Mater - cyfarfodydd

Ystyried adroddiad gan y Pennaeth Cynllunio, Gwarchod y Cyhoedd a Gwasanaethau Cefn Gwlad (copi ynghlwm) yn ceisio adolygiad o’r Polisi Trwyddedu cyfredol yn ymwneud â Cherbydau Hacni (Tacsi) a Cherbydau Hurio Preifat, Gyrwyr a Gweithredwyr a chymeradwyaeth ar gyfer ymgynghoriad ffurfiol ar ddatganiad drafft o Bolisi Trwyddedu.

PENDERFYNWYD bod y Pwyllgor yn -

 (a)      cymeradwyo’r adolygiad o’r Polisi Trwyddedu cyfredol sy’n ymwneud â Cherbydau Hacni (Tacsi) a Cherbydau, Gyrwyr a Gweithredwyr Hurio Preifat yn unol â Safonau Statudol newydd yr Adran Gludiant ac Argymhellion Cysoni Trwyddedu Tacsi a Cherbydau Hurio Preifat, a

 (b)      awdurdodi swyddogion i ymgynghori gyda’r fasnach a’r cyhoedd ehangach (gan gynnwys sefydliadau lleol perthnasol) ar ddatganiad drafft o'r Polisi Trwyddedu.

Cyflwynodd yr Uwch Swyddog Trwyddedu adroddiad (a ddosbarthwyd ymlaen llaw) yn gofyn i'r aelodau adolygu’r Polisi a’r Amodau cyfredol ar Drwyddedu Cerbydau Hacni a Cherbydau Hurio Preifat i gynnwys y safonau statudol a gyhoeddwyd gan yr Adran Drafnidiaeth a’r argymhellion a gyhoeddwyd gan Lywodraeth Cymru, ac roedd hefyd yn ceisio cymeradwyaeth i gynnal ymgynghoriad ffurfiol ar y Polisi Trwyddedu drafft.

Rhoddwyd rhywfaint o gefndir ynglŷn â chyhoeddi safonau statudol yr Adran Drafnidiaeth ym mis Gorffennaf 2020 (Atodiad A i’r adroddiad) gan ganolbwyntio ar amddiffyn plant ac oedolion diamddiffyn a rheoleiddio’r sector yn well ynghyd â chyhoeddi argymhellion Llywodraeth Cymru (LlC) ym mis Mawrth 2021 (Atodiad B i’r adroddiad) i ddarparu ‘atebion cyflym’ i wella cysondeb safonau trwyddedu a gwella diogelwch y cyhoedd.  O ran awdurdod deddfwriaethol, eglurwyd bod safonau’r Adran Drafnidiaeth yn effeithiol yng Nghymru er bod cyfrifoldeb am bolisi tacsis a cherbydau hurio preifat wedi’i ddatganoli i LlC.  Fodd bynnag, pe bai LlC yn cyflwyno deddfwriaeth i reoleiddio’r materion hynny, ni fyddai safonau’r Adran Drafnidiaeth yn weithredol mwyach.  Gan fod safonau’r Adran Drafnidiaeth wedi’u hystyried wrth ddrafftio argymhellion LlC, cynigiwyd y dylai’r Polisi a’r Amodau Trwyddedu gynnwys yr holl bolisïau ac amodau ategol eraill sy'n ymwneud â thrwyddedu tacsis a cherbydau hurio preifat, ac y dylid cynnal ymgynghoriad pedair wythnos ar y drafft hwnnw ac i'r polisi terfynol gael ei gyflwyno i'r Pwyllgor Trwyddedu i'w gymeradwyo.

Wrth ystyried yr adroddiad, gofynnwyd am farn y swyddogion am y dogfennau cynhwysfawr.  Gofynnwyd cwestiynau ynglŷn â’r broses ymgynghori arfaethedig gyda’r nod o ennyn cymaint o ymateb â phosib’ gan y diwydiant trwyddedig a budd-ddeiliaid a sicrhau bod dealltwriaeth dda o effaith unrhyw newidiadau posib' i'r polisi cyfredol.  Cadarnhaodd y swyddogion nad oedd ganddynt unrhyw bryderon ynglŷn â’r newidiadau arfaethedig i’r polisi, gan eu bod wedi’u bwriadu i wella diogelwch y cyhoedd, gwella cysondeb a gwella’r profiad i gwsmeriaid.  Roedd nifer o argymhellion LlC wedi’u cynnwys eisoes ym mholisi cyfredol y Cyngor.  Rhoddwyd sicrwydd y byddai’r prif newidiadau polisi’n cael eu hamlygu yn ystod yr ymgynghoriad, ond roedd hefyd yn bwysig i'r rhai oedd yn cael eu heffeithio allu gweld a deall y ddogfen gyfan a deall unrhyw oblygiadau yn ei sgil.  Rhoddwyd manylion am yr ymgynghoriad a fyddai’n cynnwys y diwydiant trwyddedig, grwpiau perthnasol, Cynghorau Dinas, Tref a Chymuned a’r cyhoedd yn ehangach.  Byddai’n cael ei gynnal yn fras yn unol ag ymgynghoriadau blaenorol (ymgynghoriad ysgrifenedig a sesiynau gweithdai'n cael eu cynnwys ar wahanol adegau mewn gwahanol leoliadau daearyddol o fewn y Sir) cyhyd â bod hynny'n ddiogel o safbwynt Covid, a byddai gwahoddiad i unrhyw un oedd â diddordeb neu gysylltiad gymryd rhan.  Byddai’r ymatebion i'r ymgynghoriad yn cael eu hystyried i ddylanwadu ar y polisi terfynol i’w gyflwyno i’r Pwyllgor i gael ei gymeradwyo.  Cytunodd y swyddogion i ddarparu crynodeb i’r aelodau o’r ymatebion i'r ymgynghoriad a’r adborth a gafwyd yn rhan o’r broses.

PENDERFYNWYD bod y Pwyllgor yn –

 (a)      cymeradwyo’r adolygiad o’r Polisi Trwyddedu cyfredol sy’n ymwneud â Cherbydau Hacni (Tacsis) a Cherbydau, Gyrwyr a Gweithredwyr Hurio Preifat yn unol â Safonau Statudol newydd yr Adran Drafnidiaeth ac Argymhellion Cysoni Trwyddedu Tacsis a Cherbydau Hurio Preifat Llywodraeth Cymru, ac

 (b)      awdurdodi swyddogion i ymgynghori gyda’r diwydiant a’r cyhoedd yn ehangach (gan gynnwys sefydliadau lleol perthnasol) ar ddatganiad drafft o'r Polisi Trwyddedu.