Agenda and draft minutes

Croesawodd y Pennaeth Gwasanaethau Cyfreithiol, Adnoddau Dynol a Democratiaeth bawb i'r cyfarfod a chyflwyno’r eitem o Benodi Cadeirydd.

Enwebodd y Cynghorydd Barry Mellor y Cynghorydd Jason McLellan, ac eiliwyd gan y Cynghorydd Peter Duffy.

Pawb yn codi dwylo yn unfrydol yn cytuno i hynny.

PENDERFYNWYD penodi’r Cynghorydd Jason McLellan yn Gadeirydd y Pwyllgor Llywodraethu Corfforaethol ar gyfer y flwyddyn sydd i ddod.

Enwebodd y Cynghorydd Jason McLellan y Cynghorydd Barry Mellor, a eiliwyd gan y Cynghorydd Ann Davies.

Pawb yn codi dwylo yn unfrydol yn cytuno i hynny.

PENDERFYNWYD  y dylid penodi'r Cynghorydd Barry Mellor fel Is-Gadeirydd y Pwyllgor Trwyddedu am y flwyddyn nesaf.

Dylai’r Aelodau ddatgan unrhyw gysylltiad personol neu gysylltiad sy'n rhagfarnu mewn unrhyw fater a nodwyd i'w ystyried yn y cyfarfod hwn.

Dim

Rhybudd o eitemau y dylid, ym marn y Cadeirydd, eu hystyried yn y cyfarfod fel materion brys yn unol ag Adran 100B(4) Deddf Llywodraeth Leol 1972.

Dim

Derbyn cofnodion cyfarfod y Pwyllgor Llywodraethu Corfforaethol a gynhaliwyd ar 25 Mawrth 2015.

Cyflwynwyd Cofnodion cyfarfod y Pwyllgor Llywodraethu Corfforaethol a gynhaliwyd ar 25 Mawrth 2015.

Ymddiheurodd y Pennaeth Gwasanaethau Cyfreithiol, Adnoddau Dynol a Democratiaeth i'r Pwyllgor, o ganlyniad i broblem technegol nid oedd y fersiwn Saesneg o Eitem 11 - Taliadau Ariannol i Ymadawyr Gofal - Diweddariad wedi llwytho’n gywir gan y system Mod.Gov.  Roedd y papurau Cymraeg yn gywir.  Dosbarthwyd copi o eitem 11 wedi’i argraffu yn ystod y cyfarfod.

PENDERFYNWYD  - y dylid derbyn a chymeradwyo cofnodion cyfarfod y Pwyllgor Llywodraethu Corfforaethol a gynhaliwyd ar 25 Mawrth 2015 fel cofnod cywir.

Ystyried adroddiad gan y Pennaeth Cyllid ac Asedau (copi ynghlwm).

Ystyried adroddiad gan y Prif Gyfrifydd (a ddosbarthwyd yn flaenorol) i Aelodau ystyried y wybodaeth ddiweddaraf ar Broses y Gyllideb ac i wneud sylwadau fel y bo'n briodol.

Eglurodd y Cynghorydd Julian Thompson-Hill nad oedd unrhyw Weithdai Cyllideb wedi’u cynnal ers cyfarfod y Pwyllgor Llywodraethu Corfforaethol diwethaf ar 25 Mawrth 2015.   Roedd y Gweithdy Cyllideb nesaf wedi’i drefnu ar gyfer 5 Mehefin, 2015. Roedd cyfarfodydd Gwasanaeth unigol wedi dechrau gyda 50% wedi'u cwblhau.

Roedd y bwlch a ragwelwyd yn y gyllideb ar gyfer 2015/16 tua £8m. Roedd arbedion o £2.7miliwn wedi eu cymeradwyo fel rhan o'r broses bresennol a oedd yn golygu bod y bwlch sy'n weddill tua £6.2miliwn.

Roedd disgwyl arbedion arfaethedig o oddeutu £1.5m ar ôl cwblhau'r cyfarfodydd Gwasanaeth Unigol.  Byddai hynny'n golygu dod o hyd i arbedion ychwanegol o £4.5m.

