023.

Cyflwynodd y Cynghorydd Julie Matthews, Dirprwy Arweinydd ac Aelod Arweiniol Polisi, Cydraddoldeb a Strategaeth Gorfforaethol adroddiad (a ddosbarthwyd yn flaenorol) ynglŷn â’r diweddariadau i Reolau’r Weithdrefn Gontractau er mwyn cyd-fynd â’r Ddeddf Gaffael 2023. 

Ychwanegodd y Cynghorydd Matthews nad oedd y diweddariad yn effeithio ar, nac yn newid y Strategaeth Gaffael bresennol, roedd yn ddiweddariad tymor byr gan y byddai Rheolau'r Weithdrefn Gontractau yn cael eu hadolygu ymhellach yn ddiweddarach eleni yn barod ar gyfer gweithredu Deddf Partneriaeth Gymdeithasol a Chaffael Cyhoeddus (Cymru), a ragwelir ddiwedd 2025 neu ar ddechrau 2026, yr union ddyddiad i’w gadarnhau gan Lywodraeth Cymru.

Rhoddodd Pennaeth y Gwasanaethau Cymorth Corfforaethol:  Pobl grynodeb i aelodau y byddai’r paratoadau ar gyfer Deddf Partneriaeth Gymdeithasol a Chaffael Cyhoeddus (Cymru) yn arwain at adolygiad llawer mwy cynhwysol o reolau'r weithdrefn gontractau ac yn debygol o arwain at newidiadau sylweddol iddynt.  Eglurodd fod Sir Ddinbych wedi gweithio gyda’r awdurdodau lleol eraill yng ngogledd Cymru i sicrhau cysondeb ar draws y rhanbarth, a’r bwriad oedd parhau â’r dull cydweithredol hwnnw ar gyfer yr adolygiad manylach.

Penderfynwyd bod y Cyngor yn cydnabod y newidiadau i Reolau'r Weithdrefn Gontractau er mwyn parhau â phroses gaffael sy’n cydymffurfio, a diwygio’r Cyfansoddiad i fabwysiadu’r Rheolau newydd hynny.

Ystyried adroddiad gan Reolwr Mewnwelediad, Strategaeth a Chyflawni (copi ynghlwm) yn gofyn i’r Cyngor gymeradwyo’r datganiadau ymateb a’r Cynllun Gweithredu.

Cyflwynodd y Cynghorydd Gwyneth Ellis, Aelod Arweiniol Cyllid, Perfformiad ac Asedau Strategol, adroddiad (a ddosbarthwyd ymlaen llaw) ar Asesiad Perfformiad Panel Cyngor Sir Ddinbych a’r ymateb.

Rhoddodd y Cynghorydd Ellis wybod bod Asesiadau Perfformiad Panel y Cyngor yn ofyniad statudol newydd, i’w cwblhau unwaith bob tymor gwleidyddol.  Asesiad Perfformiad Panel Sir Ddinbych oedd y cyntaf o’r asesiadau hyn i gael ei gwblhau yng Nghymru.  Rhoddodd y Cynghorydd Ellis grynodeb o’r asesiad a’i ddefnyddioldeb fel offeryn cymharu, roedd yn ymarfer amrywiol ac ystyriwyd yr adroddiad a’r cynllun gweithredu gan y Pwyllgor Llywodraethu ac Archwilio a’r Cabinet cyn iddynt gael eu hystyried gan y Cyngor.  Amlinellodd fod yr Asesiad Perfformiad Panel yn cynnwys canfyddiadau sylweddol, a’i fod yn gadarnhaol am y Cyngor ac yn cydnabod cyfraniadau arbennig staff y Cyngor yn ystod cyfnodau heriol.  Hoffai’r Cynghorydd Ellis gofnodi ei diolch i weithwyr Sir Ddinbych am eu gwasanaeth ymroddedig. 