Byddai cynigion ar gyfer arbedion yn codi o'r Gweithdy Cyllideb ar 5 Mehefin yn mynd i'r Cyngor llawn i'w cadarnhau a’u cymeradwyo ym mis Gorffennaf 2015.

Byddai rheoli risg y broses yn ystyriaeth allweddol i’r Pwyllgor ac roedd y risgiau posib i weithredu pob cynnig i arbed wedi digwydd ac yn parhau i gael eu cyflwyno mewn gweithdai wrth iddynt ddatblygu.   

Cryfhaodd y Pwyllgor Llywodraethu Corfforaethol yr alwad i Aelodau gymryd rhan ac i fynychu'r Gweithdai Gyllideb. 

Cadarnhaodd y Swyddog Adran 151 (S151O) bod Ardal y Gyllideb wedi'i sefydlu ar system Mod.Gov yn Llyfrgell yr Aelodau.  Roedd y wybodaeth yn cael ei boblogi ar hyn o bryd ac y byddai'r (S151O) yn hysbysu'r holl Aelodau pan fydd hyn wedi'i gwblhau.

Yn y fan hon, mynegodd y Cynghorydd Martyn Holland a’r Cadeirydd eu gwerthfawrogiad i Paul McGrady, Pennaeth Cyllid ac Asedau, am ei holl waith a'r cefnogaeth a roddodd yn ystod ei yrfa yn Sir Ddinbych. Byddai'n gadael Sir Ddinbych ar ddydd Gwener i ymgymryd â swydd newydd.

PENDERFYNWYD - bod y Pwyllgor Llywodraethu Corfforaethol yn derbyn ac yn nodi cynnwys yr adroddiad ar y datblygiadau diweddaraf.

Derbyn diweddariad llafar gan y Pennaeth Cyfathrebu, Marchnata a Hamdden.

Cyflwynodd y Pennaeth Cyllid ac Asedau Dros Dro adroddiad ar lafar ar gaffael gwasanaethau adeiladu.

Dywedodd y Pennaeth Cyllid ac Asedau Dros Dro bod angen gwneud newidiadau sylfaenol o ran caffael gwasanaethau adeiladu.  Roedd gan wasanaethau gwahanol drefniadau gwahanol felly byddai angen dyfeisio proses well ar gyfer caffael. Er mwyn galluogi'r system i fod yn llwyddiannus, byddai angen gwario amser gyda chyflenwyr, contractwyr a chwmnïau llai i gynorthwyo yn eu hyfforddiant fel eu bod yn hyderus yn defnyddio'r system.  Byddai'r system e-Gaffael yn helpu ond byddai angen gwneud rhai newidiadau. 

Gofynnodd y Pennaeth Cyllid ac Asedau Dros Dro am amser ychwanegol iddo allu cwrdd ag archwilio i gynhyrchu cynllun gweithredu clir a chryno i ddod yn ôl i'r Pwyllgor yn y cyfarfod a oedd i'w gynnal ar 28 Medi.

Roedd dau ddarn penodol o waith o fewn y Cynllun Corfforaethol y byddai eu hangen mewn un cynllun cyfannol:

·       sut mae'r cyngor yn gweithio gyda chyflenwyr, a

·       Manteision Cymunedol 

Byddai dadansoddiad hefyd yn cael ei gyflwyno ar yr enillion o fod yn gysylltiedig â'r Gwasanaeth Caffael Cenedlaethol a defnyddio'r fframwaith cenedlaethol. 

Byddai'r Pennaeth Cyllid ac Asedau Dros Dro yn gweithio ar brosiect hyd at ddiwedd y flwyddyn i adeiladu ar wybodaeth arbenigol am y swyddogion caffael.  Byddai ymgynghoriad hefyd yn cael ei gynnal gyda Phenaethiaid Gwasanaeth er mwyn canfod eu hanghenion ar gyfer caffael.

Byddai adroddiad yn cael ei lunio i ddiweddaru aelodau y Pwyllgor llywodraethu corfforaethol yn y cyfarfod ar 28 Medi 2015.

PENDERFYNWYD nodi’r adroddiad ar lafar ac i dderbyn yr Adroddiad Caffael Gwasanaethau Adeiladu yn y cyfarfod Llywodraethu Corfforaethol i'w gynnal ar 28 Medi 2015.

Derbyn diweddariad llafar gan y Pennaeth Cyfathrebu, Marchnata a Hamdden.

Cyflwynodd y Pennaeth Gwasanaethau Plant a Theuluoedd adroddiad (wedi’i ddosbarthu eisoes) a oedd yn rhoi'r wybodaeth ddiweddaraf am y cynnydd gyda'r cynllun gweithredu wedi’i gynnwys yn yr adroddiad Archwilio Mewnol ar Daliadau Ariannol i’r Rheiny sy’n Gadael Gofal a gyhoeddwyd ym mis Mawrth 2014.

Trafododd y Pwyllgor yr adroddiad dilynol ar 5 Tachwedd 2014 a 25 Mawrth 2015. Nodwyd rhywfaint o gynnydd yn erbyn y cynllun gweithredu ond roedd yna rai camau yn dal heb eu gweithredu, yn bennaf yn gysylltiedig â chyngor y gofynnwyd amdano gan y Gwasanaeth Caffael Cydweithredol.

Mae’r wybodaeth ddiweddaraf yn dangos bod yr holl gamau gweithredu wedi'u cwblhau ar ôl derbyn cyngor gan y Gwasanaeth Caffael Cydweithredol. Mae’r defnydd o docynnau bws wedi bod yn arbennig o ddefnyddiol ac am gael eu defnyddio gan adrannau eraill ar draws Gwasanaethau Plant a Theuluoedd.

Ar gyfer pobl ifanc a oedd yn gyfrifol am ofalu dros arian eu hunain fe sefydlwyd cyfrifon banc, ond byddai proses yn cael ei sefydlu ar gyfer y rhai nad oedd yn gyfrifol am eu harian.  Edrychwyd ar wahanol opsiynau a’r dewis Undeb Credyd oedd yn ymddangos i fod y dewis mwyaf hyblyg. 

Cadarnhaodd y Pennaeth Gwasanaethau Plant a Theuluoedd ei fod wedi cymryd hirach nag a ragwelwyd yn wreiddiol, ond roedd yr holl gamau gweithredu erbyn hyn bellach wedi’u cwblhau.

PENDERFYNWYD bod y Pwyllgor Llywodraethu Corfforaethol yn nodi'r adroddiad a chytunwyd i nodi bod y Cynllun Gweithredu wedi’i gwblhau.  Ni fyddai angen adroddiad dilynol.

Ystyried adroddiad gan y Pennaeth Busnes, Gwella a Moderneiddio (copi ynghlwm) sy'n rhoi manylion achosion o dorri'r Ddeddf Diogelu Data sydd wedi bod yn destun ymchwiliad gan y SIRO, a chwynion yn ymwneud â deddfwriaeth Rhyddid Gwybodaeth a gyfeiriwyd at y Comisiynydd Gwybodaeth.

Cyflwynodd y Pennaeth Gwella Busnes a Moderneiddio adroddiad (wedi’i ddosbarthu eisoes) yn cwmpasu'r cyfnod o Ebrill 2014 i Fawrth 2015. Nododd yr adroddiad achosion o dorri'r Ddeddf Diogelu Data gan y Cyngor sydd wedi bod yn destun ymchwiliad gan yr Uwch Swyddog Risg Gwybodaeth (SIRO – yn CSDd dyma’r Pennaeth Gwella Busnes a Moderneiddio). 

Roedd yr adroddiad hefyd yn ymdrin â chwynion am y Cyngor yn ymwneud â deddfwriaeth Rhyddid Gwybodaeth ac yn cyfeirio at y Comisiynydd Gwybodaeth, ac yn rhoi rhywfaint o wybodaeth am geisiadau Mynediad i Wybodaeth a wneir i'r Cyngor.

Mae Polisi Diogelu Data y Cyngor yn gofyn am adroddiad blynyddol ar gynnydd i'r Pwyllgor Llywodraethu Corfforaethol i ganiatáu’r Aelodau i oruchwylio'r broses.