Cyfeiriodd Pennaeth y Gwasanaeth Cymorth Corfforaethol - Perfformiad, Digidol ac Asedau (PGCC: PDA) aelodau at adroddiad yr Asesiad Perfformiad Panel yn atodiad 1, y datganiadau ymateb statudol ym mharagraffau 4.7 a 4.8 yn yr adroddiad eglurhaol i’r Cyngor a’r Cynllun Gweithredu yn atodiad 2 sy’n cynnwys y camau y byddai’r Cyngor yn eu cymryd mewn ymateb i argymhellion adroddiad yr Asesiad Perfformiad Panel.  Cydnabyddodd y PGCC: PDA y cyfraniadau a wnaed gan staff Sir Ddinbych hefyd.  Rhoddwyd gwybod i Aelodau mai’r ymateb a gynigir ar gyfer y Cyngor oedd derbyn pob un o argymhellion yr Asesiad Perfformiad Panel a oedd wedi nodi Sir Ddinbych fel Cyngor a gaiff ei redeg yn dda.

Roedd y drafodaeth a ddilynwyd gan aelodau’n cynnwys y pwyntiau canlynol:

·        Roedd y broses asesu wedi cael ei chynnal gan bobl annibynnol gymwys iawn. 

·        Barn rhai Cynghorwyr a oedd yn cwestiynu p’un a oedd yr Asesiad yn adlewyrchu’r heriau a brofwyd gan y Cyngor a’r preswylwyr yn ddiweddar mewn perthynas â’r gwasanaeth casglu newydd a lefel y cwynion a dderbyniwyd o ganlyniad.

·        Ar y lefel wleidyddol, ni ymddengys bod y cynnig o ddiffyg hyder yn arweinydd y Cyngor wedi’i gynnwys yn yr Asesiad, ond nodwyd y gwaith maes a ddigwyddodd yn ystod yr un wythnos.

·        Roedd yr Asesiad yn ystyried cadernid corfforaethol a’r darlun ehangach.

·        Roedd ymateb y Cyngor yn awgrymu y byddai rhagor o wybodaeth am dystiolaeth y Panel Asesu a arweiniodd at yr argymhellion yn ddefnyddiol.

·        Cwblhawyd yr Asesiad yn ystod cyfnod anodd i’r Cyngor ac roedd canfyddiadau’r Panel yn nodi arweinyddiaeth gadarn. 

·        Roedd adroddiad yr Asesiad yn cynnwys mân wallau ffeithiol am y Cyngor a oedd yn rhannol o ganlyniad i’r amser a oedd wedi mynd heibio rhwng y gwaith maes / dadansoddiad dogfennol a’r adroddiad canfyddiadau.

Rhoddodd y PGCC: PDA wybod i aelodau fod y cylch statudol ar gyfer Asesiadau Perfformiad y Panel yn canolbwyntio ar lywodraethu corfforaethol, rheoli risgiau a rheolaeth ariannol, yn hytrach na materion gweithredol.  Yn ogystal â hynny, un offeryn yn fframwaith rheoli perfformiad ehangach y Cyngor oedd yr Asesiadau Perfformiad Panel, ac roedd y fframwaith hwnnw’n cynnwys mesurau, dangosyddion perfformiad, cwynion a dderbyniwyd, safbwynt y defnyddiwr gwasanaeth a oedd yn canolbwyntio ar faterion gweithredol a byddai’r rhain i gyd yn cael eu hadlewyrchu yn adroddiad perfformiad blynyddol y Cyngor ym mis Gorffennaf.

PENDERFYNWYD bod y Cyngor yn:

(i) nodi a chroesawu’r Adroddiad ynghylch yr Asesiad Perfformiad Panel (Atodiad 1).

(ii) Cymeradwyo’r ymateb i’r Asesiad Perfformiad Panel, sef: 1) y datganiadau ymateb (Adran 4.7 a 4.8); a 2) y Cynllun Gweithredu (Atodiad 2).

Ystyried adroddiad gan y Cyfarwyddwr Corfforaethol Llywodraethu a Busnes (copi ynghlwm) i gyflwyno gwaith y Pwyllgor a’i ganfyddiadau a’i arsylwadau.

Cyfeiriodd y Cynghorydd Bobby Feeley at gais blaenorol yr oedd hi wedi’i wneud i gynnwys adroddiad blynyddol y Pwyllgor Safonau yn gynnar ar y rhaglen.  Roedd y Swyddog Monitro’n cydnabod y pwynt a rhoddodd wybod fod trefn y rhaglen yn ddibynnol ar bwysigrwydd yr eitemau cyllidebol a’r eitemau eraill ar y rhaglen.