Ni fu unrhyw dor-amodau mawr o’r Ddeddf Diogelu Data gan y Cyngor yn y cyfnod hwn, a dim ond dau sydd wedi’u hystyried fel bod yn ddigon difrifol i roi gwybod i Swyddfa'r Comisiynydd Gwybodaeth, yn hytrach na 4 y llynedd.  Hefyd bu gostyngiad cyffredinol yn nifer yr achosion sydd angen i’r Uwch Swyddog Risg Gwybodaeth weithredu arnynt, o 8 y llynedd i 5 y flwyddyn hon.

Nododd yr aelodau bod cyfanswm uchel a pharhaus o geisiadau am fynediad at wybodaeth wedi’u derbyn.  Roedd hyn yn parhau er gwaethaf y ffaith bod mwy o wybodaeth yn cael ei gyhoeddi ar wefan Cyngor Sir Ddinbych nag o'r blaen. 

Yn ystod 2014/15, cafodd 3 cwyn o dan y Ddeddf Rhyddid Gwybodaeth eu gwneud i'r ICO ynglŷn â'r Cyngor.  Canfuwyd dwy o blaid y Cyngor.  Yn y drydedd, canfuwyd bod y ddeddfwriaeth wedi’i thorri drwy gymryd gormod o amser i ymateb i Gais Testun Gwybodaeth.  Cydnabu’r ICO bod y darn hwn o waith wedi bod yn arbennig o gymhleth a bod ffactorau wedi cyfrannu at yr oedi ar yr ymateb.  Nid oedd angen unrhyw gamau gweithredu pellach ar ran y Cyngor gan y Comisiynydd.  Ers yr achos hwnnw, mae gweithdrefnau wedi’u gwella er mwyn sicrhau bod achosion cymhleth yn cael eu cydnabod yn gynnar yn y broses fel bod modd ymateb mewn modd amserol. 

PENDERFYNWYD bod y Pwyllgor Llywodraethu Corfforaethol yn nodi’r adroddiad.

Ar y pwynt hwn (11.20 am) cafwyd egwyl o 15 munud.

Ailddechreuodd y cyfarfod am 11.35am.

Ystyried adroddiad gan y Pennaeth Archwilio Mewnol (copi ynghlwm) sy’n darparu barn gyffredinol y Pennaeth Archwilio Mewnol ar ba mor ddigonol ac effeithiol yw fframwaith y Cyngor ar gyfer llywodraethu, risg a rheolaeth yn ystod y flwyddyn sy’n ffurfio’r ‘Datganiad Llywodraethu Blynyddol’.

Cyflwynodd y Pennaeth Archwilio Mewnol adroddiad (wedi’i ddosbarthu eisoes) yn darparu’r Pwyllgor Llywodraethu Corfforaethol gydag Adroddiad Mewnol Blynyddol ar gyfer 2014-15. Mae’r adroddiad yn nodi barn gyffredinol y Pennaeth Archwilio Mewnol ar ddigonolrwydd ac effeithiolrwydd fframwaith llywodraethu, risg a rheolaeth y Cyngor yn ystod y flwyddyn sy'n llywio'r 'datganiad llywodraethu blynyddol'.

Mae Safonau Archwilio Mewnol y Sector Cyhoeddus (PSIAS) yn ei gwneud yn ofynnol i’r 'prif weithredwr archwilio' i ddarparu barn archwilio mewnol blynyddol ac adroddiad lle mae’r Cyngor yn gallu ei ddefnyddio i lywio ei ddatganiad llywodraethu.

Mae Adroddiad Archwilio Mewnol 2014/15 yn nodi:

Ø  Bod y Pennaeth Archwilio Mewnol wedi rhoi ‘sicrwydd canolig’ ar ddigonolrwydd ac effeithiolrwydd cyffredinol amgylchedd rheolaeth fewnol y Cyngor, gan gynnwys ei drefniadau ar gyfer llywodraethu a rheoli risg

Ø  Nid oedd unrhyw gymwysterau ynghlwm â “safbwynt” y Pennaeth Archwilio Mewnol

Ø  Lefel y gwaith a wnaeth yr Archwilwyr Mewnol i gyrraedd y 'farn' gyffredinol

Ø  Sut y mae Archwilio Mewnol yn cydymffurfio â'r PSIAS, a

Ø  Chrynodeb o berfformiad Archwilio Mewnol yn ystod y flwyddyn.

Cafwyd trafodaeth, a:

PENDERFYNWYD bod y Pwyllgor Llywodraethu Corfforaethol yn derbyn ac yn nodi cynnwys yr adroddiad.

Ystyried adroddiad gan y Pennaeth Archwilio Mewnol (copi ynghlwm) sy’n cyflwyno manylion Strategaeth Archwilio Mewnol 2014/15.

Cyflwynodd y Pennaeth Archwilio Mewnol adroddiad (wedi’i ddosbarthu eisoes) yn darparu’r Pwyllgor Llywodraethu Corfforaethol â Strategaeth Archwilio Mewnol 2015-16. Mae'r Strategaeth yn darparu manylion y prosiectau Archwilio Mewnol arfaethedig ar gyfer y flwyddyn a fydd yn caniatáu i'r Pennaeth Archwilio Mewnol ddarparu 'safbwynt' ar ba mor ddigonol ac effeithiol yw fframwaith lywodraethu, risg a rheolaeth y Cyngor yn ystod y flwyddyn.

 Mae Safonau Archwilio Mewnol y Sector Cyhoeddus (PSIAS) yn ei gwneud yn ofynnol i’r 'Prif Swyddog Archwilio' i ddatblygu cynllun archwilio mewnol yn seiliedig ar risg sy'n cymryd i ystyriaeth y gofyniad i ddarparu barn ac adroddiad archwilio mewnol blynyddol y gall y sefydliad ei ddefnyddio i lywio ei ddatganiad llywodraethu.  Mae cylch gorchwyl y Pwyllgor Llywodraethu Corfforaethol hwn angen iddo ystyried Strategaeth Cynllunio Archwilio Mewnol.

Cafwyd yr ymatebion canlynol i gwestiynau gan Aelodau:

Ø  Ni chynhaliwyd archwiliadau o ysgolion gan yr Archwiliad Mewnol.  Cynhaliwyd ymweliadau â themâu iddynt ynghyd â gwaith mewn cronfeydd ysgolion yn y maes addysg.

Ø  Mae angen diweddaru’r Cyfansoddiad ac y byddai adroddiad yn cael ei gyflwyno yn y cyfarfod sydd ar y gweill ym mis Gorffennaf.

Ø  Byddai Grŵp yn gweithio ar y 10 prif faes o waith a gytunwyd arnynt.  Cytunwyd cyflwyno gwybodaeth am y meysydd hynny i'r Gweithdy Cyllideb.

PENDERFYNWYD bod y Pwyllgor Llywodraethu Corfforaethol yn derbyn ac yn nodi cynnwys yr adroddiad.

Ystyried adroddiad gan y Pennaeth Archwilio Mewnol (copi’n amgaeedig) sy’n rhoi'r wybodaeth ddiweddaraf am Gynllun Gwella Llywodraethu’r Cyngor sy’n deillio o ‘ddatganiad llywodraethu blynyddol’ y Cyngor 2013/14 – ‘Darparu llywodraethu da a gwelliant parhaus’, a chyflwyno ymgynghoriad cyntaf ar yr adroddiad hunanasesu ar drefniadau llywodraethu a gwella Conwy ar gyfer 2014/15.

Cyflwynodd y Pennaeth Archwilio Mewnol adroddiad (wedi’i ddosbarthu eisoes) i roi diweddariad ynglŷn â Chynllun Gwella Trefn Lywodraethu’r Cyngor a oedd yn codi o “ddatganiad llywodraethu blynyddol' y Cyngor yn 2013/14 – “Darparu llywodraethu da a gwelliant parhaus”.    Roedd hefyd yn cyflwyno ymgynghoriad cyntaf gyda'r Pwyllgor ar yr adroddiad hunanasesu ar drefniadau llywodraethu a gwella'r Cyngor ar gyfer 2014/15.

Mae’r adroddiad yn rhoi gwybodaeth i’r Pwyllgor Llywodraethu Corfforaethol am y cynnydd sydd wedi digwydd o ran gweithredu’r gwahanol gamau gweithredu sydd wedi’u cynnwys yng Nghynllun Gwella Llywodraethu y llynedd, er mwyn sicrhau bod gan y Cyngor drefn lywodraethu gadarn ac effeithiol ar waith.