Cyflwynodd y Swyddog Monitro Gadeirydd annibynnol Pwyllgor Safonau’r Cyngor, Julie Hughes, i’r Cyngor.  Nododd y Swyddog Monitro mai hwn oedd yr adroddiad blynyddol olaf i gael ei gyflwyno gan Ms Hughes gan y byddai ei chyfnod yn y swydd yn dod i ben ym mis Mai eleni, ac roedd ar y Swyddog Monitro eisiau diolch am y gwaith rhagorol yr oedd hi wedi’i gyflawni fel cadeirydd y pwyllgor.

Roedd cyflwyniad Ms Hughes i’r aelodau’n cynnwys y pwyntiau canlynol:

·       Roedd cyfnod yr aelod annibynnol ac Is-gadeirydd y Pwyllgor Safonau, Anne Mellor, yn ei swydd hefyd yn dod i ben.

·       Rôl aelodau’r Pwyllgor Safonau o ran arsylwi cyfarfodydd sir, tref a chymuned a darparu adborth cefnogol.

·       Rôl ganolog y Pwyllgor o ran trefniadau cod ymddygiad yr aelodau, er mwyn darparu sicrwydd i’r cyhoedd yn ogystal â diogelu Cynghorwyr.

·       Roedd y nifer isel o geisiadau ar gyfer goddefebau (ar gyfer aelodau â chysylltiad sy’n rhagfarnu mewn unrhyw fusnes a gynhelir) yn peri pryder i’r Pwyllgor Safonau, a gofynnodd Ms Hughes i Gynghorwyr Sir helpu i godi ymwybyddiaeth.

·       Dyletswyddau arweinwyr grwpiau gwleidyddol i gymryd camau rhesymol i hyrwyddo a chynnal safonau ymddygiad da a chydweithio â’r Pwyllgor Safonau o ran hynny.  Roedd y Pwyllgor yn fodlon fod bob arweinydd grŵp wedi cydymffurfio â’u dyletswyddau ac roedd Ms Hughes yn gobeithio y gellid cynnal hyn i’r dyfodol.

·       Diweddariad ar nifer y cwynion a ragwelir gan Ombwdsmon Gwasanaethau Cyhoeddus Cymru dros y flwyddyn ddiwethaf.

Cyfrannodd Aelodau at y materion canlynol:

·       Roedd Aelodau’n ddiolchgar am y gwaith yr oedd Ms Hughes a’i chydweithwyr yn y Pwyllgor Safonau wedi’i wneud.

·       Eglurwyd y weithdrefn recriwtio i lenwi swyddi’r ddau aelod annibynnol a oedd yn gorffen yn y swydd.

·       Yr heriau ychwanegol o ran cadeirio a chefnogi cyfarfodydd hybrid.

·       Roedd yn debyg bod yr amser yr oedd swyddfa’r Ombwdsmon yn ei dreulio’n ymdrin â chwynion yn rhy hir ac yn ychwanegu at y straen a deimlwyd gan bobl a oedd yn cyflwyno cwynion neu’n destun cwyn.  Cadarnhaodd Ms Hughes fod swyddfa’r Ombwdsmon yn wynebu cynnydd yn eu llwyth gwaith, yn arbennig o ran cwynion y sector iechyd ac achosion o gwynion yn ôl ac ymlaen.  Roedd yr Ombwdsmon felly’n hyrwyddo’r buddion o fesurau datrys lleol effeithiol lle bo hynny’n briodol.

PENDERFYNWYD - bod y Cyngor derbyn ac yn nodi cynnwys Adroddiad Blynyddol y Pwyllgor Safonau ar gyfer 2024.

Ystyried rhaglen waith y Cyngor (copi ynghlwm).

Cyflwynodd y Swyddog Monitro raglen waith y Cyngor (a ddosbarthwyd yn flaenorol) a rhoddodd wybod i aelodau mai cyfarfod nesaf y Cyngor fyddai’r Cyfarfod Blynyddol lle byddai Cadeirydd ac Is-gadeirydd newydd yn cael eu hethol.  Cyfeiriodd hefyd at raglen Gweithdai’r Cyngor a oedd ynghlwm â’r adroddiad.

Nododd Aelodau’r Rhaglen Gwaith.