Roedd hefyd yn gyfle i’r Pwyllgor roi sylwadau ar y drafft cyntaf o 'ddatganiad llywodraethu blynyddol' eleni.

Roedd y meysydd gwella wedi eu cynnwys mewn Cynllun Gwella Llywodraethu, sydd hefyd yn cynnig camau gweithredu i fynd i'r afael â gwendidau, y swyddogion sy'n gyfrifol am y camau gweithredu, ac amserlenni.

Yn 2013/14, cafodd y 'datganiad llywodraethu blynyddol’ traddodiadol ei ddisodli gyda dogfen o’r enw “Darparu llywodraethu da a gwelliant parhaus”.  Dylai'r Pwyllgor nodi fod hwn yn ddrafft cynnar iawn a bod gwaith dal i’w wneud arno, a bod angen ei drafod ymhellach, yn enwedig gyda'r Uwch Dîm Arweinyddiaeth.  Bydd y fersiwn derfynol y cytunwyd arni yn cael ei llofnodi gan y Prif Swyddog Gweithredol a’r Arweinydd erbyn 30 Mehefin 2015, ac yn cael ei chyflwyno i'r Pwyllgor hwn gyda'r Datganiad o Gyfrifon.

PENDERFYNWYD bod y Pwyllgor:

·       Wedi adolygu a nodi’r cynnydd ar Gynllun Gwella Llywodraethu y llynedd, ac

·       Adolygu a nodi’r drafft "datganiad llywodraethu blynyddol" ar gyfer 2014/15

Ystyried adroddiad ar y cyd gan Bennaeth y Gwasanaethau Cyfreithiol, Democrataidd ac Adnoddau Dynol a Phennaeth Archwilio Mewnol (copi ynghlwm) sy’n rhoi manylion y cwmpas a’r cynllun prosiect ar gyfer adolygu monitro Darparwyr Gwasanaeth a ariennir gan y Cyngor, a fyddai’n arwain at fframwaith newydd ar gyfer rhoi trefniadau o'r fath ar waith.

Cyflwynodd y Pennaeth Archwilio Mewnol adroddiad (wedi’i ddosbarthu eisoes) yn rhoi manylion i'r Pwyllgor Llywodraethu Corfforaethol am gwmpas a chynllun y prosiect ar gyfer adolygu’r broses o fonitro Darparwyr Gwasanaeth a ariennir gan y Cyngor (CFSPs), a fydd yn arwain at fframwaith newydd ar gyfer rhoi trefniadau o'r fath ar waith.

Mynegwyd pryderon ynglŷn â monitro CFSPs, ac felly roedd yn rhaid i’r Cyngor sicrhau fod trefniadau cadarn ar waith i fonitro llywodraethu, perfformiad ariannol, perfformiad gweithredol a'r defnydd o arian y Cyngor.

Yn y cyfarfod o'r Pwyllgor Llywodraethu Corfforaethol a gynhaliwyd ar 25 Mawrth 2015, cafwyd trafodaeth ynglŷn â rolau a chyfrifoldebau aelodau etholedig wrth gynrychioli'r Cyngor ar gyrff allanol.  Gofynnodd yr Aelodau am ragor o wybodaeth am sut y byddai hyn yn cael ei ddarparu fel rhan o'r adolygiad cyffredinol o CFSPs.

Bydd y prosiect yn arwain at fframwaith newydd ar gyfer dechrau trefniadau gyda sefydliadau y mae'r Cyngor yn darparu cyllid iddynt i ddarparu gwasanaethau ar ei ran.  Bydd hyn yn cynnwys cyrff hyd braich, partneriaethau, sefydliadau a ariennir gan grantiau, a chyflenwyr mawr trydydd parti o wasanaethau allweddol.

Bydd y fframwaith newydd yn sicrhau bod Cyngor Sir Ddinbych yn mynd i'r afael â'r risgiau allweddol canlynol:

·       Mae cael cyfarwyddyd a threfniadau cyson ar gyfer sefydlu a chofnodi CFSPs yn golygu y bydd yn gwbl ymwybodol o'r holl CFSPs y bydd yn ymdrin â nhw.

·       Mae cael trefniadau monitro rheolaidd a chadarn yn golygu na fydd y Cyngor yn ariannu CFSPs sydd ddim yn llwyddo darparu’r canlyniadau a fwriadwyd ac y byddai’n ymwybodol o'r CFSPs sy'n perfformio'n wael, yn weithredol a/ neu’n ariannol.

·       Mae cael trefniadau llywodraethu cadarn dros CFSPs yn lleihau'r tebygolrwydd o fethiant yn ei stiwardiaeth o gyllid cyhoeddus.

·       Mae cael mecanweithiau rhybuddio cynnar trwy wybodaeth monitro rheolaidd yn lleihau'r tebygolrwydd y bydd yn dioddef colled ariannol o ganlyniad i CFSP yn peidio â bodoli ac ni ddylai orfod camu i mewn gyda threfniadau at raid i ddarparu gwasanaethau.

·       Mae cael achosion busnes cadarn ar gyfer cymeradwyo trefniadau CFSP yn golygu y gall sicrhau bod CFSPs yn rhannu gwerthoedd Cyngor Sir Ddinbych ac ni ddylai ddwyn anfri ar y Cyngor drwy ei ymddygiad.

·       Mae cael cytundebau cyfreithiol cadarn a chytundebau lefel gwasanaeth yn sicrhau bod y ddau sefydliad yn deall eu rolau a'u cyfrifoldebau ac yn cryfhau sefyllfa Cyngor Sir Ddinbych mewn achos o anghydfod.

·       Mae darparu arweiniad a chefnogaeth gadarn i'w aelodau etholedig sy'n eistedd ar gyrff allanol yn diogelu eu buddiannau, yn gwella’r tebygolrwydd o archwilio cadarn ac yn egluro'r sefyllfa gyfreithiol a’r gwrthdaro o ran buddiannau sy'n ymwneud â swyddi cyfarwyddwyr ac ymddiriedolwyr.

At ei gilydd, mae'r fframwaith yn golygu na ddylai Cyngor Sir Ddinbych ddioddef niwed sylweddol i'w enw da oherwydd methiant CFSP.

Yn dilyn cais gan gynrychiolydd y Swyddfa Archwilio Cymru, cadarnhaodd y Pennaeth Archwilio Mewnol y  byddai'n gofyn i CET enwebu Swyddog i gymryd perchnogaeth o'r prosiect.

Cafwyd trafodaeth, a:

PENDERFYNWYD bod y Pwyllgor Llywodraethu Corfforaethol:

(i)              Yn ystyried a thrafod cwmpas arfaethedig a chynllun y prosiect

(ii)             Cytunwyd i ddod â'r adroddiad yn ôl i'r Pwyllgor yn y cyfarfod nesaf ar 27 Gorffennaf, 2015

(iii)            Cytunwyd gofyn i CET enwebu Swyddog i gymryd perchnogaeth o'r prosiect

Derbyn adroddiad ar lafar gan y Cynghorydd M.L. Holland.

Dim

Ystyried Rhaglen Gwaith i’r Dyfodol y Pwyllgor (copi ynghlwm).

Cyflwynodd Pennaeth y Gwasanaethau Cyfreithiol, Adnoddau Dynol a Democratiaeth Raglen Gwaith i'r Dyfodol y Cyngor (wedi’i ddosbarthu eisoes). 

Cadarnhaodd y Pwyllgor Raglen Gwaith i’r Dyfodol y Pwyllgor Llywodraethu yn amodol ar gynnwys yr eitemau busnes canlynol:

27 Gorffennaf, 2015:

·       Diweddaru Monitro Darparwyr Gwasanaeth a Ariennir gan y Cyngor

·       Adroddiad Comisiynwyr Gwyliadwriaeth Arolygu ac Adroddiad RIPA (Deddf Rheoleiddio Pwerau Ymchwilio)

28 Medi, 2015:

·       Caffael Gwasanaethau Adeiladu

PENDERFYNWYD yn amodol ar yr uchod bod y Pwyllgor Llywodraethu Corfforaethol yn cymeradwyo’r Rhaglen Gwaith i'r Dyfodol.

Daeth y cyfarfod i ben am 12.45pm.